Ee. Mawu susuɔ e sɔmɔli nɛ a be he wami ɔ a he. Baiblo ɔ de ngɛ e sɔmɔlɔ nɛ yeɔ lɛ anɔkuale ɔ he ke: ‘Ke e be he wami ɔ, Yehowa maa piɛɛ e he.’ (La 41:3) Ke hiɔ ko nɛ be tsaba ngɛ o he ɔ, níhi etɛ nɛ nyɛɛ se nɛ ɔmɛ ma nyɛ maa ye bua mo konɛ o nyɛ nɛ o da nya:

1.   Moo sɔle konɛ o nyɛ nɛ o da nya. O ma nyɛ ma ná “Mawu tue mi jɔmi ɔ nɛ pã níhi a sisi numi tsuo ɔ,” nɛ lɔ ɔ maa ye bua mo nɛ o yeyeeye peemi ɔ maa ba si.​​—Filipi Bi 4:6, 7.

2.   Mo ná juɛmi nɛ da. Baiblo ɔ de ke: “Ke nɔ ko bua jɔ e he be tsuaa be ɔ, e ngɛ kaa tsopa nɛ haa nɔ he wami. Se daa nɛ ke nɔ pee vii ɔ, e ngɛ lɛ nitsɛ e he gbee.” (Abɛ 17:22, Ngmami Klɔuklɔu ɔ) Bɔɔ mɔde nɛ o ha nɛ o bua nɛ jɔ, ejakaa jã peemi ma ha nɛ o ma ná nɔmlɔ tso mi he wami bɔ nɛ sa, nɛ o be yeyeeye pee tsɔ̃ hulɔ.

3.   Moo hyɛ be kpakpa nɛ maa ba hwɔɔ se ɔ blɔ. Hɛ kɛ nɔ fɔmi kpakpa nɛ o ma ná a ma ha nɛ o ma ná bua jɔmi ke hiɔ nɛ be tsaba ngɛ o he po. (Roma Bi 12:12) Baiblo ɔ gba kɛ fɔ si kaa be ko maa su nɛ “nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’” (Yesaya 33:24) Mawu ma tsa hiɔhi tsuo nɛ a be tsaba nɛ adesahi bɔ he mɔde hluu se a nyɛ we tsami ɔ. Kaa nɔ hyɛmi nɔ́ ɔ, Baiblo ɔ tsɔɔ kaa be maa su nɛ nɔ ko be bwɔe hu. E de ke: “E ma tsake maa pee niheyo ekohu, nɛ e he womi maa pee tlotlootlo kaa jokuɛyo he womi.”​​—Hiob 33:25.

 Mo Kadi: Wa le kaa Mawu yeɔ bua nɔ mohu lɛɛ, se Yehowa Odasefohi hu hlaa tsami ke hiɔ nɛ be tsaba ngɛ a he. (Maako 2:17) Wa tsɔɔ we hiɔ tsami blɔ nɔ tomi tutuutu nɛ e sa nɛ nɔ ko kɛ tsu ní. E sa nɛ nɔ fɛɛ nɔ nɛ mwɔ e yi mi kpɔ ngɛ hiɔ tsami blɔ nɔ tomi nɛ e maa hla a he.