WOn Ian onongo lamero adada. Kadi bed ni Ian obedo ki jami ma mitte me kom i kare me dongone, en onongo mito kwe cwiny ma a ki bot wonne. En owacci: “Onongo pe amaro babana tutwal, pien onongo mato kongo wa i labyel kweri ki dok kit ma tero kwede mamana onongo pe ber tutwal.” I kare ma Ian woto ki dongo, en ocako penye ka ce Lubanga tye ada. En openye kekene ni, “‘Ka Lubanga tye ada, ci pingo en weko dano deno can?’”

Kadi bed ni itye ki peko manok i kwoni, cwinyi twero cwer ka ineno jo ma balgi pe gideno can labongo tyen lok mo. Pi man, lapeny madok i kom deno can-ni pire bedo tek adada i kwo ni, ka ce calo Ian, in bene ideno can nyo dano ni mo me amara kome lit nyo oto.

Jo mukene gitamo ni Lubanga weko wadeno can me pwonyowa wek wabed jo mamwol ki lukica. Jo mukene bene gitamo ni dano gideno can pi bal ma gutimo ma peya kinywalogi odoco ki kom mapat.

Tek tutwal me maro Lubanga pien en pe paro ni wadeno can. Lubanga cwinye col.

Baibul tito ka maleng ni omyero pe kikok i kom Lubanga pi can ma dano gideno-ni. “Ka gibito ngat mo, en pe myero owacci, ‘Lubanga aye ma bita’, pien Lubanga pe gibito ki tiyo gin marac, en bene pe bito ngat mo.” (Yakobo 1:13,) Ki lok ada, lok man ni Lubanga aye kelo deno can-ni pe rwatte ki gin ma Baibul pwonyo ma lubbe ki kit pa Lubanga. Nining?

Kit pa Lubanga acel ma pire tek adada en aye mar. (1 Jon 4:8) Me niang lok meno maber, Baibul nyuto ni kit ma Lubanga winyo kwede ki i cwinye rom aroma ki kit ma dako ma doto latinne winyo kwede. Lubanga openyo ni, “Wi dako twero wil i kom  latinne ma en doto, kica pe twero make i kom wode ma en onywalo? Kadi bed dano [dako] wiye twero wil, ento an wiya pe biwil i komwu.” (Icaya 49:15) Itamo ni mego ma lamar romo wano latinne akaka? Lanyodo ma lamar pe romo timone wacel ento temme me laro latinne ki i can. I yo ace-lu bene, Lubanga aye pe kelo can i kom jo ma balgi pe.​—Acakki 18:25.

Kadi bed kumeno, jo ma balgi pe pud gitye ka deno can. Itwero penye kekeni ni, ‘Ka ada Lubanga paro piwa dok en tek loyo, ci pingo en pe okwany jami ducu ma kelo deno can?’

Lubanga oweko pud wamedde ki deno can watin pi tyen lok matir. Kong wanenu lok acel: Pol kare dano aye gikelo can i kom luwotgi. Pol pa lutim aranyi kacel ki jo ma gitiyo ki twerogi me diyo jo mukene pe giye weko timgi-ni. Dong, Lubanga myero otyek jo magi woko ducu pien gin aye gitye ka kelo deno can.

I kare ma lakwena Petero tye ka tito pingo Lubanga peya otyeko lubal, en ocoyo ni: “Rwot [Jehovah] pe galle agala ki cobo cikkene kit macalo jo mogo gitamo kwede, ento en pud tye ka diyo cwinye i komwu, pien en pe mito ni ngat mo orweny woko matwal, ento mito ni jo ducu guo i ningut.” (2 Petero 3:9) Diyo cwiny pa Lubanga Jehovah-ni obedo yo acel ma en tiyo kwede me nyuto marre kacel ki kicane.

Cokcok-ki, Lubanga Jehovah bityeko jo maraco. En ‘biculo aunauna i kom jo ma gikelo aunauna’ i kom jo ma pe ki bal. Jo ma gikelo deno can akaka-ni kop ma ‘gibingolo i komgi en aye pwod me to matwal.’​—2 Jo Tecalonika 1:6-9.