Lok Ma Iye Rwatte Ki Cayan

“Atyeko coyo lok ma romo pyeradek kun amiyi tam mabeco kacel ki ngec muromo, pi nyuto boti gin ma atir dok ada.”​—CAROLOK 22:20, 21.

PINGO BAIBUL DOK PAT? Bukke ma kicoyogi con gitito jami maraco dok ma pe genne ma lucayan me kom kare-ni pe giye. Wa i kare-ni bene, luco bukke myero gubed ka timo alokaloka i bukkegi wek orwatte ki ngec me cayan me kare-ni. Ento Baibul Lacwec aye mucoyo dok bene lokke “bedo matwal.”​—1 Petero 1:25.

LABOL: Cik ma Kimiyo bot Moses onongo nyuto atir ni Luicrael myero gukwiny bur me konye “i nge gony.” (Nwoyo Cik 23:12, 13) Ka Laicrael mo ogudo kom lee nyo dano muto, en myero olwok kome ki pii. (Lulevi 11:27, 28; Wel 19:14-16) Ludobo onongo kigengogi i ot nio ka dong kineno ni dobogi ocang nyo pe romo kobo i kom ngat mo keken.​—Lulevi 13:1-8.

GIN ANGO MA LUDAKTARI GIWACO: Yubo ka konye, lwoko cing, ki dong keto kigeng gubedo yo maber loyo me juko two. Ka coron nyo ka mo ma kiromo konye iye pe, dul mo me lobo Amerika ma kilwongo ni Centers for Disease Control and Prevention (CDC) omiyo tam ni: “Omyero i konye ka mabor ki wang pii mo keken ma romo mita 30 dok myero iyik konye ni i ngom.” Dul ma loyo Yotkom i Wi Lobo waco ni ka jo me kabedo moni gibolo cet nyo gikonye i coron, ci man bigengo two cado ki pacen 36. Ma peya oromo mwaki 200, ludaktari guniang ni gikobo two bot lutwo mapol pienni pe gilwoko cinggi i nge tic i kom lyelli. Dul me CDC pud wa i kare-ni gitye ka waco ki dano ni “lwoko cing aye pud tye yo maber loyo me gengo kobo pa two.” Ento gengo ludobo i ot nyo jo mukene ma komgi lit kono? Cokcok-ki, dul me Saudi Medical Journal owaco ni: “Ka two mo ma kobo pud ocakke acaka, ber me poko ki dong gengo lutwo mukene ki i kin luwotgi, man twero bedo gin ma pire tek ki dok gengo kobo pa two moni.”

IN ITAMO NINGO? Tika itwero geno buk mo mukene ma rwatte ki ngec me cayan me kare-ni kun kicoyo wacon? Nyo kece Baibul dok pat?

[Boro buk i pot karatac 6]

“Cwiny ngat moni twero bedo yom ka okwano kit ma kitito kwede kore ki kore cik me gwoko lengo i Cik ma Kimiyo bot Moses.”​​—BUK ME MANUAL OF TROPICAL MEDICINE, MA DRS. ALDO CASTELLANI GIN KI ALBERT J. CHALMERS GUCOYO