Dano milion mapol i twok lobo lung gikwero Karama pi tyen lok mapat pat. Jo mogo gimaro bedo kacel ki luremgi ki dong lupacogi. Jo mukene gitamo pi Lubanga nyo gijalo cawagi i konyo lucan. Ki botgi, magi jami ma pigi tego adada. Ento, jami magi gunywene ki tim maraco.

Mukwongo, dano mapol gitye ki niye ni Karama obedo kwero nino ma kinywalo iye Yecu. Ento, jo ma gukwano lok me tekwaro giwaco ni nino ma kinywalo iye Yecu pe kingeyo. Buk me The Christian Book of Why tito ni “Lukricitayo me kare macon gukwero keto nino ma kinywalo iye Yecu” pien onongo gimito “pokke woko ki i kom kwer ducu pa lukamfiri.” Baibul pe waco ka mo keken ni Yecu okwero nino ma kinywale iye nyo pa ngat mukene. Ento, en ociko lulub kore me kwero nino me tone.​—Luka 22:19.

Me aryo, jo ma gukwano matut lok me Baibul giye ni kwer me Karama lwite oa ki bot jo ma pe gubedo Lukricitayo kacel ki tekwaro pa lukamfiri. Jami magi kwako Father Christmas, Christmas tree, miyo mic, wango kandela, keto deyo i ot, ki dong wero wer. Ma lubbe ki tekwaro magi, buk me The Externals of the Catholic Church owaco ni: “Dano adi ma ngeyo ni watye ka kwero kwer pa lukamfiri ka ce wamiyo ki dok wagamo mic me Karama kun bene waketo jami ma tye alum alum i odiwa ki dong i kanicawa?”

Iromo tamone ni pe tye gin mo marac me nywako i tekwaro me kwer magi. Nen kong dok tyen lok me adekke. Lubanga pe cwako rubo kwer pa lukamfiri ki woro me ada. Jehovah otiyo ki lanebi Amoc me otito bot Luicrael ma onongo guweko woro me ada i kare mukato angec ni: ‘Akwero ninowu madito, acayogi woko, . . . Woo me werwu wukwany woko ki bota.’​—Amoc 5:21, 23.

Pingo en oloko lok matek kuman? Nen kong gin ma ker ma tung kumalo me Icrael onongo tye ka timone. Kabakagi mukwongo, Jeroboam, ocibo cal wod twon i boma me Dan ki dong Betel, ci owaco bot dano ni myero guwor cal-li ma ka woro Lubanga i yo matir i Jerucalem. Kabaka man bene oketo nino madito ci ocimo lulamdog wek gukony dano me kwerone.​—1 Luker 12:26-33.

Luicrael magi onongo gitamo ni gitye ka timo gin maber. Gin mono onongo pe gitye ka timo jami magi ducu me woro Lubanga ki dok me yomo cwinye? Lok magwar ma Lubanga owaco kun tiyo ki Amoc kacel ki lunebi mukene-ni nyuto kit ma en owinyo kwede ma lubbe ki kwer magi. Lubanga otiyo ki lanebi Malaki kun waco ni: “An a Rwot [Jehovah], pe alokke.” (Malaki 3:6) Man nyuto ka maleng kit ma Lubanga winyo kwede ma lubbe ki kwer me Karama i kare-ni.

I nge tamo matut i kom lok ada magi, dano milion mapol gumoko tamgi pe me kwero Karama. Ma ka meno, gin ginongo yomcwiny ka ce gibedo kace ki luremgi ki dong lupacogi dok bene gikonyo jo ma gitye i peko kare ki kare.