Abɛ 1:1-33
1 David binyumu Salomo, nɛ ji Israel matsɛ ɔ abɛhi ji nɛ ɔmɛ nɛ:
2 Abɛ nɛ ɔmɛ haa nɛ nɔ náa* juɛmi, nɛ e tsɔseɔ nɔ;E haa nɛ nɔ nuɔ juɛmi munyuhi a sisi;
3 Abɛ nɛ ɔmɛ tsɔseɔ nɔ konɛ e kɔ nɔ́ se,Nɛ́ e le nɔ́ nɛ da, e mwɔ yi kpɔ nɛ da,* nɛ e pee nɔ́ nɛ da;
4 Abɛ nɛ ɔmɛ haa nɛ nihi nɛ a be níhi a si kpami ɔ leɔ ní;E haa niheyo nile nɛ e nyɛɔ susuɔ nɔ́ he saminya.
5 Juɛmitsɛ buɔ tue nɛ e kaseɔ níhi fuu;Nɔ nɛ nuɔ nɔ́ sisi ɔ náa blɔ tsɔɔmi kpakpa,*
6 Konɛ e nu abɛ kɛ munyu nɛ mi wa* sisi,Juɛmitsɛmɛ a munyuhi kɛ a we ajohi a sisi.
7 Yehowa gbeye yemi* ji nile sisije.
Kuasiahi pɛ lɛ a gbeɔ juɛmi kɛ tsɔsemi he guɛ.
8 Ye bi, moo bu o tsɛ tsɔsemi tue,Nɛ ko kua o nyɛ blɔ tsɔɔmi.*
9 A ji jlasi nɛ ngɛ fɛu kɛ ha o yiKɛ june saminyayoo kɛ ha o kuɛ.
10 Ye bi, ke yayami peeli ngɛ hlae nɛ a sisi mo ɔ, koo nyɛɛ a se.
11 Ke a de mo ke: “Ba nɛ waa ho.
Ha nɛ wa ya wo ka nɛ wa pue muɔ si.
Wa ma ya laa, nɛ wa maa mlɛ konɛ wa nine nɛ su nihi nɛ a pee we nɔ́ ko ɔ a nɔ.
12 Wa maa mii mɛ hɛ ngmengmle kaa bɔ nɛ Yɔkɔ* miɔ nɔ ɔ,Wa maa mii mɛ kulaa kaa nihi nɛ a pu mɛ.
13 Ha nɛ wa kpɔ̃ a níhi nɛ a he jua wa a tsuo ngɛ a dɛ;Wa ma ha nɛ wa we ɔmɛ a mi ma hyi tɔ kɛ níhi nɛ wa ha.
14 Ba piɛɛ wa he,*Nɛ wɔ tsuo wa ma gba nɔ́ nɛ wa ma ya ju ɔ fiee.”*
15 Ye bi, koo nyɛɛ a se.
O nane nɛ ko ma a blɔ ɔ nɔ,
16 Ejakaa a tuɔ fo* kɛ ya peeɔ yayami;A he sɔɔ kɛ pueɔ muɔ si.
17 Ke lohwe pɛlitsɛ ngɛ mo hyɛe be mi nɛ o ngɛ lɛ ya woe ɔ, lɛɛ o tsu yaka ní tsumi.
18 Lɔ ɔ he je nɛ nimli nɛ ɔmɛ woɔ ka konɛ a kɛ pue muɔ si ɔ nɛ;A laa a he konɛ a gbe ni kpahi.*
19 Nihi nɛ a guɔ sisimi blɔ nɔ kɛ náa ní ɔ, bɔ nɛ a peeɔ a ní ha ji nɛ ɔ nɛ,Nɛ ní nɛ a náa a nɔuu lɛ maa gbe mɛ.*
20 Juɛmi nitsɛnitsɛ* ngɛ ngmlaa kpae boboobo ngɛ gbɛjegbɛ nɔ.
E yaa nɔ nɛ e woɔ e gbi nɔ ngɛ he nya buami he ɔmɛ.
21 E kpaa ngmlaa ngɛ gbɛjegbɛhi nɛ nihi fuu beɔ ngɛ nɔ ɔ a kɔnya.*
E deɔ ngɛ ma agbo ɔmɛ a nya ke:
22 “Nyɛ nihi nɛ nyɛ be níhi a si kpami, kɛ yaa si mɛni be nɛ nyɛ maa suɔ jokuɛwi a ní peemi?*
Nyɛ nihi a he fɛu yeli, kɛ yaa si mɛni be nɛ nyɛ bua maa jɔ he fɛu yemi he?
Nɛ nyɛ kuasiahi, kɛ yaa si mɛni be nɛ nyɛ maa hiɔ nile?
23 Ke i kã nyɛ hɛ mi ɔ, nyɛɛ bu tue.*
Kɛkɛ ɔ, ma ha nyɛ ye mumi ɔ;Ma ha nɛ nyɛ maa le ye munyu ɔmɛ.
24 Ejakaa i kpa ngmlaa kɛ tsɛ nyɛ si abɔ, se nyɛ pui mi,I kpa ye nine mi, se nɔ ko pui ye nya mi,
25 Nyɛ ya nɔ nɛ nyɛ kua ga tsuo nɛ i wo nyɛ ɔ,Nɛ nyɛ kplɛɛ we nyɛ hɛ mi nɛ i kã a nɔ.
26 Ke haomi ba nyɛ nɔ ɔ, imi hu ma muɔ nyɛ;Ke nɔ́ nɛ nyɛ ngɛ he gbeye yee ɔ ba a, ma ye nyɛ he fɛu,
27 Ke nɔ́ nɛ nyɛ ngɛ he gbeye yee ɔ ba kaa kɔɔhiɔ nɛ nya wa,Nɛ nyɛ haomi ɔ ba kaa ahumi,Ke haomi kɛ amanehlu ba nyɛ nɔ ɔ, ma ye nyɛ he fɛu.
28 Jamɛ a be ɔ mi ɔ, a maa ya nɔ nɛ a ma tsɛ mi, se i be nɔ hee;A kɛ hɛdɔ ma hla mi, se a be mi nae,
29 Ejakaa a hiɔ nile,Nɛ a kua ke a be Yehowa gbeye yee.
30 A kua ga nɛ i wo mɛ ɔ;A bui a hɛ mi nɛ i kã a tsuo.
31 Lɔ ɔ he ɔ, a maa na blɔ nɛ a wo ɔ mi nɔ́,*Nɛ mɛ nitsɛmɛ a ga tsɔmi* ɔmɛ tsuo ma kpa bu a yi.
32 Ejakaa blɔ yaya nɛ nihi nɛ a be níhi a si kpami ɔ wo ɔ maa gbe mɛ,Nɛ kuasiahi a he nɛ a heɔ yeɔ ɔ ma kpata a hɛ mi.
33 Se nɔ nɛ buɔ mi tue ɔ maa hi si slɔkee,Nɛ e be gbeye yee kaa haomi ko maa ba e nɔ.”
Sisi Ningmahi
^ Ngɛ Hebri gbi mi ɔ, “ma ha nɛ nɔ nɛ le.”
^ Aloo “e ye dami sane.”
^ Aloo “náa blɔ tsɔɔmi nɛ nile ngɛ mi.”
^ Aloo “nɔ́ he tomi nɔ́.”
^ Aloo “Bumi nɛ a ma ná ha Yehowa a.”
^ Aloo “o nyɛ mlaa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “Nɛ wɔ tsuo wa maa hɛɛ baagi kake.”
^ Aloo “Moo fɔ o sɔ ɔ kɛ piɛɛ wa nɔ́ ɔ he.”
^ Ngɛ Hebri gbi mi ɔ, “A nane tuɔ fo.”
^ Aloo “a ngɔ ni kpahi a klaa.”
^ Aloo “maa ngɔ a klaa.”
^ Nɛ ji juɛmi nɛ je Mawu ngɔ.
^ Ngɛ Hebri gbi mi ɔ, “a yi.”
^ Ngɛ Hebri gbi mi ɔ, “nyɛ maa suɔ níhi a si kpami nɛ nyɛ be ɔ.”
^ Aloo “Ke i kã nyɛ hɛ mi ɔ, nyɛɛ kpale nyɛ se.”
^ Ngɛ Hebri gbi mi ɔ, “a maa ye blɔ nɛ a wo ɔ mi yiblii.”
^ Aloo “yi mi tomi.”
