Lubanga tye ki kom me cwiny ma pe nen. En aye ocweyo polo, lobo, ki jami ducu makwo. Pe tye ngat mo ma ocweyo Lubanga—en pe obedo ki acakkine. (Jabuli 90:2) Lubanga mito ni dano guyenye dok gunge lok ada madok i kome.​—Kwan Tic pa Lukwena 17:24-27.

Watwero ngeyo nying Lubanga. Watwero niang kite mogo ka ce walwodo lok i kom jami ma en ocweyogi. (Jo Roma 1:20) Ento, wek wange Lubanga maber adada, mitte ni myero wakwan Baibul. Man konyowa me ngeyo kit mabeco pa Lubanga.​—Kwan Jabuli 103:7-10.

Lacwecwa Jehovah dag timo jami ma pe tye atir. (Nwoyo Cik 25:16) Dok en ocweyo dano i calle. Man aye gin mumiyo pol pa dano gidag jami ma pe tye atir. Lubanga aye pe oweko jami maraco tye ka timme. Lubanga ominiwa kero me bedo agonya me yero jami ma iwa mito. Tye me cwercwiny ni, jo mapol gitiyo ki kero man i yo marac dok pe gitiyo jami matir. Man ‘cwero cwiny Jehovah matek.’​—Kwan Acakki 6:5, 6; Nwoyo Cik 32:4, 5.

Jehovah maro jami matir, dok en bigiko tim maraco. (Jabuli 37:28, 29) Baibul wacciwa ni cokcok-ki Lubanga bijwayo jami ma pe tye atir.​—Kwan 2 Petero 3:7-9, 13.