1. Miti pa Jehovah i karewa-ni tye nining?

 OBEDO miti pa Lubanga ni kitit kwena maber me Ker-ri i wi lobo ducu. (Mar. 13:10; 1 Tem. 2:3, 4) Man tic pa Jehovah, dok obedo tic ma pire tek adada ma oweko en oketo i te tela pa Wode me amara. Watwero bedo ki gen ni i te tela pa Wode Yecu, tic man me tito kwena-ni bicobbe kit ma Jehovah mito kwede kikome ma agikki piny peya obino.—Mat. 24:14.

2. Gin ango ma wabinyamo i pwony man?

² I pwony man, wabineno kit ma Yecu tye ka tic ki “lagwok ot ma lagen dok maryek” me miyo cam me cwiny ki dok me yubo lulub kore maber pi tic me tito kwena ma pud dong dit loyo i tekwaro pa dano. (Mat. 24:45) Wabineno bene gin ma wan ducu ki acel acel watwero timone me miyo cwak ki Yecu kacel ki lagwok ot ma lagen.

3. Twero ango ma kimiyo bot Yecu?

³ Yecu tye ka doro tic me pwony. Wamoko man nining? Ma peya en odok cen i polo, Yecu orwatte ki lulub kore ma lugen i wi got mo i Galilaya. En owaco botgi ni: “Twero ducu ma i wi polo ki i lobo dong gityeko miyo woko bota.” Nen kong dok lok ma en owaco cutcut i nge meno: “Wuciti wucilok jo me rok ducu gudok jo ma luba.” (Mat. 28:18, 19) Meno nyuto ni, i kin jami mapol, Yecu bene kimine twero me doro tic me tito kwena.

4. Pingo watwero bedo ki gen ni Yecu tye ka medde ki doro tic me tito kwena nio wa i karewa-ni?

⁴ Yecu otito ni tic me tito kwena ki loko dano me doko lupwonnyene bitimme i “rok ducu” dok ni en ebibedo ki  lulub kore “kare ducu, nio i agikki piny.” (Mat. 28:20) Lokke meno nyuto ka maleng ni tic me tito kwena-ni onongo bimedde i te tela pa Yecu nio wa i karewa-ni.

5. I yo ma nining ma watye ka konyo cobo lok pa lanebi ma tye i Jabuli 110:3?

⁵ Yecu pe obedo ki par ni lutic ma mitte me tito kwena-ni welgi pe bibedo muromo i kare me agikki me lobo man. En onongo ngeyo ni lok pa lanebi ma kicoyo i jabuli-ni bicobbe: “I nino ma ibilweny i kom lukworri, lwakki gibimine kengi boti.” (Jab. 110:3) Ka itye ka nywako i tic man me tito kwena-ni, ci nongo itye ka miyo cwak bot Yecu kacel ki lagwok ot ma lagen dok itye ka konyo me cobo lok pa lanebi meno. Tic man tye ka wot anyim, ento ariya bene tye.

6. Tit kong ariya acel ma lutit kwena me Ker-ri gikato ki iye i kare-ni.

⁶ Ariya acel ma lutit kwena me Ker-ri gikato ki iye obedo aunauna. Jo mungak, lupwonye dini, ki luwibye giweko dano gibedo ki tam ma pe tye atir i kom ticwa. Ka wadiwa, jo ma wangeyogi, ki lutic luwotwa guye lok goba magi gitwero keto lyeto i komwa me juko tic pi Jehovah woko ki me juko tito kwena. I lobe mukene, lumonewa giburo utmegiwa, gilwenyo i komgi, gimakogi, nyo bene gitweyogi i buc. Timgi meno pe weko wabedo ki ur. Yecu otito woko con ni: “Jo me rok ducu bikwerowu pi nyinga.” (Mat. 24:9) Aunauna ma wakato ki iye-ni nyuto ka maleng ni watye ki cwak pa Jehovah. (Mat. 5:11, 12) Catan aye tye i nge adegadega meno. Ento Yecu tye ki teko madwong loyo pa Catan! Ki kony pa Yecu, kwena maber-ri tye ka o bot dano ma i rok ducu. Kong dong wanenu ariya mukene ma latelawa Yecu Kricito tye ka konyowa me loyone.

7. Gin ango ma moko boti ni Niyabo 14:6, 7 tye ka cobbe?

⁷ Ariya mukene ma wakemme kwede ka watye ka tito kwena aye ni dano giloko leb mapol mapatpat. I niyabo ma Yecu omiyo bot lakwena Jon, en otito ni i karewa-ni lutit kwena ma Ker-ri gibiloyo ariya man. (Kwan Niyabo 14:6, 7.) I yo ma nining? Watye ka miyo kare ki dano mapol kit ma watwero kwede me jolo kwena me Ker-ri. I kare-ni, dano ma i twok lobo ducu gitwero kwano jami ma jenge i kom Baibul ki i kabedowa me Intanet me jw.org pien tye ki ngec i leb makato 1,000 kulu! Lukiko Madit oye ni kitwero gonyo buk me Bed ki Kwo Maber Nakanaka!—ma meno aye buk ma pire tek loyo ma watiyo kwede me loko dano wek gudok lupwonnye—i leb makato 700 kulu! Pwony ma jenge i Baibul bene tye nonge macalo vidio pi ludingit ki bukke ma kicoyo i braille pi lutowang. Watye ka neno cobbe pa lok pa lunebi mapol me Baibul. Dano me “rok ma lebgi patpat” gitye ka pwonyo loko “leb ma atir,” ma en aye lok ada me Baibul. (Jek. 8:23; Jep. 3:9, NWT) Tic man ducu tye ka cobbe kakare i te tela pa Yecu Kricito.

8. Adwogi maber ango ma ticwa me tito kwena dong okelo?

⁸ I kare-ni, dano makato 8,000,000 i lobe 240 gitye ka ribbe ki dul pa Jehovah, dok mwaka ki mwaka, dano ma welgi kato 100,000 kulu ginongo batija! Ento gin ma pire tek loyo wel aye kit pa Lukricitayo nyo, ‘kit pa dano manyen,’ ma lupwonnye manyen magi gidongo. (Kol. 3:8-10) Jo mapol i kingi  guweko tim me tarwang, tim gero, cwiny me apokapoka, ki cwiny me maro lobogi mukato kare woko. Lok pa lanebi ma kicoyo i Icaya 2:4 tye ka cobbe; ‘pe dong gitye ka medde ki pwonyo lweny.’ Ka wawoto ki tute matek me ruko kit pa dano manyen, wakonyo me ywayo dano i dul pa Lubanga, dok wanyuto ka maleng ni watye ka lubo latelawa Yecu Kricito. (Jon 13:35; 1 Pet. 2:12) Pingo jami ma kit meno timme? Pien Yecu tye ka miniwa kony ma wamito.

9. Ma lubbe ki Matayo 24:45-47, gin ango ma kitito madok i kom kare me agikki?

⁹ Kwan Matayo 24:45-47. Yecu otito ni i kare me agikki, ebicimo “lagwok ot ma lagen dok maryek” me miyo cam me cwiny. Pi meno, watye ki gen ni lagwok ot man tye ka tic matek i karewa-ni. Man aye gin ma tye ka timme kikome. Latelawa tye ka tic ki gurup pa co ma kiwirogi-ni me miyo bot jo pa Lubanga kacel ki jo ma gitye ki miti “camgi [me cwiny] i kare ma mitte.” Co magi pe ginene calo gitye ki twero i kom niye pa jo mukene. (2 Kor. 1:24) Me ka meno, giye ni Yecu Kricito aye obedo “latel ki lami-cik” pa jone.—Ic. 55:4.

10. Buk mene ki i kin bukke ma kinyutogi i cal-li ma okonyi me moko tammi me cako tic pi Jehovah?

¹⁰ Cakke i mwaka 1919, lagwok ot ma lagen oyubo bukke mapatpat ma omiyo ki jo manyen kare me pwonyo lok ada ma i Lok pa Lubanga pi tyen mukwongo. I mwaka 1921, lagwok ot ma lagen oyubo buk me The Harp of God me konyo jo ma gitye ki miti me pwonyo lok ada ma pigi tego me Baibul. Ka kare woto ki kato, lagwok  ot ma lagen obedo ka yubo buke mukene. Buk mene ma okonyi me ngeyo ki maro Wonwa me polo? Tika obedo “Let God Be True,” The Truth That Leads to Eternal Life, You Can Live Forever in Paradise on Earth, Ngec ma Terowa i Kwo ma Pe Tum, Baibul Mono Ada Pwonyo Gin Ango?, Baibul Twero Pwonyowa Gin Ango?, nyo bukwa manyen me Bed ki Kwo Maber Nakanaka!? Bukke magi ducu kiyubogi me konyowa me loko dano wek gudok lulub kor Yecu. Dok onongo gubedo gin ma wamito kikome i kare ma kigoyogi.

11. Pingo pire tek adada ni wan ducu wanong cam me cwiny?

¹¹ Pe jo manyen keken aye myero gubed ki ngec matut i kom Jehovah ki Baibul. Wan ducu wamito ngec matut. Lakwena Paulo owaco ni: “Cam matek tye pi jo muteggi.” Paulo omedde ni keto i tic jami ma wapwonyo bikonyowa “me poko gin maber ki gin marac.” (Ibru 5:14) I kare man ma kit pa dano oballe adada-ni, twero bedo tek adada me lubo rwom me kit ma atir pa Jehovah. Ento Yecu tye ka neno ni wapwonyo jami ducu ma mitte me konyowa wek niyewa obed matek. Wanongo pwonnye meno ki i Lok pa Lubanga, ma en aye Baibul. Lagwok ot ma lagen yubo dok poko cam me cwiny man i te tela pa Yecu.

12. Calo Yecu, i yo ma nining ma wan wamiyo ki nying Lubanga deyo ma opore pire?

¹² Calo Yecu, wan bene wamiyo ki nying Lubanga deyo mupore pire. (Jon 17:6, 26) Me labolle, i mwaka 1931 wacako tic ki nying ma wanongo ki i Ginacoya ni Lucaden pa Jehovah. I timo meno, wanyuto kit ma nying Lubanga pire tek kwede botwa dok ni wamito ni kilwongwa ki nying Wonwa me polo. (Ic. 43:10-12) Dok nicakke i Oktoba me  mwaka meno, nying Lubanga ocako katti i pok nge Wi Lubele ducu. Medo i kom meno, Baibulwa me New World Translation of the Holy Scriptures odwoko nying Lubanga cen i kabedo ducu ka ma onongo tye iye yam con. Man pat adada ki dini pa Lukricitayo ata-ni ma gukwanyo nying Jehovah woko ki i Baibul ma gugonyo!

13. Gin ango ma weko imoko ni Yecu tye ka tic ki “lagwok ot ma lagen dok maryek” i kare-ni? (Jon 6:68)

¹³ Yecu otiyo ki “lagwok ot ma lagen dok maryek,” me yubo dul mo maber adada i lobo ma telo yo i woro me ada. In iwinyo nining i kom dul meno? Twero bedo ni iwinyo calo lakwena Petero ma owaco bot Yecu ni: “Wabicito bot anga? In itye ki lok me kwo ma pe tum.” (Jon 6:68) Onongo wabibedo kwene i kare-ni kono pe wanongo kare me donyo i dul pa Jehovah? Yecu tiyo ki dul man me neno ni wanongo cam me cwiny. En bene pwonyowa kit me cobo ticwa me pwony kore ki kore. Medo i kom meno, Yecu konyowa me ruko “kit pa dano manyen,” wek wayom cwiny Jehovah.—Ep. 4:24.

14. Adwogi maber ango ma inongo ki i bedo i dul pa Jehovah i kare me two Korona?

¹⁴ Yecu miniwa tira me ryeko i kare me peko. Adwogi maber ma wanongo ki i tira meno onen woko ka maleng i kare ma two Korona ocakke. Kadi bed dano mapol me lobo-ni onongo pe gingeyo gin ma myero gitim, Yecu oneno ni wanongo tira mabeco wek wamedde ki gwokke. Kicuko cwinywa ni omyero waruk labo um ka watye i kin lwak dok wabed ma nongo  kinwa bor ki jo mukene. Kipoyo wi luelda ni omyero gubed ka kubbe ki jo ducu me kacokke kare ki kare kun nongo gingeyo jami me kom kacel ki jami me cwiny ma gimito. (Ic. 32:1, 2) Wabedo ka nongo tira kacel ki cuko cwiny mukene ki i Lok Angeya Mua ki Bot Lukiko Madit.

15. Tira ango ma kimiyowa madok i kom cokkewa ki tito kwena i kare me two Korona, dok adwogine obedo nining?

¹⁵ I kare me two Korona, wanongo bene tira i kom kit ma cokke myero obed kwede ki kit me nywako i tic me pwony. Cutcut wacako kubbe pi cokke, gure me adwol, ki gure madito kun watiyo ki Intanet nyo cim. Wacako bene tito kwena kun polle watiyo ki cim nyo wacoyo waraga. Jehovah ogoyo laane i tutewa. Jang gang kal mapol gumiyo ripot ni wel lutit kwena omedde adada. Ki lok ada, lutit kwena mapol gunongo adwogi maber ma ocuko cwinygi adada i kare man.—Nen bok ma wiye tye ni “ Jehovah Goyo Laane i Kom Ticwa me Tito Kwena.”

16. Gin ango ma watwero bedo ki gen iye?

¹⁶ Twero bedo ni jo mogo gutamo ni dulwa tye ka keto gingi mukato kare woko i kare me two Korona. Ento kare ki kare, onen woko ka maleng ni tira ma wanongo obedo me ryeko. (Mat. 11:19) Dok ka wawoto ki lwodo yo me mar ma Yecu tye ka telo kwede jone, wabedo ki gen ni kadi bed gin ango otimme i anyim, Jehovah ki Wode me amara gibibedo kwedwa.—Kwan Jo Ibru 13:5, 6.

17. Iwinyo nining me tic i te tela pa Yecu?

¹⁷ Pud dong watye ki pwoc madit ya me tic i te tela pa Laditwa Yecu! Watye i dul ma jami calo tekwaro, rok, ki leb mapatpat pa jone pe kelo apokapoka i kingi. Wanongo tira muromo ki i Baibul dok wanongo pwonnye ducu ma wamito me cobo ticwa me pwony kakare. Kitye ka pwonyo wan ducu ki acel acel kit me ruko kit pa dano manyen, dok watye ka pwonnye me nyuto mar i kinwa. Watye ki awaka madit adada pien Yecu obedo Latel Wiwa!