Abɛ 27:1-27
27 Koo fĩa kɛ fɔ hwɔɔ nɔ,Ejakaa o li nɔ́ nɛ ligbi fɛɛ ligbi kɛ maa ba.*
2 Ha nɛ nɔ kpa* nɛ je o yi, se pi mo nitsɛ o nya;Ni kpahi,* se pi mo nitsɛ.
3 Tɛ jiɔ, nɛ zia* hu mi jiɔ,Se abofu nɛ kuasia woɔ nɔ ɔ jiɔ pe ní enyɔ nɛ ɔmɛ tsuo.
4 Abofu yi mi wa, nɛ mi mi fumi puɛɔ ní kaa nyu kpekpemi,Se mɛnɔ ma nyɛ maa da hunga jemi nya?
5 Nɔ hɛ mi kami ngɛ magbɛ nɔ ɔ hi pe suɔmi nɛ a kɛ laa.
6 Ke huɛ plaa nɔ ɔ, anɔkuale yemi mi lɛ e je kɛ pee jã,Se he nyɛlɔ fĩɔɔ nɔ nya he babauu.*
7 Nɔ* nɛ e tɔ ɔ, ke a ha lɛ hwo nɛ je hwo gbaku mi po e ma kua,*Se nɔ* nɛ hwɔ ngɛ lɛ yee ɔ, nɔ́ nɛ dooɔ po ngɔɔ ha lɛ.
8 Kaa bɔ nɛ lohwe pɛlitsɛ nɛ e jeɔ* e tsu he ngɛ ɔ,Jã nɛ adesa nɛ e jeɔ e we mi nɛ e ya hii kpae ɔ hu ngɛ.
9 Nu kɛ tsopa kɛ e he via haa nɛ nɔ tsui nyaa;Jã kɛ̃ nɛ ke huɛ je e tsui mi kɛ wo mo ga a,* e haa nɛ huɛ bɔmi ɔ ngɔɔ.
10 Ko kua o huɛ aloo o tsɛ huɛ,Nɛ koo ya mo nitsɛ o nyɛmi we mi ngɛ o haomi ligbi nɔ;Nɔ nɛ ngɛ o kasa nya a hi pe o nyɛmi nɛ ngɛ tsitsaa lokoo.
11 Ye bi, moo pee o he ní lelɔ nɛ o ha nɛ ye tsui nɛ nya,Konɛ ma nyɛ ma ha nɔ nɛ ngɛ mi ahlua bɔe ɔ heto.
12 Nɔ nɛ e hɛ mi tɛ ɔ naa haomi nɛ ma, nɛ e laa e he,Se nɔ nɛ be níhi a si kpami ɔ kɛ lɛ ya kpeɔ, nɛ e naa mi nɔ́.
13 Ke nɔ ko da nubwɔ ko se ɔ, ngɔɔ e tade ngɛ e dɛ;Ke ma se yo* ko se lɛ e da a, kpɔ̃ nɔ́ nɛ e kɛ da e se ɔ ngɛ e dɛ.
14 Ke nɔ ko kpa ngmlaa kɛ jɔɔ e nyɛmi nɔmlɔ mɔtu mla a,A maa bu lɛ kaa e ngɛ nɔ ɔ gbiɛe.
15 Yogbayo nɛ e suɔ pɛ* ngɛ kaa tsu nɛ e dungɔɔ* be fɛɛ be nɛ hiɔmi maa nɛ.
16 Nɔ fɛɛ nɔ nɛ ma nyɛ maa tsi jamɛ a yo ɔ nya a ma nyɛ maa tsi kɔɔhiɔ nya,Nɛ e ma nyɛ maa ngɔ e hiɔ nine kɛ pɛtɛ nu he.
17 Kaa bɔ nɛ dade duɔɔ dade nya a,Jã nɛ adesa hu duɔɔ e huɛ nya.*
18 Nɔ nɛ hyɛɛ fig tso nɔ ɔ maa ye e nɔ yiblii,Nɛ sɔmɔlɔ nɛ hyɛɛ e nyɔmtsɛ nɔ ɔ, a maa wo e hɛ mi nyami.
19 Kaa bɔ nɛ nɔ naa e hɛ mi ngɛ nyu mi ɔ,Jã nɛ adesa naa e tsui ngɛ nɔ kpa tsui mi.
20 Yɔkɔ* kɛ hɛ mi kpatami muɔ ɔ* tɔɛ gblegbleegble,Jã kɛ̃ nɛ adesa hɛngmɛ hu tɔɛ gblegbleegble.
21 Kaa bɔ nɛ nɔ́ he tsumi buɛ ngɛ kɛ ha sika hiɔ, nɛ flɔɔnɔɔ ngɛ kɛ ha sika tsu ɔ,Jã kɛ̃ nɛ ke a je nɔ ko yi ɔ, e kaa lɛ.*
22 Ke o kɛ tso mi bi gbee* kuasiaKaa ngma nɛ a gbee ngɛ tso mi po,E kuasia jemi ɔ be e he jee.
23 E sa nɛ o le bɔ nɛ o to kuu ɔ ngɛ ha saminya.
Hyɛ o jijɔ ɔmɛ a nɔ* saminya,
24 Ejakaa ní nami hí si kɛ yɛ daa,Nɛ matsɛ pɛɛ* hu hí si yi nɔhi tsuo.
25 Nga mumu laa, nɛ nga ehe jeɔ kpo,Nɛ a buaa nga nɛ ngɛ yoku ɔmɛ a nɔ ɔ nya kɛ baa.
26 Agbosu wawi ɔmɛ a he bwɔmi haa mo heha nɔ́,Nɛ akpakpo ɔmɛ lɛ o kɛ woɔ zugba he hiɔ.
27 Nɛ o ma ná apletsi nyɔ nyu nɛ hiɛ bɔ nɛ maa su mo,Nɛ́ e maa su o we ɔ, nɛ́ e maa baa o mawayi ɔmɛ a yi.
Sisi Ningmahi
^ Ngɛ Hebri gbi mi ɔ, “nɔ́ nɛ ligbi ko ma fɔ.”
^ Ngɛ Hebri gbi mi ɔ, “nubwɔ.”
^ Ngɛ Hebri gbi mi ɔ, “Ma se no.”
^ Aloo “kewu.”
^ Baiblo komɛ de ke, “Se ja a nyɛ he nyɛlɔ nɔ loko e fiɔɔ nɔ nya he.”
^ Aloo “Klaa.”
^ Ngɛ Hebri gbi mi ɔ, “e maa naa nɔ.”
^ Aloo “klaa.”
^ Aloo “nɛ ngɛ fo tue kɛ je.”
^ Aloo “Jã kɛ̃ nɛ ke klaa wo mo ga a.”
^ Aloo “ma se no.”
^ Aloo “Yogbayo nɛ tuɔ níhi a he munyu nyanyaanya.”
^ Aloo “tsu nɛ e ngɛ nɛɛe.”
^ Ngɛ Hebri gbi mi ɔ, “duɔɔ e huɛ hɛ mi.”
^ Aloo “Sheol.” Hyɛ Munyu Komɛ A Sisi Tsɔɔmi.
^ Aloo “Abadon.” Hyɛ Munyu Komɛ A Sisi Tsɔɔmi.
^ Aloo “Jã kɛ̃ nɛ adesa yi nɛ a jeɔ ɔ nɛ a kɛ naa bɔ nɛ e ngɛ ha.”
^ Aloo “tso nya bi si.”
^ Aloo “Ha nɛ o jijɔ ɔmɛ nɛ a hi o tsui nɔ; O hɛ nɛ hi o jijɔ ɔmɛ a he.”
^ Aloo “jlasi.”
