1. Lworo Lubanga kwako ngo, dok pingo kodi lworo man pire tek pi jo ma gimaro Jehovah?

LUKRICITAYO gimaro Lubanga, ento bene gilwore. Bot jo mukene, jami aryo magi twero nen calo gin ma pe twere. Ento pe watye ka lok i kom kodi lworo ma myelo komi-ni. Wabinyamo lok i kom lworo mo ma kite dok pat. Dano ma gitye ki kodi lworo man gitye ki woro matut pi Lubanga. Pe gimito timo gin mo keken ma twero cwero cwiny Wongi me polo pien pe gimito balo watgi kwede.​—Jab. 111:10; Car. 8:13.

2. Ma lubbe ki lok pa Kabaka Daudi ma kicoyo i Jabuli 86:11, jami aryo mene ma wabinyamo?

² Kwan Jabuli 86:11. Ka itamo i kom lok magi, ci itwero neno ni Kabaka Daudi oniang kit ma lworo Lubanga pire tek kwede. Kong dong wanenu kit ma watwero keto lok pa Daudi-ni i tic. Mukwongo, wabinyamo tyen lok mogo mumiyo omyero wabed ki woro matut pi Lubanga. Me aryo, wabinyamo kit ma watwero nyuto kwede woro matut pi nying Lubanga i kwowa me nino ducu.

3. Gin ango ma otimme i kwo pa Moses ma nen calo okonye me bedo ki woro matut pi nying Lubanga?

³ Tam kong kit ma Moses owinyo kwede i kare ma okanne i kin got ci oneno ginanyuta me deyo pa Jehovah ka tye ka kato. Buk me Insight on the Scriptures owaco ni man “nen  calo obedo gin me aura ma loyo gin mo keken ma dano oneno ma peya Yecu obino i lobo.” Moses owinyo lok magi ma nen calo lamalaika aye owaco, ni: “Jehovah, Jehovah, Lubanga ma lakica dok maro dano, kiniga pe make oyot, marre ma pe lokke dwong, en lagen mada. En gwoko mar ma pe lokke pi jo alip ki alip, kun weko rocgi, ki tim aranyigi ki balgi.” (Nia 33:17-23; 34:5-7, NW) Moses nen calo obedo ka tamo pi gin meno i kare ma en otiyo ki nying Jehovah. Pe tye me ur ni lacen Moses ociko Luicrael ni “wubed ka lworo nying me deyo ki mapek pa Rwot Lubangawu.”​—Nwo. 28:58.

4. Ngo ma twero konyowa me dongo worowa pi Jehovah?

⁴ Ka watamo i kom nying Jehovah, bedo ber ka walwodo bene lok i kom ngat ma en obedo. Myero wiwa opo i kom kite calo teko, ryeko, ngolo kop atir, ki mar. Bedo ka tam i kom kit magi ki mukene twero dongo worowa pire.​—Jab. 77:11-15.

5-6. (a) Nying Lubanga tyen lokke ngo? (b) Ma lubbe ki Nia 3:13, 14 ki Icaya 64:8, i yo ango ma Jehovah miyo jami timme?

⁵ Ngo ma wangeyo ma lubbe ki tyen lok me nying Lubanga? Lukwan mapol giye ni nying Jehovah nen calo tyen lokke tye ni “En Miyo Timme.” Meno poyo wiwa ni pe tye gin mo ma twero gengo Jehovah ki timo mitine, dok en miyo jami timme. I yo ma nining?

⁶ Jehovah miyo jami timme ki doko gin mo keken ma mitte me cobo yubbe. (Kwan Nia 3:13, 14.) Nyig lok me leb Ibru ma kigonyo ni “Atye ma Atye” tyen lokke kikome tye ni “Atwero Doko Gin Mo Keken ma Amito.” I bukkewa, kare ki kare kipoyo wiwa me tam i kom but kit pa Lubanga man ma tye me ur-ni. Jehovah bene twero miyo luticce ma gitye ki roc gidoko gin mo keken ma mitte me tic pire ki cobo yubbe. (Kwan Icaya 64:8.) I yo magi, Jehovah weko mitine cobbe. Pe tye gin mo keken ma twero genge ki cobo yubbe.​—Ic. 46:10, 11.

7. Watwero dongo pwocwa pi Wonwa me polo nining?

 ⁷ Watwero dongo pwocwa pi Wonwa me polo ka walwodo lok i kom gin ma en dong otimo ki gin ma en okonyowa me timone. Me labolle, ka walwodo lok i kom jami ducu ma en ocweyo, wabedo ki ur i kom tic pa Jehovah ducu. (Jab. 8:3, 4) Dok ka walwodo lok i kom jami ma Jehovah okonyowa me cobone, ci wadongo worowa pire. Nying Jehovah pud dong pore me awora ya! Kwako ngat ma Wonwa obedo, gin ma en otimo ki gin ma en bitimone.​—Jab. 89:7, 8.

8. Ngo ma Jehovah mito ni luticce gutim ki nyinge, ma lubbe ki Nwoyo Cik 32:2, 3?

⁸ Ma peya jo Icrael gudonyo i Lobo ma Kiciko Pire, Jehovah opwonyo Moses ki wer mo. (Nwo. 31:19) Onongo mitte bene ni Moses opwony ki dano. (Kwan Nwoyo Cik 32:2, 3.) Ka walwodo tyeng me 2 ki 3, waneno ni Jehovah pe mito ni kikan nyinge, nyo ni kiter nyinge calo gin mo maleng mukato kare woko ma pe opore me alwonga. En mito ni dano ducu gunge nyinge! Pud dong obedo mot madit ya pi Luicrael me winyo ka Moses pwonyogi lok i kom Jehovah ki nyinge! Gin ma Moses opwonyogi ojingo niyegi dok ocuko cwinygi, kit macalo kot ma ngido konyo kwede ginapita me dongo. Ngo ma watwero timo wek pwonywa obed calo pa Moses?

9. Watwero konyo nining me lonyo nying Jehovah?

⁹ Ka watye ka pwony i dog ot ki ot nyo i dye lwak, watwero tic ki Baibulwa me nyuto ki dano nying Lubanga Jehovah. Watwero miyogi bukkewa, nyutigi vidio mabeco, ki jami mogo ma nonge i kabedowa me Intanet ma kelo deyo bot Jehovah. I dog tic, i cukul nyo ka watye i wot, watwero nongo kare me lok i kom Lubangawa ma lamar-ri. Ka watito ki jo ma warwatte kwedgi lok i kom Jehovah ki yubbe pi dano ki lobo, nongo watye ka minigi ngec i kom Jehovah ma twero bedo nyen botgi. Ka watito ki jo mukene lok ada i kom Wonwa, nongo watye ka konyo me lonyo nying Lubanga. Nongo watye ka konyo dano me neno ni kipwonyogi ki lok goba mapol madok i kom Lubanga. Gin ma wapwonyo ki dano ki i Baibul obedo pwony ma twero cuko cwinygi loyo gin mo keken.​—Ic. 65:13, 14.

10. Ka watye ka kwan ki lutino kwanwa me Baibul, pingo pe omyero wapwonygi cik pa Lubanga keken?

¹⁰ Ka watye ka kwano Baibul ki dano, wamito ni wakony lutino kwanwa me ngeyo nying Jehovah ki tic kwede. Medo i kom meno, wamito ni wakonygi wek guniang gin ma nying meno cung pire. Tika watwero cobo yub meno ka wapwonyogi tira, rwom me kit ma atir pa Lubanga, ki cik ma myero gulubi keken? Latin kwan maber twero pwonyo cik pa Lubanga kun bene worogi. Ento tika latin kwan meno biwinyo Jehovah pi marre pire? Wi opo ni, Kawa onongo ngeyo cik pa Lubanga ento en onongo pe maro Lami Cik-ki, kadiwa Adam bene kit meno. (Acak. 3:1-6) Pi meno, pe omyero wapwony jo mukene cik pa Lubanga keken.

11. Ka watye ka pwonyo lok i kom cik pa Jehovah ki rwomme ma atir, watwero konyo lutino kwanwa me maro Lami Cik man nining?

¹¹ Cik pa Jehovah ber piwa kare ducu. (Jab. 119:97, 111, 112) Ento lutino kwanwa pe guromo neno cik magi kit meno nikwanyo ka guniang ni Jehovah oketo cik magi pien en marowa. Dong watwero penyo lutino kwanwa ni: “Pingo itamo ni Lubanga mito ni luticce gutim  gin moni nyo pe gutim? Meno tittiwa lok ango i Kome?” Ka wakonyo lutino kwanwa me tam i kom Jehovah ki me dongo mar matut pi nyinge, ci man twero gudo cwinygi. Lutino kwanwa pe gibimaro cik pa Lubanga keken ento wa Lami Cik-ki bene. (Jab. 119:68) Man bidongo niyegi dok bikonyogi me kanyo atematema ma tye anyim.​—1 Kor. 3:12-15.

12. I kare mene ma Daudi oweko cwinye opokke woko, dok adwogine obedo ningo?

¹² Lok ma pire tek adada ma tye i Jabuli 86:11 waco ni “mi abed ki cwiny acel.” Lubanga aye oweko Kabaka Daudi ocoyo lok ma tye i Jabuli 86:11. I kare me kwone, en oneno kit ma yot kwede me bedo ma cwinywa opokke. I nino mo, en onongo tye ka wot malo i wi ode ci oneno dako pa laco mukene tye ka lwok. I cawa meno, tika cwiny Daudi onongo tye acel nyo opokke woko? En onongo ngeyo cik pa Jehovah ma waco ni: “Cwinyi pe opukke i kom dako pa lawoti.” (Nia 20:17) Kadi bed kit meno, en omedde ki neno dako-ni. Cwinye ocako pokke, kun ki tungcel mito Batceba dok ki tungcel mito yomo cwiny Jehovah. Kadi bed Daudi onongo omaro dok olworo Jehovah pi mwaki mapol, en oweko mitine marac obwoye woko. Pi meno, Daudi otimo jami maraco mapol. En okelo lewic i kom nying Jehovah. Daudi bene okelo peko i kom jo ma balgi pe, kadiwa jo gange.​—2 Cam. 11:1-5, 14-17; 12:7-12.

13. Wangeyo nining ni Daudi dok lacen obedo ki cwiny acel?

¹³ Jehovah omiyo pwod ki Daudi, ci lacen en oyubo watte ki Jehovah. (2 Cam. 12:13; Jab. 51:2-4, 17) Daudi okoko ange pi peko ma en okelo i kare ma en oweko cwinye opokke woko. Lokke ma tye i Jabuli 86:11 kitwero bene gonyone ni: “Mi abed ki cwiny ma pe opokke.” Jehovah tika okonyo Daudi me bedo ki cwiny acel ma pe opokke? Ada okonye, pien lacen Lok pa Jehovah waco ni Daudi obedo laco ma “cwinye . . . pe opokke ki i kom Jehovah Lubangane.”​—1 Luker 11:4; 15:3, NW.

14. Lapeny mene ma omyero wapennye kwede, dok pingo?

¹⁴ Gin mutimme i kom Daudi-ni cuko cwinywa dok cikowa bene. Bal ma en otimo-ni tye me ciko lutic pa Lubanga i kare-ni. Kadi bed pud wacako tic acaka pi Jehovah nyo watiyo pi mwaki mapol, omyero wapennye kekenwa ki lapeny  man, ‘Tika atye ka cung matek i kom tute pa Catan me poko cwinya?’

15. Cwiny me lworo Lubanga twero gwokowa nining ka wangwa ocob i kom cal maraco?

¹⁵ Me labolle, ka ineno cal mo i TV nyo i Intanet ma tugo miti macilo i cwinyi, idok iye nining? Twero bedo yot me gengo ngeyi kun itamo ni cal meno pe rac tutwal. Ento cal meno mono pe twero bedo gin ma Catan tye ka tic kwede me poko cwinyi? (2 Kor. 2:11) Watwero poro cal meno ki latong nyo lee ma laco mo tye ka tic kwede me tongo dul yat madit. I acakkine, ka ma en otongo-ni nen matidi mo. Ento ka en medde ki tongo yat-ti, ka ma en tye ka tongo-ni woto ki donyo matut dok dul yat-ti pokke woko. Tika cal macilo ma waneno twero bedo calo lak latong ka mabit-ti? Gin ma twero cakke calo gin mo matidi ma nen calo pe rac, twero weko ngat moni timo bal ma poko cwinye ci turo genene woko. Pi meno, kwer timo gin mo keken ma twero yabo yo ki gin macilo me donyo i cwinyi! Wek cwinyi obed ma pe opokke pi lworo nying Jehovah!

16. Ka wakemme ki atematema me timo gin marac, lapeny mene ma omyero wapennye kwede?

¹⁶ Medo i kom cal ma tugo miti macilo, Catan bene tiyo ki jami mukene me bitowa wek watim bal. Watwero dok iye nining? Yot adada me gengo ngewa ki tam ni jami magi pe rac tutwal. Me labolle, watwero tamo ni: ‘Ah, pe kitwero ryema ki i kacokke pi timo gin man, dong nen calo pe rac tutwal.’ Kodi tam ma kit meno rac adada. Ber ka wapennye ki lapeny magi: ‘Tika Catan tye ka temo tic ki atematema man me poko cwinya woko ki i kom Jehovah? Ka alubo miti marac, tika abikelo lewic i kom nying Jehovah? Tika tic magi binyika cok ki Lubangana, nyo bidira cen  ki bote?’ Kwany kare me lwodo lapeny magi. Leg pi ryeko wek igam lapeny magi ki cwiny ma atir, kun pe ibwolle kekeni. (Yak. 1:5) Timo meno bigwokki adada. Twero konyi me kwero atematema lajwac, kit ma Yecu otimo kwede i kare ma en owaco ni: “Nyik icit cen, Catan.”​—Mat. 4:10.

17. Pingo cwiny ma opokke konye pe? Mi labol.

¹⁷ Cwiny ma opokke woko konye pe. Go kong ni i team mo me odilo, lutukone mogo gitye ki kukukuku ki luwotgi. Mogo gimito nongo deyo pigi kengi, mukene gidag lubo cik, ki mukene pe giworo lapwony tuko. Team ma kit meno pe twero loyo tuko. Ki tungcel, team ma lutukone guribbe pol kare giloyo tuku. Cwinyi twero bedo calo team ma loyo tuku-ni ka tammi, mitini, ki kit ma iwinyo kwede oribbe i tic pi Jehovah. Wi opo ni Catan mito poko cwinyi. En mito ni tammi, mitini, ki kit ma iwinyo kwede obed ma onywene atata dok ma pe rwatte ki cik pa Jehovah. Ento, mitte ni ibed ki cwiny acel wek iti pi Jehovah. (Mat. 22:36-38) Pe iye Catan opok cwinyi!

18. Ma rwatte ki lok ma tye i Mika 4:5, imoko tammi me timo gin ango?

¹⁸ Leg bot Jehovah kit ma Daudi olego kwede ni: “Mi abed ki cwiny acel me lworo in.” Tim jami ducu ma itwero me cobo lok ma i lega man. Nino ki nino, wek tam ducu ma imoko, cakke ki kom matidi o wa i kom madit, onyut ni itye ki woro matut i kom nying Jehovah. Ka itimo meno macalo Lacaden pa Jehovah, ci ibikelo deyo i kom nying meno. (Car. 27:11) Wan ducu wabibedo ki kero me lok calo lanebi Mika ma waco ni: ‘Wan wabiwot i nying Jehovah Lubangawa pi naka.’​—Mika 4:5.