Lubanga pe ki dako ma en onywalo kwede lutino. En aye Ocweyo jami ducu ma gitye ki kwo. Dano kicweyogi ma gitwero poro kit pa Lubanga. Man aye gin mumiyo dano ma Lubanga okwongo cweyone, Adam, kilwongo ni “wod pa Lubanga.” I yo acel-lu, Yecu bene kilwongo ni “Wod pa Lubanga” pien kicweyo en ki kit pa Wonne.​—Kwan Luka 3:38; Jon 1:14, 49.

Lubanga ocweyo Yecu ma peya ocweyo Adam. Ki lok ada, Lubanga ocweyo Yecu, ci otiyo ki Yecu me cweyo jami mukene-ni ducu, wa lumalaika me polo. Meno aye gin mumiyo Baibul lwongo Yecu ni “latin kayo me ginaketa ducu” pa Lubanga.​—Kwan Jo Kolocai 1:15, 16.

Ma peya kinywale i Beterekem, Yecu okwo i polo macalo lamalaika. Ka karene dong oromo, Lubanga onako kwo pa Yecu ki i polo ci oketo i ot nyodo pa Maliam wek kinywale macalo dano.​—Kwan Luka 1:30-32; Jon 6:38; 8:23.

Pingo Lubanga oweko kinywalo Yecu i lobo macalo dano? Tic ango ma pire tek ma Yecu otimo? Itwero nongo lagam pi lapeny magi ki i Baibul, ci man bimedo ngec-ci ki pwoc-ci pi gin ma Lubanga ki Yecu gutimo piri.