Nyikke Cok Bot Lubanga

Kwe Cwiny pi Jo ma Cwinygi Cwer

‘PE APORE me nongo mar pa Jehovah.’ Dako mo ma Lakricitayo ma oyelle ki cwercwiny i kwone pi kare malac owaco kit meno. En omoko kekene i cwinye ni Jehovah nen calo tye bor kwede tutwal. Tika Jehovah ada tye bor ki jo ma worre ento ma gwok nyo cwinygi cwer? Lagam ma kweyo cwiny tye nonge i coc ma Daudi ocoyo pi teko pa cwiny maleng i Jabuli 34:18.

Daudi ongeyo kit ma cwercwiny mukato kare woko gudu kwede luworo ma lugen pa Jehovah. Macalo awobi matidi Daudi okwo bene calo langwec ayelayela pa kabaka Caulo ma onongo mito neko en woko. Daudi ocito okanne ka mo ma en tamo ni Caulo twero yenye iye me agikki​—boma pa lumerok i Gat, i lobo pa jo Piliciti. Ento i kare ma kingeye woko, Daudi omayo kome kun poro bedo lapoya. Daudi omiyo deyo bot Lubanga pi gwoko kwone, dok pi kwo man ma en okato ki iye-ni, omiyo en ocoyo Jabuli 34.

Tika Daudi otamo ni Lubanga tye bor ki bot jo ma kwo matek weko ginongo ni konygi pe nyo nen calo En pe mito nenogi? Daudi ocoyo kuman: “RWOT [Jehovah] tye cok ki jo ma cwinygi cwer, en laro jo ma gitye ki arem madwong i cwinygi.” (tyeng me 18, Baibol pa Katoli) Kong dong wanenu kit ma lok magi miyo kwede kwe cwiny kacel ki gen.

“[Jehovah] tye cok.” Lok mo ma kikwedo nyutu ni man tye “yo mo me waco ni Rwot tye keto cwinye dok bedo ka ngiyo piny, tye atera kare ducu me laro jone.” Ngeyo ni kare ducu Jehovah nongo tye ka ngiyo jone weko cwinywa bedo mupye. En neno kwo matek ma gitye ka kato ki iye i kare magi ma ‘piny tye marac-ci,’ dok en ngeyo tam matut ma tye i cwinygi.​—2 Temceo 3:1; Tic pa Lukwena 17:27.

“Jo ma cwinygi cwer.” I tekwaro pa jo mogo, “cwiny ma cwer” bedo tye pi mar ma ngat moni pe ka nongone. Ento laco mo ma okwano matut owaco ni, lok magi pa laco Jabuli-ni, tye ka lok i kom “kumu ki par ma twero bino i yo mapol mapat pat.” Tye lok ada ni kadi wa luworo ma lugen pa Jehovah kare mukene giwok i kwo matek mukato kare woko ma miyo cwinygi cwer.

“Jo ma gitye ki arem madwong i cwinygi.” Jo ma cwinygi oballe woko kare mukene ginene kekengi ni konygi dong pe ada ma weko cawa mukene gengi rweny woko ducu. Buk mo matidi ma kimako i cing dok konyo jo ma goyo coc me Baibul i leb mukene waco ni lok man bene twero gonye ni “jo ma dong gipe ki gin mo maber anyim ma myero gukur.”

Jehovah kono dong waco ningo bot jo ma “cwinygi cwer” ki ma gitye ki “arem madwong i cwinygi”? En tika bedo bor kwedgi, ma nongo en tamo ni konygi pe dok pe etwero balo karene ki marre i komgi? Pe tye kumeno! Macalo lanyodo ma lamar ma gwako dok kweyo cwiny latinne i kare me peko, Jehovah tye cok bot jo ma giwore ma gikok bote pi nongo kony. En mito mada ni ekwe arem madwong ma opong i cwinygi-ni. En twero miyo botgi ryeko kacel ki teko me ciro atematema mo keken ma gin wok ki iye.​—2 Jo Korint 4:7; Yakobo 1:5.

Pingo kong dong pe inong kit ma itwero nyikke kwede cok bot Jehovah? Lubanga ma lakica ni tye ka cikke ni: “Abedo . . . ki ngat mamwol, ma cwinye cwer, dok ma ngut pi miyo kwo manyen bot jo ma cwinygi cwer dok ma gingut.”​—Icaya 57:15.