1 Mose 21:1-34
21 Yehowa ngɔ e juɛmi kɛ ba Sara nɔ kaa bɔ nɛ e de ɔ, nɛ Yehowa pee nɔ́ nɛ e wo Sara si kaa e maa pee ha lɛ ɔ.
2 Kɛkɛ nɛ Sara ba ngɔ hɔ, nɛ e fɔ binyumu kɛ ha Abraham ngɛ Abraham bwɔmi si ngɛ be nɛ Mawu wo lɛ si ɔ nya.
3 Abraham wo bimwɔyo ɔ nɛ Sara fɔ ha lɛ ɔ biɛ ke Isak.
4 Nɛ Abraham po e binyumu Isak benɛ e ye ligbi kpaanyɔ ɔ, kaa bɔ nɛ Mawu fã lɛ ɔ.
5 Abraham ye jeha 100 benɛ a fɔ e binyumu Isak kɛ ha lɛ ɔ.
6 Kɛkɛ nɛ Sara de ke: “Mawu ha nɛ i ngɛ muɔe; nɔ fɛɛ nɔ nɛ e maa nu he ɔ kɛ mi maa muɔ.”*
7 Nɛ e de hu ke: “Mɛnɔ ko nyɛ de Abraham ke, ‘Bɔ fɛɛ bɔ nɛ ji ɔ, Sara ma ha bi nyɔ’? Se kɛ̃ ɔ, i fɔ binyumu kɛ ha lɛ ngɛ e bwɔmi si.”
8 Jokuɛ ɔ ba wa nɛ a po lɛ nyɔ, nɛ ligbi nɛ a po Isak nyɔ ɔ, Abraham ngmɛ okplɔɔ ngua ko.
9 Se Sara to he hɛ kaa Egipt no Hagar binyumu ɔ nɛ e fɔ kɛ ha Abraham ɔ pɔɔ Isak he fɛu yemi.
10 Lɔ ɔ he ɔ, e de Abraham ke: “Fiee mawayo nɛ ɔ kɛ e binyumu ɔ kɛ ho, ejakaa mawayo nɛ ɔ binyumu ɔ kɛ ye binyumu Isak be gbosi ní yee!”
11 Se nɔ́ nɛ Sara de ngɛ Abraham binyumu ɔ he ɔ ngɔɛ Abraham nya kulaa.
12 Kɛkɛ nɛ Mawu de Abraham ke: “Ko ha nɛ nɔ́ nɛ Sara ngɛ dee ngɛ nyumuyo ɔ kɛ o mawayo ɔ he ɔ nɛ gba o nya. Bu lɛ tue,* ejakaa nɔ nɛ a ma tsɛ ke o nina a,* Isak nɔ lɛ e maa gu kɛ ba.
13 Ngɛ mawayo ɔ binyumu ɔ blɔ fa mi ɔ, ma ha nɛ je ma ko maa je lɛ hu e mi kɛ ba, ejakaa e ji o nina.”*
14 Lɔ ɔ he ɔ, Abraham te si mɔtu mla, nɛ e ngɔ abolo kɛ lohwe he womi tɔ kɛ e mi nyu, nɛ e kɛ ha Hagar. E ngɔ ní ɔmɛ kɛ ma Hagar konɔ, nɛ e wo e kɛ e bi nyumuyo ɔ blɔ. Kɛkɛ nɛ Hagar je nɛ e ya wo lalaalo ngɛ Beer-sheba nga a nɔ.
15 Nyagbenyagbe ɔ, nyu nɛ ngɛ lohwe he womi tɔ ɔ mi ɔ ba ta, nɛ e tsitsɛɛ e bi nyumuyo ɔ kɛ wo tso kusuu ko sisi.
16 Kɛkɛ nɛ e je kɛ ho nɛ lɛ nɔ kake too e ya hi si ngɛ he ko nɛ e kɛ lejɛ ɔ kɛmi maa pee kɛ̃ɛ̃ tsɛmi mi kɛmi, ejakaa e de ke: “I sume nɛ nyumuyo ɔ nɛ gbo ngɛ ye hɛ mi.” Lɔ ɔ he ɔ, Hagar hi si ngɛ he ko nɛ e kɛ lejɛ ɔ kɛ we tsɔ, nɛ e bɔni ya fomi boboobo.
17 Kɛkɛ nɛ Mawu nu nyumuyo ɔ gbi, nɛ Mawu bɔfo ko tsɛ Hagar kɛ je hiɔwe nɛ e de lɛ ke: “Hagar, mɛni ngɛ mo pee? Koo ye gbeye, ejakaa Mawu nu nyumuyo ɔ gbi ngɛ he nɛ e ngɛ ɔ.
18 Tee si, wo nyumuyo ɔ nɔ nɛ o kɛ o nine nɛ pɛtɛ e he saminya, ejakaa ma ha nɛ e maa pee je ma ngua.”
19 Kɛkɛ nɛ Mawu bli e hɛngmɛ nɛ e na vu ko nɛ nyu ngɛ mi, nɛ e ya yɛ nyu kɛ wo lohwe he womi tɔ ɔ mi nɛ e hyi, nɛ e ha nyumuyo ɔ eko nɛ e nu.
20 Mawu kɛ nyumuyo ɔ ngɛ be mi nɛ e ngɛ wae ɔ. E hi nga a nɔ, nɛ e ba pee kɛ̃ɛ̃ tsɛ̃lɔ.
21 E hi Paran nga a nɔ, nɛ e yayo ya ngɔ yo kɛ je Egipt zugba a nɔ kɛ ba ha lɛ.
22 Jamɛ a be ɔ mi ɔ, Abimelek kɛ e tabo ɔ nya dalɔ Fikol de Abraham ke: “Mawu piɛɛ o he ngɛ nɔ́ fɛɛ nɔ́ nɛ o ngɛ pee ɔ mi.
23 Lɔ ɔ he ɔ, amlɔ nɛ ɔ, moo ngɔ Mawu kɛ kã mi kita ngɛ hiɛ ɔ kaa o be i kɛ ye nina kɛ ye sisi bimɛ sisie, nɛ suɔmi nɛ se pui nɛ i je kpo kɛ tsɔɔ mo ɔ, mo hu o ma je jamɛ a suɔmi ɔ nɔuu kpo kɛ tsɔɔ imi, kɛ zugba a nɛ o ngɛ nɔ ɔ.”
24 Kɛkɛ nɛ Abraham de ke: “I kã kita kaa ma pee jã.”
25 Se Abraham tu nyu vu ɔ nɛ Abimelek sɔmɔli ɔmɛ kpɔ̃ ngɛ e dɛ pani nya a he munyu kɛ tsɔɔ Abimelek.
26 Abimelek de lɛ ke: “I li nɔ nɛ pee nɔ́ nɛ ɔ; o wui nɔ tã kɛ tsɔɔ mi hyɛ, nɛ i nui he nɔ́ ko hyɛ kaa mwɔnɛ ligbi nɛ ɔ.”
27 Kɛkɛ nɛ Abraham ngɔ jijɔhi kɛ nahi kɛ ha Abimelek, nɛ mɛ ni enyɔ ɔmɛ a so.
28 Benɛ Abraham je jijɔ yo kpaago nɛ a wɛ kɛ je to ɔmɛ a kpɛti ɔ,
29 Abimelek bi Abraham ke: “Mɛni he je nɛ o je jijɔ yo kpaago nɛ a wɛ nɛ ɔmɛ kɛ da hiɛ ɔ?”
30 Kɛkɛ nɛ e de ke: “Moo ngɔ jijɔ yo kpaago nɛ a wɛ nɛ ɔmɛ ngɛ ye dɛ, konɛ e pee odase kaa imi lɛ i tsua vu nɛ ɔ nɛ.”
31 Lɔ ɔ he je nɛ e wo lejɛ ɔ biɛ ke Beer-sheba* a nɛ, ejakaa lejɛ ɔ nɛ mɛ ni enyɔ ɔmɛ tsuo a kã kita ngɛ.
32 Enɛ ɔ he ɔ, a so ngɛ Beer-sheba, nɛ lɔ ɔ se ɔ, Abimelek kɛ e tabo ɔ nya dalɔ Fikol te si, nɛ a kpale kɛ ho Filisti bi ɔmɛ a zugba a nɔ ya.
33 Lɔ ɔ se ɔ, e du tamarisk tso ko ngɛ Beer-sheba, nɛ e tsɛ Yehowa, neneene Mawu ɔ biɛ ngɛ lejɛ ɔ.
34 Nɛ Abraham hi* Filisti bi ɔmɛ a zugba a nɔ be kɛkɛɛ.*
Sisi Ningmahi
^ Baiblo komɛ de ke “nu he ɔ maa muɔ mi.”
^ Ngɛ Hebri gbi mi ɔ, “Bu e gbi tue.”
^ Ngɛ Hebri gbi mi ɔ, “o ngmɛdu ɔ.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “ngmɛdu.”
^ Eko ɔ, sisi ji “Kita Vu; [Jijɔ Bi] Kpaago Vu.”
^ Aloo “hi si kaa ma se no ngɛ.”
^ Ngɛ Hebri gbi mi ɔ, “ligbihi babauu.”
