Ker pa Lubanga obedo gamente kikome ma Lubanga Jehovah aye oketo. I Baibul, “ker pa Lubanga” bene kilwongo ni “ker me polo,” pien loyo loc ki i polo. (Marako 1:14, 15; Matayo 4:17) Ker man cal ki gamente pa dano, ento rwomme lamal kato gamente pa dano i yo ducu.

•   Luloc. Lubanga ocimo Yecu Kricito macalo Kabaka me Ker-ri dok bene omine twero madit kato pa laloc mo keken ma dano. (Matayo 28:18) Yecu tiyo ki twero man i yo maber keken, kit macalo en dong otyeko nyuto ni en Laloc ma genne dok lakica. (Matayo 4:23; Marako 1:40, 41; 6:31-34; Luka 7:11-17) I te tela pa Lubanga, Yecu oyero dano ma gia ki i rok ducu me ‘loyo lobo’ kacel kwede ki i polo.—Niyabo 5:9, 10.

•   Kare me loc. Gamente pa dano pe rii nakanaka, ento Ker pa Lubanga “bicung bedo matwal.”—Daniel 2:44.

•   Jo ma i te loc. Ngat mo keken ma timo gin ma Lubanga mito twero bedo i te loc me Ker pa Lubanga, labongo paro pi tekwarone nyo ka ma kinywale iye.—Tic pa Lukwena 10:34, 35.

•   Cik. Cik me Ker pa Lubanga pe gengo tim maraco keken, ento bene konyo jo ma i te locce me bedo ki kit matir. Me labolle, Baibul wacci: ‘Mar Jehovah Lubangani ki cwinyi ducu, ki kwoni ducu, ki tammi ducu. Man aye cik madit dok mukwongo. Ki me aryone ma rom kwede en ene ni, Mar lawoti macalo imarre keni.’ (Matayo 22:37-39) Mar pi Lubanga ki mar pi luwotgi miyo jo ma i te loc me Ker-ri gitimo gin maber loyo pi jo mukene.

•   Pwonnye. Kadi bed Ker pa Lubanga tye ki rwom ma lamal pi jo ma i te locce, ento bene pwonyo dano kit me kwo ma rwatte ki rwom meno.—Icaya 48:17, 18.

•   Gin ma bicobo. Luloc me Ker pa Lubanga pe gidiyo jo ma i te locgi wek gidok lulonyo. Ma kaka meno, bicobo miti pa Lubanga, ki cikkene ni jo ma gimare bikwo pi naka i lobo paradic.—Icaya 35:1, 5, 6; Matayo 6:10; Niyabo 21:1-4.