1, 2. (a) Alokaloka ma bino atura i kwowa twero gudowa nining? (Nen cal ma tye i pot karatac man.) (b) Ma lubbe ki Jabuli 131, ngo ma twero konyowa me bedo ma wiwa opye mot?

I KARE ma Lloyd ki Alexandra dong gutiyo i Betel pi mwaki 25, kicwalogi woko ka tito kwena. I acakkine, man pe oyomo cwinygi. Lloyd owacci: “Onongo awinyo calo bedo i Betel ki tic ma atimo dong odoko gikoma woko. Ki i tamma, onongo atye ki pwoc pi tyen lok ma oweko alokaloka man otimme, ento ka cabit ki dwe woto ki kato, acako winyo calo kiryema aryema ki i Betel.” Omego Lloyd onongo cwinye bedo yom pi alokaloka man ki dok i kare mukene cwinye tur woko.

² Kare ki kare, waromo rwatte ki alokaloka mogo ma nongo pe wabyeko, dok giromo keliwa par ki turcwiny. (Carolok 12:25) Ka jolo alokaloka tek tutwal, ngo ma  watwero timone wek wabed ma cwinywa opye mot? (Kwan Jabuli 131:1-3.) Kong dong wanenu kit ma lutic pa Jehovah mogo, i kare mukato angec ki i karewa-ni, gubedo ma wigi opye mot kadi bed kwogi olokke i yo ma pe gubyeko.

3. Kwo pa Yucepu olokke atura nining?

³ Tam kong ngo mutimme i kom Yucepu. I kin lutino pa Yakobo ducu, Yucepu aye onongo en maro loyo. Man omiyo omegi Yucepu gubedo ki cwiny me nyeko i kome. I kare ma Yucepu onongo tye ki mwaka 17, gucate macalo opii. (Acakki 37:2-4, 23-28) Pi mwaki ma romo 13, en odeno can i Ejipt, mukwongo macalo opii dok lacen macalo mabuc. Yucepu onongo tye ka mabor ki wonne, ma onongo en maro adada. Pekki ma en okato ki iye onongo twero weko en bedo labongo gen dok ma cwinye kec, ento man pe otimme. Ngo ma okonye?

4. (a) Ngo ma Yucepu otimo i kare ma en tye i buc? (b) Jehovah ogamo lega pa Yucepu nining?

⁴ I kare ma Yucepu tye i buc, en nen calo obedo ka keto tamme i kom kit ma Jehovah tye ka konye kwede. (Acakki 39:21; Jabuli 105:17-19) Romo bedo ni en otamo i kom lek ma en oleko i kare ma pud tidi dok man ojingo cwinye ni Jehovah tye kwede. (Acakki 37:5-11) Nen calo obedo ka lega kare ducu kun tito ki Jehovah jami ducu ma tye i cwinye. (Jabuli 145:18) Dok Jehovah ogamo lega pa Yucepu kun cuko cwinye ni En ebibedo “kwede” kadi bed gin mo keken otimme.​—Tic pa Lukwena 7:9, 10. * (Nen lok ma tye i tere piny.)

5. “Kuc pa Lubanga” twero jingo tamwa me tic pi Jehovah nining?

⁵ Kadi bed watye ka kato ki i pekki madongo, pud watwero bedo ki “kuc pa Lubanga” ma gwoko ‘tamwa maber’ dok weko wabedo ma cwinywa opye mot. (Kwan Jo Pilipi 4:6, 7.) Ka watye ki par dok cwinywa otur, ci “kuc pa Lubanga” twero jingowa me medde ki tic pi Jehovah kun pe wailo cingwa woko. Kong dong wanenu labol pa omege ki lumege mogo me karewa-ni ma gunongo kuc pa Lubanga i kare ma gukato ki i peko.

6, 7. Tito pekowa i lega twero konyowa nining me bedo ki wic ma opye mot? Mi labol.

⁶ I kare ma Ryan ki Juliette guwinyo ni ticgi macalo painia keken pi kare mo kijuko woko, cwinygi otur adada. Ryan owacci: “Walego cutcut bot Jehovah. Wangeyo ni meno obedo kare ma kite dok pat me nyuto genwa i kom Jehovah. Jo mapol ma i kacokkewa onongo pud ginyen i ada, pi meno walego ni Jehovah okonywa me nyuto lanen maber me niye.”

⁷ Jehovah ogamo legagi nining? Ryan owacci: “Cutcut i nge legawa, tur cwiny ki par ma onongo watye kwede orweny woko. Kuc pa Lubanga obedo ka gwoko  cwinywa ki tamwa. Waniang ni Jehovah pud twero medde ki tic kwedwa ka wanyuto cwiny matir.”

8-10. (a) Cwiny maleng twero konyowa nining ka watye ki par? (b) Jehovah twero konyowa nining ka waketo cwinywa i tic pire?

⁸ Cwiny maleng twero weko wabedo ma cwinywa opye mot, dok weko wanongo tyeng mogo ki i Baibul ma twero konyowa me niang gin ma pire tek i kwowa. (Kwan Jon 14:26, 27.) Tam kong ngo mutimme i kom Philip ki Mary, luot mo ma kong gubedo i Betel pi mwaki 25 kulu. I kine ka dwe angwen keken, gin aryo ducu gurwenyo megigi i to, medo i kom meno Philip orwenyo watte mukene, dok onongo mitte ni gugwok won Mary, ma tye ki two wic.

⁹ Philip owaco ni: “Atamo ni onongo atye ka lweny ki pekona maber ento kara gin mo onongo pud orem. Anongo Jo Kolocai 1:11 i Wi Lubele mo ma gikwano i kacokke. Onongo gire atye ka kanyone ento pud mitte ni atim makato. Onongo mitte ni ‘adi cwinya i yo ducu ki yomcwiny.’ Tyeng man opoyo wiya ni yomcwinya pe cung i kom kit ma kwona tye kwede ento i kom adwogi ma cwiny maleng kelo i kwona.”

¹⁰ Jehovah ogoyo laane i kom Philip ki Mary i yo mapol adada pien guketo cwinygi i tic pire. I nge a ki i Betel, cutcut gunongo lutino kwan me Baibul ma gudongo i yo me cwiny, dok ma onongo gimito kwan tyen makato kicel i cabit acel. Mary owacci: “Lutino kwanwa magi gukeliwa yomcwiny madwong dok meno obedo yo acel ma Jehovah onongo tye ka wacciwa ni jami bibedo maber.”

11, 12. (a) I yo ango ma Yucepu otimo gin mo ma Jehovah twero goyo laane iye? (b) Jehovah omiyo mot bot Yucepu nining?

¹¹ Ka kwowa olokke atura, man twero keliwa par madwong adada ma weko watamo i kom pekowa keken. Man bene onongo romo timme i kom Yucepu. Me ka meno, en oyero me timo gin maber loyo ma en twero timone. Kit macalo Yucepu onongo otiyo matek pi Potipar, en omedde ki tic matek i kare ma kikete i buc kun tiyo tic mo keken ma lagwok mabuc omiye.​—Acakki 39:21-23.

¹² Nino mo acel, kimiyo Yucepu tic me gwoko mabuc aryo ma onongo yam gutiyo i gang kal pa Parao. Yucepu  onyuto cwiny me kica botgi, man oweko gubedo agonya me tito bote par ma onongo tye i cwinygi kacel ki lek ma guleko i dyewor ma ominigi lworo. (Acakki 40:5-8) Yucepu i kare meno onongo pe ngeyo ni lokgi-ni aye ma biweko kigonye ki i buc. I nge mwaki aryo, kigonye ki i buc dok en odoko laloc ma tye ki twero madwong adada i Ejipt. Parao keken aye ma onongo tye ki twero madit loyo Yucepu!​—Acakki 41:1, 14-16, 39-41.

13. Ngo ma watwero timo wek Jehovah ogo laane i komwa kadi bed watye ka kato ki i peko?

¹³ Calo Yucepu, watwero nongo ni watye ka kato ki i peko ma pe watwero kwanyone. Ento ka wadiyo cwinywa kun watute me timo gin ma watwero, ci Jehovah bigoyo laane i komwa. (Jabuli 37:5) Kadi bed wiwa onywene dok par bene oketo komwa woko, ‘ento genwa pe balle.’ (2 Jo Korint 4:8) Jehovah bibedo kwedwa tutwalle ka waketo cwinywa i ticwa me pwony.

14-16. Pilipo latit kwena maber-ri omedde ki keto cwinye i tito kwena nining kadi bed ni kwone olokke?

¹⁴ Pilipo latit kwena maber-ri, obedo lanen maber adada pa ngat ma oketo cwinye i ticce me pwony kadi bed kwone obedo ka lokke. I kare mo, en obedo ka nongo mit pa tic manyen i Jerucalem. (Tic pa Lukwena 6:1-6) Ento ma pe ori, jami olokke woko. I kare ma kineko Citefano, ayelayela magwar ocakke i kom Lukricitayo, dok macalo adwogine, Lukricitayo guket woko ki i Jerucalem. Pien Pilipo onongo mito ni emedde ki tic pi Jehovah, en ocito i boma me Camaria ka ma onongo mitte ni jone guwiny kwena maber.​—Matayo 10:5; Tic pa Lukwena 8:1, 5.

¹⁵ Pilipo onongo tye atera me cito ka mo keken ma cwiny pa Lubanga bitelle me cito iye. Pi meno, Jehovah otiyo kwede me tito kwena ka ma jone onongo peya guwinyo lok me kwena maber-ri. Lujudaya mapol onongo gicayo Lucamaria dok giterogi marac. Ento Pilipo pe obedo ki cwiny me apokapoka, ci onywako kwedgi lok me kwena maber ki mit kom. Dok Lucamaria gubedo ka winye “ki cwiny acel”!​—Tic pa Lukwena 8:6-8.

¹⁶ I ngeye, cwiny pa Lubanga otelo Pilipo me cito ka tito kwena i boma me Ajota ki Cecaria, ka ma onongo Lurok tye iye mapol. (Tic pa Lukwena 8:39, 40) Lacen, kwo pa Pilipo dok olokke  aye. En onyomo ci gunywalo lutino. Ento kadi bed ni kwo pa Pilipo obedo ka lokke, pud en omedde ki ticce me pwony dok Jehovah omedde ki goyo laane i kome kacel ki jo me ode.​—Tic pa Lukwena 21:8, 9.

17, 18. Ka kwowa olokke i yo mo, keto cwinywa i tic me pwony twero konyowa nining?

¹⁷ Jo mapol ma gitye ka tic pi kare malac giwaco ni keto cwinygi i tic me pwony konyogi me bedo ki yomcwiny dok ki neno mupore kadi bed kwogi olokke. Me labolle, i kare ma Osborne ki Polite, luot mo ma gibedo i lobo South Africa gua ki i Betel, gutamo ni nongo tic ki kabedo bibedo yot botgi. Ento omego Osborne owacci: “Ki cwercwiny, tic pe ononge oyotoyot kit ma onongo watamo kwede.” Dakone Polite owacci: “Wabedo labongo tic pi dwe adek kulu, dok onongo wape ki cente mo ma wagwoko. Obedo tek adada.”

¹⁸ Ngo ma okonyo Osborne ki Polite i kare meno ma onongo kwo tek-ki? Osborne owacci: “Tito kwena kacel ki jo me kacokke okonyowa adada me keto tamwa i kom jami mabeco.” Me ka bedo gang ka paro pekogi, gumoko tamgi me keto cwinygi i tic me pwony. Timo man okeligi yomcwiny madit! Dok Osborne omedde ni: “Wayenyo tic ka weng, ci lacen wanongo.”

19-21. (a) Ngo ma biweko wabedo ki wic ma opye mot? (b) Adwogi maber ango ma wanongo ka wajolo alokaloka ma otimme atura?

¹⁹ Kit ma waneno kwede, ka watute matek kun wageno Jehovah ki cwinywa ducu, ci man bikonyowa me bedo ma wiwa opye mot kadi bed wakato ki i peko ma nining. (Kwan Mika 7:7.) I nge kare mo, watwero niang ni kit ma wajolo kwede alokaloka moni kara ojingo watwa ki Jehovah. Lamego Polite otito ni juko ticgi i Betel okonye me niang tyen lok me jenge i kom Jehovah  kadi bed kwone onongo tye matek adada. En owaco ni: “Watta ki Jehovah ojing matek.”

²⁰ Mary, ma waloko i kome con-ni, pud tye ka gwoko wonne mutii-ni kun medde ki tic macalo painia. En owaco ni: “Apwonyo ni ka atye ki par, omyero kong ajuk par, alegi, ka dong ajal pekone woko. Pwony madit loyo ma anongo aye me weko jami ducu i cing Jehovah, dok man bimitte adada i kare me anyim.”

²¹ Lloyd gin ki Alexandra giye ni alokaloka mutimme i kwogi otemo niyegi i yo ma onongo pe gubyeko. Ento guneno kit ma atematema magi okonyogi kwede. I kare-ni, gingeyo atir ni niyegi tye matek ma twero kweyo cwinygi ka gitye ki peko, dok giwinyo ni gidoko jo mabeco adada.

22. Ka watute me timo gin ma watwero i kare me peko, ci gen ango ma waromo bedo kwede?

²² I lobo-ni, kwowa twero lokke atura. Kiromo miniwa tic manyen i dul pa Jehovah, two romo makowa atura, nyo bene twero mitte ni wagwok jo me gangwa. Ento kadi bed gin ango otimme, bed ki gen ni Jehovah paro piri dok bikonyi i kare ma mitte kikome. (Jo Ibru 4:16; 1 Petero 5:6, 7) Ka pud itye ka kato ki i peko, tute matek me timo jami ducu ma itwero. Leg bot Woru, Jehovah dok ipwonnye me jenge i kome i yo ducu. Ka itimo kit meno, ci ibibedo ki wic ma opye mot ma Jehovah miyo, kadi bed itye ka kato ki i alokaloka mo keken.