1. Daudi owinyo nining i kom Jehovah, dok man otugo cwinye me timo ngo?

KABAKA DAUDI ocoyo ni: ‘Jehovah dit dok myero gipake twatwal.’ (Jab. 145:3) En onongo maro Jehovah adada, dok mar meno otugo cwinye me pako Lubanga “i dye lwak ma gucokke kacel.” (Jab. 22:22; 40:5) Ngene kene ni in bene imaro Jehovah dok iye lok pa Daudi ni: “Gipwo in Rwot [Jehovah], Lubanga pa kwarowa Icrael, nino ma pe tum.”​—1 Tekwaro 29:10-13.

2. (a) Watwero pako Jehovah nining? (b) Ariya ango ma jo mukene gikemme kwede, dok ngo ma wabinyamo?

² I kare-ni, yo acel ma wapako kwede Jehovah aye ka wamiyo lagam i cokke pa Lukricitayo. Kadi bed kumeno, omege ki lumege mapol ginongo ni tek. Nongo gimito miyo lagam i cokke, ento lworo gengogi woko. Gitwero lweny ki lworo ma kit meno nining? Ki dong diro ango ma wan ducu watwero tic kwede wek wami lagam ma cuko cwiny? Ma peya wagamo lapeny magi, wek kong wanen tyen lok angwen ma pigi tego ma weko wamiyo lagam i cokke.

3-5. (a) Kit ma kitito kwede i Jo Ibru 13:15, pingo wamiyo lagam i cokke? (b) Tika myero wan ducu wamiyo kit lagam acel? Tit kong.

³ Jehovah omiyo bot wan ducu mot me pakke. (Jab. 119:108) Lagam ma wamiyo i cokke tye macalo ‘gitum ma kityero’ bot Jehovah, dok pe tye ngat mo ma twero tyerone piwa. (Kwan Jo Ibru 13:15.) Tika Jehovah mito ni wan ducu wami  gityer marom, nyo kit lagam acel? Pe, en pe mito!

⁴ Jehovah ngeyo ni watye ki kero mapatpat, dok wawok ki i kwo mapatpat. En bedo ki pwoc pi gityer ma watwero miyone bote. Tam kong i kom gityer ma onongo Jehovah jolo ki bot Luicrael. Luicrael mogo onongo gitwero miyo latin romo nyo dyel. Ento Laicrael ma lacan onongo twero miyo “amam aryo nyo litino akuri aryo.” Dok ka Laicrael mo pe twero nongo winyi aryo, Jehovah onongo ye “agwata moko kwon acel me moko mapwotte.” (Levi 5:7, 11) Moko onongo welle pe tek, ento Jehovah onongo jolo gityer meno, tekke tye “moko mapwotte.”

⁵ Lubangawa ma lakica-ni bene winyo kit meno i kare-ni. Ka wamiyo lagam en pe mito ni kong myero wabed lulok mucwiny calo Apolo nyo ni myero lokwa ogud cwiny dano adada calo pa Paulo. (Tic 18:24; 26:28) Gin ma Jehovah mito aye ni myero watute ki kerowa ducu me miyo lagam maber​—ma rwatte ki kerowa. Wi myero opo i kom dato ma omiyo cente aryo keken. Jehovah obedo ki pwoc pien en omiyo gin ducu ma onongo twero.​—Luka 21:1-4.

6. (a) Ma lube ki Jo Ibru 10:24, 25, lagam ma wawinyo twero gudowa nining? (b) Itwero nyuto pwoc nining pi lagam ma ocuko cwinyi?

⁶ Wacuko cwiny luwotwa ka wamiyo lagam. (Kwan Jo Ibru 10:24, 25.) Wan ducu wamaro winyo lagam mapatpat i cokke. Cwinywa bedo yom me winyo lagam pa latin matidi ma omiyo ki cwinye ducu. Cuko cwinywa adada me neno yomcwiny ma ngat moni bedo kwede ka tye ka miyo lagam i kom gin mo manyen ma en opwonyo. Dok wabedo ki yomcwiny ka ngat mo onyuto “tekcwiny” me miyo lagam kadi bedo ni lwor nyo pud tye ka pwonyo lebwa apwonya. (1 Tec. 2:2) Watwero nyuto pwoc nining pi tutegi? Watwero pwoyogi i nge cokke pi lagam me cukocwiny ma gumiyo. Yo mukene aye ka wan bene wamiyo lagam. Ka watimo meno, ci pe wanongo cukocwiny ki bot jo mukene keken ento wan bene wacuko cwinygi.​—Rom. 1:11, 12.

7. Adwogi maber ango ma wanongo ka wamiyo lagam?

⁷ Wanongo adwogi maber ka wamiyo lagam. (Ic. 48:17) I yo ma nining? Me  acel, ka wamito miyo lagam, ci wabedo bene ki miti me yubbe maber pi cokke. Ka wayubbe maber, ci wadongo ngecwa i kom Lok pa Lubanga. Dok ka watye ki ngec matut, ci bikonyowa me keto gin ma wapwonyo i tic. Me aryo, wanongo mit pa bedo i cokke pien nongo watye ka nywako i miyo lagam. Me adek, kit macalo waketo tek me miyo lagam, man miyo wiwa po i kom lagam ma wamiyo.

8-9. (a) Kit ma kinyuto kwede i Malaki 3:16, itamo ni Jehovah winyo nining i kom lagamwa? (b) Ariya ango ma jo mukene pud gikemme kwede?

⁸ Wayomo cwiny Jehovah ka watito pi niyewa. Watwero bedo ki gen ni Jehovah winyo lagamwa dok bedo ki pwoc madit pi tutewa me miyo lagam i cokke. (Kwan Malaki 3:16.) En nyuto pwocce ki miniwa mot ka watute me yomo cwinye.​—Mal. 3:10.

⁹ Dong, nen ka maleng ni, watye ki tyen lok matir me miyo lagam i cokkewa. Ento jo mukene pud ginongo tek me illo cinggi. Ka meno aye kit ma iwinyo kwede, ci pe iwek cwinyi otur. Kong waneno cik mogo ma igi lac me Baibul, labol mogo manok ki dong tam ma twero konyo wan ducu me tutte matek wek wami lagam mapol i cokke.

10. (a) Pol pa wan watye ki lworo ango? (b) Pingo lworo me miyo lagam twero bedo lanyut maber?

¹⁰ Tika iwinyo cwinyi poto ka itamo me illo cingi me miyo lagam? Ka tye kit meno, ci ipe keni. Lok ada tye ni, pol pa wan wabedo ki lworo ka watye ka miyo lagam. Ma peya icako lweny ki lworo ma gengi miyo lagam, omyero kong iniang gin ango kikome ma weko ibedo ki lworo. Tika ibedo ki lworo pien ni wi romo wil woko i kom gin ma imito wacone, nyo ni itwero waco gin ma pe tye kakare? Tika ibedo ki lworo pien itamo ni lagammi pe bibedo maber calo pa  jo mukene? Ki lok ada, lworo twero bedo lanyut maber. Nyuto ni imwol dok ineno jo mukene calo rwomgi lamal loyo megi. Jehovah maro jo mamwol. (Jab. 138:6; Pil. 2:3) Ento Jehovah bene mito ni imine pak, dok icuk cwiny jo mukene i cokke. (1 Tec. 5:11) En marri dok biminiwa tekcwiny ma imito.

11. Wang ginacoya mene ma i Baibul ma twero konyowa?

¹¹ Nen kong lapo wic ma nonge i ginacoya. Baibul waco ni wan ducu watimo bal i lok ma waloko ki kit ma waloko kwede. (Yak. 3:2) Jehovah pe tamo ni myero wabed ma pe watimo bal, en bene pe tamo ni omegiwa nyo lumegiwa gubed ma pe gibalo. (Jab. 103:12-14) Gin ducu gitye i kin jo me ot pa Jehovah dok gimarowa. (Mar. 10:29, 30; Jon 13:35) Giniang bene ni i kine mukene lagamwa pe kati kit ma wamito kwede.

12-13. Pwony ango ma wanongo ki i labol pa Nekemia kacel ki Yona?

¹² Tam i kom labol mogo ma tye i Baibul ma twero konyi me lweny ki lworoni. Tam kong i kom Nekemia. En onongo tiyo i ot kot pa kabaka matek adada. Nekemia onongo cwinye pe yom pien owinyo ni cel ki dog cel me Jerucalem oballe woko. (Nek. 1:1-4) Go kong kit ma cwinye obedo ka poto kwede i kare ma kabaka openye ni otit pingo cwinye pe yom! Nekemia olego oyotoyot ci ogamo lapeny meno. Lagam pa Nekemia oweko kabaka otimo jami mapol me konyo jo pa Lubanga. (Nek. 2:1-8) Tam bene i kom Yona. I kare ma Jehovah owacce ni ocit otit lokke bot jo me Nineve, lworo omako Yona adada ma oweko en oringo woko. (Yon. 1:1-3) Ento ki kony pa Jehovah Yona ocito dok otito kwena bot jo me Nineve. Kwena ma en otito-ni okonyo jo me Nineve adada. (Yon. 3:5-10) Pwony ma wanongo ki i kom gin ma Nekemia otimo tye ni pire tek me lega ma peya wamiyo lagam. Dok ki bot Yona wapwonyo ni Jehovah twero konyowa me tic pire kadi bed walwor adada. Ki lok ada, tika tye kacokke mo ma twero miyowa lworo calo jo me Nineve?

¹³ Gin ango ma itwero timone wek imi lagam ma cuko cwiny dano i cokke? Kong dong wanyamo tam mogo manoknok me timo man.

14. Pingo omyero wayubbe maber pi cokkewa dok watwero timo man awene?

¹⁴ Yubbe maber pi cokke ducu. Ka iketo yub, ci iyubbe con, dok ibedo ki tekcwiny me miyo lagam. (Car. 21:5) Ngene kene ni, wan ducu watye ki yub mapatpat me yubbe pi cokke. Eloise, dato mo ma tye ki mwaka pyera boro ki wiye, cako yubbe me nyamo Wi Lubele con i acakki me cabit. En owaco ni, “Anongo mit pa cokke ka ayubbe con.” Lamego Joy, ma tiyo cakke i Ceng Baraja me o wa i Ceng Abic pol kare yubo  Wi Lubele ma mege i Ceng Abicel. En otito ni “Yot bota me po i kom i kom pwony meno ka ayubbe ma nongo nino me cokke dong pe bor.” Laelda mo ma nyinge Ike, ma tye ki tic mapol dok bene tye painia owaco ni, “Anongo ber tutwal ki bota me kwan pi cawa mogo manoknok nino ducu me ka kwan pi cawa malac kicel i cabit acel.”

15. Itwero yubbe maber nining pi cokke?

¹⁵ Yubbe maber pi cokke kwako timo gin ango? Cak ki lega pi cwiny maleng ma peya icako kwanni. (Luka 11:13; 1 Jon 5:14) Ci ter dakika mo manok me wot wiye wiye i pwony ma tye i iye. Tute me niang wi pwony meno, wi lok matinotino, cal ma tye, kacel ki bok me pwony ka tye. Ka iwoto ki kwano paragraf acel acel, kwan tyeng mapol me Baibul ma tye kit ma itwero. Lwod lok ma tye i iye, kun iketo cwinyi i kom lok ma imito miyo iye lagammi. Ka iyubbe maber, ci bene ibinongo adwogi maber dok bibedo yot me miyo lagam.​—2 Kor. 9:6.

16. Jami tic mene ma nonge boti dok itiyo kwede nining?

¹⁶ Ka twere, ti ki jami ticwa ma nonge i Intanet ma tye i leb ma iniang maber. Jehovah tiyo ki dulle me miniwa jami tic calo JW Library^®, Watchtower Library ki Watchtower ONLINE LIBRARY^™ wek wayubbe maber pi cokke. JW Library^® app konyowa me kwanyo jami akwana, awinya ki anena ki i Intanet wek waket i cim nyo i tabuletwa. Ka wakwanyo, ci watwero kwanone​—nyo winyone i cawa mo keken, ki ka mo keken. Jo mukene gitiyo ki JW Library^® me kwan i cawa me yweyogi ki i ka tic nyo i gang kwan nyo bene ka gitye ka wot ka mabor. Watchtower Library ki Watchtower ONLINE LIBRARY^™ weko bedo yot adada me kwedo lok i kom gin mo ma wamito niang iye maber.

17. (a) Pingo ber me yubo lagam mapol? (b) Gin ango ma ipwonyo ki i vidio me Dok Larem Jehovah​—Yub Lagammi?

¹⁷ Ka twere, yub lagam mapol pi pwony acel acel. Pingo? Pien pe kitwero kwanyi kare ducu ma iilo cingi. Jo mukene bene gitwero illo cinggi i cawa ma iilo cingi, dok ngat ma tye ka doro pwony twero cimo ngat mo keken i kingi. Dok me gwoko cawa, ngat ma tye ka doro pwony meno twero jolo lagam manoknok i but pwony moni. Pi meno pe iwek i owang nyo cwinyi otur ka pe kicimmi me miyo lagam i acakki me nyamo lok. Ka iyubo lagam mapol ci ibibedo bene ki kare mapol me nywako i nyamo lok meno. Itwero yubbe me kwano wang Baibul. Ento ka twere, ci yubbe bene me miyo lagam ma pe ikwano akwana. *

18. Pingo omyero imi lagam macek?

 ¹⁸ Mi lagam macek. Pol kare lagam ma cuko cwinywa aye lagam macego dok ma niang iye yot. Pi meno, tute matek wek lagammi obed macek. Wek obed ma romo kine ka cekon 30. (Car. 10:19; 15:23) Ka dong ibedo ka miyo lagam i cokke pi kare malac, ci nongo itye ki tic me atima ma pire tek adada​—nyuto lanen maber i miyo lagammi macek. Ka imiyo lagam mabor ma niang iye tek, ci twero kelo lworo i kom jo mukene dok weko gitamo ni gin pe gitwero miyo lagam calo megi-ni. Lagam macego bene miyo kare ki jo mapol me miyo lagamgi i cokke. Tutwalle ka kicimmi mukwongo, mi lagam macek dok ma gamo lapeny ma kipenyo kikome. Pe omyero ilok i kom jami ducu ma i paragraf meno. Ka dong kigamo lapeny me paragraf meno woko, ci in itwero lok i kom jami mukene ma kubbe ki paragraf meno.​—Nen bok ma wiye tye ni “ Atwero Miyo Lagam i Kom Gin Ango?”

19. Omego ma tye ka doro pwony twero konyi nining, ento omyero kong itim gin ango?

¹⁹ Wek omego ma bidoro pwony onge con paragraf ma imito miyo lagammi i iye. Ka ibitimo kit man, ci omyero ilok con ki omego ma obidoro pwony ma peya cawa me cokke oromo. Ka cawa me miyo lagam me paragraf meno oromo, il cingi oyotoyot dok lamal wek omego meno oneni.

20. Cokke tye calo cam ma kinywako ki lurem nining?

²⁰ Ter cokke macalo cam ma kinywako kacel ki lurem. Tam kong ni luremi mogo me kacokke gulwongi ka cam, dok guwacci iyub ginacama mo manok. Ibidok iye nining? Itwero bedo ki par, ento ibiyelle ki tekki me kelo gin mo ma dano ducu gibimarone. Jehovah, ma en aye olwongowa-ni oketo mecca ma opong ki jami mabeco pi jo me kacokke. (Jab. 23:5; Mat. 24:45) Cwinye bedo yom adada ka wakelo mic maber loyo ma rwatte ki kerowa. Pi meno yubbe maber dok imi lagam mapol kit ma itwero. Ka itimo meno ci pe ibicam ki i wi mecca pa Jehovah keken ento ibikelo mic mo olo me anywaka ki jo me kacokke.