Tika Pire Tek me Ngeyo Lagamme?

“Wubingeyo lok me ada, lok me ada bigonyowu.”​—JON 8:32.

BAIBUL tye ki lok ada ma twero gonyowa ki i tam ma onywene nyo niye gobagoba madok i kom Yecu. Tika gin ma waye i kom Yecu pire tek? Ada, pire tek. Pire tek bot Jehovah. Pire tek bene bot Yecu. Dok pire myero obed tek botwa.

● Pingo pire tek bot Jehovah? Wac mere macek ni pien “Lubanga en mar.” (1 Jon 4:8) Jehovah mito ni myero wakwo ki yomcwiny dok pi naka. Yecu owaco ni: “Pien Lubanga con omaro lobo [wan dano] kumeno, omiyo iye Wode acel keken, wek dano ducu ma ye en . . . obed ki kwo ma pe tum.” (Jon 3:16) Lubanga ocwalo Wode i lobo wek Olarwa dok bene oyabiwa yo me kwo pi naka i Paradic, ma lubbe ki Yubbe mukwongo. (Acakki 1:28) Lubanga tye ki miti mada me miyo mot me kwo ma pe tum bot jo ma gipwonyo lok me ada i kom Wode dok bene gitimo jami ma rwatte ki gin ma gupwonyo.​—Jo Roma 6:23.

● Pingo pire tek bot Yecu? Yecu bene maro wan dano. En onyuto mar ma pud dong dit loyo kun miyo kwone piwa. (Jon 15:13) En oniang maber ni man keken aye yo ma eromo laro ki dano. (Jon 14:6) Tika myero wabed ki ur me ngeyo ni Yecu mito ni dano mapol gunong adwogi maber ki i kom ginkokke-ni? Man aye gin mumiyo en ociko lulub kore me ada me pwonyo dano i wi lobo lung i kom yub kacel ki miti pa Lubanga.​—Matayo 24:14; 28:19, 20.

● Pingo pire myero obed tek botwa? Tam kong manok i kom jami ma inongo ni pigi tek boti​—yotkomi ki dong jo me paco ni. Tika imito yotkom ki kwo maber pi in ki jo me amarani? Jehovah tiyo ki Yecu me miyo boti kacel ki jo me amarani gen me bedo ki yotkom labongo roc ki dong kwo ma pe tum i lobo manyen, ka ma arem ki deno can bibedo pe iye matwal. (Jabuli 37:11, 29; Niyabo 21:3, 4) Tika imito kwo i lobo ma kit meno? Ka ce tye kit meno, ci tye gin mo ma myero itim.

Kong dok inen wang Baibul ma kiketo kacel ki wi lok me pwony eni, ni: “Wubingeyo lok me ada, lok me ada bigonyowu.” Lok me ada i kom Yecu kacel ki tic ma mege ma lubbe ki cobbe pa Yub pa Lubanga twero weko ibedo agonya ki i opii marac loyo​—bedo i te cik me bal ki to. Ento ka ni inong larre meno, omyero kong inge “lok me ada.” Pingo pe kong ipwony lok me ada man ki kit ma in kacel ki jo me amarani wutwero nongo kwede adwogi maber ki iye? Lucaden pa Jehovah cwinygi bibedo yom mada me konyi.