1. Lwongo mene ma Yecu ocwalo bot lumak rec angwen, dok gin gudok iye nining?

PETERO, Anderiya, Yakobo, ki Jon onongo gitye ki biacara me mako rec. Go kong ur ma gubedo kwede me winyo lwongo pa Yecu man ni: “Wubin wulub kora, ci an abimiyo wudoko lumak dano.” * Gudok iye nining? Baibul waco ni: “Cutcut gutugi weko obwogi, gulubo kore.” (Mat. 4:18-22) Tam ma gumoko meno oloko kwogi matwal. Me kaka mako rec, gin onongo gibibedo ka ‘mako dano.’ (Luka 5:10) I kare-ni, Yecu tye ka cwalo lwongo meno bot jo ma cwinygi atir ma gimaro ada. (Mat. 28:19, 20) In tika dong ijolo lwongo pa Yecu me doko lamak dano?

2. Pingo omyero water tam ma wamoko me doko lumak dano calo gin ma pire tek, dok ngo ma bikonyowa me moko tam meno?

² Twero bedo ni dong ikwano Baibul pi kare mo dok itimo alokaloka mogo i kwoni. Kombeddi dong mitte ni imok tammi ka imito doko latit kwena maber-ri. Ka itye ki lworo me jolo lwongo pa Yecu, pe iwek cwinyi oballe. Oromo bedo ni itye ki lworo pien ingeyo ni man obedo tam ma pire tek adada. Tye ada gire ni, Baibul waco ni Petero ki lumak rec luwote guweko obwogi “cutcut.” Ento, gin pe gumoko tam meno aruya. Onongo gungeyo Yecu dok gujole macalo Meciya dwe makato abicel angec. (Jon 1:35-42) Marom aroma, in bene dong ipwonyo jami mapol i kom Jehovah ki Yecu, dok itye ki miti me medde ki dongo i yo me cwiny. Ento ma peya imoko tammi me  doko latit kwena, omyero itam iye matut. Gin ango ma okonyo Petero, Anderiya, ki jo mukene me moko tam man?

3. Ngo ma twero konyi me doko latit kwena mucwiny?

³ Lupwonnye pa Yecu mukwongo onongo gubedo jo ma gitye ki mit kom, ngec, ki tekcwiny, dok onongo gingeyo dine kengi. Labongo akalakala mo, kit magi okonyogi me doko ludiro i mako dano. Pwony man binyamo yo ma itwero dongo kwede kit magi wek idok latit kwena mucwiny.

4. Gin ango ma onongo tugo cwiny Petero me mako rec?

⁴ Mako rec onongo obedo dog tic pa Petero ma konye me pito jo me ode, ento man onongo pe obedo tic mamwa bote. Petero onongo maro tic me mako rec. (Jon 21:3, 9-15) En bene opwonnye me maro tic me bedo lamak dano. Dok ki kony pa Jehovah, Petero odoko ladiro adada i tic meno.​—Tic 2:14, 41.

5. Ma lubbe ki Luka 5:8-11, pingo onongo Petero tye ki lworo, dok ngo ma romo konyowa me loyo kodi lworo meno?

⁵ Watito kwena pien wamaro Jehovah; man aye tyen lok ma pire tek loyo mumiyo watimo tic man. Marwa pi Jehovah konyowa me tito kwena bot jo mukene kadi bed wawinyo calo pe wapore. I kare ma Yecu olwongo Petero me doko lamak dano, en owaco bote ni: “Pe ilwor.” (Kwan Luka 5:8-11.) Petero onongo pe tye ka lworo gin ma bitimme i kome ka edoko lapwonnye pa Yecu. Me ka meno, en obedo ki ur pi rec mapol ma Yecu oweko gumako-ni. En oniang ni  Yecu otimo tango, dok owinyo calo pe epore me tic kacel ki Yecu. Ki tungcel, twero bedo ni itye ki par ka iniang tic madit ma bino pi bedo lapwonnye pa Kricito. Ka tye kit meno, ci ti matek me jingo marri pi Jehovah, Yecu, ki dano luwoti, ci man bitugo cwinyi me jolo lwongo pa Yecu me doko lamak dano.​—Mat. 22:37, 39; Jon 14:15.

6. Tyen lok mukene ango ma tugo cwinywa me tito kwena?

⁶ Nen kong tyen lok mukene mumiyo watito kwena. Wamito ni walub cik pa Yecu ma waco ni: “Wuciti wucilok jo me rok ducu gudok jo ma luba.” (Mat. 28:19, 20) Watito bene kwena bot dano pien ‘kitye ka unogi matek, dong gudoko goro’ dok gimito winyo lok ada madok i kom Ker-ri. (Mat. 9:36) Jehovah mito ni dano ducu gunong lok me ada wek kilargi.​—1 Tem. 2:4.

7. I yo ma nining ma Jo Roma 10:13-15 nyuto ni tito kwena pire tek?

⁷ Ka watamo i kom kit ma ticwa me tito kwena twero konyo me laro kwo pa dano, wabibedo ki miti me timone. Lamak rec cato nyo camo rec ma en mako. Ento wan ‘wamako’ dano, nyo lupwonnye wek walar kwogi.​—Kwan Jo Roma 10:13-15; 1 Tem. 4:16.

8-9. Ngo ma omyero lamak rec onge, dok pingo?

⁸ I kare pa Yecu, onongo mitte ni lamak rec ma Laicrael onge kodi rec ango ma ebimako. (Levi 11:9-12) Onongo mitte bene ni en onge ka ma etwero nongo rec man iye. Pol kare rec pong ka ma piine tye maber dok cam tye muromo. Tika cawa ma lamak rec cito ka mako rec iye pire tek? Lamiconari mo ma bedo i cula nam mo i Pacific oniang ni tye kare mupore me mako rec. Lacaden mo me kabedo meno olwonge ni gucit ka mako rec kacel. Lamiconari-ni owaco ni, “Abirwatte kwedi diki cawa adek me odiko.” Omego-ni ogamo ni, “Pe iniang maber. Wacito i cawa ma opore pi mako rec, pe i cawa ma opore piwa.”

⁹ I yo acel-lu, lumak dano me cencwari me acel gubedo ka cito i kabedo ka ma “rec” nonge iye dok i cawa ma gibyeko ni twero nonge. Me labolle, lulub kor Yecu gutito kwena i ot pa Lubanga ki i kacokke pa Lujudaya, i ot ki ot, ki i cuk bene. (Tic 5:42; 17:17; 18:4) Wan bene omyero wange kit pa dano ma gibedo i wang ticwa. Omyero wabed atera me loko yubwa wek wacit ka tito kwena i kabedo ki cawa ma watwero nongo iye dano.​—1 Kor. 9:19-23.

10. Jami tic mene ma dul pa Jehovah ominiwa?

¹⁰ Lamak rec myero obed ki jami tic mupore dok onge kit me tic kwedgi. Wan bene omyero wabed ki jami tic mupore pi tito kwena. Dok mitte ni wange kit me tic kwedgi. Yecu omiyo tira ki lupwonnyene i kit me tito kwena maber-ri. En owaccigi gin ma myero guwot kwede, kabedo ma myero gutit iye kwena, ki dong lok ma myero guwacci. (Mat. 10:5-7; Luka 10:1-11) I kare-ni, dul pa Jehovah ominiwa Jami Ticwa ma Pigi Tego me Pwony ma tiyo maber. * Dok kipwonyowa kit me tic ki jami magi. Pwonnye meno konyowa me bedo ki tekcwiny ka watito lok ki me bedo lupwonye ma gucwiny.​—2 Tem. 2:15.

11. Pingo omyero lumak dano gubed ki tekcwiny?

¹¹ Lumak rec myero gubed jo ma cwinygi tek. I kare mukene, pinye lokke atura ma nongo gitye i dye nam. Pol kare gitiyo i dyewor dok yamo twero cako twago pii i cawa mo keken. Lumak dano bene gimito tekcwiny. Ka wacako tito kwena ci wanyutte ka maleng ni wan Lucaden pa Jehovah, wadiwa gitwero kwerowa woko, luremwa giromo ngalowa, dok jo mukene gikwero winyo lokwa woko. Ento man pe myero owek wabed ki ur. Yecu ociko con ni ebicwalo lulub kore me tito kwena bot jo ma giger.​—Mat. 10:16.

12. Ma lubbe ki Yocwa 1:7-9, ngo ma twero konyowa me dongo tekcwiny?

¹² Itwero dongo tekcwiny nining? Mukwongo, omyero ibed ki gen ni Yecu tye ka doro tic me tito kwena ki i polo. (Jon 16:33; Yabo 14:14-16) I nge meno, jing niyeni i kom cikke pa Jehovah me gwoki. (Mat. 6:32-34) Ka niyeni woto ki doko tek, ci cwinyi bene bimedde ki doko tek. Petero ki lumak rec luwote gunyuto niye matek i kare ma guweko ticgi wek gilub kor Yecu. I yo acel-lu, in bene inyuto niye matek i kare ma itito ki luwoti kacel ki wadini ni dong icako kwano Baibul ki Lucaden pa Jehovah dok itye ka cito i cokkegi! Labongo akalakala mo, in dong itimo alokaloka mapol i kwoni wek ilub  rwom me kwo ma Jehovah mito. Meno bene onongo mito niye ki tekcwiny. Ka imedde ki dongo tekcwiny, itwero bedo ki gen matek ni “[Jehovah] Lubangani tye kwedi ka ma iwoto iye ducu.”​—Kwan Yocwa 1:7-9.

13. Lwodo lok ki lega twero konyi nining me dongo tekcwiny?

¹³ I yo mukene ango ma itwero dongo kwede tekcwiny? Leg pi tekcwiny. (Tic 4:29, 31) Jehovah bigamo legani dok pe biweki ata. En bedo tye kare ducu me mini kony. Dok bene itwero lwodo lok i kom kit ma Jehovah olaro kwede jo mukene i kare mukato angec. Tam bene i kom kit ma en okonyi kwede me loyo ariya ma ikato ki iye dok omini kero me timo alokaloka i kwoni. Labongo akalakala mo, Ngat ma otelo jone i dye Nam Makwar twero konyi me doko lalub kor Kricito. (Nia 14:13) Bed ki gen matek calo pa laco jabuli ma owaco ni: “Rwot [Jehovah] tye kweda, pe abilworo gin mo. Dano kono twero timo gin ango bota?”​—Jab. 118:6.

14. Ngo ma ipwonyo ki i gin mutimme i kom lumegiwa Masae ki Tomoyo?

¹⁴ Yo mukene me dongo tekcwiny aye ki pwonyo kit ma Jehovah okonyo kwede ki jo ma onongo yam lulewic ento lacen gudongo tekcwiny. Nen kong labol pa laminwa mo ma nyinge Masae. En onongo lalewic dok winyo calo pe etwero tito kwena kulu. En onongo winyo calo lok ki jo ma pe engeyogi tek adada dok bedo calo ito got mabor adada, ma en tamo ni pe etwero timone matwal. Pi meno, en oketo tek me dongo marre pi Lubanga ki dano luwote. En otamo matut i kom kit ma ticwa me tito kwena mitte pi oyot dok olego pi kony me jingo mitine me tito kwena. En oloyo lworone dok bene otiyo macalo painia marii. Jehovah bene twero konyo lutit kwena manyen me bedo ma ‘cwinygi tek.’ Nen kong gin ma otimme i kom lamego mo ma nyinge Tomoyo. I kare ma en ocako tito kwena i ot ki ot, rwod ot mukwongo ma en orwatte kwede odange i wiye ni: “Pe amito lok ki Lucaden pa Jehovah!” ci oloro doggola matek. Ki tekcwiny, Tomoyo owaco ki latit kwena lawote ni: “Iwinyo lokke-ni? Ma peya awaco lok mo, en oniang woko ni an Lacaden pa Jehovah. Cwinya yom adada!” Tomoyo i kare-ni tye painia marii.

15. Dine ken kwako ngo, dok pingo pire tek pi Lukricitayo?

¹⁵ Lumak rec ma ludiro gingeyo dine kekengi. Dine ken obedo “kero me diyo komi me timo gin ma myero itim kadi bed cwinyi pe mito.” Lumak rec myero gudine kengi me a malo con, bedo wang ma gutyeko tic, ki kanyo kot ki yamo magwar. Wan bene myero wadine kekenwa wek wakany peko dok watyek ticwa.​—Mat. 10:22.

16. Watwero pwonnye me dine kenwa nining?

¹⁶ Pe kinywalowa ma nongo wangeyo dine kenwa. Ki lok ada, kitwa ma kinywalowa kwede tye me timo jami ma pe diyowa. Jukke ken konyowa me dongo kit me dine ken. Pi meno, wamito kony wek wapwonnye me timo jami ma wanongo ni timone tek. Jehovah miniwa kony meno kun tiyo ki cwiny mere maleng.​—Gal. 5:22, 23.

17. Kit ma kicoyo kwede i 1 Jo Korint 9:25-27, ngo ma lakwena Paulo owaco ni etimo wek edong kit me dine ken?

 ¹⁷ Lakwena Paulo onongo ngeyo dine kene. Ento en bene oye ni onongo mitte ni ‘ecan kome’ wek etim gin ma atir. (Kwan 1 Jo Korint 9:25-27.) En ocuko cwiny jo mukene me dine kengi wek gutim jami ducu “i kit maber, dok kore ki kore.” (1 Kor. 14:40) Omyero wati matek wek wamedde ki woro Jehovah, ma man kwako tito kwena ki pwonyo dano kare ki kare.​—Tic 2:46.

18. Wek Jehovah onen ni wacobo ticwa maber, ngo ma omyero watim?

¹⁸ Lamak rec winyo ni ecobo ticce maber ka emako rec mapol. Ento tic me pwony dok pat. Pe kineno ni wacobo ticwa maber pi wel dano ma wakonyogi me doko Lucaden pa Jehovah. (Luka 8:11-15) Ka wamedde ki tito kwena maber kacel ki pwonyo dano, Jehovah neno ni wacobo ticwa maber. Pingo? Pien nongo watye luwiny bote ki bot Wode.​—Mar. 13:10; Tic 5:28, 29.

19-20. Tyen lok ma pire tek ango ma watye kwede me tito kwena kombeddi?

¹⁹ I lobe mukene, kiye ni dano omak rec i dwe mogo keken. I lobe magi, lumak rec gitiyo matek ka dong kare me mako rec cok tum. Macalo lumak dano, watye ki tyen lok mukene me tito kwena kombeddi: Agikki me lobo man dong cok! Kare ma odong me nywako i tic me laro dano-ni dong odic woko. Pe igalle nyo itam ni myero ikur kare mo mupore ka wek inywak i tic man ma pire tek-ki.​—Latit. 11:4.

²⁰ Ti matek kombeddi me jingo mitini me tito kwena, dongo ngecci i kom Baibul, dongo tekcwiny, ki dong pwonnye me dine keni. Ribbe kacel ki jo makato milion aboro kulu ma gitito kwena maber i wi lobo ducu, ci ibinongo yomcwiny pa Jehovah. (Nek. 8:10) Mok tammi me nywako i tic man kit ma itwero kwede nio wang ma Jehovah owaco ni tic otum. Pwony ma lubo man binyamo yo adek ma watwero jingo kwede mitiwa me medde ki tito kwena maber me Ker-ri.