5 Mose 33:1-29
33 Jehanɛ ɔ, jɔɔmi nɛ anɔkuale Mawu ɔ nɔmlɔ Mose jɔɔ Israel bi ɔmɛ loko e gbo ji nɛ ɔ nɛ.
2 E de ke:
“Yehowa je Sinai kɛ ba,Nɛ e kpɛ ngɛ a nɔ kɛ je Seir.
E kpɛ ngɛ hɛ mi nyami mi kɛ je Paran yoku ɔmɛ a nɔ,Nɛ bɔfohi* akpe nyɔngmahi abɔ piɛɛ e he,Nɛ e ta buli ɔmɛ ngɛ e hiɔ nɔ.
3 E suɔ e we bi ɔmɛ;A ni klɔuklɔu ɔmɛ tsuo ngɛ o dɛ mi.
A hii si ngɛ o nane nya;A bɔni o munyu ɔmɛ tue bumi.
4 (Mose ha wɔ kita ko, mlaa ko,Kaa Yakob we bi ɔmɛ* a weto ní.)
5 Nɛ e* ba pee matsɛ ngɛ Yeshurun*Benɛ ni ɔmɛ a nya dali ɔmɛ bua a he nya a,A kɛ Israel wɛtso ɔmɛ tsuo.
6 Reuben yi nɛ ná wami, nɛ́ e sisi nɛ ko gu,Nɛ nyumuhi nɛ a ngɛ e wɛtso ɔ mi ɔ a nɔ nɛ ko gbɔ.”
7 Nɛ e kɛ jɔɔmi nɛ ɔ jɔɔ Yuda:
“Oo Yehowa, moo bu Yuda gbi tue,Nɛ o ngɔ lɛ kɛ ba ha e we bi ɔmɛ.
E ngɔ e kɔnihi kɛ fã nɔ́ nɛ ji e nɔ́ ɔ he;*Moo ye bua lɛ konɛ e hwu kɛ si e he nyɛli.”
8 E de ngɛ Levi he ke:
“Nɔ nɛ yeɔ mo anɔkuale ɔ, e nɔ́ ji o* Tumim kɛ o Urim ɔ,Nɔ nɛ o ka lɛ ngɛ Masa a.
O kɛ lɛ bɔni pɛmi ngɛ Meriba nyu ɔ he.
9 Levi nyumu ɔmɛ de a tsɛmɛ kɛ a nyɛmɛ ke, ‘Wa li nyɛ.’
A nyɛminyumu ɔmɛ po a hyɛ we a hɛ mi,Nɛ a fĩ we mɛ nitsɛmɛ a binyumu ɔmɛ a se.
Ejakaa a kɛ o munyu ɔ tsu ní,Nɛ a ye o somi ɔ nɔ.
10 Á tsɔɔ Yakob o kojomi ɔmɛ,Nɛ́ a tsɔɔ Israel o Mlaa a.
Á sã tsopa kɛ e he via nɛ́ e je via liliili ha mo,*Nɛ́ a sã sami afɔle ɔ tsuo ngɛ o we afɔle sami la tɛ ɔ nɔ.
11 Oo Yehowa, moo jɔɔ lɛ nɛ e na he wami,Nɛ́ o bua nɛ jɔ e nine nya ní tsumi he.
Moo ku nihi nɛ a teɔ si kɛ woɔ lɛ ɔ a nane,*Konɛ nihi nɛ a nyɛɔ lɛ ɔ nɛ a ko te si hu.”
12 E de ngɛ Benyamin he ke:
“Yehowa nɛ́ ha nɛ nɔ nɛ e suɔ lɛ ɔ nɛ hi si slɔkee;Be mi nɛ e buɔ e he ngɛ ligbi ɔ mi tsuo,E maa hi e kuɛ nya.”
13 E de ngɛ Yosef he ke:
“Yehowa nɛ jɔɔ e zugba aKɛ hiɔwe ní kpakpahi,Kɛ bɔ́, kɛ nyu nɛ je nyu hɛngmɛ ɔmɛ a mi ɔ,
14 Kɛ ní kpakpahi nɛ pu ɔ haa nɛ a waa,Kɛ ní kpakpahi nɛ a kpaa daa nyɔhiɔ,
15 Kɛ blema yoku ɔmɛ* a nɔ ní kpakpahi pe kulaa,Kɛ kponguhi nɛ a ngɛ daa a nɔ ní kpakpahi,
16 Kɛ zugba a nɔ ní kpakpa amɛ, kɛ níhi tsuo nɛ ngɛ nɔ ɔ,Nɛ́ e ná nɔ nɛ je e he kpo ngɛ mio tso ɔ mi ɔ dɛ mi jɔɔmi.
Á ba pue Yosef yi mi,Nɔ nɛ a je lɛ ngɛ e nyɛminyumu ɔmɛ a kpɛti ɔ yi kpɛti.
17 E hɛ mi nyami ɔ ngɛ kaa na ku nɛ a fɔ kekleekle hɛ mi nyami,Nɛ e koli ɔmɛ ngɛ kaa nga mi na ku kolihi.
E kɛ ma tsitsɛɛ* nihi,E kɛ ma tsitsɛɛ mɛ tsuo kɛ ya zugba a nyagbe he ɔmɛ.
A ji Efraim we akpe nyɔngmahi,Nɛ a ji Manase we akpehi.”
18 E de ngɛ Zebulun he ke:
“Oo Zebulun, mo nya ngɛ o kpo jemi mi,Nɛ mo Isakar, mo nya ngɛ o bo tsu ɔmɛ a mi.
19 A ma tsɛ nihi kɛ ya yoku ɔ nɔ.
A maa sã dami afɔlehi ngɛ lejɛ ɔ.
Ejakaa a maa ye wo ɔ mi ní babauu ɔKɛ zu ɔ mi junehi nɛ a kɛ laa a eko.”
20 E de ngɛ Gad he ke:
“Á jɔɔ nɔ nɛ ngɛ Gad huzu ɔmɛ a mi blie ɔ.
E buu si ngɛ lejɛ ɔ kaa jata,E pee klaalo kaa e ma tsɔ e he nyɛlɔ ɔ kɔni kɛ e yi.
21 E maa hla kekleekle blɔ fa mi nɔ́ ɔ kɛ ha e he,Ejakaa lɔ ɔ ji e blɔ fa mi nɔ́ nɛ mlaa wolɔ ɔ kɛ ha lɛ.
Ni ɔmɛ a nya dali ɔmɛ ma bua a he nya.
E kɛ Yehowa dami ɔKɛ e kojomi ɔmɛ ma tsu ní ha Israel.”
22 E de ngɛ Dan he ke:
“Dan ji jata bi.
E maa tu kɛ je Bashan.”
23 E de ngɛ Naftali he ke:
“Yehowa dloomi hyɛ ha Naftali,Nɛ e jɔɔmi ɔ hyi lɛ tɔ.
Moo ngɔ pusinɔ he kɛ woyi je.”
24 E de ngɛ Asher he ke:
“Á kɛ binyumuhi jɔɔ Asher,
E nyɛminyumu ɔmɛ nɛ a na lɛ mɔbɔ,Nɛ́ e ngɔ e nane kɛ ma* nu mi.
25 Dade kɛ akɔblee ji o we agbo se lami níhi,Nɛ o maa hi slɔkee o ligbi ɔmɛ tsuo.*
26 Nɔ ko be nɛ e ngɛ kaa Yeshurun anɔkuale Mawu ɔ,Nɔ nɛ teɔ ngɛ kɔɔhiɔ mi kɛ yeɔ bua mo ɔ,Nɛ́ e hiɔ bɔku ɔmɛ a nɔ ngɛ e we agboje ɔ mi ɔ.
27 Mawu ji wesa he kɛ je blema lokoo,E kɔnihi nɛ a ngɛ kɛ yaa neneene ɔ maa pɛtɛ o he kɛ ya daa.
Nɛ e maa fiee he nyɛlɔ ɔ kɛ je o hɛ mi,Nɛ e ma de ke, ‘Kpataa a hɛ mi!’
28 Israel maa hi si slɔkee,Nɛ Yakob nyu hɛngmɛ ɔ ma tsɔ e he baneeNgɛ zugba nɛ ngma kɛ wai ehe ngɛ nɔ ɔ nɔ,Zugba nɛ bɔ́ nɛɛ kɛ jeɔ bɔku ɔmɛ a mi ɔ.
29 Oo Israel, o ngɛ bua jɔmi!
Mɛnɔ nɛ ngɛ kaa mo?Ma nɛ Yehowa he a yi wami,O he piɛ pomi tsɛ̃iKɛ o klaate nɛ je agbo ɔ,
O he nyɛli ɔmɛ a he maa do blibliibli ngɛ o hɛ mi,Nɛ o maa naa a se mi.”*
Sisi Ningmahi
^ Aloo “Nɛ ni klɔuklɔuhi.”
^ Ngɛ Hebri gbi mi ɔ, “Yakob asafo ɔ.”
^ Nɛ ji Mawu.
^ E sisi ji “Nɔ Nɛ Da.” E ji hɛ mi nyami womi biɛ nɛ a kɛ tsɛɛ Israel.
^ Aloo “E kɔnihi hwu kɛ ha nɔ́ nɛ ji e nɔ́ ɔ.”
^ Munyungu nɛ ji “O” nɛ a kɛ tsu ní ngɛ fã nɛ ɔ mi ɔ daa si kɛ ha Mawu.
^ Ngɛ Hebri gbi mi ɔ, “ngɛ o gugwɔ mi.”
^ Aloo “a gbongu.”
^ Baiblo komɛ de ke “puje he yoku ɔmɛ.”
^ Aloo “si.”
^ Aloo “e du e nane he ngɛ.”
^ Ngɛ Hebri gbi mi ɔ, “Nɛ o he wami ɔ maa pee kaa o ligbi ɔmɛ.”
^ Baiblo komɛ de ke “a hehi nɛ ya hiɔwe ɔ nɔ.”
