1-2. Watwero lubo tam ma kimiyo i Carolok 4:25 nining? Mi labol.

TAM kong i kom labol adek magi. Laminwa mo muteggi tye ka tamo i kom kwo maber ma en obedo kwede con. Kadi bed ni i kare-ni en tye ka wok ki i kwo matek, en pud medde ki timo jami ducu ma en twero pi Jehovah. (1 Kor. 15:58) Nino ducu en goyo kit ma ebikwo kwede ki lupacone kacel ki lureme i lobo manyen. Laminwa mukene doki wiye po ni ngat mo me kacokke ocwero cwinye, ento en oyero me timo kica ki ngat meno. (Kol. 3:13) Omego mo wiye po i kom bal ma en otimo i kare mukato, ento en oyero me keto cwinye i kom medde ki bedo lagen bot Jehovah i kare-ni.​—Jab. 51:10.

² Gin ango marom aroma i kwo pa Lukricitayo adek magi? Gin ducu wigi po i kom jami mutimme i kwogi mukato, ento guyero pe me keto cwinygi iye tutwal. Me ka meno, gitye ka ‘neno anyim atir.’​—Kwan Carolok 4:25.

3. Pingo pire tek ni ‘wanen anyim atir?’

³ Pingo pire tek ni ‘wanen anyim atir?’ Ngat ma bedo ka neno ngeye pe twero wot atir. Man bene rom aroma ki ticwa pi Jehovah. Pe watwero medde ki tic pi Jehovah ki kerowa ducu ka kare ducu wabedo ka tamo pi gin mutimme i kare mukato angec.​—Luka 9:62.

4. Ngo ma wabinyamo i pwony man?

⁴ I pwony man, wabinyamo owic adek ma twero weko wabedo ka keto cwinywa i kom jami mukato angec. Gin aye: (1) paro jami mabeco mutimme con i kwowa, (2) mako lok i cwinywa, ki (3) bedo ma cwinywa pidowa mukato kare woko. Pi owic acel acel, wabineno kit ma cik ma igi lac me Baibul  twero konyowa kwede pe me keto cwinywa i kom “gin mukato angec,” ento me laro “gin ma tye anyim.”​—Pil. 3:13.

5. Owic mene ma Latitlok 7:10 cikowa me gwokke kwede?

⁵ Kwan Latitlok 7:10. Nen ni tyeng man pe waco ni rac me penyo ni, “Pingo jami me kare macon mukato angec onongo ber?” Po i kom jami mabeco mutimme i kwowa obedo mic pa Jehovah botwa. Ento, tyeng man kwanne ni: “Pe myero iwac ni, ‘Pingo jami me kare macon mukato angec ber kato me kare man?’” I yo mukene, owic man tye i poro kwowa macon ki kwowa kombeddi kun watamo ni i kare-ni jami ducu rac. Baibul mo acel ogonyo tyeng man ni: “Pe ipeny ni, ‘Ojone, pingo kwo onongo yot i kare mukato angec?’ Lapeny meno pe nyuto ryeko.”

6. Pingo pe nyuto ryeko me bedo ka tamo ni kwowa macon onongo ber kato ma watye iye kombeddi? Mi labol.

⁶ Pingo pe obedo gin me ryeko me tamo ni kwo ma wakato ki iye con ber kato ma watye iye i kare-ni? Bedo ki par meno weko wiwa po i kom jami mabeco keken mutimme i kwowa macon. Nyo bene twero weko wiwa wil woko i kom pekki ma wakato ki iye con. Me labolle, nen kong gin mutimme i kom jo Icrael. I nge a ki i Ejipt, wigi owil woko oyotoyot i kom kwo matek ma gubedo kwede kunnu. Me ka meno, gucako keto cwinygi i kom cam mabeco ma onongo gicamo kunnu. Guwaco ni: “Pud wapo pi rec ma yam wacamo nono i Ejipt, ki pi okwer ki okono ki kitunggulu maboco ki kitunggulu matino ki kitunggulu matik-ki!” (Wel 11:5) Ento tika ada onongo gicamo jami meno me “nono?” Pe. Luicrael gudeno can malit i kare ma onongo gitye opii i lobo Ejipt. (Nia 1:13, 14; 3:6-9) Ento, lacen wigi owil woko i kom kwo matek ma gukato ki iye dok gucako paro kwo meno. Guyero me keto cwinygi i kom jami mabeco ma gubedo kwede i Ejipt me ka keto cwinygi i kom jami mabeco ma Jehovah otimo pigi. Timgi meno pe oyomo cwiny Jehovah.​—Wel 11:10.

7. Ngo ma okonyo laminwa mo me gwokke ki owic me paro jami mabeco mutimme con i kwone?

 ⁷ I yo ma nining ma watwero gwokke ki owic me paro jami mabeco mutimme con i kwowa? Nen kong labol pa laminwa mo ma ocako tic i Betel ma i Brooklyn i mwaka 1945. Mwaki mogo lacen, en onyomme ki Labetel lawote, dok gumedde ki tic kacel i Betel pi mwaki mapol. Kadi bed kit meno, i mwaka 1976 cware kome odoko lit matek. Laminwa-ni owaco ni i kare ma cware dong cok to, en omine tam mo maber adada ma twero konye ka en odoko dato. Cware owacce ni: “Wabedo ki yomcwiny i nyomwa. Jo mapol pe gibedo kwede.” Ento en bene otite ni: “Pe ibed ka keto cwinyi i gin mukato angec​—kadi bed wi pe biwil iye. Ka kare woto ki kato, cwinyi bibedo ka kwe motmot. Pe iwek cwinyi otur dok ibed ki par pi gin ma otimme i komi. Bed ki yomcwiny pi kare ma wabedo ka tic pi Jehovah kacel. . . . Po i kom gin mukato angec obedo mic pa Lubanga botwa.” Pe iye ni man obedo tam maber adada?

8. Adwogi maber ango ma laminwa-ni onongo pi lubo tam ma cware omine?

⁸ Laminwa-ni olubo tam pa cware. En otiyo pi Jehovah ki gen nio wa i tone ma onongo dong tye ki mwaka 92. Mwaki mogo manok ma en peya oto, en owaco ni: “Ka aneno mwaki 63 ma abedo kwede i tic pi Jehovah, atwero waco ni abedo ki yomcwiny madit adada i kwona.” Pingo? En otito ni: “Gin ma keliwa yomcwiny i kwo en aye bedo kacel ki utmege i kare-ni, ki gen me bedo kacel kwedgi i lobo manyen i paradic, ki dong tic pi Lacwecwa Jehovah pi naka.” * Man pud dong lanen maber adada pa ngat ma ociko wange anyim!

9. Kit ma kitito kwede i Lulevi 19:18, awene ma watwero nongo ni tek adada me timo kica ki ngat mo ma owango iwa?

⁹ Kwan Lulevi 19:18. Pol kare wanongo ni tek adada me timo kica ka ngat ma oterowa marac-ci obedo laye lawotwa, laremwa macok,  nyo bene watwa. Me labolle, laminwa mo okok i kom lamego mukene i kacokke ni okwalo centene. Lacen laminwa-ni oniang ni kara pe en aye okwalo ci okwayo kica, ento lamego ma kikok i kome-ni omako lok i cwinye. Tika in bene dong i kare mo iwinyo kit meno? Kadi bed pe gin ma kit meno kikome aye otimme i kwoni, pol pa wan wamako kiniga dok wanongo ni tek me timo kica ki ngat ma owango iwa.

10. Ngo ma twero konyowa ka wacako mako lok i cwinywa?

¹⁰ Ngo ma twero konyowa ka wacako mako lok i cwinywa? Mukwongo, wiwa myero opo ni Jehovah neno jami ducu. En ngeyo gin ma watye ka kato ki iye, kadi wa ka kitye ka terowa marac. (Ibru 4:13) En paro piwa ka watye ka deno can. (Ic. 63:9) Dok ocikke ni ebijwayo arem mo keken ma wawinyo pien kiterowa marac.​—Yabo 21:3, 4.

11. Adwogi maber ango ma wanongo ka watimo kica ki jo mukene?

¹¹ Wiwa bene myero opo ni wabiwinyo maber ka watimo kica ki ngat ma oterowa marac. Meno aye gin ma laminwa ma kikok i kome nono ni okwalo cente-ni oniang iye. I nge kare mo, en otimo kica ki lamego ma okok i kome-ni. En oniang ni ka watimo kica ki jo mukene, ci Jehovah bene timiwa kica. (Mat. 6:14) En niang ni gin ma lamego ca otimo i kome onongo rac, ento en pud oyero me timme kica. Macalo adwogine, laminwa-ni cwinye yom i kare-ni dok twero keto cwinye i kom ticce pi Jehovah.

12. Ngo ma wapwonyo ki i 1 Jon 3:19, 20?

¹² Kwan 1 Jon 3:19, 20. Wan ducu cwinywa pidowa i kare mogo. Me labolle, jo mukene cwinygi pidogi pi jami ma gutimo ma onongo peya gupwonyo ada. Mukene cwinygi pidogi pi bal ma gutimo i nge nongo batija. Meno pe obedo gin manyen. (Rom. 3:23) Ngene kene ni, wamito ni watim gin ma atir. Ento “wan ducu ngat acel acel timo lwak roc mapol.” (Yak. 3:2; Rom. 7:21-23) Kadi bed pe wamito ni cwinywa obed ka pidowa, ento berre bene tye. I yo ma nining? Pien kodi cwiny meno twero weko watute me yubo kwowa ki me moko tamwa pe me nwoyo bal acel meno.​—Ibru 12:12, 13.

13. Pingo omyero wagwokke ki owic me bedo ma cwinywa pidowa mukato kare woko?

¹³ Kitungcel, twero bedo ni cwinywa pidowa mukato kare woko​—nyo ni, cwinyi medde ki pidi kadi bed dong ityeko ngut i kom balli dok Jehovah otyeko timmi kica woko. Kodi poto cwiny meno pe ber. (Jab. 31:10; 38:3, 4) Pingo? Nen kong labol pa laminwa mo ma cwinye obedo ka pide pi kare malac pi bal ma en otimo con. En owaco ni: “Onongo awinyo calo atye ka balo karena nono me tic matek pi Jehovah pien pe kibilara.” Pol pa wan waromo niang kit ma laminwa man winyo kwede. Pi meno, pire tek adada ni wagwokke ki owic me bedo ma cwinywa pidowa mukato kare woko. Tam kong kit ma Catan cwinye bibedo yom kwede ka wailo cingwa woko i komwa kekenwa​—kadi bed Jehovah pud marowa!​—Por ki 2 Jo Korint 2:5-7, 11.

14. Watwero ngeyo nining ni Jehovah pud marowa?

¹⁴ Pud watwero pennye kekenwa ni, ‘Atwero ngeyo nining ni Jehovah pud mara?’ Ka ipenyo lapeny meno, ci nongo nyuto ni Jehovah pud twero timmi kica. Mwaki mapol angec, Wi Lubele owaco ni, “Twero bedo ni watiko nwoyo bal moni teretere. Oromo bedo ni watute me jwayo goro ma onongo watye kwede ma peya wacako tic pi Lubanga ento jwayone  oloyowa woko. . . . Pe irweny gen. Pe itam ni itimo bal ma Jehovah pe dong bitimmi iye kica matwal. Meno aye kit ma Catan mito ni itam kwede. Lok ada tye ni, kit ma iwinyo kwede obedo lanyut ni pud pe icito bor ki bot Jehovah. Bed mwol dok ibed ka lego Lubanga wek otimmi kica, meno bikonyi me bedo ma cwinyi pe pidi dok man bikonyi pe me nwoyo bal meno. Kadi bed latin moni poto i peko acel-li tyen mapol, en kare ducu penyo wonne pi kony. Pi meno, medde ki penyo Jehovah pi kony dok en bikonyi pi kicane ma pe wapore pire.” *

15-16. Jo mukene giwinyo nining ka guniang ni Jehovah pud marogi?

¹⁵ Jo pa Jehovah mapol ginongo kwe cwiny ki i niang ni Jehovah pe oilo cinge woko i komgi. Me labolle, mwaki mogo mukato angec, omego mo acel owaco ni enongo pwony ki i gin ma otimme i kwo pa lamego mo ma okatti i pwony ma lubbe aluba ma wiye tye ni “Baibul Loko Kwo pa Dano.” I pwony meno, lamego-ni otito ni pi jami maraco mutimme i kwone i kare mukato angec, obedo tek adada bote me ye ni Jehovah twero marre. En obedo ka winyo kit meno pi mwaki mapol i nge nongo batija. Ento, i kare ma en olwodo lok i kom ginkok, en ocako bedo ki neno mapat. *

¹⁶ Kwano gin mutimme i kwo pa lamego-ni okonyo omego-ni nining? En ocoyo ni: “I kare ma onongo pud atidi, abedo ka neno cal macilo dok onongo tek adada me juko tim meno. Cokcok-ki, abedo ka neno cal magi doki. Ayenyo kony ki bot luelda, dok atute matek me loyo gorona meno. Luelda gupoyo wiya pi mar ki kica pa Lubanga. Kadi bed kit meno, i kare mukene pud awinyo calo konya pe dok calo Jehovah dong pe twero mara. Kwano gin mutimme i kom lamego-ni okonya adada. Dong aniang ni ka awaco ni Lubanga pe twero timma kica, meno nyuto ni aye ni ginkok pa Wode pe twero jwayo balla. Angolo pwony meno ki i Wi Lubele wek abed ka kwanone dok alwod lok iye teke acako winyo ni konya pe.”

17. Lakwena Paulo ogwokke nining ki i owic me bedo ma cwinye pide mukato kare woko?

 ¹⁷ Jami ma otimme ma kit meno poyo wiwa i kom lakwena Paulo. Ma en peya odoko Lakricitayo, en otimo bal madongo mapol. Paulo wiye opo i kom bal magi ma en otimo-ni, ento en pe obedo ka tamo pire i cawa ducu. (1 Tem. 1:12-15) En oneno ginkok macalo mic pa Lubanga pire. (Gal. 2:20) I yo meno, Paulo ogwokke ki i owic me bedo ma cwinye pide mukato kare woko dok oketo cwinye i kom timo gin ma kerone twero pi Jehovah.

18. Ngo ma wapwonyo ki i pwony man?

¹⁸ Ngo ma wapwonyo madok i kom owic adek ma wanyamogi i pwony man? (1) Po i kom jami mabeco mutimme i kwowa con obedo mic pa Jehovah botwa; ento kadi bed kwowa mukato onongo ber nining, kwowa i lobo manyen bibedo ber makato. (2) Jo mukene gitwero cwero cwinywa, ento ka wayero me timmigi kica, ci wabibedo ki kero me medde ki tic pi Jehovah ki yomcwiny. (3) Cwiny ma pidowa mukato kare woko twero gengowa ki tic pi Jehovah ki yomcwiny. Dong, calo Paulo, myero waye ni Jehovah otyeko timiwa kica woko.

19. Wangeyo nining ni i lobo manyen wiwa pe bibedo ka po i kom jami maraco mutimme i kwowa con?

¹⁹ Watye ki gen me kwo pi naka. Dok i lobo manyen pa Lubanga, wiwa pe bipo i kom gin mo keken mukato ma ocwero cwinywa. Ma lubbe ki kare meno, Baibul waco ni: “Pe dong gibipo pi jami macon.” (Ic. 65:17) Tam kong: Jo mogo i kinwa dong gutii woko i tic pa Jehovah, ento i lobo manyen komgi biroc doko nyen calo pa latin. (Yubu 33:25) Pi meno dong, myero wamoku tamwa pe me bedo ka paro gin mukato angec. Me ka meno, wanenu anyim atir kun watimo jami ducu ma watwero kombeddi wek wabed tye i lobo manyen!