1, 2. Jehovah kweyo cwinywa nining ka watye ka wok ki i atematema, dok cikke mene ma wanongo i Lokke?

OMEGO mo ma wiye nono obedo ka tam i kom ngo ma kicoyo i 1 Jo Korint 7:28, ma waco ni “jo ma nyomme gibinongo ayelayela me kwo.” Omego-ni oloko ki laelda mo munyomme kun penye ni: “‘Ayelayela’ man obedo ngo, dok atwero lweny kwede nining ka anyomme?” Ma peya laelda-ni ogamo lapeny meno, en owaco ki omego man ni kong otam i kom lok mukene ma lakwena Paulo ocoyo ni: “Lubanga ma kweyo cwiny dano ducu. En kweyo cwinywa i can ducu ma walimo.”​—2 Jo Korint 1:3, 4.

² Wangeyo ni Wonwa Jehovah, marowa, dok kweyo cwinywa ka watye ka wok ki i kwo matek. Wi twero po i kom kare mogo ma Jehovah okonyi dok omini tira kun tiyo ki Lokke. Watwero bedo labongo akalakala mo ni Jehovah mito gin maber loyo piwa, kit ma en otimo kwede  pi luticce me kare macon.​—Kwan Jeremia 29:11, 12.

3. Lapeny mene ma wabigamogi i pwony man?

³ Pol kare, bedo yot botwa me kanyo pekki ki ayelayela ka wangeyo gin ma tye ka kelogi. Ci dong pingo wakemme ki ayelayela i nyomwa nyo i gangiwa? Dok labol mene ma kicoyo i Baibul ki

ma otimme i karewa-ni ma twero konyowa me nongo kwe cwiny? Kong dong wanen lagam pi lapeny magi ki kit ma watwero kanyo kwede ki atematema.

4, 5. Ayelayela ango ma laco gin ki dako gitwero kato ki iye?

⁴ I kare ma Jehovah ocweyo dako mukwongo, en okele bot laco ci Kawa odoko dako pa Adam. Jehovah owaco ni: “Laco weko wonne ki minne, moko i kom dakone likang, gin aryo gidoko kom acel.” (Acakki 2:24) Ngene kene ni wan ducu watye ki roc. (Jo Roma 3:23) Pi meno, ka laco gin ki dako gunyomme, peko twero bino i kingi. Me labolle, ma pud peya gunyomme, onongo mitte ni dako obed lawiny bot lunyodone. Ento Lok pa Lubanga waco ni i nge nyom, laco doko lawi dakone. (1 Jo Korint 11:3) I acakkine, twero bedo tek ki laco me telo wi dakone. Dok twero bedo tek ki dako me bedo lawiny bot cware ma ka winyo lunyodone. Ki bene ka jo moni pud gunyomme nyen, gitwero bedo ki peko i kingi ki wadigi, dok man bene twero bedo macalo atematema.

⁵ Tam kong i kom kit ma laco gin ki dakone gitwero winyo kwede ka guniang-ni gibibedo ki latin. Kadi bed ni cwinygi twero bedo yom, ento bene pol kare nongo gitye ki par. Gitwero bedo ki par ka ce ic-ce bibedo maber, ki dok kit ma yotkom latin bibedo kwede. Dok bene gingeyo ni man bimito cente madit. I nge nywalo latin, luot myero gutim alokaloka i kwogi. Dako myero ocwal cawa malac i gwoko latin. Pi meno, laco ki dako pe gitwero nongo cawa me bedo kacel kit ma onongo gitimo kwede con. Jami mapol bene nongo mitte ki bot laco. Myero onen ni emiyo jami ma mitte pi dakone ki latinne.

6-8. Jo munyomme gitwero winyo nining ka pe gitwero nywal?

⁶ Jo munyomme mogo bene dok gikemme ki peko mukene. Twero bedo ni gimito latin ki kwok matino, ento nongo pe gitwero nywal. Ka dako pe twero gamo ic, ci cwinye twero tur adada. (Carolok 13:12) I kare me Baibul, onongo pire tek ni mon myero gunyomme dok gunywal lutino. Meno aye tyen lok muweko cwiny Lakeri, dako pa Yakobo otur adada pien ni en onongo pe twero gamo ic calo laminne. (Acakki 30:1, 2) I lobo mogo i kare-ni, jo mukene gitamo ni pire tek adada me bedo ki lutino. Dano pol kare gipenyo lumiconari ma gitye i lobogi pingo gipe ki latin mo. Kadi bed lumiconari magi gutemme me tittigi, jo mukene pud dok giwaco ni, “Aai, wabilego piri!”

⁷ Nen kong dok labol mukene. Lamego  mo ma bedo i England onongo mito lutino ki kwok matino. I kare ma en oniang ni pe ebinywalo latin mo keken, cwinye otur adada. En kacel ki cware gumoko tamgi me gwoko latin ma pe meggi wek obed calo meggi. Ento laminwa-ni pud obedo ki cwercwiny pi kare mo. En owaco ni, “Onongo angeyo ni gwoko latin pa ngat mo calo megi pe rom ki ma inywalo anywala.”

⁸ Baibul waco ni ‘dako gibilaro ka onywal.’ (1 Temceo 2:15) Ento man pe tyen lokke ni en binongo kwo ma pe tum pien ni onywalo lutino. Ci dong tyeng man niange ningo? Min latin keto cwinye ka gwoko lutino kacel ki gange. Man twero gwokke ki i jami calo kwoto nying jo mukene nyo rwako wiye i lok ma pe kwake. (1 Temceo 5:13) Kadi bed kumeno, en pud twero bedo ki peko i nyomgi nyo i gange.

9. Peko ango mukene ma jo munyomme gitwero kemme kwede?

⁹ I kin pekki ma jo munyomme mogo gikemme kwede aye ka ngat acel i kingi oto. Kadi bed ni onongo gitamo ni gin ma kit meno pe bitimme i komgi, jo mapol gukanyo peko man. Lukricitayo gitye ki gen i kom nicer, dok man kweyo cwinygi adada. (Jon 5:28, 29) Wonwa Jehovah, ocikke me timo jami mapol adada piwa ka watye ka wok ki i kwo matek. Kong dong wanen kit ma lutic pa Jehovah mogo gunongo kwede ki kwe cwiny man ki kit ma okonyogi kwede.

10. Anna onongo kwe cwiny nining? (Nen cal ma i pot karatac 3.)

¹⁰ Tam kong i kom gin mutimme i kom Anna, lapal cwiny Elkana. En onongo mito nywal adada, ento jamine onongo pe tye ka wot tung cinge. Kadi bed kumeno, nyeke Penina onongo tye ki lutino mapol. (Kwan 1 Camuel 1:4-7.) Medo i kom peko man, Penina onongo bedo ka nywaro Anna “mwaka ki mwaka.” Man onongo cwero cwiny Anna adada. Gin ango ma en otimo me kweyo cwinye? En olego bot Jehovah. Anna bene ocito wa i ot me woro Jehovah dok olego pi cawa malac. En olego Jehovah ni omine latin laco, dok en onongo geno ni Jehovah bikonye. I nge lega, cwinye okwe dok “wange odoko leng.” (1 Camuel 1:12, 17, 18) En onongo ngeyo ni Jehovah bimine latin laco nyo bikweyo cwinye i yo mo olo.

11. Lega twero kweyo cwinywa nining?

¹¹ Wabikemme ki atematema mapol pien watye ki roc dok wakwo i lobo pa Catan. (1 Jon 5:19) Ento watwero nongo kony. Watwero lega bot Jehovah, “Lubanga ma kweyo cwiny  dano ducu.” Meno aye gin ma Anna otimo. En otito ki Jehovah kit ma ewinyo kwede kikome dok obako doge pi kony. I yo acel-li, ka watye ka kato ki i kwo matek, omyero pe wagik ki tito pekowa bot Jehovah keken. Myero wabak dogwa bote pi kony dok wawacce kit ma wawinyo kwede kikome.​—Jo Pilipi 4:6, 7.

12. Gin ango ma okonyo Anna me bedo ki yomcwiny kadi bed ni onongo en tye ka wok ki i atematema?

¹² Cwinywa twero cwer adada pien wape ki latin mo nyo warwenyo ngat ma wamaro i to. Ento pud watwero nongo kwe cwiny. Tam kong i kom labol pa Anna lamego mo ma okwo i kare pa Yecu. I nge bedo i ot gin ki cware pi mwaka abiro keken, cware oto woko. Dok nen calo en onongo pud pe ki latin mo keken. Ento gin ango ma okonye? “En yam pe a ki i ot pa Lubanga.” Kadi wa i kare ma Anna tye ki mwaka 84 en onongo pud cito i ot pa Lubanga ka lega ki woro Jehovah. (Luka 2:37) Meno aye gin ma okweyo cwinye dok okonye me bedo ki yomcwiny kadi bed ni en onongo tye ka kato ki i atematema.

13. Lurem ma gigene gitwero konyowa nining kadi bed wadiwa gucwero cwinywa?

¹³ Wan bene watwero nongo kwe cwiny ki bot luremwa ma gigenne ma i kacokke. (Carolok 18:24) Paula onongo tye ki mwaka abic keken i kare ma minne oweko woro Jehovah. Cwiny Paula otur adada, dok jamine onongo pe yot bote. Ento lapainia mo ma nyinge Ann obedo ka cuko cwinye kun nyute mar. Paula owaco ni: “Kadi bed ni Ann onongo pe obedo watta, mar ma en onyuta okweyo cwinya adada. Okonya me medde ki woro Jehovah.” Min Paula dong odwogo cen i kacokke, dok man oweko cwiny Paula yom adada i kare-ni. Cwiny Ann bene yom adada pien ekonyo Paula me medde ki tic pi Jehovah.

14. Adwogi mabeco ango ma wanongo ka wacuko cwiny jo mukene?

 ¹⁴ Ka walungo wiwa i timo jami mabeco me konyo jo mukene, pol kare wiwa wil woko i kom peko ma watye kwede. Me labolle, lumege mapol ma gunyomme nyo ma wigi nono, gingeyo ni ka ginywako kwena maber me Ker ki jo mukene, nongo gitye ka tic kacel ki Jehovah me timo mitine. Man keligi yomcwiny. Ki lok ada, wan ducu watwero nyuto ni waparo pi jo mukene ka watitigi lok me kwena maber. Ka watimo jami mabeco pi utmegiwa, wanyikke cok botgi. (Jo Pilipi 2:4) Meno aye gin ma lakwena Paulo otimo. En oketo cwinye me konyo jo mukene ‘macalo mego ma gwoko litinone.’ Paulo  bene ocuko cwiny utmegine “macalo won litino cuko cwiny litinone.”​—Kwan 1 Jo Tecalonika 2:7, 11, 12.

15. Anga ma tye ki tic me pwonyo lutino ki lok i kom Jehovah?

¹⁵ Watwero cuko cwiny jo me ot ma gitye i kacokkewa nining? I kare mogo, jo ma pud ginyen i ada gitwero penyowa me pwonyo lutino ki lok i kom Jehovah nyo me kwano Baibul ki lutinogi. Baibul nyuto ni Jehovah omiyo tic me pwonyo ki tiro lutino bot lunyodogi. (Carolok 23:22; Jo Epeco 6:1-4) Kadi bed ni i kine mogo jo mukene gitwero miyo kony, ento pire tek ni lunyodo myero gupwony lutinogi gin kikomgi. Lunyodo myero gulok ki lutinogi kare ducu.

16. Gin ango ma myero wiwa opo iye ka watye ka konyo lutino mukene?

¹⁶ Ka lunyodo gupenyowa ni wakwan Baibul ki lutinogi, myero wiwa opo ni pe watye ki twero marom ki lunyodo pa lutino magi. I kine mogo bene waromo kwan ki lutino ma lunyodogi pe i ada. Ka watye ka kwan ki lutino ma pe megwa, bedo me ryeko ka wakwano kwedgi ki i ganggi ma nongo lunyodogi nyo Lacaden mo muteggi tye nyo i dye lwak. Ka watimo kit meno, pe wabiweko jo mukene gibedo ki tam marac. Dok i nge kare mo, lunyodo gitwero medde ki pwonyo lutinogi ki lok i kom Jehovah gin ki komgi.

17. Lutino gitwero kweyo cwiny jo ma i pacogi nining?

¹⁷ Jo matino ma gupwonye me maro Jehovah gitwero kweyo ki cuko cwiny jo me ganggi. Gitimo meno nining? Ka giworo lunyodogi dok gitiyo matek me konyogi. Dok bene ka lutino gigwoko gennegi bot Jehovah, ci gicuko cwiny dano ducu ma i pacogi. Ma pud peya Pii Aluka ocorre i lobo, Lamek onongo woro Jehovah. En oloko i kom wode Nua ni: “I lobo ma yam Rwot oceno-ni, latin man aye bimiyo waywe ki aroma tic me cingwa.” Lok meno ocobbe i nge Pii Aluka, i kare ma Jehovah okwanyo cen ma kiceno ki lobo. (Acakki 5:29; 8:21) I kare-ni, lutino ma gigwoko gennegi bot Jehovah bene gitwero cuko cwiny jo ma i pacogi. Dok bene gitwero konyo jo ducu ma i pacogi me kanyo atematema i kare-ni ki bene i anyim.

18. Gin ango ma twero konyowa me kanyo atematema mo keken?

¹⁸ Jo pa Jehovah i kare-ni ginongo kwe cwiny ka gilego bot Jehovah, gilwodo lok i kom labol ma kicoyogi i Baibul, ki dok ka gibedo ki wat macok ki utmege. (Kwan Jabuli 145:18, 19.) Wangeyo ni Jehovah kare ducu nongo tye atera me kweyo cwinywa, dok en bikonyowa me kanyo atematema mo keken ma wakemme kwede i kwowa!