TYENG man tito kit ma dano gubedo ka loc kwede cakke wacon. Loc pa dano okelo deno can kacel ki pekki mapat pat. Pi mwaki mapol, jo ma gitye ki cwiny matir gutemme wek dano ducu gukwo ma rom aroma ento woro kacel ki camucana pol kare balo yubgi. Pingo man obedo ka timme? Pingo camucana pud orwako lwite? Man tye pi tyen lok adek magi.

Baibul tito atir ni wan ducu watye “i te loc pa bal.” (Jo Roma 3:9, Baibol pa Katoli) Calo two ma pe cang ma lutino gilako ki bot lunyodogi, bal tye gin ma “bedo” i komwa. Dok “cik” pa bal aye ma dorowa kare ducu. Cwiny me bal weko jo mapol giketo mitigi bedo mukwongo nyo gilungo wigi ka yenyo jami me kom nyo nongo twero kun gituko ki wi jo mukene.​—Jo Roma 5:21; 7:17, 20, 23, 25.

Dano i lobo-ni gitye ki cwiny me woro kun giparo pigi kengi. Pi man, jo mogo ginongo tek tutwal me pokke woko ki i kin jo mukene. Pien giparo pigi kengi, cawa weng nongo gimito ni gibed ki twero. Gibedo bene ki miti matek me nongo cente kacel ki jami me kom mapol makato kit ma gimito. Tye me cwer cwiny ni kodi jo-ni ginyuto atir ni pe giparo pi kit ma ginongo kwede jami magi. Ma ka kwero lyeto ma a ki bot luwotgi, jo man ‘gilubo kor lwak pi tiyo gin marac.’​—Nia 23:2.

Catan ma obedo cwec me cwiny ma lajemo-ni tye ka ‘bwolo dano ma i wi lobo ducu.’ (Niyabo 12:9) Gin ma yomo cwinye aye nyweno wi dano. En romo tic ki dirone me bwolowa me yenyo jami me kom kacel ki cente wek wakwal jami.

Man mono te lokke ni Catan aye dorowa dok myero walub gin ma en mito? Wabineno lagamme i pwony ma lubo man.