Tute me ngeyo mic maber loyo pi ngat moni pe yot. Kit ma mic moni pire tek kwede meno dong bedo i cing ngat ma kimine mic. Kit gin ma ngat moni nongo ni pire tek pat ki bot ngat mukene.

Me labolle, latin me mwaka apar ki wiye twero nongo ni tet ma pud okati nyen loyo aye obedo mic ma pire tek adada. Ladit ki tungcel, cwinye twero bedo yom adada ka kimine gin mo ma dong orii i doggolagi me ganggi macalo mic. I tekwaro mogo, mic ma opore pi dano ducu bed ni latin nyo ladit obedo cente, man weko ngat meno wilo ki gin ma cwinye maro nyo mito.

Kadi bed ni pe yot, jo mapol pud gitute me yenyo mic maber nyo ma pire tek loyo pi ngat ma gimaro. Kadi bed ni i cawa mukene pe gitwero nongo mic meno, ento tam i kom jami mogo matinotino twero weko mic moni kelo yomcwiny. Kong dong wanen jami angwen ma gitwero weko mic yomo cwiny ngat moni.

Miti pa Lagam mic. Laco mo i Belfast, i Kumalo me lobo Ireland owaco ni, lela me pyem ngwec ma kimine macalo mic i kare ma mwakane tye i kine 10 nyo 11 aye pud obedo mic mo maber loyo ma kimine. Pingo? En owaco ni: “Pien onongo emito lela adada.” Lok man nyuto ni, gin ma ngat moni mito aye ma weko mic moni yomo cwiny ngat moni nyo pe. Pi meno, myero kong itam i kom miti pa ngat ma imito miyo mic. Tute me niang gin ma pire tek bote, pien gin ma pire tek bote en aye ma doro mitine. Me labolle, kwariwa pol kare gimaro bedo kacel ki jo me pacogi. Mitigi twero bedo me neno lutinogi kacel ki likwayogi kare ki kare. Cito ka limo piny kacel ki lunyodowa ma guteggi twero bedo gin ma pire tek botgi adada dok gibedo ki pwoc iye makato mic mo keken ma kiminigi.

Gin ma pire tek ma weko wangeyo miti pa ngat moni aye me ciko itwa me winyo lokgi. Baibul  cuko cwinywa me ‘winyo lok oyotoyot, ento pe me rune me gamone.’ (Yakobo 1:19) Pol kare ka itye ka leyo lok ki luremi nyo wadini, cik iti me winyo lokgi maber pien man bikonyi me niang mitigi. Man bikonyi ka ce imito minigi mic weko imiyo gin ma gimaro ma cobo mitigi.

Cobo peko pa lagam mic. Ngat ma imiyo mic bibedo ki yomcwiny adada ka ce mic ma imine-ni cobo pekone moni kadi bed ni mic-ce tidi. Ento itwero ngeyo gin ma ngat moni mito nining?

Yo mayot me ngeyone twero bedo me penyo ngat meno gin ma en mito nyo ma en maro. Kadi bed kit meno, man weko pol pa lumi mic pe ginongo yomcwiny ma inongo kace ituru ngat moni atura ki mic. Medo i kom meno, kadi bed ni jo mukene giloko atir i kom jami ma gidag nyo ma gimaro, ento inongo ni pol kare pe gitito gin ma gimito.

Pi meno, bed ma wangi twolo me neno kit kwo ma ngat moni tye ka woko ki iye. Tika en pud tidi nyo oteggi, otii, wiye nono, onyomme, kenye oket, dato, latic, nyo dong oweko tic woko? Ci dong tam i kom kit mic mene maber ma twero rwatte ki miti pa ngat meno.

Me niang miti pa ngat ma imito mine mic, lok ki jo mukene ma gukato ki i kit kwo ma en tye iye-ni. Gitwero wacci gin ma mitte dok ma pire tek ento nongo dano mapol pe gingeyo. Leyo tam kit meno weko dong ibedo agonya me miyo mic ma twero cobo peko ki miti pa ngat meno ma jo mukene pe gitwero tamone.

Kare me miyone. Baibul waco ni: ‘Lok ma giloko i kare ma mitte kikome, ber mada!’ (Carolok 15:23) Ginacoya man nyuto ni lok ma kiloko i kare mupore twero kelo alokaloka madit adada. Man bene rwatte ki gin ma watimo. Kit ma lok ma kiloko i kare mupore ber kwede-ni, kit meno bene mic ma gimiyo i kare maber nyo i kare ma ngat meno mito iye twero konyo i kare meno adada.

Laremi macok nyom. Bulu macok tyeko kwanne. Dako macok nywal. Magi gubedo kare mogo me yomcwiny ma itwero miyo iye mic. Jo mogo gunongo ni pore me coyo piny jami mogo ma bitimme i mwaka meno. Man bikonyogi me yenyo mic mupore me amiya i kare meno. *

Ento, pe myero wami mic keken ka i kare magi. Watwero bedo ki yomcwiny ma bino pi miyo mic i kare mo keken. Ento bene myero wagwokke i kare mogo. Me labolle, ket kong ni laco omiyo ki dako mo mic labongo tyen lok mo keken, dako-ni twero cako tamo ni laco-ni omiye mic pien tye ki miti i kome. Ka meno tye lok ada ci, nongo pore me miyo mic, ento ka pe ci twero kelo turcwiny nyo winye manok. Man dok weko waneno tyen lok mukene madok i kom miyo mic​—miti pa lami mic.

Miti pa lami mic. Kit ma labol ma waneno malo-ni onyuto kwede, ber me niang ka ce ngat ma ibimiyo mic-ni twero dok bedo ki tam mukene nyo niang iye i yo marac. Kitungcel bene, ber ki lami mic me tamo i kom tyen lok muweko en mito miyo mic ki ngat moni. Kadi bed ni jo mapol gitamo ni meno pe gitye ki tyen lok mo marac me miyo mic, dano mapol gimiyo mic i kare mogo i mwaka pe pi mitigi ento pien nongo gineno timme kit meno. Ento bene jo mukene gimiyo mic pien gigeno ni gibinongo gin mo iye nyo weko kiworogi.

Ngo ma itwero timone wek imi mic ki cwiny mupore? Baibul waco ni: “Gin ducu ma wutimo, wuti ki mar.” (1 Jo Korint 16:14) Ka imiyo mic ki cwiny me mar kun nongo bene itamo pi miti pa lagamone, ci ki lok ada ngat ma imiyo bibedo ki yomcwiny dok in bene ibedo ki yomcwiny i miyone. Ka imiyo mic ki cwiny ducu, ci ibiweko Wonwa me polo bedo ki yomcwiny bene. Lakwena Paulo  opwoyo Lukricitayo me Korint i kare macon pi bedo ma cinggi yot ki bene me konyo Lukricitayo i Judaya. Paulo owaccigi ni: “Lubanga maro ngat ma miyo jamine ki yomcwiny.”​—2 Jo Korint 9:7.

Tam i kom jami ma wanyamogi-ni twero konyo adada i miyo mic ma yomo cwiny ngat moni. Jami magi ma wanenogi-ni ki mukene gukonyo adada i yub pa Lubanga i miyo mic mo ma pud dong pire tek loyo ducu. Wakwayi me neno mic man ma pire tek-ki kun ikwano pwonyo ma lubo man.