1, 2. (a) Yecu odok i lok pa Petero nining i kare ma en owacce ni opar pire kene? (Nen cal ma tye i pot karatac man.) (b) Pingo Yecu odokke iye kit meno?

LUKWENA pa Yecu gubedo ki ur madit! Gin gutamo ni Yecu bidwoko ker pa jo Icrael i cinggi ento, Yecu owaco botgi ni ebideno can ci eto woko. Lakwena Petero okwongo gamo ni: “Rwot! Gin macalo man pe bitimme i komi wacel.” Ci Yecu ogamme ni: “Dok cen i ngeya in Catan! Idoko ariya woko bota, pien tammi pe lubo pa Lubanga, ento pa dano.”​—Matayo 16:21-23; Tic pa Lukwena 1:6.

² I kare ma Yecu owaco meno, En onyuto ka maleng ni tam pa Jehovah pat adada ki tam pa jo me lobo man ma Catan dorogi-ni. (1 Jon 5:19) Petero ocuko cwiny Yecu me bedo ki tam me ‘par piri keni’ ma jo mapol gitye kwede i kare-ni. Ento Yecu onongo ngeyo ni Jehovah mito ni eyubbe pi deno can ki to ma ebikato ki i iye. Yecu omiyo lagam ma nyuto atir ni en ye tam pa Jehovah dok kwero tam pa jo me lobo man.

3. Pingo tek tutwal me ye tam pa Jehovah kun wakwero tam pa jo me lobo?

 ³ Wan kono? Tika watamo calo Jehovah kece watamo calo jo me lobo man? Wan macalo Lukricitayo, watute matek me neno ni jami ma watimo yomo cwiny Lubanga. Ento kit ma watamo kwede kono? Tika watye ka tute me tam calo Jehovah ki dok neno jami kit ma en neno kwede? Timo meno mito keto tek. Ento ki tungcel, yot adada me tam calo jo me lobo. Tye kit meno pien cwiny me lobo-ni aye tye ka doro tam pa jo ma orumowa. (Jo Epeco 2:2) Dano mapol i kare-ni giparo pigi kengi, dok cwinywa twero bwolowa me tam calo gin. Ki lok ada, tek me tam calo Jehovah ento yot adada me tam calo jo me lobo man.

4. (a) Ngo ma bitimme ka waweko tam me lobo aye odoro tamwa? (b) Ngo ma wabinyamo i pwony man?

⁴ Ka waweko ni tam me lobo man aye odoro tamwa, ci watwero doko jo ma tamo pigi kengi dok wacako moko tamwa piwa kenwa. (Marako 7:21, 22) Pi meno pire tek adada ni wapwonnye me tamo ‘tam pa Lubanga ento pe pa dano.’ Pwony man bikonyowa me timo meno. Wabinyamo tyen lok mumiyo neno jami kit ma Jehovah neno kwede pe diyo dano, ento kelo adwogi maber. Wabinyamo bene kit ma watwero gwokke kwede wek tam me lobo man pe odor tamwa. I pwony ma lubo man, wabinyamo kit ma waromo niang kwede tam pa Jehovah i lok mogo ki dok kit ma watwero loko kwede tamme wek odok tamwa.

5. Pingo jo mukene pe gimito ni ngat mo odiigi?

⁵ Jo mukene pe gimito ni ngat mo keken odor tamgi. Gin giwaco ni, “Atamo pira kena.” Meno nongo gitye ka wacci gimito ni gimok tamgi pigi kengi dok gitye ki twero me timone. Gin pe gimito ni ngat mo odorgi nyo odiigi me bedo rom ki jo mukene. * (Nen lok ma tye i tere piny.)

6. (a) Bedo agonya ango ma Jehovah miniwa? (b) Tika bedo agonya man wang coo-ne pe?

⁶ Ber me ngeyo ni kadi waye tam pa Jehovah, pud wabedo agonya me moko tamwa. Buk pa 2 Jo Korint 3:17 tittiwa ni: ‘Ka ma cwiny pa Jehovah tye iye, kunnu bedo agonya bene tye iye.’ Jehovah miniwa bedo agonya me yero kit dano ma wamito ni wabedi. Wan ducu watye ki jami ma iwa maro dok bene watwero yero gin ma yomo cwinywa. Dok meno aye kit Jehovah ocweyowa kwede. Ento meno pe tyen lokke ni watye agonya labongo wang coo mo. (Kwan 1 Petero 2:16.) Ka wamito ngeyo ka gin moni ber nyo rac, Jehovah mito ni wati ki Lokke me timo meno. Tika man obedo gingi nyo tye ki adwogi maber?

7, 8. Tika man obedo gingi me neno gin moni kit ma Jehovah mito ni wanen kwede? Mi labol.

⁷ Waromo porone kit man. Lunywal kare ducu gitute me pwonyo lutinogi kit mabeco. Giromo pwonyogi kit me  bedo jo ma genne, me tic matek, ki me paro pi jo mukene. Jami magi pe keto dic i kom lutino. Me ka meno, nongo lunyodo gitye ka yubo lutinogi pi kwo maber i anyim. Ka lutino gudongo ma gua woko ki gang, ci gibibedo agonya me moko tam pigi kengi. Ka guyero me lubo kwo matir ma lunyodogi opwonyogi kwede, man twero konyogi me moko tam maber dok gigwokke ki i kom pekki, par, kacel ki koko ange.

⁸ Macalo wego ma lamar, Jehovah mito ni lutinone ducu gubed ki kwo ma dong ber loyo. (Icaya 48:17, 18) Pi meno en pwonyowa ki cik ma igi lac ma dok i kom kwo ma opore kacel ki kit ma myero water ki jo mukene. En mito ni wanen jami kit ma en neno kwede dok me kwo ma rwatte ki cikke. Man pe obedo gingi. Me ka meno, weko wadoko ryek dok konyowa me moko tam matir. (Jabuli 92:5; Carolok 2:1-5; Icaya 55:9) Pud watwero bedo agonya me moko tamwa i kom gin ma yomo cwinywa, dok wabimoko tam ma keliwa yomcwiny. (Jabuli 1:2, 3) Ka watye ki tam pa Jehovah, wanongo adwogi mabeco!

9, 10. Gin ango ma nyutu ni tam pa Jehovah ber loyo pa jo me lobo man?

⁹ Tyen lok mukene ma omiyo wamito ni tamwa obed calo pa Jehovah aye ni, tam pa Jehovah tye lamal kato tam me lobo man woko. Jo me lobo-ni gimiyo tam i kom kit me bedo ki yomcwiny i kwo me ot, bedo ki dog tic maber, kit maber, ki dong jami mukene ma kwako kwo. Ento tamgi pol kare pe rwatte ki tam pa Jehovah. Me labolle, lobo-ni pol kare cuko cwiny dano me lubo mitigi kengi dok weko bene dano neno tim tarwang calo gin maber. Dok bene i kine mukene cuko cwiny jo munyomme ni gitwero bedo ki yomcwiny ka gupokke nyo guketo kenygi woko pi tyen lok matinotino. Tam man pe rwatte ki gin ma Baibul pwonyo. Ento tika tam me lobo-ni tiyo maber i kare-ni makato tam me Baibul?

¹⁰ Yecu owaco ni: ‘Ryeko pa Lubanga loyo kop pi ticce ma en otiyo.’ (Matayo 11:19) Kadi bed diro me tet manyen omedde adada i lobo man, ento cobo pekki madongo ma gengowa bedo ki yomcwiny calo lweny, apokapoka me rangi del kom, ki turo cik dong oloyogi woko. Medo i kom meno, lobo-ni tero tim me tarwang calo pe obedo gin marac. Ento jo mapol giye ni tim tarwang turo odi, kelo two mapol dok tye ki adwogi maraco mukene. Ento tam ma a ki bot Jehovah kono? Lukricitayo ma gilubu tam pa Jehovah  gitye ki yomcwiny i odigi, komgi yot, dok gitye ki wat maber ki omege ki lumege i wi lobo ducu. (Icaya 2:4; Tic pa Lukwena 10:34, 35; 1 Jo Korint 6:9-11) Man nyutu ka maleng ni tam pa Jehovah ber loyo tam pa jo me lobo man.

11. Anga ma odoro tam pa Moses, dok man okelo adwogi ango?

¹¹ Lutic pa Jehovah me kare ma okato angec onongo gingeyo ni tam pa Jehovah tye lamal kato ducu. Me labolle, kadi bed ni Moses “gipwonyo ki ryeko ducu pa Luejipt,” en onongo ngeyo ni ryeko me ada a ki bot Jehovah. (Tic pa Lukwena 7:22; Jabuli 90:12) Pi meno en openyo Jehovah ni: “Nyutta kiti, wek angeyi.” (Nia 33:13) Pien Moses oye ni Jehovah odor tamme, Jehovah otiyo kwede me timo jami me aura kun cobo Mitine dok en omiyo ki Moses deyo i kare ma olwongo Moses ni obedo laco ma tye ki niye matek.​—Jo Ibru 11:24-27.

12. Lakwena Paulo omoko tamme kun jenge i kom gin ango?

¹² Lakwena Paulo onongo obedo dano maryek, ma okwano i rwom ma lamal adada, dok onongo loko leb Ibru ki Grik. (Tic pa Lukwena 5:34; 21:37, 39; 22:2, 3) Ento i kare ma onongo mitte ni en omok tamme i kom gin maber ki marac, en okwero ryeko me lobo-ni ci omoko tamme kun jenge i kom lok pa Lubanga. (Kwan Tic pa Lukwena 17:2, 3; 1 Jo Korint 2:6, 7, 13.) Macalo adwogine, en ocobo ticce me pwony maber dok obedo ki gen me nongo mot ma rii nakanaka.​—2 Temceo 4:8.

13. Anga ma tye ki tic me loko tamwa wek wanen jami kit ma Jehovah neno kwede?

¹³ Onen ka maleng ni tam pa Lubanga tye lamal loyo tam pa jo me lobo man. Ka walubo rwom me kwo ma a ki bot Jehovah, ci wabinongo adwogi maber dok wabibedo ki yomcwiny me ada. Ento Jehovah pe bidiyowa me lubo tamme. “Lagwok ot ma lagen dok maryek” pe doro tamwa, kadi wa luelda bene. (Matayo 24:45; 2 Jo Korint 1:24) Wan ducu ki acel acel watye ki tic me loko tamwa piwa kenwa wek wanen jami kit ma Jehovah neno kwede. Watwero timo meno nining?

14, 15. (a) Gin ango ma omyero wabed ka lwodone wek watam calo Jehovah? (b) Pingo myero pe wawek tam me lobo-ni odony i wiwa? Mi labol.

¹⁴ Jo Roma 12:2 wacciwa ni: “Pe wulub tam me lobo man, ento wuwek Lubanga olok tamwu odok nyen, wek omi wuniang i gin ma Lubanga mito, gin maber, ma yomo cwinye, ma roc mo pe iye.” Ginacoya man pwonyowa ni kadi bed ni Lubanga aye onongo pe doro tamwa ma peya wapwonyo ada, pud watwero loko tamwa wek wanen jami kit ma Lubanga neno kwede. Kadi bed ni kit mogo ma walako ki bot lunywalwa ki dong kabedo ma wadongo iye onongo doro tamwa yam con, ento pud watwero medde ki loko tamwa. Dok tamwa bilokke ma lubbe ki gin ma wayero me lwodone kare ducu. Ka walwodo lok ma lubbe ki tam pa Jehovah, ci wabiniang ni tamme kare ducu  tye atir. Man biweko wabedo ki miti me neno jami kit ma Jehovah neno kwede.

¹⁵ Ento wek walok tamwa dok wacak tam calo Jehovah, omyero ‘pe walub tam me lobo man.’ Man tyen lokke ni myero wajuk neno, kwano nyo winyo gin mo keken ma pe rwatte ki tam pa Lubanga. Me konyowa wek waniang kit ma man pire tek kwede, tam kong i kom labol madok i kom gin acama. Ngat ma mito bedo ma kome yot twero yero me camo cam mabeco. Ento tutene ducu konye bibedo pe ka en kare ki kare bene camo cam ma otop! I yo acel-lu, tutewa ducu me pwonyo tam pa Jehovah konye bibedo pe ka waweko tam me lobo-ni donyo i wiwa.

16. Myero wagwokke ki i kom gin ango?

¹⁶ Tika watwero gwokke kwicikwici ki i kom tam me lobo-ni? Pe kumeno, wabibedo ka rwatte ki tam me lobo-ni pien pe watwero a woko ki i lobo man. (1 Jo Korint 5:9, 10) Kadi ka watye ka tito kwena, warwatte ki dano ma gitito tamgi ma pe tye atir ki niyegi me gobagoba. Ento kadi bed pe watwero gwokke kwicikwici ki tam maraco, pe mitte ni waye dok wabed ka lwodone. Calo Yecu, myero wakwer oyotoyot tam ma Catan mito ni wabed ka lwodone. Dok watwero gwokke wek pe wabed ka rwatte atata ki tam me lobo man.​—Kwan Carolok 4:23.

17. Watwero gwokke nining wek pe warwatte ki tam me lobo-ni atata?

¹⁷ Me labolle, myero wayer luwotwa ki diro. Baibul cikowa ni ka wamako lirem macok ki jo ma pe giworo Jehovah, ci wabicako tam bene calo gin. (Carolok 13:20; 1 Jo Korint 15:12, 32, 33) Myero bene wayer jami galowangwa ki diro. Ka wakwero galowang ma nyuto gero, tim tarwang, ki lok ni kwo ocakke pire kene, ci wabigwokke ki i tam “ma gengo dano miyo pe gingeyo Lubanga.”​—2 Jo Korint 10:5.

18, 19. (a) Pingo myero wagwokke adada ki tam me lobo man ma kicwalo lapiny lapiny? (b) Lapeny mene ma omyero wapennye kwede, ki dok pingo?

 ¹⁸ Omyero bene wange dok wakwer tam me lobo-ni kadi bed kicwalo i yo ma pe watwero niang iye oyotoyot. Me labolle, lok angeya mogo kimiyo ma olenge woko kun nongo cwako tam pa pati moni me wibye. Dok lok angeya mukene cwako yub ki jami ma jo me lobo-ni maro. Filim ki bukke mogo giweko tam me “par piri keni” ki tam ni “remo pek loyo pii” nen calo gin maber, dok ma opore. Ento tamgi magi pe rwatte ki tam me Baibul. Baibul waco ni wan kacel ki jo me gangiwa wabibedo ki yomcwiny ka wamaro Jehovah loyo ngat mo keken. (Matayo 22:36-39) Medo i kom meno, ododo mogo ma i bukke, katuun ki filim pa lutino cwako tim me tarwang lapiny lapiny, kadi bed dano gineno calo pe giraco.

¹⁹ Man pe nyutu ni rac me nongo mit pa galowang mupore. Ento myero wapennye kekenwa ni: ‘Tika aniang i kom tam me lobo man kadi bed pe kicwalo atir atir? An mono atye ka gwokke kena kun bene agwoko lutinona ki i yub me telebijon nyo jami akwana maraco? Tika akonyo lutinona me bedo ki neno pa Jehovah wek tam me lobo-ni ma gineno nyo giwinyo pe odor tamgi?’ Ka waniang apokapoka ma tye i kin tam pa Lubanga ki tam me lobo-ni, ci ‘pe wabilubo tam me lobo man.’

20. Ngo ma bimoko anga ma doro tamwa?

²⁰ Myero wiwa opo ni tam a ki i kabedo aryo keken. Me acel ki bot Jehovah, ki dong mukene a ki bot Catan kacel ki lobone. Anga ma tye ka doro tammi? Lagamme tye ni, ngat ma inongo ngec ki bote. Ka wajolo tam me lobo-ni, ci lobo-ni aye bibedo ka doro tamwa dok wabicako timo jami kun waparo piwa kenwa. Pi meno, pire tek tutwal ni wayer ki diro jami ma waneno, wakwano, wawinyo ki dong jami ma walwodo i cwinywa.

21. Ngo ma wabinyamo i pwony ma lubo man?

²¹ I pwony man, waneno ni, wek wabed ki tam pa Jehovah omyero wagwokke adada ki tam me lobo man. Omyero bene walwod tam pa Lubanga wek watam calo en. I pwony ma lubo man, wabineno kit ma watwero timo meno kwede.