Peko Ducu Bigik!

KA NGAT mo owacci ni, “Peko ducu dong cok gik,” ibidok iye ningo? Gwok ibiwaco ni, “In nen calo itye ka lek aye. Peko tye gin komwa.” Nyo bene iromo tamo keken ni, ‘Nyeri mono tamo ni etye ka tuko ki wi anga?’

Kadi kono nen calo peko ma poto atura pe bigik, watye ki gen ni alokaloka bitimme. Ento pe bitimme macalo adwogi me tute pa dano. Dano pe gitye ki kero me niang maber gin mumiyo man timme ki dok pingo, dok bene pe gitwero timo gin mo keken me gengo. Kabaka Solomon me Icrael, ma onongo ngene pi ryekone ki niang matut ma tye kwede ocoyo ni: “Dano kara pe twero ngeyo gin ma tye ka timme i lobo. Kadi bed dano mo oyelle ma rom mene me yenyone, pud pe binongo; dok kadi bed dano ma laryeko tamo ni engeyo, pe twero nongone bene.”​—Latitlok 8:17.

Anga ma twero gengo peko ma poto atura ka dano pe gitwero? Baibul tito ka maleng ni Lacwecwa aye ma bikelo alokaloka. En aye ma oketo jami ducu ma i lobo, calo kit ma kot yubbe kwede me cwer. (Latitlok 1:7) Ka i poro ki dano, teko pa Lubanga pe gik. Lanebi Jeremia oye lok man kun wacci: “Ai Rwot [Jehovah] Lubanga! In aye ma iketo polo ki lobo ki tweroni dok ki tekki! Pe tye gin mo matek ma in pe iromo tiyone.” (Jeremia 32:17) Kit macalo Lubanga ocweyo lobo ki jami ducu ma tye iye-ni, en ngeyo kit me gwokone kacel ki jami ma iye wek dano gubed ki kuc ki piny ma opye mot.​—Jabuli 37:11; 115:16.

Lubanga kono dong bikelo alokaloka man nining? Ker pa Lubanga, ma en aye ker ma Lubanga oketo i polo-ni, bikelo alokaloka madit i lobo dok bene jami ducu ma kelo peko bibedo i te locce. Kadi bed ni Jehovah tye ki kero me timo man en kikome, ento en ojalo twero man bot Wode. Lanebi Daniel owacci: “Gitingo loc ducu gimiyo i cinge, kacel ki ker ducu ki deyone wek lwak me rok ducu ki rok ducu, ki jo ma loko leb mapatpat-gu ducu, gubed luticce.”​—Daniel 7:14.

Yecu Kricito, Wod pa Lubanga, gimine twero muromo me kelo alokaloka man ma biweko lobo bedo kabedo mamwonya. I kare ma Yecu pud tye i lobo mwaki alip aryo angec, en onyuto wiye wiye kit ma ebikelo kwede jami ducu ma kelo peko i te twerone. I nino mo acel, ma Yecu ki lupwonnyene gitye i yeya i nam me Galilaya “Yamo madwong ocako kodo, pii otwagge, ocorre i yeya, omiyo i yeya ocako pong woko.” Man oonyo koyo i kom lupwonnyene, dok gutamo ni gibito woko, ci gucoyo Yecu. Gin ango ma Yecu otimo? En owaco keken ni “‘Ling, pye mot.’ Yamo ocako kwe, nam oling mot.”  Man ocungo wi lupwonnyene ma pe wacce, ci gupenye kekengi ni: “Man anga kaa, ma yamo ki nam giwinye-ni?”​—Marako 4:37-41.

Dong lacen i nge i kare meno, kimini Yecu rwom ma lamal me bedo cwec me cwiny dok kimiyo twero ki loc ducu i cinge. Calo Kabaka me Ker pa Lubanga, en tye ki twero me loc ki kelo alokaloka i lobo wek dano gubed ki kuc kacel ki piny mupye mot.

Ento, kit ma waneno kwede-ni pekki mapol ki mukene ma gipoto atura dano giyenyo ayenya ki komgi, dok gudoko raco tutwal pien tye jo mogo ma gitiyo ki luwotgi opii opii me cobo mitigi kengi ki pi woro me jami. Gin ango ma Ker-ri bitimone i kom jo ma wigi tek, guding, gumoko tamgi pe me lokke? Baibul loko pi bino pa Rwotwa Yecu ni “a ki i polo kacel ki lumalaikane matek i dye mac ma lyel. I kare meno en biculo kwor i kom jo ma pe ngeyo Lubanga, ki i kom jo ma pe gilubo lok me kwena maber i kom Rwotwa Yecu.” Ada en bityeko “jo ma tye ka balo lobo woko.”​—2 Tecalonika 1:7, 8; Niyabo 11:18.

I nge man, Yecu Kricito ma en aye “Kabaka ma loyo luker ducu[-ni],” biketo lobo kacel ki jami calo yamogi-gu ducu ite locce . (Niyabo 19:16) En bineno ni lutedero ducu ma ker-ri biloyogi gibedo labongo peko mo kadi ki acel. En bitic ki tekone me kelo alokaloka i kom jami calo yamo, lyeto ki ngico, oro ki cwirgi-ni ducu wek kare ki kare pe gukel peko i kom dano. Adwogine bibedo gin ma yam con Jehovah ocikke pire bot jone ni: “An abimiyowu kot macwer i karene, lobo biceko cam, yadi ma i poto binyako nyiggi.” (Lulevi 26:4) Dano bibedo ki kare me gero odigi labongo lworo mo keken ni gin mo bibalone: “Dano gibigero odi ci gibedo i igi, gibipuro poto olokgi, ci gibicamo nyige bene.”​—Icaya 65:21.

Gin Ango ma Myero Itim?

Labongo akalakala mo, in bene calo jo mukene mapol, itye ki mitti me kwo i lobo ma peko mo keken dong pe iye. Dong gin ango ma myero itim wek ibed kunnu? Kit ma “jo ma pe ngeyo Lubanga” ki “jo ma pe gilubo lok me kwena maber” pe gibibedo i lobo ma bibino i anyim dok jami maraco pe iye-ni, ngat acel acel myero opwony lok i kom Lubanga i kare-ni dok bene ocwak yubbe me loyo lobo. Lubanga mito ni wangeye dok bene walub lok me kwena maber me Ker-ri ma en oketo pi Wode.

Yo maber me pwonyo man aye me nongo ngec matut ki i Baibul. Buk man tye ki ngec ma konyowa me donyo i lobo me kuc i te loc me Ker-ri. Pingo pe ipeny Lucaden pa Jehovah wek gukonyi me niang gin ma Baibul pwonyo? Gitye ki mitti me konyi ma lubbe ki yub man. Labongo akalakala mo​—tek itute me ngeyo Lubanga dok ilubo lok me kwenane maber-ri, ci lok ma i Carolok 1:33 bicobbe i kommi ni: “Ngat ma biwinyo lokka bibedo ma ocung matek; en bibedo ma pe lworo gin marac, labongo par mo.”