Hela biɛ nɛ a kɛ tsɛɔ Baiblo mi womi nɛ ji Kpojemi ɔ ji A·po·kaʹly·psis (apocalypse), nɛ e sisi ji kaa “a bli nɔ́ ko nɔ” aloo “a je nɔ́ ko kpo.” Biɛ nɛ ɔ ha nɛ wa na nɔ́ nɛ Kpojemi tsɔɔ​—e haa nɛ a naa sanehi nɛ a ngɔ kɛ laa (e bli ɔ nɔ), nɛ e jeɔ níhi nɛ a ngma kɛ fɔ si nɛ a maa ba mi hwɔɔ se ɔ kpo. Gbamihi fuu ngɛ Kpojemi womi ɔ mi nɛ kpaako a maa ba mi.

Níhi nɛ ngɛ Kpojemi womi ɔ mi

•   Sisije.​—Kpojemi 1:1-9.

•   Sɛ gbihi nɛ Yesu kɛ mane asafo kpaago ɔmɛ.​—Kpojemi 1:10–3:22.

•   Mawu nɛ e hii si ngɛ matsɛ sɛ nɔ ngɛ hiɔwe ɔ he nina.​—Kpojemi 4:1-11.

•   Nina slɔɔtoslɔɔtohi nɛ a nyɛɛ a sibi se:

  •   Nya sɔumi nɔ́ kpaago ɔmɛ.​—Kpojemi 5:1–8:6.

  •   Titimati kpaago ɔmɛ, nyagbe etɛ ɔmɛ ngɔ haomi etɛ kɛ ba.​—Kpojemi 8:7–​14:20.

  •   Kplu kpaago, eko tsuaa eko mi haomi daa si kɛ ha Mawu kojomi nɛ a plɛ pue zugba a nɔ.​—Kpojemi 15:1–16:21.

  •   Mawu he nyɛli ɔmɛ a hɛ mi kpatami he nina.​—Kpojemi 17:1–20:10.

  •   Mawu jɔɔmihi nɛ maa ba ngɛ hiɔwe kɛ zugba a he nina.​—Kpojemi 20:11–22:5.

•   Nyagbe.​—Kpojemi 22:6-21.

Níhi nɛ maa ye bua mo nɛ o nu Kpojemi womi ɔ sisi

1.   E mi munyu ɔmɛ woɔ nɔ he wami. Pi gbeye sane kɛ ha nihi nɛ sɔmɔɔ Mawu. Nihi babauu kɛ munyungu nɛ ji “apocalypse” tsuɔ ní kɛ tsɔɔ hɛ mi kpatami nɛ nya wa. Se Kpojemi womi ɔ sisije kɛ e nyagbe ɔ tsɔɔ kaa nihi nɛ kaneɔ womi nɛ ɔ, nɛ a nuɔ sisi, nɛ a kɛ níhi nɛ a kaneɔ ɔ tsuɔ ní ɔ ma ná bua jɔmi.​—Kpojemi 1:3; 22:7.

2.   “Nina” loo okadihi babauu nɛ a kɛ tsu ní ngɛ Kpojemi womi ɔ mi ɔ daa si ha nɔ́ kpa.​—Kpojemi 1:1.

3.   A tu nihi titli komɛ kɛ okadi komɛ nɛ a kɛ tsu ní ngɛ Kpojemi womi ɔ mi ɔ a he munyu ngɛ Baiblo ɔ mi womihi nɛ sɛ hlami ɔ ekomɛ a mi:

   •   Yehowa​—‘anɔkuale Mawu nɛ e ngɛ hiɔwe’ kɛ níhi tsuo a Bɔlɔ.​—5 Mose 4:39; La 103:19; Kpojemi 4:11; 15:3.

   •   Yesu Kristo​—“Mawu To Bi ɔ.”​—Yohane 1:29; Kpojemi 5:6; 14:1.

   •   Satan Abosiami​—Mawu he nyɛlɔ.​—1 Mose 3:14, 15; Yohane 8:44; Kpojemi 12:9.

   •   Babilon Ngua a​—Yehowa Mawu kɛ e we bi a he nyɛlɔ kɛ he nɛ jami mi lakpa tsɔɔmihi tsuo je, kaa bɔ nɛ blema Babilon (Babel) ma a ji ɔ.​—1 Mose 11:2-9; Yesaya 13:1, 11; Kpojemi 17:4-6; 18:4, 20.

   •   “Wo ɔ”​—yayami peeli nɛ a teɔ si kɛ woɔ Mawu.​—Yesaya 57:20; Kpojemi 13:1; 21:1.

   •   Ní komɛ nɛ a kɛ tsu ní ngɛ blema kpe he bo tsu ɔ nɛ a sɔmɔ Mawu ngɛ mi ɔ mi​—ekomɛ ji somi daka a, wo nɛ ngɛ kpɛe kaa ahuhuɛ (kã nɛ a kɛ fɔɔ dɛ kɛ nane he), kanehi, tsopa kɛ e he via sami, kɛ la tɛ nɛ a sãã sami bɔ ngɛ nɔ.​—2 Mose 25:10, 17, 18; 40:24-32; Kpojemi 4:5, 6; 5:8; 8:3; 11:19.

   •   Lohwe awi yeli​—a daa si kɛ ha adesa nɔ yemihi.​—Daniel 7:1-8, 17-26; Kpojemi 13:2, 11; 17:3.

   •   Yibɔhi (nɔmahi) nɛ a kɛ tsu ní kɛ da si ha níhi.​—Kpojemi 1:20; 8:13; 13:18; 21:16.

4.   Nina amɛ kɔɔ “Nyɔmtsɛ ɔ ligbi ɔ” nɛ je sisi ngɛ jeha 1914 benɛ a to Mawu Matsɛ Yemi ɔ sisi nɛ Yesu bɔni nɔ yemi kaa Matsɛ ɔ he. (Kpojemi 1:10) Lɛɛ wa ma nyɛ maa hyɛ blɔ kaa gbami titli komɛ nɛ a ngɛ Kpojemi womi ɔ mi ɔ maa ba mi ngɛ wa be nɛ ɔ mi.

5.   Bɔ nɛ pee nɛ waa nu Kpojemi womi ɔ sisi ɔ, wa hia yemi kɛ buami nɛ wa ná loko wa nu Baiblo mi womi kpa amɛ a sisi ɔ. Kaa nile nɛ je Mawu ngɔ kɛ yemi kɛ buami nɛ nihi nɛ a nu sisi ɔ kɛ ma ha wɔ.​—Bɔfo Ɔmɛ A Ní Tsumi 8:26-39; Yakobo 1:5.