Tika imito ni in kacel ki lupaconi wubed ma komwu yot dok wukwo pi naka? Tika imito bedo i lobo ka ma arem, deno can, ki dong to gibidoko gin macon? Lobo meno pe obedo lek mo ata. Ma ka meno, cokcok-ki lobo manyen ka ma kit ma atir bedo iye bibino pien obedo yub pa Lubanga Jehovah. Nen kong kit ma yubbe bicobbe kwede kit ma kitito i Niyabo 21:3-5.​—Kwan.

“En [Lubanga] bijwayo pig wanggi woko ducu.” (Niyabo 21:4) Pig wang mene ma en bijwayone woko? Man pe obedo pig wang me yomcwiny nyo ma bino ka gin mo odonyo i wangwa. Cikke pa Lubanga-ni loko i kom pig wang ma bino pi deno can ki arem cwiny. Lubanga pe bijwayo pig wang mamwa; ento bikwanyo jami ducu ma keliwa pig wang​—deno can ki arem cwiny.

“To bene dong bibedo pe.” (Niyabo 21:4) Pe tye gin mo ma okelo pig wang makato lamonewa to. Jehovah bigonyo dano ma gin lugen ki i to. Nining? En bijwayo gin ma kelo to: bal ma walako ki bot Adam. (Jo Roma 5:12) Jehovah bitic ki ginkok pa Yecu me kwanyo roc ki i kom dano. * Ci dong lakwor me agikki, to, “gibityeko woko.” (1 Jo Korint 15:26) Dano ma lugen gibikwo kit ma Lubanga oyubo ni gukwo kwede​—pi naka, ki yotkom.

‘Arem bene dong bibedo pe.’ (Niyabo 21:4) Kodi arem mene ma bibedo pe? Arem cwiny ki arem kom ducu ma bal alaka okelo dok omiyo dano milion mapol bene pud gideno can malit atika bibedo pe.

Ma cokcok-ki, wabilimo kwo labongo pig wang, to, ki dong arem. Iromo penye kekeni ni, ‘Man mono bitimme kwene?’ ‘Cikke man pa Lubanga-ni mono pe loko i kom kwo ma bibedo i polo?’ Pe. Nen kong gin mumiyo pe bibedo i polo. Mukwongo, cikke man cakke ki lok ni “kabedo pa Lubanga dong tye bot dano,” dok dano gibedo i lobo. (Niyabo 21:3) Me aryo, cikke man loko i kom lobo ma “to bene dong bibedo pe” iye​—lobo ma to onongo yam tye iye ento to dong bibedo pe. Ma naka yam to pe i polo, ento dong obedo tye i lobo kany pi kare malac. Pi meno, cikke pa Lubanga me kelo kwo maber bicobbe i lobo kany.

Jehovah mito ni wabed ki niye ni ebikelo lobo manyen ka ma kit ma atir bedo iye. Cutcut i nge tito pi mot ma bibino-ni, en omoko cikkene kun wacci: “Nen, aketo jami ducu doko nyen.” Ci dok omedo ni: “Lok magi lok ma genne dok me ada.” (Niyabo 21:5) Pingo pe imed ngecci i kom kit ma in ki jo me amarani wutwero bedo ki yomcwiny i kin jo ma gibineno kit ma cikke pa Lubanga bicobbe kwede?