Baiblo ɔ tsɔɔ kaa e sa nɛ o suɔ o he bɔ nɛ sa. Suɔmi nɛ o ma ná ha o he ɔ ma bi nɛ o hyɛ o he nɔ́ saminya, o bu o he, nɛ o na o he kaa o he jua wa. (Mateo 10:31) Baiblo ɔ tsɔɔ kaa e sɛ nɛ wa fo wɔ pɛ wa nɔ́ mi, loo wa hla hɛ mi nyami, mohu ɔ, e sa nɛ huzu nɛ hi wa he nɛ wa maa suɔ ɔ he.

Mɛnɔ e sa nɛ waa suɔ kekleekle?

1.   E sa nɛ waa je wa tsui mi kɛ suɔ Mawu kekle. Baiblo ɔ tsɔɔ kaa mlaa nɛ pe kulaa a ji, “e sa nɛ o suɔ Yehowa o Mawu ɔ kɛ o tsui tsuo.”​—Maako 12:28-30; 5 Mose 6:5.

2.   Mlaa enyɔne nɛ pe kulaa a ji: “E sa nɛ o suɔ o nyɛmi kaa bɔ nɛ o suɔ o he ɔ.”​—Maako 12:31; 3 Mose 19:18.

3.   E ngɛ mi kaa Baiblo ɔ de we tɛ̃ɛ kaa waa suɔ wɔ nitsɛmɛ wa he mohu lɛɛ, se mlaa nɛ ji “suɔ o nyɛmi kaa bɔ nɛ o suɔ o he ɔ” tsɔɔ kaa e he hia nɛ wa ná suɔmi nɛ sa kɛ ha wa he, nɛ waa bu wa he bɔ nɛ sa hulɔ.

Mɛnɔ Yesu suɔ kekle?

 Yesu tsɔɔ blɔ nɔ nɛ wa maa gu kɛ ngmɛ pɛpɛɛpɛ ngɛ suɔmi nɛ wa ma ná kɛ ha Mawu, wa nyɛmimɛ, kɛ wɔ nitsɛmɛ wa he ɔ mi. Nɛ e de e kaseli ɔmɛ kaa a kase lɛ.​—Yohane 13:34, 35.

1.   Yesu suɔ Yehowa Mawu kekle, nɛ e bɔ mɔde kaa ní tsumi nɛ Mawu ha lɛ ɔ, e maa gbe nya. E de ke: “Bɔ nɛ pee nɛ je ɔ nɛ e le kaa i suɔ Tsɛ ɔ, i peeɔ kaa bɔ nɛ Tsɛ ɔ fã mi ke ma pee ɔ.”​—Yohane 14:31.

2.   Yesu suɔ e nyɛmimɛ hulɔ, e yeɔ buaa nihi, nɛ e ngɔ e wami po kɛ fɔ si ha adesahi tsuo.​—Mateo 20:28.

3.   Jehanɛ ɔ, e suɔ e he bɔ nɛ sa, ejakaa e náa be kɛ jɔɔ e he, e náa be kɛ yeɔ ní nɛ e kɛ e se nyɛɛli ɔmɛ kɛ e kaseli 12 ɔmɛ yaa he nya buamihi.​​—Maako 6:31, 32; Luka 5:29; Yohane 2:1, 2; 12:2.

Ke o suɔ ni kpahi ɔ, lɔ ɔ ma ha bua jɔmi kɛ bu nɛ o ngɛ ha o he ɔ maa ba si lo?

 Dɛbi, ejakaa a bɔ wɔ ngɛ Mawu subai nɔ, nɛ Mawu su titli ji suɔmi. (1 Mose 1:27; 1 Yohane 4:8) Enɛ ɔ tsɔɔ kaa Mawu bɔ wɔ konɛ wa nyɛ nɛ wa je suɔmi kpo kɛ ha ni kpahi. Ke wa suɔ wa he ɔ, tɔmi ko be he, se wa bua maa jɔ wawɛɛ ke wa suɔ Mawu pe nɔ́ fɛɛ nɔ́ ngɛ wa si himi mi, nɛ wa bɔɔ mɔde kaa wa maa pee ni kpahi kpakpa. Baiblo ɔ tsɔɔ kaa, “bua jɔmi babauu ngɛ nɔ́ hami mi pe nɔ́ ngɔmi”​—Ní Tsumi 20:35.

 Mwɔnɛ ɔ, nihi fuu susu kaa ke o suɔ o he pe ni kpahi ɔ, lɔ ɔ ma ha nɛ o bua maa jɔ. A ngɔ “suɔ o he” kɛ da “suɔ o nyɛmi” nane mi. Se mwɔnɛ ɔ, níhi a si kpami tsɔɔ kaa wa náa bua jɔmi kɛ nɔmlɔ tso mi he wami kpakpa ke waa kɛ Baiblo ga womi nɛ ji: “Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he” ɔ tsu ní.​—1 Korinto Bi 10:24.