Adongo i Rmaysh , macok ki wang lobo me Icrael ki Lebanon i kare me lweny. Wiya pud po maber adada i kom kit ma owic mwoc kwede ki dong dano ma balgi pe ma tyengi ki badgi ongun woko. Kwo nongo tek dok turo cik kacel ki tim gero onongo onya adada.

Lupacowa gitye i dini ma kilwongo ni Maronite Church, ma tye but dini me Eastern Catholic Churches. Babana onongo kare ducu yelle me miyo jami me kom pi jo me ode, wan 12, ento Mego onongo neno ni wan jo mukene-ni wacito ka lega. Lacen, acako bedo ki tam ni dini bene pe konyo jo magoro kit ma pol pa dano pe gitimo-ni.

I kare ma atye mwaka apar ki wiye, acako bedo ki miti me pwonyo kung fu. Anongo pwonnye magwar i kom kit me dongo ki gweyo dano ki dong kit me tic ki jami lweny mapat pat. Atamo kekena ni, ‘Pe aromo juko lweny, ento olo to atwero juko jo ma gimaro tim gero.’ Ka teke aneno jo aryo gitye ka lweny, adonyo iye cut. Onongo iya wang oyot adada dok gin mo manok keken weko akeco woko. Pol pa dano ma gibedo i kupiny me Lebanon onongo gilwora adada kit macalo onongo abedo ka lweny pira kena i kom cwiny me apokapoka ki dong tim gero-ni.

I 1980, adonyo i kilab mo me kung fu ma tye i Beirut. Kadi bed ni bom, gurunet, ki dong mujinga onongo kibayogi nino ducu, man pe ogenga me cito ka pwonye. Onongo atute me cam, buto ki dong kwo calo Bruce Lee, lalweny mo acel ma ladiro i kung fu. Onongo ayubo wiya, awoto, ki dong adange calo en ka atye ka tuko kung fu. Onongo pe abwunyo atata.

Mitina madit onongo tye me doko ladiro i tuko kung fu i lobo China. I nino mo acel i otyeno ma atye ka pwonye matek me yubbe pi cito i China, awinyo ka kidwongo doggola. Larema mo acel obino ki Lucaden pa Jehovah aryo. Gin gunonga ma arukke ki bongo macol me pwonye dok kwok tye ka mol  ki i koma, ci awaco botgi ni, “Pe angeyo lok mo keken madok i kom Baibul.” Pe onongo angeyo ni cakke i cawa meno kwona bilokke.

Lucaden-ni gunyutta ki i Baibul gin mumiyo dano pe gitwero jwayo pigi kengi cwiny me apokapoka kacel ki tim gero. Gin gutitta ni Catan Larac-ci aye okelo pekki ma kit magi. (Niyabo 12:12) Gin ma ogudo cwinya aye ni Lucaden-ni guloko ma cwinygi opye mot dok gubedo ki tekcwiny. Ki bene, ogudo cwinya adada i kare ma gupwonya ni Lubanga tye ki nyinge. (Jabuli 83:18) Gin bene gunyutta 1 Temceo 4:8, ma kwanne ni: “Pwonnye me rweyo ler kom tye ki kony, ento konnye nok; lworo Lubanga konyo i yo ducu, pien twero kelo botwa gum i kare man ki i kwo ma bibino i anyim.” Lok magi gukelo alokaloka madit adada i kwona.

Tye me cwercwiny ni pe dong arwatte ki Lucaden magi pien jo me pacowa guwacci pe dong gudwogi. Kadi bed kumeno, amoko tamma me giko tuko kung fu ento me cako kwano Baibul. Man pe oyomo cwiny omera maditte ki matidine, ento amoko tamma me yenyo Lucaden pa Jehovah wek acak kwano Baibul kwedgi.

Amedde ki yenyo Lucaden-ni ento pe anongogi. I kare meno, cwinya ocwer pi to pa babana ma otimme atura kacel ki pekki mukene ma opoto i pacowa. I kare ma acako tic bot kampuni mo me gedo, lawota mo ma nyinge Adel ma watiyo kacel kwede, openya gin mumiyo cwinya pe yom. En ocako titta gen me nicer ma tye i Baibul. Pi dwe abongwen, Lacaden man odiyo cwinye kun kwano Baibul kweda i yo me mar dok me kica.

I kare ma wamedde ki kwan, acako niang ni pire tek tutwal ni omyero alok kwona. Ento loko kwona pe obedo yot. Kiniga onongo kare ducu maka oyotoyot adada. Baibul okonya me niang kit ma aromo juko kwede kinigana kun pe atimo gin mo keken kit ma cwinya mito. Me labolle, i Matayo 5:44 Yecu omiyo tira man: “Wumar lukworwu, dok bene wuleg Lubanga pi jo ma keto ayelayela i komwu.” Ki bene, Jo Roma 12:19 cikowa ni, “Pe wucul kwor, . . . pien yam gicoyo ni, ‘An aye ma abiculo kwor, abiculo wange lacen, man Rwot [Jehovah] ma owaco.’” Ginacoya magi kacel ki mukene gukonya me bedo ma cwinya opye.

Kadi bed ni i acakkine lupacowa pe guye ni akwan Baibul ki Lucaden pa Jehovah, gin dong gucako bedo ki woro i komgi. Ki lok ada, omera matidine otyeko ribbe kweda i woro Jehovah, dok Mamana bene ocung ingewa liking nio wa i tone.

Jehovah bene omiya Anita, dako maber ma lagen, ma watye ka tic kwede kacel i tic pi kare malac. Nicakke i mwaka 2000, an kacel ki Anita watye ka bedo i Eskilstuna , i lobo Sweden, ka ma wakwano Baibul ki dano i leb Arabic.

Pud kica maka i kom jo ma gitye ka deno can pi tim gero. Ento atye ki yomcwiny kacel ki kuc pien dong angeyo gin mumiyo deno can tye ki dok gin ma Lubanga bitimone me gikone.​—Jabuli 37:29.