Tika dong inino mo komi obedo lit? Gwok nyo icang oyotyot mumiyo wi dong pe po tutwal iye. Ento, meno pat dok ki kumo. Dakta mo ma nyinge Alan Wolfelt ocoyo i bukke ma wi lokke tye ni, Healing a Spouse’s Grieving Heart ni: “Pe tye gin mo ma watwero timone me ‘weko’ kumo nyo par kwicikwici.” Ento, en dok omedde ni: “I nge kare mo, ka kimini kony, ci cwinyi twero kwe.”

Macalo labol, tam kong i kom kit ma Abraim owinyo kwede i kare ma dakone oto. Baibul wacci, “Abraim odonyo i ot okumo, okoko Cara ki pig wange.” Nen calo Abraim obedo ka kumo pi kare malac. * Labol mukene obedo pa Yakobo, ma onongo kibwolo ni lee tim oneko wode Yucepu woko. En okok pi “kare malac,” dok jo me ode onongo pe gitwero kweyo cwinye. Lacen i nge mwaki mapol, en onongo pud tye ki par madwong pi to pa Yucepu.​—Acakki 23:2; 37:34, 35; 42:36; 45:28.

I kareni bene, dano mapol pud gikumo pi kare malac ka gurwenyo jogi me amara i to. Kong wunenu labol aryo magi.

• “Cwara, Robert, oto i Julai 9, 2008. Odiko me nino meno onongo pe pat ki nino mukene-ni. I nge mato cai, en otimo gin ma onongo timo kare ducu ma peya ocito i dog ticce; okwako kora, dok owacca ni emara. Mwaki abicel dong okato ento pud cwinya cwer adada pi tone. Pe atamo ni cwercwiny pi to pa Rob bia matwal.”​—Gail, mwakane 60.

• “Kadi bed ni dakona oto mwaki 18 angec, pud atye ki par mapol kacel ki kumo pi tone. Ka aneno gin acweya mo mamwonya, acako paro dakona, kun alwodo kit ma en onongo twero nongo kwede yomcwiny me neno gin ma atye ka nenone-ni.”​—Etienne, mwakane 84.

Ngene kene ni, obedo kit pa dano me bedo ka kumo pi kare malac kumeno. Ngat acel acel kumo i yo mapatpat, dong pe bedo me ryeko me ngolo kop i wi ngat mukene pi kit ma en kumo kwede. Kitungcel, bedo ber ka wagwokke ki ngolo kop i wiwa kekenwa ka ce to pa ngat moni okeliwa kumo madit tutwal. Watwero kanyo cwercwiny nining?