Nyikke Cok bot Ngat ma Gamo Lega

JO MA giwacci giye i kom Lubanga-ni pe giromo tito pingo giye i kome ka ipenyogi. Pe bene gitwero tito gin mumiyo dini tye ka kelo pekki mapol nyo ni Lubanga weko dano deno can. Gin maber ma gitwero timone aye me lega bot Lubanga mo ma pe giniang i kome.

Ento tye gin mukene ma iromo timone makato lega wek inyikke cok bot Lubanga. Itwero dongo niyeni i kom ngec ma itye kwede i kom Lubanga dok meno weko imarre kun pire bedo tekki. Niye me ada cung i kom gin ma kineno kome. (Jo Ibru 11:1) Ka i pwonyo lok ada i kom Lubanga, ci iromo ngeyo en kun iloko kwede macalo laremi. Nen kong gin mutimme i kom jo mogo ma onongo bene gilego bot Lubanga kadi bed ni onongo gitye ki akalakala.

◼ Patricia, kiloko i kome i pwony me acel. “I nino mo acel, onongo atye ki luwota ma giromo gin apar i kare ma gucako nyamo lok i kom dini. Onongo atittigi ni aweko babana ma pe ye i kom Lubanga-ni, gin ki Lacaden mo acel pa Jehovah i kare ma gitye ka nyamo lok me Baibul. Ngat acel i kin luwota-ni owacci ‘Oromo bedo ni Lucaden pa Jehovah gipwonyo lok ada.’

Ngat acel owacci “‘Pingo pe kong wacitu i gang legagi wek waniang wunu maber?’ Ci wacito bene ada. Pien Lucaden pa Jehovah gimaro dano, an ki jo mukene wabedo ka wire i gang legagi kadi bed ni cwinywa onongo gung.

“Ento, i Ceng Cabit mo acel, awinyo gin mo ma ogudo cwinya adada. Ngat ma obedo ka miyo pwony-nyi otito tyen lok mumiyo dano deno can. Onongo pe angeyo matwal ni kicweyo dano labongo roc i acakki, dok ni bal obino kun wok ki i ngat acel ci onya oromo dano ducu. Lami pwony-nyi bene otito gin mumiyo too pa Yecu pire tek me dwoko cen gin ma lunyodowa mukwongo gurwenyo. * (Jo Roma 5:12, 18, 19) Wanga otugi yabbe cutcut. Atamo ki i cwinya ni, ‘Lubanga tye kara ada dok paro piwa.’ Amedde ki kwano Baibul, ci pi tyen mukwongo i kwona, aniang ni aromo lega bot Lubanga.”

◼ Allan, kiloko bene i kome i pwony me acel. “I nino mo acel Lucaden pa Jehovah gubino i pacowa, ci dakona ojologi i ot pienni lucaden-ni onongo gutitte pi kwo ma pe tum i lobo kany, dok lokgi-ni ogudo cwinye adada ma omiye miti. Iya pe obedo yom i kome. Pi meno, aweko wele ci acito bote i jokon,  awacce ni, ‘Wek mingo obedi. Pe iromo ye jami ata kumeno calo bur lyel!’

En ogamo ni, “‘Ayela pe, ka kumeno in cit iwaccigi ni pwonygi-ni pwony goba.’

“Nyuto ni pwonygi-ni obedo pwony goba ongaya woko. Lucaden-ni gunyuto cwiny me lirem dok gumiya buk ma loko i kom ka ce kwo kicweyo acweya nyo ocakke pire kene. Lok ducu ma i bukki kinyamogi kore ki kore i yo ma niang iye yot ma oweko atugi moko tamma me medo ngecca i kom Lubanga. Acako kwano Baibul ki Lucaden pa Jehovah, ci cutcut aniang ni jami ma Baibul pwonyogi pat adada ki jami ma onongo atamogi madok i kom dini. Pienni abedo ka medde ki pwonyo lok i kom Jehovah, acako lega bote i kom pekona kikome. Alego ni okonya wek abwot tam maraco ma onongo atye kwede i cwinya. Kombeddi dong awinya yamo mangic kuta pien angeyo ni Jehovah gamo legana.”

◼ Andrew, bedo i lobo England. “Kadi bed ni onongo atye ki tam mucwiny medo ki miti matek i kom cayan, onongo aye pwony man ni kwo ocakke pire kene-ni pienni jo mukene giwacci obedo lok ada. Onongo awacci Lubanga pe pi jami maraco ma tye ka timme-ni.

 “I kine mogo atamo ni: ‘Ka Lubanga ada tye malo kuca, ci amito niang pingo jami magi ducu gitimme. Pingo tim gero ki lweny onya mapol ata?’ I kine mogo alego pi kony ka atye i peko, ento nongo pe angeyo nga kikome ma atye ka lega bote-ni.

“I nino mo acel ngat mo omiyo bot dakone trak ma wi lokke tye ni Lobo-ni Bitwero Bwot? ma Lucaden pa Jehovah aye gucoyo. Meno aye lapeny ma abedo ka penye kwede kare ki kare. Trak man oweko apenye kekena ni, ‘Lagam ma Baibul miyo pi lapeny man mono pire tek?’ Lacen, i kare ma atye i yweyo, ngat mo omiya buk me The Bible​—God’s Word or Man’s? * I kare ma aniang ni Baibul ada rwatte ki cayan, anongo ni omyero ange lok mukene mapol ki i Baibul. Aye kwano buk meno i kare ma Lacaden mo acel pa Jehovah openyo me kwan kweda. I kare ma acako niang yub ma Jehovah tye kwede, acako winyo ki i cwinya ni en tye kara ada, dok atwero lega bote cawa mo keken.”

◼ Jan, odongo i ot ma danone gitye i dini Purutanti i London. “Tim maraco ma tye i dini ki kit ma peko onya kwede oweko akwero lok me dini. Atenyo bene kwan woko ci acako goyo wer wek anong cente. Meno aye kare ma arwatte ki laco mo ma nyinge Pat. En odongo i ot ma danone gitye Lukatoli dok en bene okwero lok me dini calo an.

“Wabedo i ot mo ma kiweko woko kacel ki jo mukene ma bene gutenyo kwan ento gimito donyo i dini mogo me lobo Acia. Nyamo lok obedo magwar i kinwa ka ce tyen lok me kwo tye, dok wabedo wa i cwiny dyewor. Kadi bed ni wan ki Pat onongo pe waye i kom Lubanga, ento onongo waye ni tye ngat mo ma ‘ocweyo kwo.’

“Wanywalo latin kayowa, awobi, i kare ma wakobo i kumalo me lobo England ka yenyo tic me goyo wer. I dyerwor mo acel, kom latin obedo lit, ci acako lega bot Lubanga mo ma pe bene aye i kome. Ma pe otero kare, wat i otwa ki Pat oballe ma oweko akwanyo latinna ci tyena iye. Alego dok pi tyen me aryo pi nongo kony ka gwok nyo ngat mo tye ka winya. Pat bene kara olego pi kony acel-lu.

“Lacen i nino meno, Lucaden aryo pa Jehovah gubino bot Pat ci gunyutte tam mabeco dok ma tiyo ma ginonge i Baibul. Pat ogona cim kun penya ka waromo bedo kacel wek wakwan Baibul kacel ki Lucaden-ni. I nge kare manok keken, waniang ni me yomo cwiny Lubanga, omyero waco nyomwa i te cik. Onongo nen calo gin matek adada pi wat ma oballe i kinwa-ni.

“Onongo wamito ngeyo jami mapol ma lubbe ki cobbe pa lok pa lunebi me Baibul, gin mumiyo dano deno can, ki dong gin ma Ker pa Lubanga obedo. Motmot waniang ni Lubanga paro piwa, dok man omiyo wabedo ki miti me timo gin ma en mito. Ma oweko labongo balo kare watugi watweyo lagit cut. Ryeko ma tye i Lok pa Lubanga okonyowa me gwoko lutinowa adek, awobe aryo ki anyaka acel. Dong watye ki gen ni Jehovah gamo legawa ka walego bote.”

Niang Piri Keni Gin ma Nyuto ni Lubanga Tye

Calo dano milion mapol ata-ni, jo ma kicoyo lok komgi i pwony eni ni pe kibwologi ki pwony me dini goba dok guniang pigi kengi gin mumiyo Lubanga oweko ni dano guden can. Ma lubbe ki lok pa ngat acel acel, tika ineno ni niango matir i kom ngec me Baibul aye ogudo cwinygi ci oweko guye ni Jehovah kara ada gamo lega?

Tika imito niang gin ma nyuto ni Lubanga tye? Lucaden pa Jehovah cwinygi bibedo yom me konyi pwonyo lok ada i kom Jehovah ki dong kit ma iromo nyikke kwede cok bot ngat ma ‘gamo lega-gu ducu.’​—Jabuli 65:2.

[Lok ma tye piny]

[Boro buk i pot karatac 10]

“I kare ma acako niang yub ma Jehovah tye kwede, acako winyo ki i cwinya ni en tye kara ada, dok atwero lega bote cawa mo keken”

[Cal ma tye i pot karatac 9]

Niye me ada cung i kom gin ma kineno medo ki miti me ngeyo lok ada i kom Lubanga