1, 2. (a) Lubanga mito ni kit jone obed nining? (b) Lapeny mene ma wabinyamogi i pwony man?

 JEHOVAH omiyo lakwena Petero ocoyo lok i kom lengo ma kiloko iye i buk pa Lulevi kun bene tito gin mumiyo pire tek ni Lukricitayo myero gubed leng i kitgi ducu. (Kwan 1 Petero 1:14-16.) Jehovah, ma en aye ‘Ngat Maleng-ngi’ mito ni jo ma kiwirogi ki “romi mukene[-ni]” myero gutute matek me bedo leng i kitgi ducu.​—Jon 10:16.

² I pwony man, wabineno cik mogo ma igi lac ki i buk pa Lulevi, ma ka waketogi i tic i kwowa ci wabibedo leng i kitwa ducu. Wabinyamo lapeny mogo calo: Omyero water cik pa Lubanga nining? Buk pa Lulevi pwonyowa gin ango ma lubbe ki cwako twero me loc pa Jehovah? Pwony ango ma wanongo ki i gityer ma jo Icrael onongo gimiyo?

3, 4. (a) Pingo Lukricitayo myero pe guter cik kacel ki cik ma igi lac me Baibul calo gin me tuko? (b) Pingo pe myero wacul kwor nyo wamak lok i cwinywa?

³ Ka wamito yomo cwiny Jehovah, ci omyero waket cwinywa i lubo cikke kacel ki cik ma igi lac kun pe waterogi calo gin me tuko. Kadi bed ni pe dong watye i te Cik ma Kimiyo bot Moses, ento cik ma iye twero konyowa me niang  gin ma Lubanga mito ki gin ma en dag. Me labolle, kiciko jo Icrael ni: “Pe icul kwor, pe ibed ki akeca [akemo] i kom lutuwu; ento mar lawoti macalo imarre keni; an a Rwot [Jehovah].”​—Levi 19:18.

⁴ Jehovah pe mito ni wacul kwor, dok bene pe mito ni wamak lok i cwinywa. (Rom. 12:19) Ka pe walubo cik kacel ki cik ma igi lac pa Lubanga, ci man biyomo cwiny Larac-ci dok bibalo nying Jehovah. Ka ngati mo ocwero cwinywa akaka, ci omyero pe wabed atabo ma kigwoko iye akemo. Lubanga ominiwa mot me bedo “atabo ma gicweyo ki lobo” wek wabed ki lonyo me tiyo ticwa me pwony. (2 Kor. 4:1, 7) Pe wamito ni wagwok akemo ma rom ki kwir marac i atabo ma kit meno!

5. Pwony ango ma wanongo ki bot Aron ki dong to pa awobene? (Nen cal ma tye i pot karatac 17.)

⁵ I Lulevi 10:1-11, wakwano lok i kom gin mo mutimme ma okelo arem cwiny madit bot lupaco pa Aron. Nen calo cwinygi oballe adada i kare ma mac oa ki i polo ci owango awobe pa Aron, Nadab ki Abiu i kema me woro Jehovah. Pud dong obedo twon atematema madit adada bot Aron ki lupacone pien kigengogi ni pe gukok jo aryo magi. Tika itye ka gwoko lengoni kun pe iribbe ki lupacowu nyo ngati mo keken ma kiryemo ki i kacokke?​—Kwan 1 Jo Korint 5:11.

6, 7. (a) Ngo ma omyero watam iye ka watye ka moko tam me cito i nyom ma obitimme i kanica? (Nen lok ma tye i tere piny.) (b) Watwero tito bot wadiwa nining gin mumiyo pe wanywako i nyom ma timme i kanica?

⁶ Twero bedo ni pe wabirwatte ki atematema malit calo ma Aron ki lupacone gukato ki iye-ni. Ento, ngo ma myero watim ka ce kilwongowa i nyom pa watwa mo ma bitimme i kanica? Ginacoya pe gengowa me bedo i nyom ma kit meno, ento tika tye cik mogo ma igi lac me Baibul ma gudo tam ma wamoko i kom lok meno? *

⁷ Tam ma wamoko me yomo cwiny Jehovah ki dok me bedo leng twero nyweno wi wadiwa ma gipe Lucaden. (1 Pet. 4:3, 4) Ki lok ada, watemme pe me cwero cwinygi ento pol kare ber ka waloko lok ada dok i yo me kica. Ento omyero watim man con ma peya nino me nyom oromo. Omyero wapwogi dok wawaccigi ni cwinywa yom pien gulwongowa me bedo i nyom meno. I ngeye, waromo wacone ni pien nyom man bibedo i kanica, nywako iye romo balo yomcwinygi i nino meno ma pire tek-ki dok twero kelo lewic botgi kacel ki jo mukene. Man aye gin acel ma waromo timone wek wagwok niyewa.

8. Buk pa Lulevi nyuto twero me loc pa Jehovah nining?

⁸ Buk pa Lulevi loko teretere i kom twero me loc pa Jehovah. Pi tyen makato 30 kulu, wakwano ni Jehovah aye omiyo cik ma i buk pa Lulevi. Moses onongo ngeyo man dok en otimo gin ma Jehovah ocike. (Levi 8:4, 5) I yo acel-li, wan bene omyero watim gin ma Jehovah mito ni watim. Ma lubbe ki man, dul pa Lubanga tye ka miniwa kony. Ento, watwero bedo i atematema me turo niyewa ka ce watye kenwa, kit ma otimme kwede i kare ma kibito Yecu i dye tim-mi. (Luka 4:1-13) Ka ce wacwako twero me loc pa Jehovah dok wagene, ci pe tye ngati mo keken ma bimiyo waturo cik pa Jehovah dok lworo pe bimakowa.​—Car. 29:25.

9. Pingo kideg jo pa Lubanga i lobbe ducu?

 ⁹ Wan macalo lulub kor Kricito, kiunuwa i lobbe mapat pat i twok lobo ducu. Man pe myero omi wabed ki ur pien Yecu owaco bot lupwonnyene ni: “Gibiketo lok roro i komwu wek wunen can, gibinekowu woko; jo me rok ducu bikwerowu pi nyinga.” (Mat. 24:9) Kadi bed ni kidegwa, ento pud watye ka medde ki tito kwena me Ker-ri kun wabedo leng i wang Jehovah. Pingo kidegwa kuman kadi bed ni wagenne, wakwo kwo maleng, ki dok walubo cik pa gamente? (Rom. 13:1-7) Pien waye ni Jehovah aye obed Lalocwa! Watiyo “pire keken” dok pe wabitero cikke kacel ki cikke ma igi lac calo gin me tuko.​—Mat. 4:10.

10. Gin ango mutimme i kare ma omego mo acel pe ogwoko gennene?

¹⁰ Wan bene “pe [jo] me lobo.” Pi meno, pe wacwako tung ka mo keken ka odok i lok me lweny ki wibye. (Kwan Jon 15:18-21; Icaya 2:4.) Jo mogo ma gudyere bot Lubanga pe gugwoko gennegi. Pol pa jo magi gungut i kom balgi ci guyubo watgi ki Wonwa me polo ma lakica-ni. (Jab. 51:17) Jo manok keken aye pe gungut. Me labolle, i kare me Lweny me II me Wi Lobo, omegiwa ma romo160 ma mwakagi tye 45 odok kwede piny kigwarogi ki i mabuc ducu ma i lobo Hungary ci kiterogi i taun mo acel. I ngeye, kiwacigi ni gudony i mony. Omege ma lugen gucung matek kun gikwero woko lajwac, ento dano abongwen i gurup meno gukwonge me doko lumony dok guye unifom. I nge mwaki aryo, ngat acel ma pe ogwoko gennene obedo i kin lumony ma kiwacigi ni gunek Lucaden ma lugen-ni. Omine onongo tye i kin Lucaden magi! Ento, pe kimedo ki nekogi.

11, 12. Pwony ango ma wanongo ki i gityer ma onongo kimiyo i Icrael i kare macon?

¹¹ Ma lubbe ki Cik ma kimiyo bot Moses, Luicrael onongo myero gumi gityer mapat pat. (Levi 9:1-4, 15-21) Gityer magi onongo myero gubed ma komgi yot pienni gicung pi gityer pa Yecu ma pe ki roc-ci. Medo i kom meno, jo Icrael onongo gityero gityer acel acel ma lubbe ki kit ma myero kityer kwede. Me labolle, nen kong gin ma onongo mitte ki bot mego ma pud onywalo anywala. Lulevi 12:6 waco ni: “Ka kare me lonnyene otum, ka nyo pi awobi nyo pi nyako, dako bikelo latin romo ma ditte romo mwaka acel bot ajwaka [lalamdog] i doggola kema me rwatte pi gitum awanga, ki latin akuri, nyo amam, pi gitum me bal.” Kadi bed kumeno, Cik ma kimiyo bot Moses nyuto ni Lubanga obedo ngat ma lamar dok pe lagingi. Ka mego meno pe twero wilo romo, cik onongo ye ni otyer amam aryo, nyo litino akuri aryo. (Levi 12:8) Kadi bed ni en lacan, Jehovah onongo marre dok pwoye ma rom aroma ki ngat ma tyero gitum ma wele tek adada. Pwony ango ma wanongo ki i lok man?

¹² Lakwena Paulo ocuko cwiny luye luwote me miyo ‘pak bot Lubanga macalo gitum ma gityero.’ (Ibru 13:15) Omyero watit pi nying Jehovah i dye lwak. Omege ki lumege ma itgi oding gitiyo ki leb pa luding it me miyo pak ma kit meno bot Lubanga. Lukricitayo ma pe gikato woko ento gibedo ki i ot keken gipake kun gitiyo ki waraga, gimiyo caden ki i cim, gitito kwena bot jo ma gwokogi ki dong wele ma gibino ka limogi. Cawa ma waromo cwalone i  pako Jehovah cung i kom kerowa kacel ki yotkomwa. Omyero wami gin maber loyo.​—Rom. 12:1; 2 Tem. 2:15.

13. Pingo omyero wami ripot me ticwa me pwony?

¹³ Pien wamaro Jehovah, wan wamiyo gityerwa bote labongo dic. (Mat. 22:37, 38) Ento dwe ki dwe kipenyowa ni myero wami ripotwa ma lubbe ki ticwa me pwony. Pi meno, omyero wanen yub man nining? Ripot ma wamiyo dwe ki dwe-ni nyuto ni watye ki cwiny me lworo Lubanga. (2 Pet. 1:7) Ki lok ada, ngat mo pe omyero obed i lyeto me cwalo cawa malac i ticwa me pwony wek emi ripot madit. Ka latit kwena pe twero tiyo tic mapol i ticwa me pwony gwok nyo pi tiyo nyo two, en romo miyo ripot me dakika 15 keken. Jehovah cwinye yom pi dakika ma en omiyo-ni pien meno nongo obedo gityer maber loyo ma en romo miyone. Jehovah bene ngeyo ni omegiwa ki lumegiwa gimarre dok gimito bedo Lucadenne. Calo Luicrael mogo ma onongo pe gitwero miyo gityer ma wele tek-ki, jo ma gitiyo pi Jehovah ento gitye ki goro i kare-ni bene giromo miyo ripotgi. Ripot ma wamiyo-ni bene kiribo kacel ki pa omegiwa ki lumegiwa ma i twok lobo ducu, dok man konyo dul pa Jehovah me goyo pulan ma lubbe ki tito kwena i kare me anyim. Pi meno, tika omyero wanen ni kitye ka diyowa tutwal ka kiwacci myero wami ripotwa?

14. Tit kong gin mumiyo omyero wangi kit ma wakwano kwede piwa kenwa.

¹⁴ I nge nyamo pwony magi ma pigi tego-ni ki i buk pa Lulevi, iromo tamone ni: ‘Olo dong aniang maber gin mumiyo buk man kiketo i kin bukke me Baibul.’ (2 Tem. 3:16) Romo bedo ni kombeddi dong imoko tammi me bedo leng, pe ni gwok nyo Jehovah mito ni ibed leng keken ento pien en opore me nongo gin maber loyo ki botwa. Gwok nyo lok ma wanyamogi ipwony aryo magi ki i buk pa Lulevi-ni odongo mitini me kwedo lok matut ki i Ginacoya. (Kwan Carolok 2:1-5.) Bed ka ngiyo kit ma ikwano kwede piri keni. Ki lok ada, imito ni Jehovah ojol pak ma imiyo bote macalo gityer-ri. Tika itye ka weko yub me telebijon, tuko, winyo redio, ki dong jami mukene gitye ka balo dongoni i yo me cwiny? Ka tye kumeno, ci omyero ilwod lok i kom jami mogo ma lakwena Paulo ocoyogi bot Lukricitayo me Ibru.

15, 16. Pingo Paulo oloko atir i kare ma ocoyo waraga bot Lukricitayo me Ibru?

¹⁵ Paulo oloko atir i kare ma ocoyo waraga bot Lukricitayo me Ibru. (Kwan Jo Ibru 5:7, 11-14.) En pe omungo lok mo keken! Paulo owaco botgi ni ‘gudoko nyap’ i winyo lok, ma te lokke ni onongo giniang mot. Pingo Paulo oloko lok atir i wigi kuman? En onongo tye ka nyuto mar ki par ma Jehovah tye kwede pi Lukricitayo magi ma onongo gitye  ka temme me cung matek pi ngec manok ma gunongo ki i Baibul. Ngeyo pwony ma pigi tego me Baibul pire tek adada. Ento, “cam matek” mitte wek ngat moni odong odok Lakricitayo muteggi i yo me cwiny.

¹⁶ Ma ka dongo i yo me cwiny wek gupwony jo mukene, onongo mitte ni myero kipwony Lukricitayo me Ibru apwonya. Pingo? Pien gin pe gubedo ka camo “cam matek.” Penye kekeni ni: ‘An tika atye ki cwiny matir i kom pwony matut me Baibul? An tika akwanogi ki mit kom? Tika aweyo kwano Baibul i yo matut dok pe alego? Ka ce tye kumeno, tika pekona tye i kit ma akwano kwede pira kena?’ Pe myero watit kwena keken bot dano ento omyero wapwonygi dok walokgi gudok lupwonnye pa Yecu.​—Mat. 28:19, 20.

17, 18. (a) Pingo omyero wacam cam matek i yo me cwiny kare ducu? (b) Omyero wanen mato kongo nining ma peya wabino i cokke?

¹⁷ Pol pa wan pe wanongo kwano Baibul yot. Ki lok ada, Jehovah pe miyo cwinywa pidowa wek wakwan Baibul. Ento, kadi bed watiyo pi Jehovah pi mwaki mapol nyo pi mwaki mogo manok, wan ducu omyero wamedde ki camo cam matek i yo me cwiny. Timo meno pire tek ka wamito ni wabed leng.

¹⁸ Wek wabed leng, omyero wangi Ginacoya i yo matut dok watim gin ma Lubanga mito ki botwa. Tam kong i kom awobe pa Aron, Nadab ki Abiu ma kinekogi i kare ma gutyero ‘mac ma yam pe kicikogi ni gutyer,’ pienni gwok nyo onongo gumer ki kongo. (Levi 10:1, 2) Nen kong gin ma Lubanga owaco bot Aron i nge nekogi. (Kwan Lulevi 10:8-11.) Tika lok meno nyuto ni omyero pe wabil kongo mo keken ma peya wabino i cokke? Tam kong i kom lok magi: Wan wape i te Cik ma kimiyo bot Moses. (Rom. 10:4) I lobbe mukene, omegiwa ki lumegiwa gimato kongo i yo mupore i cawa me cam ma peya gucito i cokke. Kitiyo ki kikopo angwen ma kongo vino tye i igi i cawa me kwero kwer me Kato. (Mat. 26:27) Baibul okwero lajwac mero ki dong mato kongo wa i labyel kweri. (1 Kor. 6:10; 1 Tem. 3:8) Ki bene, Lukricitayo mapol cwinygi ma ngoligi kop-pi pe ye ni gubil kongo kadi matidi mo ma peya guworo Jehovah. Kadi bed kit meno, kwo me lobbe acel acel pe rom, ento gin ma pire tek aye ni Lukricitayo myero ‘gupok kin jami maleng ki jami ma pe leng’ wek gukwo kwo maleng i yo ma yomo cwiny Lubanga.

19. (a) Ngo ma myero wange ma lubbe ki woro pi jo me ot ki dong kwan piwa kenwa? (b) Gin ango ma imoko tammi me timone ka odok i lok me bedo ngat maleng?

¹⁹ Tye pwony mabeco ma wabinongo ka ce wakwano Lok pa Lubanga i yo matut. Ti ki jami me kwedo lok wek inong adwogi maber ki i woro pi jo me ot ki dong kwan piri keni. Med ngecci i kom Jehovah kacel ki yubbe. Nyikke cok bote. (Yak. 4:8) Leg bot Lubanga calo laco jabuli ma owero ni: “Yab wanga wek anen piny, anen jami me aura ma tye i cikki.” (Jab. 119:18) Pe iter cik kacel ki cik ma igi lac me Baibul calo gin me tuko. Lub labongo dic cik pa Jehovah, ‘Ngat Maleng,’ dok inywak ki mit kom i ‘tic maleng me tito lok me kwena maber ma a ki bot Lubanga.’ (1 Pet. 1:15; Rom. 15:16) Bed ngat maleng i kare man me agikki ma piny rac tutwal-li. Wan ducu omyero wabed leng i kit me kwowa dok wacwak twero me loc pa Jehovah, Lubangawa maleng.