Bedo ki mar kwako mer ki jo mukene kun iwinyo ki i cwinyi. Ngat ma lamar nyuto i ticce ki lokke kit ma ewinyo kwede ki i cwinye pi jo ma emarogi, kadi bed ni mitte ni ejal jami mogo.

Moses onyuto mar pi Lubanga. I yo ango? Po i kom lok ma kicoyo i 1 Jon 5:3: “Pien maro Lubanga en aye gwoko cikke.” Kit ma Moses onongo maro Lubanga-ni, en olubo cikke. Moses otimo jami ducu ma Lubanga openye ni otim​—calo tic matek me cung i nyim Parao nyo ma nen yot calo ryeyo odone i wi Nam Makwar. Moses oye kadi bed lubo cikke onongo yot nyo tek. En “otimo ducu kit meno.”​—Nia 40:16.

Moses onyuto mar pi Luicrael luwote. Onongo gingeyo ni Jehovah tye ka tic ki Moses me telogi, pi meno gubino bot Moses ki pekkigi mapat pat. Wakwano ni: “Dano gucung i nyim Moses nia odiko con nio wa otyeno.” (Nia 18:13-16) Go kong kit ma Moses onongo ol kwede i nge winyo pekki ma Luicrael gubedo ka titte dyeceng lung! Kadi bed kumeno, cwiny Moses obedo yom me konyo jo ma en onongo marogi.

Medo i kom winyo lokgi, Moses bene olego pi jo ma en marogi. En bene olego pi jo ma gutere marac! Me lapore, i kare ma lamin Moses, Miriam, ongur i kom Moses, Jehovah opwode ki dobo. Ma ka bedo ki yomcwiny pi pwod man, Moses okwayo Jehovah pi Miriam kun lego ni: “Cange ba, ai Lubanga, abako doga boti do.” (Wel 12:13) Mar aye omiyo Moses olego ki kica.

Watwero lubo lanen pa Moses ka wabedo ka dongo mar matut pi Lubanga. Kodi mar ma kit meno konyowa me lubo cikke ‘ki i cwinywa.’ (Jo Roma 6:17) Ka walubo cik pa Jehovah ki cwinywa ducu, wakelle yomcwiny. (Carolok 27:11) Wan bene wanongo adwogi maber. Ka watiyo pi Lubanga pien watye ki mar me ada pire, ci pe wabitimo jami matir keken, ento bene wabinongo yomcwiny i timogi!​—Jabuli 100:2.

Yo mukene ma watwero lubo kwede lanen pa Moses aye me dongo cwiny me jalle ken pi jo mukene. Ka ce luremwa nyo lupacowa gubino botwa ki pekkigi, mar konyowa me (1) keto cwinywa i lokgi, (2) temo niang kit ma giwinyo kwede, ki dok (3) nyutigi ni waparo pigi.

Calo Moses, watwero lega pi jo ma wamarogi. I kine mukene watwero winyo marac pien pe watwero cobo pekkigi ma gitye ka tito botwa-ni. Watwero bene wacone ki cwercwiny ni, “Timma kica pien gin ma atwero timone aye me lega piri.” Ento po ni: “Lega pa dano ma kite atir tek, tye ki twero madwong.” (Yakobo 5:16) Legawa twero weko Jehovah timo gin mo ma onongo pe bitimone pi ngat meno. Pi man, gin maber loyo ma watwero timone aye me lega pi jo ma wamarogi. *

Tika pe iye ni watwero nongo pwony mapol ki i lanen pa Moses? Kadi bed ni en obedo dano adana calo wan, en oweko lanen maber adada me niye, mwolo, ki dong mar. Ka wamedde ki lubo lanenne maber-ri, ci wan bene wanongo adwogi maber piwa kenwa ki dok jo pi mukene.​—Jo Roma 15:4.