Petro Kekleekle Womi ɔ 5:1-14
5 Enɛ ɔ he ɔ, kaa nyɛ nyɛmi nɔkɔtɔma, Kristo amanehlu ɔmɛ a he odase yelɔ kɛ nɔ nɛ e ma ná hɛ mi nyami ɔ nɛ a ma je kpo ɔ mi blɔ fa mi nɔ́ ɔ, i ngɛ nikɔtɔma amɛ nɛ a ngɛ nyɛ kpɛti ɔ pɛɛ nɛ ɔ kpae:*
2 Nyɛɛ hyɛ Mawu to kuu ɔ nɛ a kɛ wo nyɛ dɛ ɔ nɔ, nyɛ sɔmɔ kaa a nɔ hyɛli,* pi ngɛ nɔ nyɛmi nya, se nyɛɛ je nyɛ tsui mi kɛ pee ngɛ Mawu hɛ mi; pi ngɛ se nami nɛ ngɛ zo he suɔmi he je, se mohu kɛ bua jɔmi;
3 nyɛ ko pee nyɔmtsɛmɛ ngɛ ni nɛmɛ nɛ a ji Mawu we bi* ɔmɛ a nɔ, mohu ɔ, nyɛɛ ngɔ nyɛ he kɛ pee nɔ hyɛmi níhi kɛ ha to kuu ɔ.
4 Nɛ ke a je to nɔ hyɛlɔ ngua a kpo heii ɔ, nyɛ nine maa su hɛ mi nyami jlasi nɛ e kpa we ɔ nɔ.
5 Ngɛ jamɛ a blɔ ɔ nɔ nɔuu ɔ, nyɛ nihewi ɔmɛ hu nyɛɛ ba nyɛ he si kɛ ha nyumu nikɔtɔma* amɛ.* Se nyɛ tsuo nyɛɛ wo* he si bami* ngɛ nyɛɛ kɛ nyɛ sibi a si himi mi, ejakaa Mawu teɔ si kɛ woɔ he nɔ woli, se he si bali lɛɛ, e dlooɔ mɛ.
6 Enɛ ɔ he ɔ, nyɛɛ ba nyɛ he si ngɔ wo Mawu nine nɛ he wa a sisi, konɛ e wo nyɛ nɔ ngɛ be nɛ sa mi,
7 nɛ nyɛ sake nyɛ yeyeeye peemi ɔmɛ* tsuo ngɔ fɔ e nɔ, ejakaa e susuɔ nyɛ he.
8 Nyɛ hɛ mi nɛ ka si, nɛ nyɛɛ hwɔɔ! Nyɛ he nyɛlɔ Abosiami ɔ nyɛɛɔ kɛ yaa kɛ baa kaa jata nɛ ngɛ huãe nɛ e ngɛ hlae nɛ e maa mi nɔ ko.*
9 Se nyɛɛ te si kɛ wo lɛ, nyɛ he nɛ wa ngɛ hemi kɛ yemi ɔ mi, ejakaa nyɛ le kaa kikɛmɛ a amanehlu nɛ ɔmɛ nɔuu nɛ nyɛ nyɛmimɛ a kuu ɔ tsuo* ngɛ nae ngɛ je ɔ mi.
10 Se ke nyɛ na amanehlu be bɔɔ ko ɔ, dloomi tsuo Mawu ɔ, nɔ nɛ e tsɛ nyɛ kɛ ba e neneene hɛ mi nyami ɔ mi ngɛ Kristo mi ɔ, lɛ nitsɛ e maa gbe nyɛ tsɔsemi ɔ nya. E maa waje nyɛ, e ma ha nɛ nyɛ he maa wa, e ma ha nɛ nyɛ maa pi si wawɛɛ.
11 Á ngɔ he wami ɔ kɛ ha lɛ kɛ ya neneene. Amen.
12 Kɛ gu Silvano, nɔ nɛ i buɔ lɛ kaa nyɛminyumu anɔkualetsɛ ɔ nɔ ɔ, i ngma nyɛ munyuhi bɔɔ nɛ ɔ konɛ ma kɛ wo nyɛ he wami nɛ ma ngɔ hɛdɔ kɛ ye odase kaa enɛ ɔ ji Mawu dloomi nitsɛnitsɛ ɔ nɛ. Nyɛɛ da si kpɛii ngɛ mi.
13 Yo ɔ nɛ e ngɛ Babilon ɔ, nɔ nɛ a hla lɛ kaa bɔ nɛ a hla nyɛ ɔ ke e biɔ nyɛ, nɛ Maako, ye bi ɔ hu ke e biɔ nyɛ.
14 Nyɛ fɔ nyɛ sibi kɛ suɔmi nya he fĩɔmi.
Nyɛ nihi tsuo nɛ nyɛɛ kɛ Kristo pee kake ɔ, nyɛ nine nɛ su tue mi jɔmi nɔ.
Sisi Ningmahi
^ Aloo “he wami nɛ ɔ woe.”
^ Aloo “nyɛɛ hyɛ a nɔ saminya.”
^ Hela, “gbosi ní.”
^ Aloo “nikɔtɔma.”
^ Hela, “nyɛɛ ngɔ nyɛ he kɛ wo nyumu nikɔtɔma amɛ a sisi.”
^ Aloo “fĩ.”
^ Aloo “he si bami juɛmi.”
^ Aloo “haomi ɔmɛ; nyagba amɛ.”
^ Aloo “e ngɛ nɔ ko hlae nɛ e mi.”
^ Hela, “nyɛ nyɛmi peemi ɔ.”
