1, 2. (a) Ngo ma Jehovah owacci bitimme i karewa-ni? (b) Lapeny mene ma wabinyamogi i pwony man? (Nen cal ma tye i pot karatac man.)

MA ONONGO tye ka lok i kom kwo me kareni, Jehovah otito ni: “I kare meno jo apar ma gua ki i lwak rok ma lebgi patpat gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubanga tye kwedwu.’” (Jek. 8:23) Calo jo apar ma kiloko i komgi-ni, jo ma gitye ki gen me kwo i lobo dong ‘gumako dog kanyi pa Lajudaya.’ Gitye ki awaka madit me bedo kacel ki ‘Luicrael me cwiny,’ kun gingeyo ni Jehovah tye ka goya laane i kom jo ma en owirogi.​—Gal. 6:16.

² Calo lanebi Jekaria, Yecu bene otito pi note ma jo pa Lubanga gitye ka nongo mitte. En owaco ni lulub kore gitye i dul aryo, “romi manok” ki “romi mukene,” ento dok omedo ni gibibedo “lwak acel” i te “lakwat acel.” (Luka 12:32; Jon 10:16) Ento, wat ma tye i kin gurup aryo magi kelo lapeny mogo: (1) Tika mitte ni romi mukene-ni gunge nying jo ma kiwirogi ducu ma gitye kwo kareni? (2) Lukricitayo ma kiwirogi myero gubed ki neno ango i komgi kekengi? (3) Neno ango ma myero ibed kwede ka ngati mo ocako camo mugati nyo mato  vino i kwer me Nipo? (4) Tika myero ibed ki par ka wel jo ma gicamo mukati ki dok gimato vino i kwer me Nipo tye ka medde? Kong dong waneno lagam pi lapeny magi ki acel acel.

3. Pingo pe twere me ngeyo angagi ma bibedo i kin jo 144,000?

³ Tika mitte ni romi mukene-ni gunge nying jo ducu ma kiwirogi ma gitye kwo kareni? Lagam macek tye ni, pe. Pingo pe mitte? Pien, kadi bed ni ngat moni tye ki lwongo me cito i polo, meno nongo obedo lwongo keken ento nongo Jehovah pud peya omoko gen meno. Meno aye tyen lok mumiyo Catan bene tiyo ki “lunebi-gu ma lugoba . . . wek girweny wa ki jo ma Lubanga oyero bene.” (Mat. 24:24) Ngat mo keken pe twero ngeyo ka Lakricitayo mo ma kiwiro binongo motte me kwo i polo ka pud Jehovah peya ongolo kop ni ngat meno opore me nongo mot. Jehovah aye ma moko dok en aye ma biketo lanyut me agikki i tur nyim ngat meno ka ogwoko genene nio wa i to nyo ma nongo “can madit atika” cok cakke. (Yabo 2:10; 7:3, 14) Pi meno, konye pe pi jo ma gitye ka kwo i kare-ni me temo byeko angagi ki i kin jo pa Lubanga ma gibibedo i kin jo 144,000. ^[1]

4. Ka pe twere me ngeyo nying jo ducu ma kiwirogi ma gitye ka kwo i lobo i kareni, ci romi mekene-ni giromo ‘nywako wot kwedgi’ nining?

⁴ Ka pe twere me ngeyo nying Luicrael me cwiny ducu ma gitye ka kwo i lobo i kareni, ci romi mukene-ni giromo ‘nywako wot kwedgi’ nining? Nen kong lok ma lanebi Jekaria ocoyo ma lubbe ki jo apar-ri. Jo magi ‘gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubanga tye kwedwu.’ Kadi bed ni kiloko i kom Lajudaya acel keken, nyig lok ni “kwedwu” niange ni kitye ka lok i kom jo mapol. Dong man nyuto atir ni Lajudaya me cwiny-nyi pe abedo ngat acel keken ento jo mapol! Pi meno, pe mitte ni myero wange Lujudaya me cwiny ducu ki acel acel ka wek wanywak wot kwedgi. Ma ka meno, omyero wangegi macalo gurup ka wek wacwakgi. Ginacoya pe cuko cwinywa me lubo kor dano adana. Yecu aye Latelwa.​—Mat. 23:10.

5. Tira magwar ango ma ngat ma kiwiro myero otam iye matut, dok pingo?

⁵ Jo ma gicamo mugati dok gimato vino i kwer me Nipo myero gutam matut i kom tira man ma tye i 1 Jo Korint 11:27-29. (Kwan.) Lakwena Paulo onongo tye ka lok i kom gin ango? Ka Lakricitayo ma kiwiro pe ogwoko watte ki Jehovah, ci en pe bibedo ma opore me camo mugati dok me mato vino i kwer me Nipo. (Ibru 6:4-6; 10:26-29) Tira magwar man konyo Lukricitayo ma kiwirogi wek wigi opo ni pud peya ginongo mot meno. Myero gumedde ki cito anyim atir kun ‘gikemo tol, wek ginong mot, ma en aye lwongo ma Lubanga tye ka lwongogi kwede malo i Kricito Yecu.’​—Pil. 3:13-16.

6. Lukricitayo ma kiwirogi myero gubed ki neno ango i komgi kekengi?

⁶ Cwiny maleng oweko Paulo ocuko cwiny Lukricitayo ma kiwirogi kun waccigi ni: “Wulub kit me kwo ma myero, ma rwatte ki lwongo ma yam gilwongowu iye.” Giromo timo man nining? Paulo omedde kun waco ni, “wuwor jo mukene, wubed mwol, dok wubed jo ma ciro gin ducu ma balo cwiny dano, kun ngat acel acel diyo cwinye i kom lawote ki mar.  Wuket tek me gwoko ribbe ma cwiny maleng omiyowu wek wubed acel i twec me kuc.” (Ep. 4:1-3) Cwiny pa Jehovah weko wadongo cwiny me mwolo ento pe me awaka (Kol. 3:12) Jo ma kiwirogi giye ki mwolo ni pe gitye ki cwiny maleng madwong loyo jo ma gitye ki gen me kwo i lobo. Gin pe giwaco ni gitye ki ngec ma kite dok pat dok bene pe gitemme me nyuto ni rwomgi lamal loyo pa jo mukene. Jo magi pe gimiyo tam bot jo mukene ni gin bene kiwirogi dok ni myero gucak camo mugati ki mato vino i kwer me Nipo, ma ka meno, giye ki mwolo ni Jehovah aye lwongo jo ma kiwirogi.

7, 8. Ngo ma Lukricitayo ma kiwirogi pe gimito ni gitim pigi, dok pingo?

⁷ Kadi bed ni obedo twon mot madit me bedo ki lwongo me kwo i polo, ngat ma kiwiro pe bimito woro ma kite dok pat ki bot jo mukene. (Ep. 1:18, 19; kwan Jo Pilipi 2:2, 3.) Cwiny pa Jehovah tuco botgi keken ento pe bot jo mukene. Pe tye ngec mo keken ma kimiyo bot lwak. Pi meno, pe gibedo ki ur mo ka dano gikwero ni pe kiwirogi ki cwiny maleng. Ki lok ada, gingeyo ni Ginacoya miyo tam ni pe omyero kiye cutcut ka ngat mo waco ni Lubanga ocime. (Yabo 2:2) Pe gitiyo ki motgi man me wir-ni calo “kad” me titte bot jo mukene. Pol kare pe bene gitito pi kit ma kiwirogi kwede bot jo mukene wek dano pe dok guket tam mapol tutwal i komgi, dok pe giwakke pi mot ma gibinongo i anyim.​—1 Kor. 1:28, 29; kwan 1 Jo Korint 4:6-8.

⁸ Medo i kom meno, Lukricitayo ma kiwirogi pe gikete calo jo ma rwomgi lamal tutwal. Pe giyenyo jo mukene ma gitye ki lwongo acel-lu wek gibed kacel nyo giyub gurupgi ma pat me kwano Baibul. (Gal. 1:15-17) Tim ma kit meno kelo apokapoka i kacokke dok pe rwatte ki tic pa cwiny maleng ma kelo kuc ki note.​—Kwan Jo Roma 16:17, 18.

9. Pingo myero igwokke ki kit ma itero kwede ki jo ma gicamo mugati dok gimato vino i kwer me Nipo? (Nen bok ma wiye tye ni “ Mar ‘Pe Tiyo Gin ma Pe Myero.’”)

⁹ Myero iter ngat ma camo mugati dok mato vino i kwer me Nipo nining? Yecu owaco bot lupwonnyene ni: “Wun ducu dong odoko utmego.” En dok omedde ni: “Ngat ma kette kene ni edit, gibidwokke piny, ento ngat ma mwolle kene gibimiyo doko dit.” (Mat. 23:8-12) Pi meno, pe tye gin matir, me keto deyo mukato kare i kom ngat mo keken, kadi bed ni meno en tye ngat acel i kin utmege pa Kricito ma kiwirogi. Ginacoya loko i kom luelda kun waco ni meno myero walub lanen me niye pa jo ma gitelowa, ento pe waco ni myero waket deyo i kom ngat mo keken calo kit ma kitimo kwede i kom lutela me lobo-ni. (Ibru 13:7) Tye ada ni Ginacoya loko i kom jo mukene ni myero “giworgi twatwal.” Ento jo magi myero kiworgi pe pienni gitye jo ma kiwirogi, ento pien gitye ka “loyo loc maber” dok bene gitye ka “yelle ka tito lok ki pwonyo dano.” (1 Tem. 5:17) Pi meno, bibedo me lewic tutwal bot jo ma kiwirogi ka ce romi mukene-ni minigi pak nyo deyo. Ma dong rac loyo, bibedo tek bot Lukricitayo ma kiwirogi me mwolle ka kiterogi i yo ma dok pat. (Rom. 12:3) Wan ducu pe wamito wawek ngat mo i kin jo ma kiwirogi opot i bal!​—Luka 17:2.

10. Itwero nyutone nining ni itye ki woro i kom Lukricitayo ma kiwirogi?

¹⁰ Watwero nyuto woro mupore nining bot jo ma Jehovah owirogi? Pe wabipenyogi lapeny mo keken ma lubbe ki kit ma kiwirogi kwede. Pi meno, omyero wagwokke pe me rwako wiwa i gin ma pe  kwakowa. (1 Tec. 4:11; 2 Tec. 3:11) Pe myero watam ni ka dong ngat moni kiwiro nongo dong lunyodone, luote, nyo wadine bene nongo kiwirogi. Wat nyo nyom pe gudo kit ma kiwiro ki ngat moni. (1 Tec. 2:12) Myero wagwokke ki penyo luot pa ngat mo keken ma kiwiro i kom kit ma en winyo kwede pi ngeyone ni en bibedo i lobo kany i Paradic labongo luote. Ma ka bedo ki lapeny mapol ma twero kelo cwercwiny, wan ducu watwero bedo ki gen ni Jehovah biyabo cinge ci ‘miyo gin makwo ducu giyeng.’​—Jab. 145:16.

11. Wabigwokke nining ka pe wabedo ka ‘dworo dano’?

¹¹ Jo ma gitero Lukricitayo ma kiwirogi i yo mupore gibigwokke ki i timo bal. Ginacoya wacciwa ni jo ma “pe gin utmego kikome” giromo donyo wa i kacokke. (Gal. 2:4, 5; 1 Jon 2:19) Jo magi giromo wacone ni gin bene kiwirogi. Medo i kom meno, kadi wa Lukricitayo mogo ma kiwirogi giromo a woko ki i niye. (Mat. 25:10-12; 2 Pet. 2:20, 21) Ka wagwokke ki ‘dworo dano,’ ci jo magi pe gibiweko waa woko ki i ada; dok bene niyewa pe bidoko goro ka Lakricitayo mo ma wangeyo nyo ma dong ori i ada orwenyo gennene.​—Juda 16.

12, 13. Pingo pe myero wabed ki par mapol pi wel jo ma gicamo mugati dok gimato vino i kwer me Nipo?

¹² I mwaki mogo ma cokcok-ki, wabedo ka neno kit ma wel jo ma gicamo mugati dok gimato vino i kwer me Nipo tye ka medde ameda. Man dok pat ka kiporo ki kit ma welgi obedo ka dok kwede piny pi mwaki mapol mukato angec. Tika myero wabed ki par mapol pi kit ma welgi tye ka medde kwede? Pe. Kong dong wanenu jami mogo ma pigi tego ma myero waketgi i wiwa.

¹³ ‘Jehovah ngeyo jo ma gin jone kikome.’ (2 Tem. 2:19) Omege ma gikwano wel jo ma gicamo mugati dok gimato vino i kwer me Nipo pe gitwero ngeyo angagi ma kiwirogi. Wel jo magi bene kwako wa jo mogo ma gitamo mere atama ni gin bene kiwirogi. Jo mogo ma gubedo ka camo mugati ki mato vino i kwer me Nipo gugiko woko i nge kare mo. Jo mukene gwok onongo wigi onywene manok nyo cwinygi otur ma oweko gutamo ni gin bene gibiloc  kacel ki Kricito i polo. Pi meno, wel jo ma gicamo mugati ki dok gimato vino i kwer me Nipo aye pe gin ma nyuto wel jo ma kiwirogi ma gudong i lobo i kareni.

14. Gin ango ma Baibul loko ma lubbe ki wel jo ma kiwirogi ma gibibedo tye i acakki me twon can madit atika-ni?

¹⁴ Jo ma kiwirogi pud gibibedo tye i lobbe mapol i kare ma Yecu bidwogo ka cokogi me cito i polo. Ma lubbe ki gin ma Yecu bitimone i kare meno, Baibul owaco ni: “En bioro lumalaika ki tum ma kok malongo, gibicoko jone ma en oyero ki i twok piny angwen ducu, nia ki i agikki polo tungcel nio kwede wa i agikkine mukene.” (Mat. 24:31) Ginacoya nyuto ni udong jo ma kiwirogi gibibedo tye i lobo i kare me agikki. (Yabo 12:17) Ento Baibul pe nyuto wel jo ma gibidong i lobo i kare ma twon can madit atika-ni bicakke.

15, 16. Gin ango ma myero waniang ma lubbe ki jo 144,000 ma Jehovah oyero-ni?

¹⁵ Jehovah aye ma moko kare me yero jo ma kiwirogi. (Rom. 8:28-30) Jehovah ocako yero jo ma kiwirogi i nge kare ma Yecu oto ci ocer iye, dok bene nen calo Lukricitayo ducu me cencwari me acel onongo kiwirogi. Nicakke i cencwari me acel nio wa i acakki me kare me agikki, pol pa jo ma onongo giwaco ni gin lulub kor Kricito onongo gitye Lukricitayo ma lugoba; Yecu oporogi ki “doo.” Kadi bed kumeno, Jehovah pud omedde ki wiro jo mogo ma lugen i kare meno, dok gunyuto ni gibedo calo “kal” ma Yecu oloko iye-ni. (Mat. 13:24-30) I kare man me agikki-ni bene, Jehovah pud omedde ki yero jo mogo wek gubed i kin jo 144,000. ^[2] Ka en oyero me medde wa i kare man ki yero jo mukene pi mot man, ci dong twero ango ma watye kwede me penyo ryeko pa Jehovah? (Ic. 45:9; Dan. 4:35; kwan Jo Roma 9:11, 16.) ^[3] Omyero wagwokke adada pe me bedo calo lutic ma gubedo ka nguru i kom kit ma won poto oculo kwede luticce ma gucako tic cawa apar acel-li.​—Kwan Matayo 20:8-15.

¹⁶ Pe ni jo ducu ma gitye ki gen me kwo i polo gubedo “lagwok ot ma lagen dok maryek.” (Mat. 24:45-47) Macalo kit ma otimme kwede i cencwari me acel, Jehovah gin ki Yecu gitye ka pito jo mapol kun gitiyo ki jo manok. Kitiyo ki Lukricitayo ma kiwirogi manok keken me coyo Ginacoya i leb Grik i cencwari me acel. I kare ni bene, kicimo Lukricitayo ma kiwirogi manok keken me miyo ‘cam i kare ma mitte.’

17. Ngo ma ipwonyo ki i pwony man ma wanyamo-ni?

¹⁷ Gin ango ma wapwonyo ki i pwony man ma wanyamo-ni? Jehovah oyero me miyo mot aryo mapat pat​—kwo i polo pi Lujudaya me cwiny ki kwo i lobo kany ma kiporo ki jo apar ma gibimako kanyi pa Lajudaya. Kad bedi kit meno, en mito ni jo ma gitye ki mot me kwo i polo kacel ki ma gitye ki mot me kwo i lobo kany ducu gugwok gennegi i yo ma rom aroma. Gurup aryo ni ducu myero gubed lugen. Gurup aryo-ni ducu myero gunote kacel. Gin ducu myero gubed jo ma kelo kuc i kacokke. Kit macalo kare me agikki dong tye ka nyiko cok tutwal-li, myero wan ducu wamoko wunu tamwa me tic kacel calo romi me dwol acel i te tela Kricito.