LOK MA I POK NGEYE | ITWERO BEDO COK KI LUBANGA
Tika Iwinyo ni Itye Cok ki Lubanga?
“Bedo ki wat macok ki Lubanga weko ibedo agonya, cwinyi pye mot, dok ibedo ki tekcwiny. Iwinyo calo iwacci Lubanga paro piri cawa ducu.”—CHRISTOPHER , LATIN AWOBI MA BEDO I LOBO GHANA.
“Lubanga neno peko ducu ma itye iye, nyutti mar dok konyi adada kadi bed peya ilego bote.”—HANNAH, LATIN ANYAKA MA MWAKANE 13, BEDO I ALASKA, LOBO AMERIKA.
“Pud dong pire tek adada dok kweyo cwinywa me ngeyone ni watye ki wat macok ki Lubanga!”—GINA, DAKO MA TYE I KINE MWAKA 45, BEDO I LOBO JAMIACA.
Man pe te lokke ni Christopher, Hannah, ki dong Gina keken aye giwinyo kumeno. Dano mapol i twok lobo lung gitye ki gen ni Lubanga terogi macalo lureme. Ento in kono? Tika iwinyo ni itye cok ki Lubanga? Nyo kece imito ni ibed cok kwede adada? Gwok nyo ipenye kekeni ni: ‘Tika twere pi dano mamwa-ni me bedo ki wat macok ki Lubanga Won Twer Ducu? Man twere nining?’
TWERE ME BEDO COK KI LUBANGA
Baibul wacciwa ni twere me bedo ki wat macok ki Lubanga. Baibul waco ni Lubanga olwongo Abraim ni ‘larema.’ (Icaya 41:8) Nen bene lok me yomcwiny ma kicoyo i Yakobo 4:8 ma waco ni: “Wunyik cok bot Lubanga, ci en bene binyiko cok botwu.” Pi meno, nen atir ka maleng ni twere me bedo ki wat macok nyo larem Lubanga. Ento, kit ma Lubanga pe nen-ni, wan watwero ‘nyikke cok’ bote kun wabedo ki wat maber kwede nining?
Me gamo lapeny meno, nen kong gin ma timme wek lirem odong i kin dano. Pol kare cakke ka ngat acel acel tuco nyinge bot lawote. I ngeye, watgi dongo ka gikubbe i kingi kare ki kare kun ginywako tamgi kacel ki kit ma giwinyo kwede ki i cwinygi. Dok ka gitute me konyo ngat acel acel, liremgi jing dok moko matek liking. Man bene rom aroma ki dongo wat macok ki Lubanga. Kong dong wanenu kit ma man twere kwede.
Itwero Bedo ki Miti i kom Lok Man
WI LUBELE
Tika Ingeyo Dok Itiyo ki Nying Lubanga?
Lubanga otuco nyinge botwa kun waco ni: “An Jehovah. Meno aye nyinga.”
