Mic mogo pigi tego pien nongo ngat ma omiyowa-ni obedo ngat ma tye ki twero nyo ngat ma waworo adada. Kadi bed mic mukene welgi yot, pud watero calo gin me wel pien dano ma omiyowa nongo obedo watwa nyo laremwa macok. Labolle obedo mic ma Russell omiyo bot Jordan, ma kiloko iye i pwony mukato-ni. Man rwatte ki mic me ginkok nining?

Mukwongo, Baibul waco ni, ‘Lubanga ocwalo Wode acel keken i lobo wek omi wabed kwo pire.’ (1 Jon 4:9) Man aye omiyo ginkok obedo mic madit adada. Pe tye ngat mo ma tye ki twero madit loyo Lubanga. Laco Jabuli mo oloko i kom Lubanga ni: “In keni aye ma nyingi Rwot [Jehovah], in aye Ngat Mamalo Twal ma loyo wi lobo-ni ducu.” (Jabuli 83:18) Ngat ma tye ki twero madit loyo aye ma omiyo mic man.

Me aryo, Lubanga aye “Wonwa.” (Icaya 63:16) En aye omiyowa kwo. Medo i kom meno, en gwokowa kit macalo wego ma lamar gwoko kwede lutinone. I kare ma Lubanga tye ka lok ki jone kun lwongogi ni Epraim, en owaco ni: “Epraim, in latinna ma amaro adada, . . . abibedo ki kica i komi bene.” (Jeremia 31:20) Lubanga bene winyo kit meno i kom jo ma wore i kare-ni. En pe obedo Lacwecwa keken ento bene obedo Wonwa ki Laremwa. Man mono pe weko mic mo keken ma a ki bote bedo gin ma pire tek?

Mic mukene pigi tek pien mar me ada aye nongo otugo cwiny ngat ma omiyo-ni. Lami mic ma cinge yot pe dok mito ni kiculle pi kicane.

Lubanga omiyo Wode piwa pien ni en marowa. Baibul waco ni, ‘Gin ma yam onyuto marre botwa en ene, Lubanga ocwalo Wode acel keken i lobo.’ Pingo en otimo man? “Wek omi wabed kwo pire.” (1 Jon 4:9) Man tika onongo obedo tic ma Lubanga myero otim? Pe kumeno! ‘Yecu okokowa’ pi ‘kica’ ma Lubanga onyuto botwa.—Jo Roma 3:24.

Pingo mic pa Lubanga onyuto “kicane”? Baibul tito ni: “Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Jo Roma 5:8) Mar me ada otugo cwiny Jehovah me laro dano ma lugoro ki lubalo. Pe wapore me nongo mar meno, dok pe watwero culo wange. Mic ma en omiyo onyuto mar ma pud dong dit loyo i tekwaro pa dano.

Mic mogo pigi tek pien nongo lami mic-ci ojalo gin madit adada me miyone. Ka ngat moni tye atera me jalo gin ma pire tek adada bote wek omi botwa, ci wamaro mic meno mada pi cwiny jalene.

Lubanga ‘omiyo Wode acel keken.’ (Jon 3:16) En omiyo ngat ma pud dong cok kwede loyo. Pi kare malac ma Lubanga obedo ka cweyo kwede polo ki lobo, Yecu otiyo kacel kwede dok ‘cwiny Lubanga obedo yom kare ducu i kome.’ (Carolok 8:30) Yecu aye ‘Wode me amara’ dok en aye “cal pa Lubanga ma pe nen-ni.” (Jo Kolocai 1:13-15) Wat ma tye i kin Yecu ki Lubanga aye pud dong wat macok loyo.

Ento, Lubanga “yam pe oweko Wode kikome.” (Jo Roma 8:32) Jehovah ominiwa ngat ma pire tek loyo bote. Pe tye mic mo ma Lubanga ojalo madit loyo wode.

Mic mukene pigi tek pien gicobo mitiwa madit atika dok oyotoyot. Me labolle, ket kong ni yat mo ma welle tek mitte me laro kwoni ento ipe ki cente ci ngat moni okonyi oculo pire woko. Ibitero mic meno calo gin ma pire tek, pe kumeno?

‘Macalo dano ducu to i Adam, en i kit yo acel-lu jo ducu gibimiyogi kwo i Kricito.’ (1 Jo Korint 15:22) Wan ducu macalo likwayo pa Adam, ‘wato’ dok pe watwero bwot ki i two kacel ki to nyo yubo watwa ki Lubanga wek wabed labongo bal i nyime. Dok macalo dano adana pe watye ki kero me bedo kwo piwa kenwa nyo miyo “kwo” bot ngat mukene. Baibul waco atir ni: “Adada, pe tye dano mo ma twero kokke kekene, nyo ma twero miyo wel mo bot Lubanga pi wilo kwone . . . welle dit mada, dok pe twero romo.” (Jabuli 49:7, 8) Wamito kony pi oyotoyot pien ni pe waromo culo pi ginkok-ki. Ka ni kiwekwa kenwa, pe dong wabiromo timo gin mo pi kwowa kulu.

Pi marre madit, Jehovah oculo pi “yat” ma wamito me laro kwowa, wek ‘jo ducu gunong kwo’ i Kricito. Ginkok cobo man nining? “Remo pa Wode Yecu Kricito bene lwoko bal ducu woko ki i  komwa.” Ada, niye i kom remo pa Yecu yabo yo botwa wek kitimiwa kica pi balwa dok wanong kwo ma pe tum. (1 Jon 1:7; 5:13) Jowa me amara ma dong guto woko gibinongo adwogi maber ki i ginkok-ki nining? ‘Dano aye mukelo to, dok bene cer pa jo muto Yecu mukelo.’—1 Jo Korint 15:21. *

Mic me ginkok pa Yecu pe kiromo porone ki mic mo mukene pien ngat ma omiyo-ni aye ngat madit loyo ducu dok omiyo pi marre. Pe tye ngat mukene ma ojalo gin madit loyo Lubanga Jehovah. Dok pe tye mic mo mukene ma cobo mitiwa madit loyo calo bedo agonya ki i bal ki to. Ada, pe tye mic mo ma welle dit loyo ginkok.