Jo ma gukwano lok kom two wic giwacciwa ni dano pe gimito jami me kom keken wek gibed ki yomcwiny. Gin ma moko botwa lok man aye ni dano gitimo jami ma cobo yubgi nyo miti ma gitye kwede. Me cobo miti man, jo mukene gijalo karegi i timo jami mogo calo gwoko kabedo murumowa, goyo cal, wer ki dong jami mukene mapat pat. Ento jo mapol pe ginongo yomcwiny kikome i timo jami magi.

Pe obedo me ur bot jo ma gikwano Baibul ni kinywalowa ki miti me ngeyo Lubanga. Cura mogo mukwongo i buk me Acakki nyuto ni i kare ma dong Lubanga ocweyo laco ki dako mukwongo,en onongo loko kwedgi kare ducu kun minigi kare me dongo wat macok kwede. (Acakki 3:8-10) Lubanga pe ocweyo dano ni gukwo pigi kengi; pire tek ni gulok ki Lacwecgi. Baibul loko teretere i kom miti man.

Me labolle, Yecu owacci: ‘Gitye ki yomcwiny jo ma gingeyo ni gin lucan i yo me cwiny.’ (Matayo 5:3) Ki i tyeng man, waromo wacci gin ma pire tek wek wabed ki yomcwiny i kwowa aye obedo ngeyo Lubanga. Watwero timo meno nining? Yecu otito lagamme i kare ma en owaco ni, “Dano pe bibedo kwo ki kwon keken, ento bedo kwo ki lok ducu ma a ki i dog Lubanga.” (Matayo 4:4) I yo mene ma tam pa Lubanga kacel ki tirane ma tye i Baibul konyowa me bedo ki yomcwiny kacel ki tyen lok me kwo? Kong dong wanenu yo adek ma pigi tego.

I kareni, dano mapol ma gitye ki ngec matut gimiyo tam i kom wat i kin jo aryo, mar, kwo me ot, cobo kukukuku, nongo yomcwiny, ki dok kit me bedo ki kwo ma tye ki tyen lok. Ento anga mapat ki Lacwecwa Lubanga Jehovah, ma tye ki ngec mucwiny loyo, ma romo miyo tam matir i kom jami magi ducu?

Me lapore: Ka iwilo kamera, ibinongo i bokke buk mo matidi ma nyutti kit ma myero iti kwede  wek inong adwogi maber ki iye. Waromo poro Baibul ki buk meno. Baibul obedo buk ma Lacwecwa omiyo ma nyuto kit ma dano myero gukwo kwede. Buk man tito gin mumiyo kimiyo kwo bot dano ki dok kit ma myero guti kwede wek gunong adwogi maber.

Kit macalo buk moni tito pi jami ma gitwero balo macin moni-ni, Baibul bene poyo wi jo ma gikwano i kom jami ma twero balo kwogi. Jo mukene gitwero miyo tam mapat ma nen calo lubone yot, ento mono pe itamo ni wabinongo adwogi maber dok wabigwokke ki i pekki mapat pat ka walubo tira ma a ki bot Lacwecwa?

Kadi bed ni Lubanga Jehovah miniwa cik kacel ki tira, en pe diyowa me lubogi. Ma ka meno, pien en marowa dok mito konyowa, en cuko cwinywa i yo me mar ni: “An a Rwot [Jehovah] Lubangawu amito pwonyowu wek wubed maber, kun atelowu i yo ma myero wuwot iye. Kono yam wubedo ka winyo cikka, kono ber! Kono kucwu omol calo kulu ma mol jwi, kono wuloyo lok [kitwu atir] calo nam ma piine mol labongo yweyo-ni.” (Icaya 48:17, 18) I yo macek, ka walubo tira pa Lubanga, ci kwowa bibedo maber. Me ketone i yo mukene, wamito Lubanga i kwowa wek kwowa owok maber dok wabed ki yomcwiny.

Jo mogo pe gimito Lubanga i kwogi pien gitye ka wok ki i pekki mapol ma weko gibedo ki akalakala ka Lubanga ma lamar tye. Me lapore, gitwero penye ni: ‘Pingo jo ma kitgi ber gideno can?’ ‘Pingo lutino ma balgi pe kinywalogi ki goro?’ ‘Pingo ngolo kop alenga onya tutwal?’ Magi aye lapeny ma pigi tego adada, dok nongo lagamgi twero kelo alokaloka madit adada i kwowa. Ento ma peya wacako koko i kom Lubanga pi pekki magi, kong wanenu kit ma Lok pa Lubanga, Baibul, menyo kwede dero i kom lapeny magi.

I cura me adek i Acakki, wakwano lok i kom kit ma Catan otiyo kwede ki twol me bito dano mukwongo me turo cik pa Lubanga ma ocikogi kwede ni pe gucam yat me ngeyo gin maber ki marac. Catan owaco bot Kawa ni. “Pe wubito. Pien Lubanga ngeyo ni, ka wucamo, ci wangwu biyabbe woko, ci wubidoko calo Lubanga, miyo wungeyo gin maber ki gin marac.”​—Acakki 2:16, 17; 3:4, 5.

Ma lubbe ki lok magi, Catan onongo pe tye ka waco keken ni Lubanga lagoba, ento bene ni en laloc marac. Larac-ci onongo tye ka wacci ka dano guwinyo lokke, ci gibedo ki kwo maber adada. Pyem man onongo kitwero cobone nining? Jehovah omiyo kare wek dano ducu gunen ki wanggi ka ce adot ma giketo i kome-ni tye ada nyo pe. I timo meno, Lubanga onongo tye ka  miyo kare ki Catan kacel ki jo ma gicwake me nyutone ka gitwero loyo dano i yo maber labongo en.

Gin ango ma itamo ni obedo lagam me adot pa Catan-ni? Tika dano gitwero bedo maber kun gilone kengi labongo Lubanga? Deno can, ngolo kop alenga, to, timo bal, kwo marac, lweny, nek lumuku nyo icipan, ki dong bal mukene ma gumiyo dano gudeno can pi cencwari mapol gitye lanyut ma cimo ni dano pe gitwero lone kengi labongo Lubanga. Ma ka wacone ni, Lubanga aye weko dano gideno can, Baibul nyuto ka maleng gin ma tye ka kelo pekki magi ni: “Dano ma tye ki twero loyo jo mukene ki tek.”​—Latitlok 8:9.

Ki lok ada, dong nen ka maleng ni omyero walokke bot Lubanga me niang gin mumiyo watye ka deno can ki dong kit ma kitwero cobogi kwede. Lubanga kono bitimo gin ango?

Pi kare malac dong, dano gubedo ki miti madit me bedo agonya ki i two, tiyo, ki dong to. Gin gutute matek kun gitiyo ki cawagi, kerogi, ki dong jamigi me cobo pekki magi ento man pe onyako nyige wacel. Jo mogo gubedo ki gen me nongo alokaloka ki timo jami mogo calo mato yadi me tekwaro, rweyo ler, ki dong tim tyet tyet. Man ducu opoto nono.

Lubanga mito ni dano gukwo maber dok ki yomcwiny. Man aye obedo yubbe mukwongo i kare mucweyo dano, dok wiye pud peya owil iye. (Acakki 1:27, 28; Icaya 45:18) Lubanga Jehovah ocikke botwa ni wang ma ecobo yubbe ducu. (Icaya 55:10, 11) Baibul waco botwa ni Lubanga ocikke me dwoko Paradic ma lunyodowa mukwongo gurwenyo-ni. I buk me agikki i Baibul, wanongo lok magi ni: “En [Jehovah] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.” (Niyabo 21:4) Lubanga bitimo jami magi ducu nining, ki dok adwogi ango ma watwero nongone ki i cikke man?

Yecu Kricito, Wod pa Lubanga opwonyo lulub kore me lega wek miti pa Lubanga otimme. Lega man ma jo mogo gilwongo ni Lega pa Rwot-ti, dano mapol gingeyo nyo bene ginwoyo kare ki kare. Ma wacci: “Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo” (Matayo 6:9, 10) Ada, Lubanga Jehovah bitic ki Ker-re me jwero loc pa dano ma okelo adwogi marac-ci ki dok me kelo lobo manyen, ka ma kit ma atir bedo iye. * (Daniel 2:44; 2 Petero 3:13) Gin ango ma myero watim me nongo adwogi maber ki i cikke pa Lubanga?

Yecu Kricito otito gin mo mayot ma watwero  timone: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” (Jon 17:3) Ada, ki kony pa Lubanga, watwero nongo kwo ma pe tum i lobo manyen ma Lubanga ociko pire-ni. Gen man twero mini tyen lok mukene me ye ni ada wamito Lubanga i kwowa.

Mwaki alip aryo angec, i Areopago, ma tye i Atene, lakwena Paulo owaco lok madok i kom Lubanga bot jo Atene ma onongo gitye atera me winyo lok manyen ni: “En kikome aye ma miyo kwo ki dano ducu wa ki yweyo ki jami ducu . . . ‘Wakwo i en, wawoto i en, wabedo i en,’ macalo ngat mo ocoyo. Ngat acel i kin lucocwu bene ocoyo ni, ‘Wan bene wan litinone.’”​—Tic pa Lukwena 17:25, 28.

Gin ma Paulo otito bot jo Atene-ni pud tye lok ada. Lacwecwa miniwa yamo ma wayweyo, dek ma wacamo, ki dong pii ma wamato. Ki lok ada, pe watwero kwo labongo jami mabeco ma Jehovah omiyo me gwokowa-ni. Ento pingo Lubanga pud tye ka medde ki miyo jami magi bot dano ducu, kadi bed ni gitamo pire nyo pe? Paulo owaco ni “wek gubed ka yenyo Lubanga wek ka gibongo abonga gwok nyo gugud kome ci ginonge, pien en pe tye cen ka mabor ki bot ngat acel acel i kinwa.”​—Tic pa Lukwena 17:27.

Tika imito ngeyo Lubanga maber, nyo pwonyo jami mapol madok i kom yubbe kacel ki tirane ma konyowa me kwo maber i kareni ki dok pi naka? Ka tye kumeno, wacuko cwinyi me lok ki ngat ma omini magajin man nyo kubbe ki jo ma gucoyo magajin man. Gibibedo ki yomcwiny me konyi.