Ke huno ko kɛ e yo a juɛmi kɔ we ngɛ nɔ́ kake he, nɛ jehanɛ se hu e slo níhi nɛ a bua jɔ he ɔ, e peeɔ nyagba kɛ haa mɛ. Se ke ji kaa a juɛmi kɔ we ngɛ níhi nɛ nyɛɛ se nɛ ɔmɛ a he ɔ, lɛɛ e maa pee nyagba agbo nitsɛ:

•   Si abɔ nɛ e sa kaa a ya slaa a weku li

•   Bɔ nɛ e sa kaa a kɛ sika nɛ tsu ní ha

•   Ke ji kaa a ma fɔ bimɛ aloo a be fɔe

 Mɛni o ma nyɛ maa pee ke o kɛ o he piɛɛlɔ ɔ nyɛ juɛmi kɔ we?

•  Nɔ́ nɛ e sa nɛ o le

•  Nɔ́ nɛ o ma nyɛ maa pee

 Pi be fɛɛ be nɛ nyɛ juɛmi ma kɔ ngɛ níhi a he. Pi be fɛɛ be nɛ nɔ kɛ e yo nɛ a suɔ a he wawɛɛ po a juɛmi ma kɔ ngɛ níhi a he. E ma nyɛ maa ba jã ngɛ níhi nɛ a he hia po a mi.

 “A fɔ mi ngɛ weku ko nɛ a blaa kɛ peeɔ nɔ́ fɛɛ nɔ́ ɔ mi. Wa ya slaa wa maa kɛ wa nɛnɛ, wa tsɛko ɔmɛ, wa nyɛngua amɛ, wa nyɛwayo ɔmɛ, kɛ a bi ɔmɛ ngɛ otsi ɔ nyagbe. Ye huno ɔ weku li ɔmɛ lɛɛ a pɔɛ jã peemi. Enɛ ɔ he ɔ, wa juɛmi kɔ we ngɛ be abɔ nɛ e sa kaa wa ya ye ngɛ wa weku li ɔmɛ a ngɔ, kɛ si abɔ nɛ e sa kaa wa tsɛ wa weku li nɛ a kɛ wa he kɛ ɔ ngɛ tɛlifoo nɔ.”​—Tamara.

 “Akɛnɛ e slo bɔ nɛ a tsɔse I kɛ ye yo ɔ ha he je ɔ, wa juɛmi kɔ we ngɛ bɔ nɛ e sa kaa waa kɛ wa sika nɛ tsu ní ha a he. Benɛ wa sɛ gba si himi mi nyɔhiɔ bɔɔ ko ɔ, wa sa nya bɔɔ ngɛ he. Wa sɛɛ he ní si abɔ loko wa nyɛ tsu nyagba a he ní.”​—Tyler

 Nyagba komɛ ngɛ nɛ sanehi a he nɛ nyɛ maa ngmɛɛ kɛkɛ ɔ, be nyɛe ma tsu a he ní. Kaa nɔ hyɛmi nɔ́ ɔ, mɛni nyɛ maa pee ke nyɛ nganyɛ loo nyɛ ngatsɛ be he wami, nɛ e ma bi kaa a hyɛ e nɔ? Aloo mɛni nyɛ maa pee ke nyɛ kpɛti nɔ kake suɔ kaa e fɔ bi, se nɔ kake hu sume? a

 “I kɛ ye yo ɔ wa susu bi fɔmi he si abɔ. Kpamisaa nɛ ɔ e ngɛ he munyu tue, se wa juɛmi hu kɔ we gblee. E ngɛ yee ha mi kaa ma kplɛɛ e susumi ɔ nɔ.”​—Alex.

 Ke nyɛ juɛmi kɔ we ngɛ níhi a he po ɔ, e sɛ nɛ lɔ ɔ nɛ puɛ nyɛ gba a. Ní leli komɛ tsɔɔ kaa, ke o kɛ o he piɛɛlɔ ɔ nyɛ juɛmi kɔ we ngɛ sanehi nɛ a he hia amɛ a he ɔ, e sa nɛ o pee nɔ́ fɛɛ nɔ́ nɛ o ma nyɛ konɛ o nine nɛ su nɔ́ nɛ o ngɛ hlae ɔ nɔ, ke lɔ ɔ ma bi nɛ o je gba po. Se jamɛ a “ga womi” ɔ ma ha nɛ o nu he kaa o hiami nɔ́ ɔ he hia pe nɔ́ fɛɛ nɔ́, nɛ e be hae nɛ o ye kita nɛ o ka Mawu kaa o maa mɛtɛ o he piɛɛlɔ ɔ he ngɛ nɔ́ fɛɛ nɔ́ mi ɔ nɔ.

 Moo fia o pɛɛ si kaa o maa ye o gba si himi kita a nɔ. Ke o pee jã a, o kɛ o he piɛɛlɔ ɔ ma nyɛ maa pee kake kɛ tsu nyagba a he ní, pe nɛ nyɛ maa na nyɛ sibi kaa he nyɛli.

 Baiblo sisi tomi mlaa: “Nɔ́ nɛ Mawu ngɔ kɛ tsa a, ko ha nɛ adesa ko nɛ e gba mi”—Mateo 19:6.

 Susu nɔ́ nɛ maa je mi kɛ ba a he. Kaa nɔ hyɛmi nɔ́ ɔ, ngɔɔ lɛ kaa nyɛ ti nɔ kake suɔ kaa nyɛ fɔ bi, se nɔ kake hu sume. Níhi fuu ngɛ nɛ nyɛ ma nyɛ ma susu he, ekomɛ ji:

•   Bɔ nɛ suɔmi kɛ kake peemi nɛ ngɛ nyɛ kpɛti ngɛ gba si himi ɔ mi ɔ ngɛ ha.

   Anɛ ke nyɛ fɔ bi ɔ, nyɛ ma nyɛ maa pee kake kɛ hyɛ lɛ nɛ́ e be nyagba pee lo?

•   Blɔ nya ní tsumihi nɛ ma ba fɔ si ngɛ nyɛ nɔ.

   E biɔ babauu pe niye ní, tade, kɛ hwɔ he nɛ o ma hla kɛ ha o weku ɔ.

•   Bɔ nɛ nyɛ sika he blɔ nya tomi ngɛ ha.

   Anɛ o ma nyɛ ma bla ní tsumi, weku, kɛ blɔ nya ní tsumi kpahi nɛ o tsu a he ní lo?

 Baiblo sisi tomi mlaa: “Nyɛ ti mɛnɔ lɛ ke e ngɛ hlae maa ma mɔ ɔ, kekleekle ɔ, e be si hie nɛ e maa bu nya?”​—Luka 14:28.

 Nyɛ susu níhi tsuo nɛ kɔ sane ɔ he ɔ a he. Nyɛ ma nyɛ ma tsu nyagba komɛ nɛ nyɛ juɛmi kɔ we ngɛ he ɔ a he ní. Kaa nɔ hyɛmi nɔ́ ɔ, ke nyɛ nyagba ji bi fɔmi ɔ, nɔ nɛ sume nɛ nyɛ fɔ ɔ ma nyɛ ma bi e he ke:

•   ‘Ke I ke wa ko fɔ ɔ, anɛ I ngɛ tsɔɔe kaa wa ko fɔ kulaa, aloo I ngɛ tsɔɔe kaa waa mlɛ bɔɔ lolo?’

•   ‘Anɛ akɛnɛ I susu kaa I bi nyɛe ma pee fɔlɔ kpakpa a he je nɛ I ke wa ko fɔ ɔ lo?’

•   ‘Anɛ I ngɛ gbeye yee kaa ye he piɛɛlɔ ɔ ma kua mi lo?’

 Jehanɛ se ɔ, nɔ nɛ e suɔ nɛ nyɛ fɔ bi ɔ hu ma nyɛ ma bi e he sane nɛ ɔmɛ:

•   ‘Anɛ wa dla wa he kɛ ha bimɛ a tsɔsemi lo?’

•   ‘Anɛ wa ngɛ sika nɛ waa kɛ maa hyɛ wa bimɛ a nɔ lo?’

 Baiblo sisi tomi mlaa: ‘Juɛmi ɔ nɛ je hiɔwe ɔ nuɔ nɔ́ sisi.’​—Yakobo 3:17.

 Mo susu se namihi nɛ ngɛ o he piɛɛlɔ ɔ susumi ɔ he ɔ he. Nihi enyɔ ma nyɛ maa hyɛ nɔ́ kake, se kɛ̃ ɔ, a ma nyɛ ma ná susumi slɔɔtohi ngɛ he. Ja nɔuu kɛ̃ nɛ nɔ kɛ e yo ma nyɛ maa susu sane ko he, se e maa slo nɔ fɛɛ nɔ juɛmi ngɛ he. Kaa nɔ hyɛmi nɔ́ ɔ, e ma nyɛ maa slo bɔ nɛ a kpɛti nɔ fɛɛ nɔ suɔ kaa a kɛ sika nɛ tsu ní ha. Ke nyɛ ma susu sanehi nɛ a he hia amɛ a he ɔ, nyɛ susu níhi nɛ nyɛ juɛmi kɔ ngɛ he ɔ a he kekle, loko nyɛ susu níhi nɛ nyɛ juɛmi kɔ we ngɛ he ɔ a he.

•   Mɛni ji oti komɛ nɛ nyɛ juɛmi kɔ ngɛ a he?

•   Mɛni se nami lɛ ngɛ nyɛ ti nɔ fɛɛ nɔ susumi ɔ he?

•   Bɔ nɛ pee nɛ bua jɔmi nɛ hi nyɛ gba si himi ɔ mi ɔ, anɛ nyɛ ti nɔ kake aloo nyɛ tsuo nyɛ ma nyɛ ma dla nyɛ susumi konɛ nyɛ juɛmi nɛ kɔ lo?

 Baiblo sisi tomi mlaa: “Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he.”​—1 Korinto Bi 10:24.