1. Lanen ango ma Yecu oweko ki lulub kore, dok gin gudok iye nining? (Nen cal ma tye i pok ngeye.)

YECU obedo ki neno ma atir i kare me ticce me pwony i lobo, dok en mito ni lulub kore bene gubed ki neno ma atir i kom ticgi me pwony. (Jon 4:35, 36) I kare ma Yecu tye kacel ki lupwonnyene, gin onongo gitye ki mit kom i tic me pwony. (Luka 10:1, 5-11, 17) Ento i kare ma kimako Yecu dok kineke, lupwonnyene gurwenyo mit komgi me tito kwena pi kare mo. (Jon 16:32) I nge cere, Yecu ocuko cwinygi ni omyero guket tamgi i tito kwena. Dok i kare ma en odok cen i polo, lupwonnyene gutito kwena ki mit kom adada ma oweko lumonegi gukok i komgi ni: “Wupongo i Jerucalem woko pi pwonywu-ni.”​—Tic 5:28.

2. Jehovah ogoyo laane i kom tic me tito kwena nining?

² Yecu aye obedo ka doro tic ma Lukricitayo me cencwari me acel gubedo ka timo, dok Jehovah ogoyo laane i komgi kun weko welgi medde. Me labolle, i Pentekote i mwaka 33 K.M., dano ma welgi romo 3,000 gunongo batija. (Tic 2:41) Dok wel lupwonnye obedo ka medde ameda. (Tic 6:7) Kadi bed kit meno, Yecu onongo otito con ni tic me tito kwena binyako nyige adada i kare me agikki.​—Jon 14:12; Tic 1:8.

3-4. Pingo jo mukene ginongo ni tic me pwony tek, dok gin ango ma wabinyamo i pwony man?

³ Wan ducu watute matek me bedo ki neno ma atir i ticwa me pwony. I lobe mukene, timo meno pe tek. Pingo? Pien dano mapol adada gitye ki miti me kwano Baibul ma oweko jo mogo myero gukur wang ma Lacaden mo tye ma  twero kwan kwedgi! Ento i but lobo mukene, lutit kwena ginongo tic me tito kwena tek adada; pol kare pe ginongo dano gang, dok jo ma ginongo pe ginyuto miti i Baibul.

⁴ Ka ibedo ka ma tito kwena tek iye adada, ci tam ma kimiyo i pwony man twero konyi. Wabineno gin ma jo mogo gutimo wek girwatte ki jo mapol i ticgi me pwony. Dok wabineno pingo omyero wabed ki neno mupore kadi bed dano gijolo kwenawa nyo pe.

5. Ariya mapatpat ango ma Lucaden mapol gikato ki iye?

⁵ Pol pa Lucaden ginongo ni tek adada me rwatte ki dano i gangigi. Lutit kwena mogo gibedo i kabedo ma nongo pe giromo rwatte ki dano ma iye. Twero bedo ni gangi magi kirumo woko ki cel dok tye ki askari ma pe ye ni dano gudony ka rwod ot aye pe olwongogi. Lutit kwena mogo gicito i ot ki ot labongo peko mo, ento pe gimaro nongo dano gang. Lutit kwena mukene doki, gitito kwena i caro ka ma dano manok keken aye gibedo iye. Lutit kwena magi gitwero wot pi mairo mapol wek gurwatte ki rwod gang acel​—ento i kare mogo bene ginongo ngat meno pe gang! Ka warwatte ki ariya magi, pe omyero wail cingwa woko. Ngo ma omyero watim wek walo ariya magi dok walok ki dano mapol i ticwa me pwony?

6. I yo ma nining ma lutit kwena girom aroma ki lumak rec?

⁶ Yecu oporo tic me tito kwena ki tic pa lumak rec. (Mar. 1:17) Lumak rec mogo gitiyo pi nino mapol labongo mako kadi wa rec acel. Ento pe giilo cinggi woko; giloko dirogi aye. Giloko cawa, kabedo, kacel ki yo me mako rec. Wan bene watwero timo alokaloka marom i ticwa me pwony. Nen kong tam magi.

7. Adwogi ango ma wanongo ka watito kwena i cawa mapatpat?

⁷ Tute me rwatte ki dano i cawa mapatpat. Wabirwatte ki jo mapol ka watito kwena i cawa ma gitwero bedo iye gang. Ngene kene ni dano ducu wang ma gudwogo gang! Omege ki lumege mapol gimaro tito kwena i dyeceng ki otyeno pien gimaro nongo dano gang i cawa meno. Medo i kom meno, rwod ot bedo agonya dok nongo tye atera me lok i cawa meno. Nyo gwok itwero nongo ni, tye me kony me lubo tam ma laelda mo ma nyinge David omiyo. En owaco ni i nge tito kwena pi cawa acel nyo aryo i wang tic mo, en kacel ki latit kwena lawote gidok cen i gangi ma pe gunongo iye dano wiati-ni. En owaco ni, “Abedo ki ur madit pien wanongo dano mapol gang tyen me aryone ma wadok cen ka lok kwedgi.” *

8. Watwero lubo tam ma i Latitlok 11:6 ka odok i kom ticwa me pwony nining?

⁸ Pe myero wail cingwa woko. Ginacoya ma pwony man jenge iye poyo wiwa i kom cwiny ma omyero wabed kwede. (Kwan Latitlok 11:6.) David, ma kiloko i kome con-ni pe oilo cinge. I ot mo acel, en obedo ka tute matek me rwatte ki rwod ot ci lacen orwatte kwede. Laco-ni onongo tye ki miti madwong me nyamo Baibul dok owaco ni, “Abedo kany dong pi mwaki aboro, ento ma naka yang Lacaden pa Jehovah mo keken peya oo ganga.” David owaco ni, “Aniang ni ka watute matek ci  dong wanongo ngat moni gang, pol kare en jolo kwena ma watito.”

9. Gin ango ma Lucaden mukene gutimo wek girwatte ki jo ma nongogi gang tek?

⁹ Tem tito kwena i kabedo mapat. Me rwatte ki jo ma pol kare pe kinongogi gang, lutit kwena mogo giloko kabedo ma gitito iye kwena. Me labolle, tito kwena i teng gudi ki miyo caden kun watiyo ki lalor bukke obedo yo maber me rwatte ki jo ma gibedo i odi ma kirumo woko ki cel ka ma pe watwero rwatte kwedgi ka watye ka tito kwena i ot ki ot. Man miyo kare ki Lucaden me lok wang ki wang ki jo ma gibedo i odi magi. Medo i kom meno, lutit kwena mapol gunongo ni pol pa dano giye lok kwedwa nyo gigamo gin akwana ka warwatte kwedgi i bar namo, i cuk, nyo i kabedo me tiyo biacara. Floiran, ma obedo laneno me adwol i lobo Bolivia, owaco ni: “Wamaro cito i cuk ki kabedo me biacara i kine ka cawa abiro me o cawa abongwen me dyeceng i cawa ma nongo lucatwil tic pe omakogi. Pol kare wanyamo lok maber dok i kare mogo wacako wa kwano Baibul kwedgi.”

10. Yo mapatpat ango ma itwero tic kwede me rwatte ki dano i ticci me pwony?

¹⁰ Tem yo mapat me tito kwena. Go kong ni dong iyelle tyen mapol me rwatte ki ngat moni wang ki wang. Icito i gange i cawa mapatpat ento peya inonge gang. Tika tye yo mukene ma watwero tic kwede me tito kwena ki ngat meno? Laminwa Katarína, owaco ni, “Acoyo waraga bot jo ma pe anongogi gang, kun acoyo gin ma onongo abiwaccigi ka arwatte kwedgi wang ki wang.” Ngo ma wapwonyo ki bot  Katarína? Tute me o bot dano ducu ma i wang ticwu kun itiyo ki yo mapatpat ka itye i ticci me pwony.

11. Pingo jo mukene pe ginyuto miti i kom kwenawa?

¹¹ Jo mukene pe ginyuto miti i kom kwenawa. Pe gitamo ni omyero ginge lok i kom Lubanga nyo Baibul. Pe giye i kom Lubanga pien gineno pekki mapol i lobo. Gikwero Baibul pien gineno tim gobagoba pa lutela dini ma giwaco ni gikwo ma lubbe ki Baibul. Jo mukene gulungo wigi i dog ticgi, i gwoko jo me odigi, nyo i kom pekkigi, dok pe gineno kit ma Baibul twero konyogi kwede. Watwero medde ki bedo ki yomcwiny nining ka jo ma watito kwena botgi pe gineno kit ma kwena ma watito pire tek kwede?

12. Keto i tic lok ma i Jo Pilipi 2:4 twero konyowa i tic me pwony nining?

¹² Nyut ni iparo pi jo mukene. Jo mapol ma onongo i acakkine pe ginyuto miti, lacen gujolo kwena maber i kare ma guniang ni latit kwena moni paro pigi adada. (Kwan Jo Pilipi 2:4.) Me labolle, David, ma kiloko i kome con-ni, owaco ni, “Ka ngat moni owaco ni pe etye ki miti i kom lokwa, wadwoko Baibul ki bukkewa i kicawa ci wawacce ni: ‘Amito niang pingo iwinyo kit meno.’” Dano gitwero niang ka ngat moni paro pigi. Wigi twero wil woko i kom lok ma wawaco, ento wigi pe biwil i kom kit ma lokwa ogudogi kwede. Kadi bed ni rwod ot pe oye ni waloki, watwero nyuto ni waparo pire ki i kit ma watimme kwede kun wanyuto cwiny me lirem.

13. Watwero loko kwenawa wek obed ma rwatte ki miti pa rwod ot acel acel nining?

¹³ Wanyuto ni waparo pi rwod ot ka waloko kwenawa wek obed ma rwatte ki mitine. Me labolle, tika waneno lanyut mo ni lutino tye i gang meno? Lunywalgi gitwero bedo ki miti me niang tam ma Baibul miyo madok i kom kit me gwoko lutino nyo kit me bedo ki yomcwiny i kwo me ot. Tika waneno kopulo mapol i doggolagi? Watwero moko tamwa me lok i kom tim aranyi ki lworo ma tye madwong adada i lobo-ni, ci i nge meno rwod ot twero bedo ki miti me niang i kom kit ma kibicobo kwede tim aranyi matwal. I yo mo keken, tute me konyo jo ma gitye ka winyo lokki me neno kit ma tam ma i Baibul twero konyogi kwede. Katarína, ma kiloko i kome con-ni, owaco ni, “Abedo ka poyo wiya kekena i kom kit ma ada oyubo kwede kwona.” Macalo adwogine, Katarína tito  kwena ki tekcwiny, dok pol kare jo ma en loko kwedgi gineno meno.

14. Ma lubbe ki Carolok 27:17, lutit kwena gitwero konnye i kingi nining ka gitye i tic me pwony?

¹⁴ Nong kony ki bot jo mukene. I cencwari me acel, Paulo onywako dirone me tito kwena ki pwony kacel ki Temceo dok en ocuko cwiny Temceo me tic ki diro magi me konyo jo mukene. (1 Kor. 4:17) Calo Temceo, wan bene watwero nongo adwogi maber ki bot jo ma gitye ki diro i kacokkewa. (Kwan Carolok 27:17.) Nen kong labol pa omego mo ma nyinge Shawn. Pi kare mo, en onongo tiyo macalo painia i caro mo ma pol pa danone guyeng woko ki dinigi. Ngo ma en otimo me medde ki bedo ki yomcwiny? En owaco ni, “Ka onongo twere, an onongo atiyo ki latit kwena mukene. Watiyo ki kare ma nongo watye ka wot i kin gangi me dongo dirowa i tic me pwony. Me labolle, onongo wanyamo gin ma rwod ot owaco ki kit ma wagamme kwede. Ci onongo wanyamo kit ma wabidok kwede i yo mapat ka rwod ot owaco lok acel-li i nino mukene.”

15. Pingo lega pire tek i ticwa me pwony?

¹⁵ Leg Jehovah pi kony. Leg Jehovah pi kony kare ducu ma inywako i tic me pwony. Wamito kony pa cwiny maleng i jami ducu ma watimo. (Jab. 127:1; Luka 11:13) Ka itye ka penyo pi kony pa cwiny maleng pa Jehovah i lega, tite gin ma imito kikome. Me labolle, leg Jehovah wek onyutti ngat ma mito pwonyo lok i kome dok tye atera me winyo lokki. Ci omyero itute matek me tito kwena bot jo ducu ma irwatte kwedgi.

16. Pingo kwan piwa kenwa pire tek adada pi ticwa me pwony?

¹⁶ Ket cawa me kwan piri keni. Lok pa Lubanga waco ni: “Wuniang i gin ma Lubanga mito, gin maber, ma yomo cwinye, ma roc mo pe iye.” (Rom. 12:2) Ka wakwanyo kare me kwan, ci wabingeyo Lubanga adada. Man weko ka watito kwena bot jo mukene, gibiniang woko ni waye i kom gin ma watye ka wacone i ticwa me pwony. Katarína, ma kiloko i kome con-ni, owaco ni: “I kare mo mukato angec, aniang woko ni omyero ajing niyena ka odok i kom pwony mogo me Baibul. Pi meno, akwanyo kare me ngiyo i yo matut gin ma moko ni Lacwec tye ada, ni Baibul ada obedo Lok pa Lubanga, dok ni Lubanga tye ki dul ma cung pire i kare-ni.” Katarína owaco ni kwan pire kene ojingo niyene dok omedo yomcwinye i ticce me pwony.

17. Pingo Yecu omedde ki bedo ki neno ma atir i ticce me pwony?

¹⁷ Yecu obedo ki neno ma atir kadi bed jo mukene onongo pe gimito winyo kwenane. Pingo? En onongo ngeyo kit ma ada bikonyo kwede jo magi, dok onongo mito miyo kare ki jo mapol me winyo kwena me Ker-ri. En bene onongo ngeyo ni jo mogo ma i acakkine pe gunyuto miti lacen onongo gibijolo kwenane. Nen kong gin mutimme i kom jo me gang pa Yecugi kikome. Pi mwaki adek ki nucu ducu ma en obedo ka tito kwena, pe tye omine mo keken ma odoko lapwonnyene. (Jon 7:5) Ento, i nge cere gin gudoko Lukricitayo.​—Tic 1:14.

18. Pingo wamedde ki tito kwena?

¹⁸ Pe wangeyo anga ma bidoko Lacaden pa Jehovah. Jo mogo gitero kare malac me jolo ada loyo jo mukene. Kadi wa jo ma gikwero winyo lokwa gineno kitwa  mabeco ki nenowa ma atir, dok lacen giromo cako miyo “deyo bot Lubanga.”​—1 Pet. 2:12.

19. Ma lubbe ki 1 Jo Korint 3:6, 7, gin ango ma omyero waniang iye?

¹⁹ Kadi bed wapito kodi dok waonyo pii iye, wiwa myero opo ni Lubanga aye weko dongo. (Kwan 1 Jo Korint 3:6, 7.) Omego mo ma bedo i lobo Ethiopia ma nyinge Getahun, owaco ni: “Pi mwaki makato 20, an kena aye onongo abedo Lacaden ma bedo i wang tic mo ma pe kimaro tito iye kwena. Ento i kare-ni watye lutit kwena 14. Lutit kwena apar wiye adek gunongo batija, ma i kine tye iye dakona ki lutinowa adek. Pol kare wabedo ki dano 32 i cokkewa.” Getahun cwinye yom adada ni emedde ki diyo cwinye dok etito kwena kun ekuro Jehovah wek okel jo ma cwinygi atir i dulle!​—Jon 6:44.

20. I yo ma nining ma watye calo lumi kony ma gucito ka laro dano?

²⁰ Jehovah neno kwo pa dano ducu ni pire tek. En omiyowa mot me tic kacel ki Wode me coko dano ki i rok ducu ma peya agikki me lobo man obino. (Ag. 2:7) Ticwa me tito kwena kiromo porone ki tic me laro kwo pa dano. Dok wan watye calo gurup pa lumi kony ma kicwalogi me laro jo ma yeyagi tye ka lwiny. Kadi bed jo manok keken aye kitwero larogi, ento tic ma lumi kony-nyi ducu gitimo pire tek adada. Man bene tye ada ka odok i kom ticwa me pwony. Pe wangeyo dano adi ma kibilarogi ki i lobo pa Catan-ni. Ento Jehovah twero tic ki ngat mo keken me konyogi. Omego Andreas, ma bedo i lobo Bolivia, owaco ni, “Angeyo ni ka ngat mo keken opwonyo ada ci onongo batija, man nongo otwere pien jo mapol gutiyo matek me konye.” Dong omyero wamedde ki bedo ki neno ma atir i kom ticwa me pwony. Ka watimo meno, Jehovah bigoyo laane i komwa dok ticwa me tito kwena bikeliwa yomcwiny madwong adada.