Lapeny Pa Lukwan Bukkewa . . .

Mono Lukricitayo ma Lugen Ducu Gibicito i Polo?

▪ Jo mapol dong gukwano lok me kwe cwiny pa Yecu ma tye ni: “Pien Lubanga con omaro lobo kumeno, omiyo iye Wode acel keken, wek dano ducu ma ye owek to, ento obed ki kwo ma pe tum.” (Jon 3:16) Tika Yecu onongo tye ka waco ni luworo ma lugen pa Wonne, Jehovah gibicito i polo ka nongo kwo mamit kacel ki kuc pi naka ki yomcwiny?

Nen kong lok man ma kelo tam i wi dano ni: “Pe tye ngat mo ma yam oito i polo, kono en ma ceng olor piny nia ki i polo, en aye Wod pa dano ma bedo i polo.” (Jon 3:13) Man dong te lokke ni luworo ma lugen i kare macon calo Nua, Abraim, Moses ki Daudi pe gucito i polo. (Tic pa Lukwena 2:34) Ci dong gin gucito kwene? Lagamme tye macek ni: Luworo ma lugen i kare macon-ni gitye i bur lyel, gunino woko i to, pe gingeyo gin mo, gitye ka kuro cer.​—Latitlok 9:5, 6; Tic pa Lukwena 24:15.

Yecu aye obedo ngat mukwongo me lok i kom cito i polo i nge to. En owaco bot lukwenane ni ebiyubo kabedo pigi i polo. (Jon 14:2, 3) Man onongo tye gin manyen bot lwak pa Lubanga. Lakwena Paulo otito lacen ni inge to ki cer pa Yecu nio wa i dokke i polo, Yecu ‘oyabo bot lupwonnyene yo manyen me kwo’​—yo mo ma pud peya dano mo onongo olubo.​—Jo Ibru 10:19, 20.

Man mono dong te lokke ni nicakke i kare meno jo ducu ma lugen gibicito i polo? Pe kumeno, pienni nicer me cito i polo tye pi dog tic mo ma kimiyo bot dano mogo manok. I otyeno me agikki ma obedo iye ki lukwenane, Yecu owaco botgi ni ‘gibibedo i wi komker kun gingolo kop’ i Ker me polo. Dong loc kacel ki Yecu i polo aye obedo dog ticgi.​—Luka 22:28-30.

Jo mukene mapat ki lukwena bene kibimiyo botgi tic man mamwonya-ni. I gin anyuta mo, lakwena Jon oneno Yecu kacel ki jo ma gucer gitye i polo ma kilwongogi ni ‘lulamdog ma gitiyo bote, gin bene gibiloyo lobo.’ (Niyabo 3:21; 5:10) Jo meno onongo gitye gin adi? Kit macalo timme kwede i gamente ducu ni, jo manok keken aye giloyo loc. Dong tye bene kumeno i Ker man me polo-ni. Yecu ma en aye Wod Romo pa Lubanga, biloc kacel ki jo 144,000 luloc luwote “ma gikokogi ki i kin dano ducu.”​—Niyabo 14:1, 4, 5.

Tye kono lok ada ni jo 144,000 tye wel manok ka iporo ki wel jo ducu ma lugen ma yam con ki ma i kare-ni. Ento man kono gire niang iye pe tek pien jo 144,000 kicerogi me kwo i polo pi dog tic maleng. Ka ce onongo imito gedo ot mo, mono ibicoyo ludiro ducu me gedo ma gitye i kabedo ma ikwo iye-ni? Pe kumeno. Ibimito wel dano muromo pi dog tic meno keken. I yo acel-lu bene, Lubanga pe oyero dano ducu ma lugen pi tic ma dok pat-ti me loc kacel ki Kricito i polo.

Gamente man me polo-ni bicobo yub mukwongo pa Lubanga pi wan dano. Yecu kacel ki jone 144,000 luloc luwote gibibedo luneno i tic me loko lobo me doko paradic, ka ma jo ma lugen ma welgi pe kwanne gibikwo iye pi naka ki yomcwiny. (Icaya 45:18; Niyabo 21:3, 4) Man bene bibedo i kine jo ma kibicerogi ma Lubanga wiye po i komgi.​—Jon 5:28, 29.

Luwor Jehovah ducu ma lugen​—yam con nyo i kare-ni​—gitwero nongo mic mamwonya me kwo pi naka. (Jo Roma 6:23) Jo manok keken aye gibikwo i polo ma lubbe ki dog tic mo madok pat, kun pol pa dano gibikwo i paradic i lobo.