1, 2. (a) Tic ango ma pire tek ma kimiyo ki Solomon? (b) Pingo Daudi obedo ki par i kom Solomon?

SOLOMON obedo ki tic ma pire tek adada. Jehovah oyere me loyo wi tic me gero ot me woro i Jerucalem, man onongo bibedo tic me gedo ma pud dong pire tek ma loyo ducu! Ot pa Lubanga onongo “myero obed me deyo makato ducu,” dok onongo biywek mada pi lengnge. Ma pire tek loyo, man onongo bibedo “ot pa Rwot [Jehovah] Lubanga.”​—1 Tekwaro 22:1, 5, 9-11.

² Kabaka Daudi onongo ngeyo ni Lubanga bikonyo Solomon. Ento Solomon onongo “pud tidi, [dok] peya tye ki ngec mo.” Tika en onongo bibedo ki tekcwiny me ye tic meno? Nyo tika mwakane ki dok ngec manok ma en tye kwede bigenge? Wek tic meno ocobbe, onongo mitte ni Solomon obed ki tekcwiny dok omak ma tic.

3. Gin ango ma Solomon opwonyo ki i tekcwiny pa wonne?

 ³ Twero bedo ni Solomon opwonyo jami mapol ki i tekcwiny pa wonne, Daudi. I kare ma Daudi pud tidi, en olwenyo ki lee mager ma gubedo ka mako romi pa wonne. (1 Camuel 17:34, 35) En bene onyuto tekcwiny i kare ma olwenyo ki Goliac twon oteka lweny. Ada, ki teko pa Lubanga kacel ki lagweng mo mapwot, Daudi oloyo Goliac.​—1 Camuel 17:45, 49, 50.

4. Pingo onongo mitte ni Solomon obed ki tekcwiny?

⁴ Watwero niang pingo Daudi aye ma onongo opore me cuko cwiny Solomon wek obed ngat ma cwinye tek pi gero ot pa Lubanga. (Kwan 1 Tekwaro 28:20.) Ka onongo Solomon pe obed ma cwinye tek, lworo onongo twero balo cwinye, dok genge wa cako tic mamwa. Meno onongo bibedo rac makato giko tic meno i kor yo.

5. Pingo wamito tekcwiny?

⁵ Calo Solomon, wan bene wamito kony ki bot Jehovah wek wabed ki tekcwiny me timo tic ma en miniwa. Pi meno myero wakwan labol pa jo mogo ma gubedo ki tekcwiny i kare mukato angec. Ci dong watwero tam i kom kit ma watwero bedo kwede ki tekcwiny wek wacobo ticwa.

6. Gin ango ma yomcwinyi i kom tekcwiny pa Yucepu?

⁶ Yucepu onyutu tekcwiny i kare ma dako pa Potipar otemme me diye wek otim tim tarwang. En nen calo bene oniang ni kwone bibedo ka ma ding ka ekwero. Ento ma ka ye bita meno, en obedo ki tekcwiny ci okwero woko lajwac.​—Acakki 39:10, 12.

7. Rakab onyuto tekcwiny nining? (Nen cal ma tye i pot karatac 27.)

⁷ Rakab bene obedo ki tekcwiny. I kare ma lurot piny pa Luicrael gucito i gange i Jeriko, lworo onongo twero make ci kwero konyogi woko. Ento pien en oketo genne i kom Jehovah, man omiyo en obedo ki tekcwiny me kano coo aryo-ni ki dok okonyogi me lwi woko. (Yocwa 2:4, 5, 9, 12-16) Rakab onongo ngeyo ni Jehovah aye Lubanga me ada, dok onongo ye labongo akalakala mo ni Jehovah bimiyo lobo i cing Luicrael. En pe oye wek lworo i kom jo mukene otur cwinye, kadiwa kabaka me Jeriko kacel ki jone. Ma ka meno, en obedo ki tekcwiny ci olaro kwone kacel ki pa jo me gange.​—Yocwa 6:22, 23.

8. Tekcwiny pa Yecu ogudo lukwenane nining?

⁸ Lukwena pa Yecu bene gubedo ki tekcwiny. Guneno kit ma Yecu cwinye onongo tek kwede, dok man okonyogi me lubo lanene. (Matayo 8:28-32; Jon 2:13-17; 18:3-5) I kare ma Lucadukayo gutemme me gengogi ni pe gutit kwena madok i kom Yecu, lukwena mere gumedde  ameda.​—Tic pa Lukwena 5:17, 18, 27-29.

9. 2 Temceo 1:7 konyowa nining me niang ka ma watwero nongo iye tekcwiny?

⁹ Yucepu, Rakab, Yecu ki dong lukwena gumoko tamgi me timo gin ma atir. Gubedo ki tekcwiny pe ni onongo gigeno tekogi, ento onongo gijenge i kom Jehovah. Wan bene ka wamito ni cwinywa obed tek, myero wajenge i kom Jehovah ento pe i komwa kekenwa. (Kwan 2 Temceo 1:7.) Kong wanenu kabedo aryo i kwowa ma mito tekcwiny: i kwo me ot ki dok i kacokke.

10. Pingo mitte ni cwiny bulu ma Lukricitayo obed tek?

¹⁰ Tye kabedo mapol i kwo pa Lukricitayo ma bulu ma mito tekcwiny wek guti pi Jehovah. Gitwero nongo pwony ki dok lubo lanen pa Solomon, ma onyuto tekcwiny i kare ma omoko tam me ryeko me gero ot pa Lubanga. Kadi bed ni lunyodo myero gumi tam bot lutinogi, ento lutino bene gitye ki katala me moko tam ma pigi tego pigi kengi. (Carolok 27:11) Mitte ni gubed ki tekcwiny me moko tam me ryeko madok i kom angagi ma twero bedo luremgi, ngo ma gitimo me galowang, kit me kwo i yo maleng, ki dong kare ma gibinongo batija iye. Jami magi mito tekcwiny pien nongo gitye ka timo jami ma cwero cwiny Catan, ngat ma yeto Lubanga.

11, 12. (a) Moses onyuto tekcwiny nining? (b) Jo matino gitwero lubo lanen pa Moses nining?

¹¹ Tam acel ma pire tek ma bulu myero omok aye yubbe pi anyim. I lobe mukene, jo matino gitye i lyeto me kwan i rwom ma malo ki dok me nongo tic ma culle bup. I lobe mogo, can lim oromo kin piny adada, dok jo matino giwinyo calo gin ma pire tek loyo aye tic matek me konyo jo me ganggi. Ka itye i lobo ma kumeno, ci tam kong i kom labol pa Moses. En odongo i cing nya pa Parao, dok onongo twero keto yub me bedo lalonyo nyo me bedo ngat madit i Ejipt. Go kong lyeto ma en obedo kwede ma a ki bot jo ma gugwokke i Ejipt, lupwonyene, ki dong lumi tam! Ento Moses obedo ma cwinye tek dok oyero me bedo i kin jo pa Lubanga. I kare ma Moses oweko Ejipt kacel ki lonyo ma kunu ducu, en ojenge i kom Jehovah ki cwinye ducu. (Jo Ibru 11:24-26) Macalo adwogine, Jehovah omine mot mapol, dok bimedde mot mapol i anyim.

¹² Ka jo matino giketo yub me tic pi Jehovah ki pi Kerri mukwongo i kwogi, ci Jehovah biminigi mot. En bikonyogi me miyo jami ma mitte bot jo me otgi. I cencwari me acel, bulu mo ma nyinge Temceo oketo tic pi Lubanga obedo mukwongo i kwone, dok in bene itwero timo meno. * (Nen lok ma tye i tere piny.)​—Kwan Jo Pilipi 2:19-22.

13. Tekcwiny okonyo lamego mo me cobo yubbe nining?

¹³ Onongo mitte ni lamego mo ma a ki Alabama, U.S.A., obed ki tekcwiny wek oket yub me tic pi Lubanga. En ocoyo ni: “I kare ma atye ka dongo onongo  alwor adada. Pe onongo atwero wa lok ki dano i Ot me Ker, makato dong i ot ki ot ki ngat ma pe angeyo.” Ki kony pa lunyodone kacel ki jo mukene i kacokke, lamego-ni odoko lapainia. En owaco ni: “Lobo pa Catan-ni cuko cwinywa me kwan i rwom ma lamal, me nongo yweka, cente mabup, ki dong jami me kom mapol.” Ento en oniang ni meno dano mapol pe gitwero nongo jami magi ducu dok man keligi par ki arem keken. En dok omedde ni: “Tic pi Jehovah okela yomcwiny madit dok awinyo ni olo to atiyo gin mo.”

14. Ngo ma twero timme ma mito tekcwiny ki bot Lunyodo ma Lukricitayo?

¹⁴ Lunyodo ma Lukricitayo bene myero gubed ki tekcwiny. Me laporre, ladit ticci twero penyi kare ki kare ni iti wa i nge cawa me tic i nino ma nongo iketo pi woro pi jo me ot, tic me pwony ki dong cito i cokke. Tekcwiny mitte wek pe iye tam pa ladit tic-ni dok wek ibed lanen maber bot lutinoni. Nyo twero bedo ni lunyodo mukene i kacokke giye ni lutinogi gutim jami ma in pe imito ni lutinoni gutim. Ka lunyodo meno gupenyi pi tyen lok ma oweko in pe iye kono, tika ibibedo ki tekcwiny me tito botgi i yo me woro?

15. Jabuli 37:25 ki Jo Ibru 13:5 twero konyo lunyodo nining?

¹⁵ Tekcwiny mitte wek wakony lutinowa me keto yub i tic pi Lubanga. Me labolle, lworo twero mako lunyodo mukene me cuko cwiny lutinogi wek guket  yub me tic macalo painia, ki tic ka ma can lutit kwena tye iye, tic i Betel, nyo konyo me gero Odi me Ker ki dong Odi me Gurewa. Twero bedo ni gitye ki lworo ni ka dong giti lutinogi pe gibibedo ki kero me gwokogi. Ento, lunyodo ma giryek gibedo ki tekcwiny kacel ki niye pien gingeyo ni Jehovah bigwoko cikkene. (Kwan Jabuli 37:25; Jo Ibru 13:5.) Lunyodo ma gibedo ki tekcwiny dok gijenge i kom Jehovah gikonyo lutinogi bene me timo meno.​—1 Camuel 1:27, 28; 2 Temceo 3:14, 15.

16. Lunyodo mukene gukonyo lutinogi nining me keto yub me tic pi Lubanga, ki dok adwogi maber ango ma lutinogi gunongo?

¹⁶ Luot mo i lobo Amerika gukonyo lutinogi me keto cwinygi i tic pi Jehovah. Won lutino-ni owaco ni: “Ma peya lutinowa gupwonyo wot ki lok, onongo waloko kwedgi i kom yomcwiny ma bino pi tic calo painia ki dok pi kacokke. Dok man obedo yubgi.” En owaco ni pien lutinogi guketo yub meno ci dok gucobo, man okonyogi me lweny ki abita me lobo pa Catan-ni kun giketo cwinygi i tic pi Jehovah. Omego mo ma tye ki lutino aryo ocoyo ni: “Lunyodo mapol gitute matek dok giketo cente mabup i konyo lutinogi wek gubed lutuku muywek, gunong galowang ki kwan i rwom ma lamal. Tye me ryeko ma loyo ka watute matek dok waketo cente mabup i konyo lutinowa me bedo ki yub ma bikonyogi me dongo watgi ki Jehovah. Obedo me yomcwiny madit adada pe ni lutinowa gucobo yub ma onongo gitye kwede keken ento pien wakonyogi me cobo yub man.” Nge ni meno lunyodo ma gikonyo lutinogi me keto ki cobo yub me tic pi Lubanga gitye ki cwak pa Jehovah.

17. Mi labol mogo ma nyuto ni pire tek me bedo ki tekcwiny i kacokke.

¹⁷ Mitte bene ni wabed ki tekcwiny i kacokke. Me labolle, luelda bene myero gubed ki tekcwiny ka ngat mo otimo bal marac nyo ka gitye ka konyo jo ma kwogi tye ka mading pi lok me yotkom. Luelda mogo gilimo jo ma gitye i buc me kwan ki jo ma gunyuto miti nyo me doro cokke. Lumege ma wigi nono kono? Mitte bene ni gubed ki tekcwiny i ticgi pi Jehovah. Gitwero tic calo painia, kobo ka ma can lutit kwena tye iye, tic kacel ki Lugo Pulan me gedo/Tic me Gedo, ki dong pongo fom me donyo i Cukul pa Lutit Kwena me Ker. Mogo bene gilwongogi me cito i Cukul me Gilead.

18. Lumege ma guteggi gitwero nyuto tekcwiny nining?

¹⁸ Wamaro lumegiwa ma guti, dok cwinywa yom ni gitye kwedwa i kacokke! Kadi bed ni mogo dong pe gitwero timo jami mapol i tic pa Lubanga kit macon, pud giromo bedo ma cwinygi tek kun gimedde ki timo gin ma gitwero. (Kwan Tito 2:3-5.) Me labolle, lamego mo mutegi mito cwinye obed tek ka luelda guwacce ni olok ki lamego mo ma pud tidi madok i kom rukke. En pe myero odaa i wi lamego matidi-ni ento myero okonye i yo me mwolo, me tam i kom kit ma rukke twero gudo kwede ki dano mukene. (1 Temceo 2:9, 10) Ka lumege ma guteggi ginyuto margi i yo meno, ci man bijingo kacokke adada.

19. (a) Omege ma gunongo batija gitwero bedo ki tekcwiny nining? (b) Jo Pilipi 2:13 ki 4:13 twero konyo omege me bedo ki tekcwiny nining?

 ¹⁹ Mitte ni omege ma gunongo batija gubed ki tekcwiny me ye tic me atiya. Ka gitye atera me tic calo lukony kor tic ki dok luelda, ci kacokke binongo adwogi maber. (1 Temceo 3:1) Ento, jo mukene pe giye timone. Gwok omege mo otimo bal mo i kare mukato angec, ci dong neno ni pe epore me tic macalo lakony kor tic nyo laelda. Omego mukene twero neno ni pe etwero tic meno. Ka iwinyo kumeno, ci Jehovah twero konyi me bedo ki tekcwiny. (Kwan Jo Pilipi 2:13; 4:13.) Po i kom labol pa Moses. En bene otamo ni pe onongo etwero timo gin ma Jehovah mito ni etim. (Nia 3:11) Ento Jehovah okonye me bedo ki tekcwiny me timo gin ma onongo mitte ni en otim. Omego ma onongo batija twero nongo tekcwiny nining? En twero lega bot Jehovah wek okonye ki bene kwano Baibul nino ducu. En twero tam i kom labol pa jo mogo ma kicoyo lok komgi i Baibul ma gunyuto tekcwiny. Ki cwiny me mwolo, en twero penyo luelda wek gupwonye kun bene jalle me miyo kony ma mitte i kacokke. Wacuko cwiny omege ducu ma gunongo batija me bedo ki tekcwiny ki dok me tic matek pi kacokke!

20, 21. (a) Daudi opoyo wi Solomon i kom ngo? (b) Gin ango ma watye ki gen iye?

²⁰ Kabaka Daudi opoyo wi Solomon ni Jehovah bibedo kwede nio wang ma otyeko gero ot pa Lubanga. (1 Tekwaro 28:20) Ngene kene ni Solomon olwodo lok matut i kom lok meno, dok pe oye ni mwakane ki dok ngec manok ma en tye kwede ogenge ki timo tic. Ma ka meno, en onyuto tekcwiny dok ki kony pa Jehovah, en otyeko gero ot pa Lubanga i nge mwaka abiro ki nucu.

²¹ Jehovah okonyo Solomon, dok en bene twero konyowa me bedo ma cwinywa tek ki dok me cobo ticwa, i pacowa ki dong i kacokke bene. (Icaya 41:10, 13) Ka wanyuto tekcwiny i ticwa pi Jehovah, wabibedo ki gen ni en biminiwa mot i kare-ni ki i anyim bene. Pi meno, myero wabed ma ‘cwinywa nwang, ci wamak ma tic.’