Abɛ 29:1-27
29 Adesa nɛ a kã e hɛ mi si abɔ, se loloolo ɔ, e kuɛ wa a,*A maa ku lɛ tlukaa nɛ e be hie tsami.
2 Ke dali a he hiɛ ɔ, nihi nyaa,Se ke yiwutsotsɛ ngɛ tsɛ yee ɔ, nihi kɛmɛɔ.
3 Nɔ nɛ e suɔ juɛmi ɔ haa nɛ e tsɛ nyaa,Se nɔ nɛ e kɛ tuutuu poli bɔɔ ɔ kpataa e níhi a hɛ mi.
4 Matsɛ nɛ yeɔ dami sane ɔ haa nɛ ma yaa nɔ,Se nɔ nɛ e hlaa nyɔ mi ní ɔ kpataa ma hɛ mi.
5 Nɔ nɛ gbeɔ e nyɛmi nɔmlɔ yi mi ɔ,E ngɛ e nyɛmi ɔ nane ya woe.
6 Nɔmlɔ yayami ɔ, e tɔmi tsɔɔ lɛ klama,Se dalɔ hwɔɔ lele kɛ bua jɔmi nɛ e nyaa.
7 Dalɔ susuɔ he blɔhi nɛ ohiatsɛmɛ ngɛ ngɛ mlaa nya a he,Se yiwutsotsɛ lɛɛ, pi e kɔmɔ ji lɔ ɔ.
8 Fĩali ngɛ kaa nihi nɛ a mɛɛ ma* he la,Se nihi nɛ a ngɛ juɛmi ɔ gbeɔ abofu nya la.
9 Ke juɛmitsɛ kɛ kuasia ná sane ɔ,Ngmlaa kɛ he fɛu yemi lɛ baa, se nɔ́ kpakpa ko ji mi kɛ bɛ.
10 Muɔ si pueli nyɛɔ nɔ fɛɛ nɔ nɛ sane ko be e he,*Nɛ a hlaa kaa a maa ngɔ dali a wami.*
11 Kuasia jeɔ e we abofu* tsuo kpo,Se juɛmitsɛ peeɔ dii nɛ e yeɔ e he nɔ.
12 Ke nɔ yelɔ buɔ lakpa munyuhi tue ɔ,E sɔmɔli tsuo maa pee yiwutsotsɛmɛ.
13 Ohiatsɛ kɛ yi mi walɔ sɔ ngɛ blɔ nɛ ɔ nɔ:
Yehowa lɛ haa nɛ mɛ ni enyɔ ɔmɛ tsuo a hɛngmɛ naa la.*
14 Ke matsɛ kojoɔ ohiatsɛmɛ ngɛ dami mi ɔ,E matsɛ sɛ ɔ maa ma si kpɛii be fɛɛ be.
15 Kpa* kɛ hɛ mi kami haa nɔ juɛmi,Se jokuɛ nɛ a ngmɛɛ e je mi he ha lɛ ɔ pueɔ e nyɛ hɛ mi si.
16 Ke yiwutsotsɛmɛ a he hiɛ ɔ, tɔmi hiɛɛ,Se dali maa na a hɛ mi kpatami ɔ.
17 Tsɔse o bi, nɛ e ma ha nɛ o ma ná he jɔmi;Nɛ e ma ha nɛ o* bua maa jɔ wawɛɛ nitsɛ.
18 He nɛ Mawu blɔ tsɔɔmi* be ɔ, nihi peeɔ a tsui nya ní,Se nihi nɛ a yeɔ mlaa nɔ ɔ ngɛ bua jɔmi.
19 A kɛ munyuhi kɛkɛ tsɔse we sɔmɔlɔ,Ejakaa e nuɔ sisi mohu lɛɛ, se e yi nɔ.
20 Anɛ o na nɔ ko nɛ e yeɔ oya kɛ tuɔ munyu lo?
Hɛ kɛ nɔ fɔmi babauu ngɛ kɛ ha kuasia po pe lɛ.
21 Ke a pua sɔmɔlɔ ko kɛ je e jokuɛwi a si ɔ,Pee se ɔ, e ba peeɔ nɔ nɛ li sina.
22 Adesa nɛ e mi mi fuɔ mlamlaamla a tleɔ pɛ si;Nɔ fɛɛ nɔ nɛ e tsui gbaa e nya a tɔ̃ɔ babauu.
23 Adesa nitsɛ he nɔ womi ji nɔ́ nɛ maa ba lɛ si,Se nɔ fɛɛ nɔ nɛ baa e he si ɔ,* a maa wo e hɛ mi nyami.
24 Nɔ nɛ e kɛ julɔ bɔɔ ɔ sume lɛ nitsɛ e he.*
E maa nu nɛ a ngɛ tsɛe ke a ba ye odase,* se e be nɔ́ ko dee.
25 Adesa hɛ mi gbeye yemi* ji klama,*Se nɔ nɛ ngɔɔ e hɛ kɛ fɔɔ Yehowa nɔ ɔ ma ná he piɛ pomi.
26 Nihi fuu suɔ nɛ nɔ yelɔ nɛ bu mɛ tue,*Se Yehowa ji nɔ nɛ yeɔ dami sane ha adesa.
27 Dalɔ hiee nɔ nɛ e yi dami sane,Se yiwutsotsɛ hiee nɔ nɛ e blɔ da.
Sisi Ningmahi
^ Aloo “e tue mi ti ɔ.”
^ Aloo “tsɔɔ ma.”
^ Aloo “nɛ piami ko be e he.”
^ Aloo “klaa.” Baiblo komɛ de ke, “Se dalɔ hlaa kaa e maa po e wami he piɛ.”
^ Aloo “e he numihi.” Ngɛ Hebri gbi mi ɔ, “e mumi.”
^ Nɛ tsɔɔ kaa lɛ nɛ e haa mɛ wami.
^ Aloo “Tsɔsemi; Tue gblami.”
^ Aloo “o klaa.”
^ Aloo “kpo jemi.”
^ Ngɛ Hebri gbi mi ɔ, “baa e he si ngɛ mumi mi ɔ.”
^ Aloo “nyɛɔ lɛ nitsɛ e klaa.”
^ Aloo “E maa nu kita kami nɛ gbiɛmi piɛɛ he.”
^ Aloo “He domi blibliibli ngɛ adesa hɛ mi ɔ.”
^ Aloo “tsɔɔ nɔ klama.”
^ Baiblo komɛ de ke, “suɔ nɛ a hɛ mi nɛ ba nyami ngɛ nɔ yelɔ hɛ mi.” Ngɛ Hebri gbi mi ɔ, “hlaa nɔ yelɔ hɛ mi.”
