1. I yo ma nining ma Jehovah tye calo mego ma dot?

“WI DAKO twero wil i kom latinne ma en doto?” Meno lapeny ma Jehovah openyo i kare pa lanebi Icaya. Lubanga owaco ki jone ni, “Kadi bed dano wiye twero wil, ento an wiya pe biwil i komwu.” (Ic. 49:15) En pol kare pe tiyo ki lapor pa mego me lok i kome. Ento i tyeng man, en otiyo kwede. Jehovah oporo kit ma en winyo kwede i kom luticce ki mar matut ma mego tye kwede pi latinne pien en onongo mito ni luticce gunge ni en marogi matek adada. Pol pa mege giwinyo calo laminwa Jasmin ma owaco ni, “Ka itye ka doto latinni, wudongo wat mo ma kite dok pat ma rii pi kare me kwowu kulu.”

2. Jehovah winyo nining ka latinne acel mo oa woko ki bote?

² Jehovah ngeyo ka latinne acel mo ojuko cito i cokke ki tic me pwony. Tam kong dong cwercwiny ma en bedo kwede me neno luticce alip mapol ma ticgi kwe woko * mwaka ki mwaka.

3. Ngo ma Jehovah mito?

³ Pol pa omege ki lumege ma ticgi okwe woko lacen gidwogo i kacokke, dok cwinywa bedo yom adada ka gudwogo! Jehovah mito ni gin gudwog cen, dok wan bene wawinyo kit meno. (1 Pet. 2:25) Watwero konyogi nining me dwogo cen? Ma peya wagamo lapeny meno, bedo ber ka kong wangeyo pingo jo mukene gijuko wot i cokke ki nywako i tic me pwony.

4. Ngo ma timme i kom jo mukene pi dog ticgi?

⁴ Jo mogo gulungo wigi i dog ticgi. Omego Hung, * ma bedo i lobo Acia, owaco ni: “Abedo ka tic ki kero madwong kun bene atero cawa malac i dog ticca. Pe anyutu ryeko. Atamo ni ka atye ki cente muromo ci abibedo ki kero me woro Jehovah ma cwinya opye. Pi meno, amedo cawa ma acwalo i dog ticca. Acako keng cokke motmot ci oo kare mo ajuko cito iye kwicikwici. Nen calo Catan tiyo ki lobo-ni me wiro tam pa dano motmot wek gujuk tic pi Lubanga.”

5. Laminwa mo acel odok i kom pekki mapatpat ma en obedo kwede nining?

⁵ Omege ki lumege mukene gitye ki pekki mapol ma turo cwinygi. Laminwa ma nyinge Anne ma bedo i Britain tye ki lutino abic. En owaco ni: “Woda acel anywalo ma tye ki goro mapol i kome. Lacen, kiryemo nyara acel woko ki i kacokke dok woda mukene odoko lapoya. Cwinya otur adada mumiyo ajuko cito i cokke ki tito kwena woko. I agikkine, ticca okwe woko.” Kica makowa i kom Anne ki lutinone kacel ki jo ducu ma gitye ka kato ki i pekki ma cal ki magi!

6. Pingo ngat moni twero a woko ki i kin jo pa Jehovah ka en pe olubo tira ma tye i Jo Kolocai 3:13?

⁶ Kwan Jo Kolocai 3:13. Lutic pa Jehovah mukene cwinygi ocwer pi gin ma omego nyo lamego mo me kacokke otimo. Lakwena Paulo oniang ni i kine mukene watwero bedo ki “lok mo i kom” omego nyo lamego mo. Oromo bene bedo ni kiterowa marac. Ka pe wagwokke, watwero mako lok i cwinywa. Kiniga twero weko ngat moni a woko ki i kin jo pa Jehovah. Tam kong gin ma otimme i kom Pablo, omego mo ma bedo i lobo Amerika ma Tung Kupiny. Kikelo adot goba i kome, dok macalo adwogine, en orwenyo motte me tic i kacokke. En odok iye nining? Pablo owaco ni, “Kiniga omaka adada, dok motmot acako a woko ki i kacokke.”

7. Gin ango ma twero timme i kom ngat ma cwinye bedo ka pide pi bal ma otimo con?

⁷ Ka ngat moni otimo bal madit i kare mukato angec, cwinye twero bedo ka pide pi kare malac. En twero bedo ki tam ni Lubanga pe dong twero mare. Kadi bed en ongut i kom balle dok kitime kica, en romo winyo calo pe epore me bedo i kin jo pa Lubanga. Omego mo ma nyinge Francisco owinyo kit meno. En owaco ni, “Luelda gucika matek pi tim me tarwang. Kadi bed i acakkine amedde ki wot i cokke, ento cwinya otur adada dok anongo ni pe apore me bedo i kin jo pa Jehovah. Cwinya obedo ka pida, oweko amoko tamma ni Jehovah pe otimma kica. Lacen ajuko wot i cokke woko.” In iwinyo nining i kom omege ki lumege ma gitye ka kato ki i pekki ma kititogi malo-ni? Tika kica maki i komgi? Ma dong pire tek loyo, Jehovah kono winyo nining i komgi?

8. Jehovah tika wiye wil i kom jo ma gutiyo pire con? Tit kong.

⁸ Jehovah wiye pe wil i kom jo ma kong gutiyo pire con ento lacen gujuko ribbe ki jone woko; dok bene wiye pe wil i kom tic ma gutimo pire. (Ibru 6:10) Lanebi Icaya omiyo lapor mamwonya adada me nyuto kit ma Jehovah paro kwede pi  jone. Icaya ocoyo ni: “En bikwayo romine calo lakwat, bitingo litino romine i bade, en bitingogi i kore.” (Ic. 40:11) Jehovah, ma en aye Lakwat Madit Loyo, winyo nining ka laticce mo ojuko tic pire? Yecu otito kit ma Jehovah winyo kwede i kare ma openyo lupwonnyene ni: “Wutamo gin ango? Ka ce dano mo tye ki romine miya acel, ka acel i kingi ocito orwenyo woko, pe biweko romi pyerabongwen wiye abongwen-ni i wi cere-gu, ci cito ka yenyo en murwenyo-ni? Ka ononge, ada awaco botwu ni, cwinye bibedo yom pire makato pi romi pyerabongwen wiye abongwen ma pe onongo gurwenyo-ni.”​—Mat. 18:12, 13.

9. Lukwat mabeco i kare me Baibul onongo gitero romigi nining? (Nen cal ma i pok ngeye.)

⁹ Pingo rwatte me poro Jehovah ki lakwat? Pien lakwat maber i kare me Baibul onongo paro pi romine adada. Me labolle, Daudi olwenyo ki labwor ki nguu wek egwok romine. (1 Cam. 17:34, 35) Lakwat maber ngeyo oyotoyot ka romone acel mo orwenyo. (Jon 10:3, 14) Lakwat ma kit meno biweko romine 99 i dwol nyo lego lukwat luwote me gwokogi wek en ecit ka yenyo romo ma orwenyo-ni. Yecu otiyo ki lapor man me pwonyowa lok ada ma pire tek ni: “Wora ma tye i polo bene pe mito ni ngat mo acel i kin jo magi matino myero oto.”​—Mat. 18:14.

10. Ma lubbe ki Ejekiel 34:11-16, gin ango ma Jehovah ocikke me timone pi romine ma gurwenyo?

¹⁰ Jehovah maro wan ducu ki acel acel, kadi wa “jo magi matino” ma gua woko ki i kin romine. Lubanga ocikke kun tiyo ki lanebi Ejekiel ni ebiyenyo romine ma gurwenyo dok ebikonyogi me yubo watgi kwede. En bene otito gin ma ebitimone kikome me larogi. Gin ma en onongo bitimo rom ki gin ma lakwat ma Laicrael onongo timo ka romone orwenyo. (Kwan Ejekiel 34:11-16.) Mukwongo, lakwat onongo yenyo romo meno, dok man onongo mito cawa malac ki tute  matek. Ka en onongo romo murwenyo-ni, ci kelo i kin luwote. Medo i kom meno, ka onongo romo man owanne nyo kec oneko matek, lakwat onongo konyo lee magoro man i yo me mar, kun tweyo wang rette, tinge, dok pite. Luelda ma gikwayo “romi pa Lubanga,” bene omyero gutim jami magi ka gimito konyo ngat mo ma orwenyo woko ki i kacokke. (1 Pet. 5:2, 3) Luelda giyenyo jo magi, gikonyogi me dwogo cen i kacokke, dok ginyuto botgi mar ki minigi kony ma gimito me doko lurem Jehovah. *

11. Gin ango ma onongo lakwat maber ngeyo?

¹¹ Lakwat maber onongo ngeyo ni romo twero rweny woko. Dok ka romo mo oa woko ki i kin luwote, lakwat onongo pe tero ki gero. Nen kong labol ma Lubanga owekiwa i kare ma en tye ka konyo luticce mogo ma kong gua woko ki bote.

12. Jehovah otero Yona nining?

¹² Lanebi Yona oringo woko ki i tic ma kimine. Kadi bed kit meno, Jehovah pe oilo cinge woko i kom Yona oyotoyot. Calo lakwat maber, Jehovah olare dok okonye me nongo kero ma mitte me cobo ticce. (Yona 2:7; 3:1, 2) Lacen, Lubanga otiyo ki keno me konyo Yona wek oniang kit ma kwo pa dano pire tek kwede. (Yona 4:10, 11) Pwony ango ma wanongo? Luelda omyero pe guil cinggi oyotoyot i kom jo ma ticgi okwe woko. Me ka meno, luelda gitute me niang gin mumiyo romo meno oa woko ki i kin luwote. Dok ka romo meno odwogo cen bot Jehovah, luelda gimedde ki nyuto bote mar.

13. Pwony ango ma watwero nongo ki i kit ma Jehovah odok kwede i lok pa laco Jabuli 73?

¹³ Ngat ma ocoyo Jabuli 73 cwinye otur i kare ma oneno kit ma jo maraco gitye ka kwo kwede maber. En obedo ki akalakala ka ce adwogi mo maber  tye i timo miti pa Lubanga. (Jab. 73:12, 13, 16) Jehovah odok iye nining? En pe ongolo kop i wi laco-ni ni kite rac. Ki lok ada, Lubanga oweko kicoyo lok pa laco-ni i Baibul. Lacen, laco jabuli man oniang ni bedo ki wat maber ki Jehovah pire tek loyo gin mo keken, dok meno aye gin ma weko kwowa konnye bedo tye. (Jab. 73:23, 24, 26, 28) Pwony ango ma wanongo? Luelda omyero pe gurune me ngolo kop i kom jo ma gucako bedo ki akalakala ka ce adwogi mo maber tye i tic pi Jehovah. Me ka ngolo kop i komgi, luelda myero gutem niang pingo giloko dok gitimme kit meno. Meno aye bikonyo luelda me nongo Ginacoya ma gitwero tic kwede me cuko cwiny jo magi.

14. Pingo Elia onongo mito kony, dok Jehovah omiye kony meno nining?

¹⁴ Lanebi Elia oringo woko ki bot Daker Jejebel. (1 Luker 19:1-3) En otamo ni pe tye ngat mo mukene ma tye ka tic macalo lanebi pa Jehovah, dok owinyo calo ticce konnye pe. Cwiny Elia otur adada ma omiyo en onongo mito to woko. (1 Luker 19:4, 10) Me ka ngolo kop i wi Elia, Jehovah ocuko cwinye ni en pe tye kene, ni en twero geno teko pa Lubanga, dok ni Jehovah pud tye ki tic madwong pire. Jehovah owinyo lok pa Elia ki kica, dok omine tic manyen. (1 Luker 19:11-16, 18) Pwony ango ma wanongo? Lukricitayo ducu, tutwalle luelda, myero guter romi pa Jehovah ki kica. Kadi bed  ngat moni owaco ni etye ki kiniga nyo ewinyo calo Jehovah pe bitimme kica, luelda myero guwiny lokke mot ka en tye ka tito tam ma i cwinye. I nge meno, gibitute me cuko cwiny romo murwenyo-ni ni Jehovah mare.

15. Ma lubbe ki Jon 6:39, Yecu oneno romi pa Wonne nining?

¹⁵ Jehovah mito ni wawiny nining i kom romine ma gurweny? Yecu owekiwa lanen maber me aluba. En onongo ngeyo ni romi pa Jehovah ducu pigi tek i wang Lubanga, pi meno Yecu otute ki kerone ducu me konyo “romi murwenyo” me dwogo cen bot Jehovah. (Mat. 15:24; Luka 19:9, 10) Calo lakwat maber, Yecu bene otimo jami ducu ma etwero wek pe erweny romo pa Jehovah.​—Kwan Jon 6:39.

16-17. Luelda omyero guwiny nining i kom konyo jo ma gurwenyo ki i kacokke? (Nen bok ma wiye tye ni “ Kit ma Romo Murwenyo Twero Winyo Kwede.”)

¹⁶ Lakwena Paulo ocuko cwiny luelda me kacokke me Epeco me lubo lanen pa Yecu. En owaco ni: “Myero wakony lugoro kun wapo lok pa Rwotwa Yecu ma yam owaco ni, ‘Miyo mot kelo gum [yomcwiny] makato gamo agama.’” (Tic 20:17, 35) Nen ka maleng ni, luelda i kare-ni gitye ki tic ma pire tek me gwoko jo pa Jehovah. Salvador, ma tye laelda i lobo Spain owaco ni, “Ka atamo pi kit ma Jehovah paro kwede pi romine murwenyo, man tugo cwinya me timo jami ducu ma twero me konyogi. Macalo lakwat, angeyo ni Jehovah mito ni agwokgi.”

¹⁷ Jo ducu ma kiloko i komgi i pwony man ma onongo gua woko ki i kacokke kikonyogi me dwogo cen bot Jehovah. Kombeddi-ni, tye jo mapol ma gurwenyo ma bene gimito dwogo cen. Pwony ma lubo man binyamo i yo matut jami ma watwero timo me konyogi wek gudwog cen bot Jehovah.