1. Gin ango ma Yecu oloko iye i dyewor me agikki ma en obedo kacel ki lupwonnyene?

I DYEWOR me agikki ma Yecu obedo kacel ki lupwonnyene, en oloko i kom nyig lok me mar tyen ma romo 30 kulu. En owaco bot lupwonnyene ni omyero ‘gumarre kekengi.’ (Jon 15:12, 17) Mar ma tye i kingi onongo bibedo dwong ma dano ducu bingeyo ni gubedo lulub kor Kricito me ada. (Jon 13:34, 35) Mar ma Yecu oloko pire-ni pe obedo gin ma wawinyo awinyo i cwinywa keken. Obedo kit ma pire tek dok kwako jalle ken. Yecu owaco ni: “Pe tye ngat mo ma tye ki mar madit makato man, ni dano miyo kwone pi lureme. Wun lurema ka wutiyo gin ducu ma acikowu.”​—Jon 15:13, 14.

2. (a) Lutic pa Lubanga gingene pi gin ango i kare-ni? (b) Lapeny mene ma wabigamone i pwony man?

² Lutic pa Jehovah i kare-ni gingene matek pi nyuto mar ma pe paro pire kene ki bedo ma gunote. (1 Jon 3:10, 11) Mar man pe paro rok ma waa ki iye, kakawa, leb ma waloko  nyo kit ma wadongo kwede. I wi lobo ducu, lutic pa Jehovah gimaro luwotgi ki mar me ada. Pingo mar mitte adada i kare man? Jehovah gin ki Yecu ginyuto mar ma weko wadongo nining? Dok wan bene watwero nyuto mar ma kit man nining wek wamed teko bot jo mukene dok wacuk cwinygi?​—1 Jo Korint 8:1.

3. Kwo ma ‘tye marac-ci’ tye ka gudo dano nining?

³ Watye ka kwo i kare ma kwo ‘tye marac,’ dok opong ki “can ki ayelayela keken.” (2 Temceo 3:1-5; Jabuli 90:10) Tye jo mapol ma gitye ka deno can ma dong gimito kwanyo kwogi woko. Dano makato 800,000 kulu gidene mwaka ki mwaka, ma nyuto ni i cekon 40 nongo dano acel tye ka dene. Ki cwercwiny, omegiwa mukene bene gukato ki i pekki calo man dok gukwanyo kwogi woko.

4. Jo mene ma kicoyo lok i komgi i Baibul ma guwinyo calo gimito to woko?

⁴ I kare macon, lutic pa Lubanga mogo ma lugen guwinyo marac adada pi pekkigi ma oweko onongo gimito to woko. Me labolle, Yubu obedo ki arem madwong adada ma oweko en owacci: “Adag dong kwona.” (Yubu 10:1; 14:13) Cwiny Yona otur matek ma oweko en owacci: “[Jehovah], kwany kwona woko ki i koma, akwayi, pien bedo ber ka ato kato ma abedo kwo.” (Yona 4:3) Lanebi Elia bene orwenyo gen woko ci owaco ni: “Dong otum, ai Rwot [Jehovah], tin dong ikwany kwona woko.” (1 Luker 19:4) Ento Jehovah onongo maro luticce ma lugen magi dok mito ni gubed kwo. Akemo pe omake i komgi pi kit ma guwinyo kwede. Me ka meno, en okonyogi me bedo ki miti me kwo wek gumedde ki tic pire ki gen.

5. Pingo omegiwa ki lumegiwa gimito marwa i kare-ni?

⁵ I kare-ni, omege ki lumegiwa mapol gitye ka kato ki i pekki madongo dok gimito marwa. Mogo kinywarogi nyo bene kiunogi. Mukene kiyelogi nyo kikwoto nyinggi i ka ticgi. Nyo romo bedo ni guol matek pien gitiyo pi cawa malac nyo gitye ki dog tic ma keto lyeto mukato kare woko i komgi. Jo mukene gitye ki pekki madongo i odigi. Gwok nyo gunyomme ki ngat ma pe woro Jehovah dok bedo ka cayogi kare ducu. Pi pekki magi kacel ki lyeto mukene ma gikato ki iye, jo mapol dong giwinyo calo tekogi otum woko dok gikalo akala ka ada kwogi konye pud tye. Anga ma twero konyogi?

6. I yo ango ma mar pa Jehovah medo kwede teko bot luticce?

⁶ Jehovah cuko cwiny luticce ni emarogi i kare-ni dok ebimarogi pi naka. Tam kong kit ma Luicrael guwinyo kwede i kare ma Jehovah owaccigi ni: ‘Piwu dit, dok amarowu adada,’ ci omedde ni ‘Pe wulwor, an atye kwedwu’! (Icaya 43:4, 5) Wangeyo ni wan ducu ki acel acel piwa tek bot Jehovah. * (Nen lok ma tye i tere piny.) Baibul nyuto botwa cikke man ni: ‘En twon oteka lweny ma  bikelliwu loc. En biwakke i komwu ki yomcwiny.’​—Jepania 3:16, 17.

7. I yo ma nining ma mar pa Jehovah tye calo mar pa mego ma dot? (Nen cal ma tye i pot karatac 8)

⁷ Jehovah ocikke me jingo ki kweyo cwiny jone ki i peko mo keken ma gikato ki iye. En owaco ni: “Wubidoto cak ki i tunone, en bitingowu woko i langete, dok bene wubibedo ka tuko i eme. Abikweyo cwinywu, calo latin ma minne kweyo cwinye.” (Icaya 66:12, 13) Go kong kit ma latin matidi bedo labongo lworo ka minne tinge dok tuko kwede! Jehovah mari matek dok mito ni ibed labongo lworo. Pe ibed ki akalakala mo ni piri pe tek bot Jehovah.​—Jeremia 31:3.

8, 9. Mar pa Yecu twero jingowa nining?

⁸ Nen dok tyen lok mukene mumiyo waye ni Jehovah marowa: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Ginkok pa Yecu nyuto ni en bene marowa, dok mar meno jingowa. Baibul tittiwa ni kadi “can nyo kumo” pe “bipokowa ki i kom mar pa Kricito.”​—Jo Roma 8:35, 38, 39.

⁹ I kine mukene, wabedo ki peko ma weko wadoko goro i komwa nyo i kit ma wawinyo kwede, nyo ma rwenyo yomcwinywa woko i tic pi Jehovah. Ento ka wiwa po i kom kit ma Yecu marowa kwede, man miyowa teko me ciro. (Kwan 2 Jo Korint 5:14, 15.) Mar pa Yecu miyowa miti me medde ki bedo kwo kun watiyo pi Jehovah. Twero konyowa pe me ilo cingwa woko, kadi bed watye ka kato ki i can, aunauna, turcwiny, nyo par.

10, 11. Obedo tic pa anga me jingo omege ma cwinygi otur? Tit kong.

¹⁰ Jehovah bene tiyo ki kacokke me dongowa ki marre. Ka wamaro omegiwa ki lumegiwa, man nyuto ni wamaro Jehovah. Watute me timo jami ducu ma watwero me konyo omegiwa wek gunge ni pigi tek dok Jehovah marogi. (1 Jon 4:19-21) Lakwena Paulo ocoyo ni: “Wucuk cwinywu kekenwu, dok wukonnye bene kekenwu wek wudong i cwinywu, ngat acel acel okony lawote me dongo, kit macalo wutye ka timone-ni.” (1 Jo Tecalonika 5:11) Pe luelda keken aye gitwero timo man. Wan ducu ki acel acel waromo lubo lanen pa Jehovah ki Yecu kun wakweyo cwiny omegiwa ki lumegiwa.​—Kwan Jo Roma 15:1, 2.

¹¹ Jo mogo i kacokke ma gilwenyo ki tur cwiny nyo par mukato kare woko omyero gunong kony kacel ki yat ki bot daktar mupore. (Luka 5:31) Luelda ki jo mukene me kacokke gingeyo ni kadi bed pe gitye ludaktar, ento kony ki kwe cwiny ma gimiyo pire tek adada. Jo ducu ma i kacokke gitwero ‘cuko cwiny jo ma cwinygi otur, konyo jo ma goro, kun gidiyo cwinygi bene i kom dano ducu.’ (1 Jo Tecalonika 5:14) Mitte ni watute me niang kit ma omegiwa giwinyo kwede. Omyero wadi cwinywa i komgi dok walok i yo ma kweyo cwinygi ka cwinygi otur. Tika itemme me cuko cwiny jo mukene? Ngo ma iromo timone wek imedde ki jingo ki dong kweyo cwiny jo mukene?

12. Mi labol pa dano mo ma onongo cuko cwiny ki bot jo me kacokkene.

¹² Laminwa mo ma bedo i lobo Ulaya  owaco ni: “I kare mogo abedo ki tam me kwanyo kwona woko ento atye ki jo mabeco ma gikonya. Kacokke ma atye iye olaro kwona. Omege ki lumege ginyuta mar dok gicuko cwinya kare ducu. Kadi bed jo manok keken aye gingeyo ni atye ka lweny ki tur cwiny, ento jo me kacokke giyelle me konya kare ducu. Luot mo acel gitye calo lunyodona i yo me cwiny. Gigwoka maber, dok gitye atera me konya i cawa mo keken dyeceng nyo dyewor.” Ngene kene ni, pe dano ducu giromo miyo kony i yo marom. Ento wan ducu watwero miyo kony bot omegiwa ki lumegiwa. * (Nen lok ma tye i tere piny.)

13. Gin ango ma omyero watim wek wakwe cwiny jo mukene?

¹³ Bed ngat ma tero ite dok winyo lok mot. (Yakobo 1:19) Wanyuto mar ka wawinyo lok i yo me kica. Peny lapeny ma nyuto kica wek iniang kit ma omeru winyo kwede. En bingeyo woko ka ada iparo pire, kadi ki i wangi. Ka en tye ka lok, di cwinyi wek en oloki labongo ngolo doge. Ka ibedo ngat ma winyo lok mot, ci itwero niang kit ma en winyo kwede dok ikonye me genni. Man biweko bedo yot bote me winyo lokki ka itute me konye. Ka ada iparo pi jo mukene, ci man biyabi yo me kweyo cwinygi.

14. Pingo pe omyero wacaa kit ma jo mukene giwinyo kwede?

¹⁴ Pe icaa tamme. Ngat ma cwinye otur winyo marac adada ka oniang ni watye ka cayo kit ma en winyo kwede. Man weko bedo tek adada piwa me miyo kony bote. “Lok pa ngat ma pe ki tam winnye malit macalo pala lucwan ka ocobo dano, ento lok ma a ki i leb ngat maryek twero cango dano.” (Carolok 12:18) Kadi bed ni pe wamito waco lok ma wango i dano ma cwinye otur akaka, ento pud watwero kelo rem cwiny ka waloko labongo tam. Me cuko cwiny ominwa, omyero wawek en obed labongo gung cwiny mo ni watye ka tute me niang pekone.​—Matayo 7:12.

15. Gin tic ma pire tek ango ma watwero tic kwede me kweyo cwiny jo mukene?

¹⁵ Ti ki Lok pa Lubanga me kweyo cwiny jo mukene. (Kwan Jo Roma 15:4, 5.) Baibul oa ki i bot ‘Lubanga ma kweyo cwiny,’ pi meno pe wabedo ki ur ni tye ki lok me kwe cwiny mapol adada iye. Watye bene ki Watch Tower Publications Index ki Buk ma Konyo Lucaden pa Jehovah me Kwedo Lok. Tic ki jami magi twero konyowa me nongo wang ginacoya kacel ki bukke ma waromo tic kwede me kweyo ki cuko cwiny omegiwa ki lumegiwa.

16. Kit ango ma twero konyowa me cuko cwiny ngat ma cwinye otur?

¹⁶ Bed lakica dok pe iter dano ki gero. Jehovah obedo “Won ma lakica, Lubanga ma kweyo cwiny dano ducu” dok bene tye ki “kica madwong” i kom luticce. (Kwan 2 Jo Korint 1:3-6; Luka 1:78; Jo Roma 15:13) Paulo owekiwa lanen maber pien en olubo lanen pa Jehovah. En ocoyo ni: “Rik omwol i kinwu acalo toto a gwoko itino mere. Parowu ocirowa meicel omiyo rik mom omito  miyowu ka amut aber keken ame oya i bang Obanga, ento anaka wan i komwa omiye bangwu, pien omarowu meicel.” (1 Jo Tecalonika 2:7, 8, Lango Baibul) Ka wamwol calo Jehovah, ci waromo miyo kwe cwiny ma ominwa tye ka lega pire!

17. Neno matir ango ma omyero wabed kwede i kom omegiwa ma twero konyowa me cuko cwinygi?

¹⁷ Nge ni omeru bene tye ki roc. Bed ki neno matir. Ka itye ki gen ni omege myero gubed labongo roc, ci nongo igeno bwoyo ngor. (Latitlok 7:21, 22) Wi opo ni Jehovah tye ki neno matir i komwa. Dong omyero wadi cwinywa i kom luwotwa. (Jo Epeco 4:2, 32) Pe wamito ni wawek omegiwa guwiny calo pe gitye ka cobo ticgi pi Jehovah maber, nyo wabed ka porogi ki jo mukene. Me ka meno, wacuko cwinygi kun wanyuto botgi jami mabeco ma gitye ka timone. Man twero konyogi me bedo ki yomcwiny ka gimedde ki tic pi Jehovah.​—Jo Galatia 6:4.

18. Pingo mitte ni wanyutu mar ma dongo dano?

¹⁸ Ngat acel acel i kin lutic pa Jehovah pire tek adada bote ki bot Yecu. (Jo Galatia 2:20) Wamaro omege ki lumegiwa adada, pi man omyero watergi ki kica. Dong “watamu pi gin ma kelo kuc ki gin ma dongo niyewa i kinwa kekenwa.” (Jo Roma 14:19) Pud dong watye ka kuro kwo i Paradic ya, ka ma dano mo keken pe bibedo ki turcwiny! Two ki lweny dong bibedo pe matwal. Dano pe dong gibito pi bal alaka, dok aunauna, peko me i odi, ki jami ma turo cwinywa bibedo pe. I agikki me mwaka alip acel me loc pa Yecu, dano ducu dong gibibedo labongo roc. Jo ma gubedo lugen wa i atematema me agikki, Jehovah bijologi calo lutinone i lobo kany dok gibibedo ki “kuc ki deyo ma gimiyo ki litino pa Lubanga.” (Jo Roma 8:21) Dong walego ni wan ducu wamedde ki nyuto mar ma dongo dano dok wakonnye i kinwa kekenwa wek wadony i lobo manyen.