2 Mose 5:1-23
5 Lɔ ɔ se ɔ, Mose kɛ Aaron ya Farao ngɔ nɛ a ya de lɛ ke: “Nɔ́ nɛ Yehowa, Israel Mawu ɔ de ji nɛ ɔ nɛ, ‘Ha nɛ ye we bi ɔmɛ nɛ a ho nɛ a ya ye gbijlɔ kɛ ha mi ngɛ nga a nɔ.’”
2 Se Farao bi mɛ ke: “Mɛnɔ ji jamɛ a Yehowa a nɛ e sa kaa ma bu e gbi tue nɛ ma ha nɛ Israel nɛ ho ɔ? I li Yehowa ko, nɛ jehanɛ se hu i be hae nɛ Israel nɛ ho.”
3 Se a de lɛ ke: “Hebri bi ɔmɛ a Mawu ɔ kɛ wɔ tu munyu. Wa kpa mo pɛɛ, wa suɔ nɛ waa hia blɔ ligbi etɛ kɛ ya nga a nɔ nɛ wa ya sã afɔle kɛ ha Yehowa, wa Mawu ɔ; ke pi jã a, e maa ngɔ hiɔ kɛ ba wa nɔ aloo e maa ngɔ klaate kɛ gbe wɔ.”
4 Egipt matsɛ ɔ ha mɛ heto ke: “Mose kɛ Aaron, mɛni he je nɛ nyɛ ngɛ ni ɔmɛ ngɔe kɛ ngɛ a ní tsumi ɔ he jee ɔ? Nyɛɛ kpale kɛ ho nyɛ ní tsumi ɔ he ya!”
5 Nɛ Farao ya nɔ nɛ e de ke: “Hyɛ bɔ nɛ nyɛ we bi ɔmɛ a he hiɛ ha, nɛ nyɛ ngɛ hlae nɛ a je ní tsumi ɔ he nɛ a ya jɔɔ a he.”
6 Jamɛ a ligbi ɔ nɔuu ɔ, Farao fã ní tsumi ɔ nya nikɔtɔma amɛ kɛ ní tsumi ɔ nɔ hyɛli ɔmɛ ke:
7 “Nyɛ ko ha ni ɔmɛ nga nɛ a kɛ pee bliikisi ɔ hu. Nyɛ ha nɛ mɛ nitsɛmɛ a ya nɛ a ya bua nga nya.
8 Se nyɛ ha nɛ á po bliikisi abɔ nɛ a pooɔ daa a nɔuu. Nyɛ ko gbɔ nɔ kɛ ha mɛ, ejakaa a ngɛ hejɔ pee.* Lɔ ɔ he je nɛ a ngɛ ngmlaa kpae ke, ‘Wa suɔ nɛ waa je, wa suɔ nɛ wa ya sã afɔle kɛ ha wa Mawu ɔ!’ nɛ.
9 Nyɛ ha nɛ a tsu ní wawɛɛ pe kekle ɔ po. Nyɛ ko ha mɛ deka, bɔ nɛ pee nɛ a ko bu lakpa munyuhi tue.”
10 Lɔ ɔ he ɔ, ní tsumi ɔ nya nikɔtɔma amɛ kɛ ní tsumi ɔ nɔ hyɛli ɔmɛ ho nɛ a ya de Israel bi ɔmɛ ke: “Nɔ́ nɛ Farao de ji nɛ ɔ nɛ, ‘I be nyɛ nga hae hu.
11 Nyɛɛ ya nɛ nyɛ ya hla nyɛ nitsɛmɛ nyɛ nga ngɛ he saisaa nɛ nyɛ maa na eko ngɛ, se a be nyɛ ní tsumi ɔ nɔ gbɔe kɔkɔɔkɔ.’”
12 Kɛkɛ nɛ ni ɔmɛ gbɛ fĩa Egipt zugba a nɔ tsuo konɛ a ya bua nga* nya nɛ́ a kɛ pee bliikisi.
13 Nɛ ní tsumi ɔ nya nikɔtɔma amɛ ya nɔ nɛ a de ke: “Nyɛ ti nɔ fɛɛ nɔ nɛ e gbe e daa ligbi ní tsumi ɔ nya kaa bɔ nɛ e peeɔ be nɛ a haa nyɛ nga a.”
14 Jehanɛ se hu ɔ, a fiaa ní tsumi ɔ nɔ hyɛli nɛ a ji Israel bi nɛ Farao ní tsumi ɔ nya nikɔtɔma amɛ hla a kpa. A bi mɛ ke: “Mɛni he je nɛ nyɛ pui bliikisi abɔ nɛ jinɛ nyɛ pooɔ daa a? Hiɛ ɔ jã, nɛ mwɔnɛ ɔ hu jã nɔuu.”
15 Lɔ ɔ he ɔ, Israel bi nɛ a hyɛɛ ní tsumi ɔ nɔ ɔ ya Farao ngɔ nɛ a ngɔ a haomi ɔ kɛ ya fɔ e hɛ mi, nɛ a bi lɛ ke: “Mɛni he je nɛ o ngɛ o sɔmɔli ɔmɛ pee kikɛ nɛ ɔ?
16 A ha we o sɔmɔli ɔmɛ nga hu, se kɛ̃ ɔ, a ngɛ wɔ dee ke, ‘Nyɛɛ po bliikisi! A ngɛ o sɔmɔli ɔmɛ kpa fiae, se tɔmi ɔ je mo nitsɛ o we bi ɔmɛ.”
17 Se Farao de mɛ ke: “Nyɛ ngɛ hejɔ pee,* nyɛ ngɛ hejɔ pee!* Lɔ ɔ he je nɛ nyɛ ngɛ dee ke, ‘Wa suɔ nɛ waa je, wa suɔ nɛ wa ya sã afɔle ha Yehowa’ a nɛ.
18 Esɔ nɛ nyɛɛ kpale kɛ ho nɛ nyɛ ya tsu ní! A be nyɛ nga hae, se kɛ̃ ɔ, nyɛɛ po bliikisi abɔ nɛ nyɛ pooɔ daa a.”
19 Kɛkɛ nɛ Israel bi nɛ a hyɛɛ ní tsumi ɔ nɔ ɔ na kaa fami nɛ ji: “Nyɛ ko gbɔ bliikisi abɔ nɛ nyɛ pooɔ daa ligbi ɔ nɔ kɔkɔɔkɔ” ɔ ha nɛ a sɛ haomi ngua mi.
20 Lɔ ɔ se ɔ, benɛ a je kpo kɛ je Farao ngɔ ɔ, a ba ná Mose kɛ Aaron nɛ a daa si ngɛ lejɛ ɔ ngɛ mɛ mlɛe.
21 Oya nɔuu nɛ a de mɛ ke: “Yehowa nɛ e hyɛ nyɛ nɛ e kojo nyɛ, ejakaa nyɛ ha nɛ wa he pee Farao kɛ e sɔmɔli ɔmɛ tai* nɛ nyɛ ngɔ klaate kɛ wo a dɛ konɛ a kɛ gbe wɔ.”
22 Kɛkɛ nɛ Mose sɔle kɛ ha Yehowa nɛ e de lɛ ke: “Yehowa, mɛni he je nɛ o hao nimli nɛ ɔmɛ ɔ? Mɛni he je nɛ o tsɔ mi ɔ?
23 Kɛ je be nɛ i ya Farao hɛ mi nɛ i ya tu munyu ngɛ o biɛ mi ɔ, e wa nimli nɛ ɔmɛ yi mi wawɛɛ pe kekle ɔ po, se o kpɔ̃ we o we bi ɔmɛ hulɔ.”
Sisi Ningmahi
^ Aloo “ejakaa a ngɛ a he jɔɔe.”
^ Nga nɛ a ngɛ tsɔɔe ngɛ hiɛ ɔ ji hwiit kɛ blɛfo kɛ a henɔ ɔmɛ a tsohi nɛ a poo nɛ e piɛ ngɛ ngmɔ ɔ nɔ ke a kpa ní ta.
^ Aloo “Nyɛ ngɛ nyɛ he jɔɔe.”
^ Aloo “nyɛ ngɛ nyɛ he jɔɔe.”
^ Aloo “wa he ngɛ fu jee ngɛ Farao ɔ kɛ e sɔmɔli ɔmɛ a hɛ mi.”
