Luye Kikome dok Anywali ma Kitgi Beco Yo me Bedo ki Kit Aryo Magi

JAMI aryo mene ma gunen ka maleng i tic me pwony pa Yecu? Mukwongo, Yecu otute me loko cwiny dano, ento pe me kelo alokaloka i lok me wibye. Me lapore, nen kong gin ma Yecu obedo ka nwoyone teretere i Pwonye ma omiyo i Wi Got. Ma peya en otito kit ma pire tek kwede me bedo calo kado ki tara, en owaco bot lwak ma tye ka winye ni yomcwiny me ada tye bot jo ma “gingeyo ni gin lucan i lok me cwiny.” En dok omedde ni: “Gitye ki gum [yomcwiny] jo ma mwol, . . . jo ma cwinygi leng, . . . jo ma kelo kuc.” (Matayo 5:1-11) Yecu okonyo lulub kore me ngeyo kit ma pire tek kwede me bedo ki tam mupore ma lubbe ki gin ma Lubanga wacci rac nyo ber ki dong tic pi Lubanga ki cwinygi ducu.

Me aryone, i kare ma Yecu oneno ka dano gideno can, cwiny me kica oweko en otimo gin mo me konyogi. Ento en pe obedo ki yub mo me kwanyo peko woko ducu. (Matayo 20:30-34) En ocango lutwo, ento two gire omedde ki bedo tye. (Luka 6:17-19) En omiyo jo ma kiunugi guwinyo agonya, ento ngolo kop alenga kacel ki deno can pud gumedde anyim. En omiyo cam bot jo ma kec nekogi, ento kec pud omedde ki bedo tye i lobo.​—Marako 6:41-44.

Cuko ki dok Kweyo Cwiny Dano ki i Deno Can

Pingo Yecu oketo cwinye me cuko ki dok kweyo cwiny dano ki i deno can ento pe me loko gamente nyo rwenyo can? Yecu onongo ngeyo ni Lubanga tye ki yub me tic ki Kerre i kare ma anyim me kelo agikki me gamente pa dano ci kwanyo woko jami ma gikelo deno can. (Luka 4:43; 8:1) Pi meno, i kare ma lupwonnyene gupenye ni omedde ki cango jo ma komgi lit, Yecu owaccigi ni: “Dok wakobu woko i gang mukene ma tye cok ki kany, wek acitit lok kunnu bene; pien meno en aye gin mumiyo abino.” (Marako 1:32-38) Yecu okonyo jo mapol ma onongo can obwoyogi, ento gin ma pire obedo tek bote aye pwonyo ki dong tito lok pa Lubanga.

I kare-ni, Lucaden pa Jehovah gitute me lubo lanen pa Yecu i ticgi me pwony. Gin gikweyo cwiny dano kun gimiyo kony bot jo ma can odiyogi. Ento Lucaden magi pe gitute me kwanyo ngolo kop alenga woko ki i lobo. Gin giye ni Ker pa Lubanga bikwanyo jami ma weko dano deno can. (Matayo 6:10) Calo Yecu, gin giketo cwinygi me cuko cwiny dano ento pe me loko gamente. Yo man tiyo maber ada pien peko madit pa dano pe obedo tim me wibye, ento bedo ki kwo matir.

Anywali ma Kitgi Beco

Kitungcel, Lucaden pa Jehovah gingeyo ni obedo ticgi me bedo anywali ma kitgi beco. Pi meno, giworo twero ma ki bot gamente. Kun gitiyo ki bukke kacel miyo caden, gin gicuko cwiny dano me bedo jo ma lubo cik. Ento ka ce gamente openyogi me timo gin mo ma pe rwatte ki cik pa Lubanga, Lucaden gikwero woko. Gin ‘giwinyo Lubanga makato dano.’​—Tic pa Lukwena 5:29; Jo Roma 13:1-7.

Lucaden pa Jehovah gilimo jo ma i kabedogi kun gikwano kwedgi Baibul  labongo cul mo. Macalo adwogine dano milion mapol ata dong gutyeko loko cwinygi. Mwaka ki mwaka, dano mia mapol ata ginongo kony me weko kwo mogo maraco calo mato tar, mero ki kongo, tic ki yadi i yo marac, tuko me goyo cente ki dong tim me abor. Gin gudoko anywali ma gilubo cik pien gitye ka tic ki cik me Baibul i kwogi.

Medo i kom meno, pwony me Baibul konyo jo me paco moni me bedo ki woro matut i kingi dok bene yabo doggola me nyamo lok i kin laco ki dako, lunyodo ki litinogi ki dong lutino ki luwotgi. Magi gubedo jami ma jingo wat ma tye i kin lupaco moni. Gangi matego bene giweko kabedo moni bedo matek.

Man ma dong watyeko neno lok ma pigi tego ipwony magi-ni, in itamo ningo: Baibul tika yeni kirub dini ki tim me wibye? Lagamme tye ka maleng ni; pe cwako. Ento Lukricitayo me ada tika myero gubed anywali ma kitgi beco? Eyo, mitti ni myero obed kumeno. Gin mono gitwero timo meno nining? Ka ce gilubo cik ma Yecu ominigi ni myero gubed calo kado ki tara bot jo me lobo.

Jo ma gitute me tic ki tam magi pa Kricito-ni i kwogi gikelo adwogi maber botgi, jo me pacogi ki dong bot jo ma i kabedo ma gikwo iye. Lucaden pa Jehovah ma gikwo ka ma ibedo iye cwinygi bibedo yom me nyamo kacel kwedi ngec mukene ma lubbe ki kit ma kikwano kwede Baibul ki dano. *

[Lok ma tye piny]

[Boro buk i pot karatac 7]

Yecu oketo cwinye me cuko cwiny dano, ento pe me loko gamente

[Boro buk i pot karatac 8]

Lucaden pa Jehovah ginongo ni obedo ticgi me bedo anywali ma kitgi beco