I kare ma wel lutit kwena omedde, onongo bene bukke mapol mitte adada bot omege ki lumege. Omege ma i Betel me Brooklyn onongo gigoyo magajin, ento onongo pud gijenge i kom kampuni mukene pi goyo bukke ma pok ngegi tek. Ci pi dwe mapol, kampuni meno onongo pe twero goyo bukke muromo ma kibitic kwede i tic me pwony. Pi meno, Omego Rutherford openyo Robert Martin, omego ma onongo neno wi tic i faktoriwa, ka en tamo ni watwero goyo bukkewa piwa kenwa.

Omego Martin owaco ni: “Meno obedo tam mamwonya adada, pien onongo tyen lokke ni wabiyabo faktori ma twero goyo bukkewa.” Omege gupango ot mo i namba 18 Concord Street i Brooklyn dok guwilo macin ducu ma mitte.

Pe jo ducu cwinygi obedo yom ni omege dong gitwero goyo bukkegi. Preciden me kampuni mo ma onongo yam gigoyo bukkewa olimo faktoriwa manyen-ni. En owaco ni: “Wutye ki macin mabeco adada me goyo bukke, ento pe tye ngat mo keken i kinwu ma ngeyo tic kwede. I nge dwe abicel keken, macinwu-ni ducu bidoko yugi.”

Omego Martin otito ni: “Lokke meno onongo winye calo ada mo tye iye, ento en pe otamo i kom Jehovah; ma kare ducu konyowa.” Omego Martin oloko kakare. Ma pe orii, faktori manyen-ni onongo tye ka goyo bukke 2,000 nino ki nino.

Medo i kom goyo bukkegi mogo, jo pa Jehovah gucako tic ki yo manyen me tito kwena maber—redio. I Ceng Cabit otyeno, i nino dwe 26 me Febuari, 1922, Omego Rutherford oloko i redio pi tyen mukwongo. En omiyo pwony ma wi lokke tye ni “Jo Milion Mapol ma Gitye Kwo i Kare-ni Dong Pe Gibito” i redio citecen ma kilwongo  ni KOG i Los Angeles, California, lobo Amerika.

Kibyeko ni dano ma romo 25,000 guwinyo purogram man. Jo mogo i kingi gucwalo waraga me nyuto pwocgi pi purogram man. Waraga acel oa ki bot laco ma nyinge Willard Ashford, ma onongo bedo i Santa Ana, California. En opwoyo Omego Rutherford pi pwony “mamit ma oyomo cwinywa.” I nge meno en omedde ni: “I pacona onongo watye ki lutwo adek ma pe gitwero a ki gang. Pi meno, onongo pe bitwere ki wan me bino ka winyo pwonyi, kadi bed onongo imiyo pwony man i kabedo macok kwedwa.”

Kibedo ka miyo pwony mukene i redio i cabit mogo ma lubo meno. I agikki me 1922, magajin me The Watch Tower okatti ki byek ni “jo ma romo 300,000 guwinyo kwena man ki i redio.”

Pi cuko cwiny ma gunongo ki i waraga kacel ki lok pa dano, Lutino Kwan me Baibul gumoko tamgi me gero citecen me redio i kabedo ma kilwongo ni Staten Island, ma pe bor ki Betel me Brooklyn. I mwaki ma lubo-ni, Lutino Kwan me Baibul onongo gubitiyo ki citecen man, ma kilwongo ni WBBR, me tito kwena me Ker-ri bot dano i kabedo mapol.

Magajin me The Watch Tower me Juni 15, 1922, omiyo lok angeya ni gure madit bibedo tye i kabedo ma kilwongo ni Cedar Point, Ohio, cakke i nino dwe 5 me o 13 me Sektemba, 1922. Lutino Kwan me Baibul gubedo ki yomcwiny madwong adada i kare ma guo i Cedar Point.

I pwonye mukwongo, Omego Rutherford otito bot lwak ni: “Atye ki gen matek ni Rwot . . . bigoyo laane i kom gure madit man dok bineno ni kimiyo caden magwar makato i kare mo keken i lobo.” Lulok ma i gure madit meno gubedo ka cuko cwiny omege ki lumege me tito kwena.

Ka dong i Ceng Abic, nino dwe 8 me Sektemba, jo ma romo 8,000 gudonyo i ot ma kibimiyo iye pwony, dok gubedo ka kuro pwony pa Omego Rutherford ki miti madit. Gubedo ki gen ni en bitito tyen lok me nukuta man ni “ADV,” ma onongo kigoyo i kom karatac me lwongo. I kare ma gubedo piny, polgi  guneno kapet madit ma kidolo ci kiketo malo i wi abam. Omego Arthur Claus, ma onongo ocito i gure madit kun a ki i Tulsa, Oklahoma, i lobo Amerika, onongo kom ka ma en twero winyo iye pwony maber. Onongo pe yot me nongo kabedo ma kit meno pien i gure madit man, onongo lakub dwan ma kitwero tic kwede me medo dwan lalok pe.

Wek ngat mo pe obed ki kare me balo pwony, wonkom omiyo lok angeyo ni pe kibiye ni ngat mo ma oo let odony i ot i kare me pwony pa Omego Rutherford. Cawa 3 ki nucu me odiko, Omego Rutherford ocako pwonye ki lok pa Yecu ma nonge i Matayo 4:17, ni  “Ker me polo dong onyiko cok.” I kare ma en tye ka lok i kom kit ma dano gibiwinyo kwede kwena me Ker-ri, en owaco ni: “Yecu kikome otito ni i kare me dwogone en bidoro tic me kac, i kare meno en bicoko bote jo ma lugen.”

Omego Arthur Claus, ma onongo obedo i ot madit-ti, wiye po ni: “Onongo watero itwa watye ka lubo lokke ducu.” Ento dok two omake atura ci onongo mitte ni okat woko. Arthur okato woko, kadi bed onongo pe mito, pien ngeyo ni pe kibiye ni edwog i iye i kare ma nongo Omego Rutherford tye ka miyo pwonye.

I nge dakika mo manok, en ocako winyo maber. En otito ni i cawa ma etye ka dwogo cen i ot, ewinyo ka dano dongo cinggi malongo adada. Meno obalo wiye adada! En omoko tamme ni ebiwinyo but pwony mudong-ngi kadi bed mitte ni eyit i wi ot wek etim meno. Omego Claus, ma onongo pud awobi me mwaka 23 keken i kare meno, oyenyo yo me yito wa i wi ot. Wang dirica ma i dan ot malo onongo tye twolo, dok i kare ma en oo cok ki wang dirica magi, onongo twero winyo pwony maber adada.

Ento Arthur onongo ni pe etye kene. Lureme mogo bene onongo gitye i wi ot. Ngat acel i kingi, Frank Johnson, oringo bot Arthur ci openye ni, “Itye ki kodi pala matino ma kigwoko i jeba-ni?”

 Arthur ogamo ni, “Atye kwede do.”

Ci Frank ogamo ni, “In aye ibedo lagam me legawa kikome. Ineno kapet ma kidolo-ni? Obedo lanyut, ma kitweyo woko i kom cumar magi. Ter iti iwiny lok pa Langolkop. * Ka en owaco ni, ‘dong omyero wurwe, wurwe,’ ci ngol tol angwen-ni woko.”

Pi meno, Arthur omako palane i cinge ci okuro kacel ki lureme me winyo ka Omego Rutherford waco lok ma bibedo calo lanyut pire me ngolo lanyut ma kingabo-ni. Ma pe orii, Omego Rutherford oo i but pwonye ma dong pire tek loyo. Omego Rutherford onongo tye ki miti matek adada dok nen calo odange matek i cawa ma owaco ni: “Wubed lucaden me ada dok ma lugen pa Rwot. Wumedde anyim ki lweny wang ma Babilon madit kituro woko matwal. Wutit kwena i kabedo ducu. Lobo ducu myero onge ni Jehovah aye Lubanga dok ni Yecu Kricito aye Kabaka pa kabaka ki Rwot pa rwodi ducu. Man obedo kare ma pire tek loyo i tekwaro pa dano. Nen, Kabaka tye ka loc! Wun aye wutye ki tic me tito pire bot dano ducu. Dong, wurwe, wurwe, wurwe, pi Kabaka ki Kerre!”

Arthur otito ni en kacel ki omege mukene-ni gungolo tol ma otweyo lanyut ci lanyut-ti oyarre maber. Ma rwatte ki nukuta “ADV,” lanyut meno onongo kwanne ni: “Advertise the King and Kingdom!” (“Wurwe pi Kabaka ki Kerre!”)

Gure madit ma obedo tye i Cedar Point okonyo omege me keto tamgi i kom tic ma pire tek me tito pi Ker-ri, dok jo ma gudyere gubedo ki yomcwiny me nywako i tic meno. Lapainia mo ma a ki i Oklahoma, lobo Amerika, ocoyo ni, “Wabedo ka tito kwena i kabedo ma dano mapol gitiyo tic me golo got macol ki i te ngom dok gin lucan adada.” En owaco ni pol kare ka dano guwinyo kwena ma i magajin me Golden Age, “gimwoc ki koko.” En owaco ni, “Obedo twon mot madit me kweyo cwinygi.”

Lutino Kwan me Baibul magi guniang kit ma lok pa Yecu ma nonge i Luka 10:2 pire tek kwede: “Kac tye dwong, ento lukac aye nok.” I kare ma mwaka meno tum, onongo gumoko tamgi matek me rweyo pi Ker-ri i kabedo ducu.