2 Samuel 20:1-26
20 Jehanɛ ɔ, sanetsɛ ko ngɛ nɛ a tsɛɛ lɛ ke Sheba, nɛ ji Bikri, Benyamin no ɔ binyumu ɔ. E kpã titimati* nɛ e de ke: “Wa be blɔ fa mi nɔ́ ko ngɛ David mi, nɛ wa be gbosi ní ko náe ngɛ Ishai binyumu ɔ dɛ. Israel bi, nyɛ ti nɔ fɛɛ nɔ nɛ ho e mawu ɔmɛ a ngɔ* ya!”
2 Kɛkɛ nɛ Israel nyumu ɔmɛ tsuo jɔɔ David se nyɛɛmi, nɛ a ya nyɛɛ Sheba, Bikri binyumu ɔ se; se Yuda nyumu ɔmɛ mɛtɛ a matsɛ ɔ he, kɛ je Yordan kɛ ya si Yerusalem.
3 Benɛ David ba e we* ɔ mi ngɛ Yerusalem ɔ, matsɛ ɔ ngɔ e yi kpahi nyɔngma amɛ nɛ e si ngɛ e se kaa a hyɛ we ɔ nɔ ɔ, nɛ e kɛ mɛ ya to we ko mi, nɛ e to bulɔ ngɛ a nya. E haa mɛ niye ní, se e kɛ mɛ ná we bɔmi. A tsi a nya nɛ a hi si kaa yalɔyihi kɛ ya si be nɛ a gbo, pohu a huno ngɛ je mi.
4 Jehanɛ ɔ, matsɛ ɔ de Amasa ke: “I ha mo ligbi etɛ nɛ o ya bua Yuda nyumu ɔmɛ a nya kɛ ba ye ngɔ, e sa nɛ mo hu o ba.”
5 Lɔ ɔ he ɔ, Amasa ho nɛ e ya bua Yuda nyumu ɔmɛ a nya, se be nɛ a to lɛ ɔ be loko e ba.
6 Lɔ ɔ se ɔ, David de Abishai ke: “Sheba, Bikri binyumu ɔ maa ye wɔ awi pe bɔ nɛ Absalom ye wɔ awi ɔ. Ngɔɔ o nyɔmtsɛ ɔ sɔmɔli ɔmɛ nɛ nyɛɛ fiee e se, konɛ e ko ya sɛ mahi nɛ a fia gbogbo kɛ wo a he ɔ mi, nɛ́ e je wa dɛ.”
7 Enɛ ɔ he ɔ, Yoab nyumu ɔmɛ, Keret bi ɔmɛ, Pelet bi ɔmɛ, kɛ nyumuhi nɛ a he wa a tsuo je kpo nɛ a fiee e se; a je Yerusalem, nɛ a fiee Sheba, Bikri binyumu ɔ se.
8 Benɛ e piɛ bɔɔ nɛ a maa su tɛ ngua a nɛ ngɛ Gibeon ɔ he ɔ, Amasa kɛ mɛ ba kpe. Jamɛ a be ɔ mi ɔ, Yoab wo e ta yami tade ɔ, nɛ e kɛ klaate nɛ ngɛ kpo mi wo e ngmɔngmɔ he. Benɛ e yaa Amasa ngɔ ɔ, klaate ɔ je e he kɛ nɔ si.
9 Yoab bi Amasa ke: “Ye nyɛminyumu, o ngɛ saminya lo?” Kɛkɛ nɛ Yoab ngɔ e hiɔ nine kɛ pɛtɛ Amasa kpɛni he kaa nɔ́ nɛ e yaa fĩɔ e nya he.
10 Amasa juɛmi yɛ klaate nɛ ngɛ Yoab dɛ ɔ nɔ, nɛ Yoab ngɔ klaate ɔ kɛ gbɔ e mi mi, nɛ e mi ní pã pue zugba. E he hia we nɛ e gbɔ lɛ ekohu; kake ɔ pɛ ma nyɛ maa gbe lɛ. Kɛkɛ nɛ Yoab kɛ e nyɛminyumu Abishai fiee Sheba, Bikri binyumu ɔ se.
11 Yoab nihewi ɔmɛ a ti nɔ kake daa si ngɛ e he, nɛ e ngɛ dee ke: “Nɔ fɛɛ nɔ nɛ e fĩ Yoab se kɛ nɔ fɛɛ nɔ nɛ e ngɛ David blɔ fa mi ɔ, e nyɛɛ Yoab se!”
12 Jamɛ a be ɔ mi tsuo ɔ, Amasa ngɛ huae ngɛ e muɔ ɔ mi ngɛ gbɛjegbɛ ɔ kpɛti. Benɛ nyumu ɔ na kaa ni ɔmɛ tsuo ba ngɛ si dae ɔ, e je Amasa ngɛ gbɛjegbɛ ɔ nɔ kɛ ya nga a mi. Nɛ e ngɔ tade kɛ ha e nɔ, ejakaa e na kaa nɔ fɛɛ nɔ nɛ ma ba su he nɛ Amasa ngɛ ɔ daa si.
13 Benɛ e je lɛ kɛ je gbɛjegbɛ ɔ nɔ ɔ, nyumu ɔmɛ tsuo nyɛɛ Yoab se kɛ fiee Sheba, Bikri binyumu ɔ se.
14 Sheba ya gu Israel wɛtso ɔmɛ tsuo a mi kɛ ho Abel ngɛ Bet Maaka ya. Bikri bi ɔmɛ bua a he nya, nɛ mɛ hu a nyɛɛ e se kɛ ho lejɛ ɔ ya.
15 Yoab kɛ e nyumu ɔmɛ ba,* nɛ a ba sa Sheba yi ngɛ Abel ngɛ Bet Maaka, nɛ a fia kpoku kɛ wo ma a he, ejakaa zu kpoku bɔle ma a. Nɛ nyumu ɔmɛ tsuo nɛ a piɛɛ Yoab he ɔ ngɛ gbogbo ɔ sisi tsuae konɛ a ku gbogbo ɔ.
16 Kɛkɛ nɛ yo ní lelɔ ko kpa ngmlaa kɛ je ma a mi, nɛ e de ke: “Nyɛɛ bu tue, nyumuhi, nyɛɛ bu tue! I kpa nyɛ pɛɛ nɛ nyɛ de Yoab ke, ‘Moo ba hiɛ ɔ nɛ i kɛ mo nɛ tu munyu.’”
17 Lɔ ɔ he ɔ, e su yo ɔ he, nɛ yo ɔ bi lɛ ke: “Mo ji Yoab ɔ lo?” E he nɔ ke: “Ee, imi.” Kɛkɛ nɛ yo ɔ de lɛ ke: “Moo bu o mawayo ɔ munyu ɔmɛ tue.” E de ke: “I ngɛ tue bue.”
18 Yo ɔ tsa nɔ ke: “Blema a, a deɔ ke, ‘Ha nɛ a ya bi ga womi ngɛ Abel, kɛkɛ ɔ, sane ɔ se po.’
19 I daa si ngɛ nihi nɛ a suɔ tue mi jɔmi nɛ a yeɔ anɔkuale ngɛ Israel ɔ a nane mi. O ngɛ hlae nɛ o kpata ma ko nɛ ngɛ kaa binyɛ ngɛ Israel ɔ hɛ mi. Mɛni he je nɛ e sa kaa o puɛ* Yehowa weto ní ɔ?”
20 Yoab he nɔ ke: “Kpaoo, i be nyɛe ma puɛ ma a, nɛ i be nyɛe ma kpata ma a hɛ mi.
21 Pi jã kulaa ji sane ɔ. Mohu ɔ, nyumu ko nɛ e je Efraim yoku ɔmɛ a nɔ nɛ́ a tsɛɛ lɛ ke Sheba, Bikri binyumu ɔ tsɔ Matsɛ David hɛ mi atuã.* Ke nyɛ ngɔ jamɛ a nyumu kake ɔ kɛ wo ye dɛ ɔ, ma je ma a he.” Kɛkɛ nɛ yo ɔ de Yoab ke: “Hyɛ! A maa fɔ e yi kɛ gu gbogbo ɔ nɔ kɛ mane mo!”
22 Oya nɔuu nɛ yo ní lelɔ ɔ ya ni ɔmɛ tsuo a ngɔ, nɛ a po Sheba, Bikri binyumu ɔ yi, nɛ a fɔ kɛ mane Yoab. Kɛkɛ nɛ Yoab kpã titimati ɔ, nɛ a gbɛ kɛ je ma a he, nɛ nɔ fɛɛ nɔ ho e we mi ya; nɛ Yoab kpale kɛ ho matsɛ ɔ ngɔ ya ngɛ Yerusalem.
23 Jamɛ a be ɔ mi ɔ, Yoab ji Israel tabo ɔ tsuo nya dalɔ; nɛ Benaya, Yehoyada binyumu ɔ ji Keret bi ɔmɛ kɛ Pelet bi ɔmɛ a nya dalɔ.
24 Nihi nɛ a nyɛɔ a nɔ kɛ tsuɔ ní tsumi kpakpataa a, a nya dalɔ ji Adoram; Yehoshafat, Ahilud binyumu ɔ ji sane ngmalɔ.
25 Sheva ji womi ngmalɔ; Zadok kɛ Abiatar ji osɔfohi.
26 Nɛ Ira, Yair no ɔ hu ba pee David sɔmɔlɔ* nɔkɔtɔma.
Sisi Ningmahi
^ Ngɛ Hebri gbi mi ɔ, “koli.”
^ Baiblo komɛ de ke “nɛ ho e bo tsu ɔmɛ a mi.”
^ Aloo “matsɛ we.”
^ Ngɛ Hebri gbi mi ɔ, “A ba.”
^ Ngɛ Hebri gbi mi ɔ, “mi.”
^ Ngɛ Hebri gbi mi ɔ, “wo e nine nɔ ngɛ Matsɛ David nɔ.”
^ Ngɛ Hebri gbi mi ɔ, “osɔfo.”
