1 Kronika 24:1-31
24 Aaron sisi bimɛ ɔmɛ ngɛ a kuuhi a mi ji nɛ ɔmɛ nɛ: Aaron binyumuhi ji Nadab, Abihu, Eleazar, kɛ Itamar.
2 Se Nadab kɛ Abihu gbo si a tsɛ ɔ, nɛ a be binyumuhi; se Eleazar kɛ Itamar ya nɔ nɛ a sɔmɔ kaa osɔfohi.
3 David, kɛ Zadok nɛ e je Eleazar binyumu ɔmɛ a kpɛti ɔ, kɛ Ahimelek nɛ je Itamar binyumu ɔmɛ a kpɛti ɔ gba a mi kɛ wo kuuhi a mi ngɛ a sɔmɔmi ní tsumi ɔ nya.
4 Akɛnɛ Eleazar binyumu ɔmɛ a nyatsɛmɛ ɔmɛ hiɛ pe Itamar binyumu ɔmɛ a nyatsɛmɛ ɔmɛ he je ɔ, a gba a mi ngɛ a nyatsɛmɛ ɔmɛ a nya: Eleazar binyumu ɔmɛ ná nihi 16 kaa a tsɛmɛ a we ɔmɛ a nyatsɛmɛ, nɛ Itamar binyumu ɔmɛ ná nihi 8 kaa a tsɛmɛ a we ɔmɛ a nyatsɛmɛ.
5 Jehanɛ hu ɔ, a fɔ sɔ kɛ gba Eleazar binyumu ɔmɛ kɛ Itamar binyumu ɔmɛ a mi, ejakaa a ngɛ nya dali kɛ ha he klɔuklɔu ɔ, kɛ nya dali nɛ a sɔmɔɔ anɔkuale Mawu ɔ nɛ́ a je kuu enyɔ nɛ ɔmɛ tsuo a mi.
6 Kɛkɛ nɛ Shemaya, Netanel binyumu ɔ nɛ ji Levibi ɔmɛ a womi ngmalɔ ɔ ngma a biɛhi ngɛ matsɛ ɔ, ma nikɔtɔma amɛ, osɔfo Zadok, Ahimelek, nɛ ji Abiatar binyumu ɔ, osɔfo ɔmɛ a tsɛmɛ a we ɔmɛ a nyatsɛmɛ ɔmɛ, kɛ Levibi ɔmɛ a tsɛmɛ a we ɔmɛ a nyatsɛmɛ ɔmɛ a hɛ mi, nɛ a hla a tsɛmɛ a we ɔ kake kɛ ha Eleazar, kɛ kake hu kɛ ha Itamar.
7 Kekleekle sɔ ɔ ya nɔ Yehoyarib nɔ; nɔ́ nɛ ji enyɔ ɔ ya nɔ Yedaya nɔ,
8 nɔ́ nɛ ji etɛ ɔ ya nɔ Harim nɔ, nɔ́ nɛ ji eywiɛ ɔ ya nɔ Seorim nɔ,
9 nɔ́ nɛ ji enuɔ ɔ ya nɔ Malkiya nɔ, nɔ́ nɛ ji ekpa a ya nɔ Miyamin nɔ,
10 nɔ́ nɛ ji kpaago ɔ ya nɔ Hakoz nɔ, nɔ́ nɛ ji kpaanyɔ ɔ ya nɔ Abiya nɔ,
11 nɔ́ nɛ ji nɛɛ ɔ ya nɔ Yeshua nɔ, nɔ́ nɛ ji nyɔngma a ya nɔ Shekania nɔ,
12 nɔ́ nɛ ji 11 ɔ ya nɔ Eliashib nɔ, nɔ́ nɛ ji 12 ɔ ya nɔ Yakim nɔ,
13 nɔ́ nɛ ji 13 ɔ ya nɔ Hupa nɔ, nɔ́ nɛ ji 14 ɔ ya nɔ Yeshebeab nɔ,
14 nɔ́ nɛ ji 15 ɔ ya nɔ Bilga nɔ, nɔ́ nɛ ji 16 ya nɔ Imer nɔ,
15 nɔ́ nɛ ji 17 ɔ ya nɔ Hezir nɔ, nɔ́ nɛ ji 18 ɔ ya nɔ Hapizez nɔ,
16 nɔ́ nɛ ji 19 ɔ ya nɔ Petahia nɔ, nɔ́ nɛ ji 20 ɔ ya nɔ Yehezkel nɔ,
17 nɔ́ nɛ ji 21 ɔ ya nɔ Yakin nɔ, nɔ́ nɛ ji 22 ɔ ya nɔ Gamul nɔ,
18 nɔ́ nɛ ji 23 ɔ ya nɔ Delaya nɔ, nɔ́ nɛ ji 24 ɔ ya nɔ Maazia nɔ.
19 Bɔ nɛ a to a sɔmɔmi ní tsumihi a he blɔ nya kɛ fɔ si ke a ba Yehowa we ɔ ji nɛ ɔmɛ nɛ, e ngɛ kaa bɔ nɛ a nɛnɛ Aaron to he blɔ nya kɛ fɔ si kaa bɔ nɛ Yehowa, Israel Mawu ɔ fã lɛ ɔ.
20 Nɛ Levibi nɛ piɛ ɔ a kpɛti ni komɛ ji nɛ ɔmɛ nɛ: ngɛ Amram binyumu ɔmɛ a kpɛti ɔ, Shubael; ngɛ Shubael binyumu ɔmɛ a kpɛti ɔ, Yedeya;
21 Rehabia nina amɛ: ngɛ Rehabia binyumu ɔmɛ a kpɛti ɔ, Ishia ji a nyatsɛ;
22 ngɛ Izharbi ɔmɛ a kpɛti ɔ, Shelomot; ngɛ Shelomot binyumu ɔmɛ a kpɛti ɔ, Yahat;
23 nɛ ngɛ Hebron binyumu ɔmɛ a kpɛti ɔ, Yeria ji a nyatsɛ, Amaria ji nɔ enyɔne, Yahaziel ji nɔ etɛne, Yekameam ji nɔ eywiɛne;
24 ngɛ Uziel binyumu ɔmɛ a kpɛti ɔ, Mika; ngɛ Mika binyumu ɔmɛ a kpɛti ɔ, Shamir.
25 Mika nyɛminyumu ji Ishia; ngɛ Ishia binyumu ɔmɛ a kpɛti ɔ, Zakaria.
26 Merari binyumuhi ji Mahli kɛ Mushi; ngɛ Yaazia binyumu ɔmɛ a kpɛti ɔ, Beno.
27 Merari binyumuhi ji nɛ ɔmɛ nɛ: Yaazia binyumuhi ji, Beno, Shoham, Zakur, kɛ Ibri;
28 Mahli binyumu ji Eleazar, Eleazar be binyumuhi;
29 Kish binyumuhi ji nɛ ɔmɛ nɛ: ngɛ Kish binyumu ɔmɛ a kpɛti ɔ, Yerameel;
30 nɛ Mushi binyumuhi ji Mahli, Eder, kɛ Yerimot.
Ni nɛ ɔmɛ ji Levi binyumuhi ngɛ a tsɛmɛ a we ɔmɛ a nya.
31 Nɛ mɛ hu a fɔ sɔ kaa bɔ nɛ a nyɛminyumuhi nɛ ji Aaron binyumu ɔmɛ pee ngɛ Matsɛ David, Zadok, Ahimelek, osɔfo ɔmɛ a tsɛmɛ a we ɔmɛ a nyatsɛmɛ ɔmɛ, kɛ Levi bi ɔmɛ a tsɛmɛ a we ɔmɛ a nyatsɛmɛ ɔmɛ a hɛ mi ɔ. Ngɛ a tsɛmɛ a we ɔmɛ a mi ɔ, bɔ nɛ a kɛ nɔ nɛ ji nyatsɛ ɔ yeɔ ha a, jã nɔuu nɛ a kɛ e nyɛminyumu nyafii ɔ hu yeɔ.
