Abɛ 30:1-33
30 Sɛ gbi nɛ mi jiɔ nɛ ngɛ munyuhi nɛ Yake binyumu Agur tu kɛ tsɔɔ Itiel ɔ mi ji nɛ ɔ nɛ; e tu kɛ tsɔɔ Itiel kɛ Ukal.
2 Imi lɛ i li ní pe nɔ fɛɛ nɔ,Nɛ i be nɔ́ sisi numi nɛ e sa kaa adesa nɛ ná a eko.
3 I kase we nile,Nɛ i be Nɔ Klɔuklɔu Pe Kulaa a nile ɔ eko.
4 Mɛnɔ kuɔ kɛ ya hiɔwe nɛ lɔ ɔ se ɔ, e kple kɛ ba?
Mɛnɔ bua kɔɔhiɔ nya kɛ wo e dɛ enyɔ ɔmɛ a mi?
Mɛnɔ buɛtɛ nyu ɔmɛ ngɛ e tade mi?
Mɛnɔ to zugba a nyagbe he ɔmɛ tsuo sisi?*
Ke o le ɔ, kɛ a tsɛɛ lɛ kɛɛ, nɛ e binyumu ɔ hu kɛ a tsɛ lɛ kɛɛ?
5 Munyu fɛɛ munyu nɛ Mawu tuɔ ɔ, e he tsɔ.*
E ji tsɛ̃i kɛ ha nihi nɛ a saa we ngɛ e ngɔ ɔ.
6 Koo ngɔ nɔ́ ko kɛ piɛɛ e munyu ɔmɛ a he,Ke pi jã a, e ma kã o hɛ mi,Nɛ a maa bu mo lakpatsɛ.
7 Níhi enyɔ lɛ i ngɛ bie ngɛ o dɛ.
Ko ha nɛ jamɛ a ní ɔmɛ nɛ a bɔ mi loko ma gbo.
8 Mo je níhi nɛ a pi anɔkuale kɛ lakpa kɛ je ye he kɛ ya se lokoo.
Ko ha nɛ ma ye ohia nɛ ko ha nɛ ma ná ní hulɔ.
Niye ní nɛ maa su mi ɔ, lɔ ɔ pɛ nɛ o ha mi,
9 Konɛ ma ko ba tɔ, nɛ́ ma kua mo, nɛ́ ma de ke, “Mɛnɔ ji Yehowa?”
Loo ma ye ohia nɛ ma ya ju kɛ pue ye Mawu ɔ biɛ ɔ hɛ mi si.*
10 Koo gbe sɔmɔlɔ he guɛ kɛ ha e nyɔmtsɛ,Ke pi jã a, e maa gbiɛ mo nɛ o maa ye fɔ.
11 Yi nɔ ko ngɛ nɛ e gbiɛɔ e tsɛNɛ e jɔɔ we e nyɛ.
12 Yi nɔ ko ngɛ nɛ e buu lɛ nitsɛ e he kaa e he tsɔ,Se a fɔ we e he mu* ɔ ngɛ e he.
13 Yi nɔ ko ngɛ nɛ e woɔ e he nɔ wawɛɛ,E hɛngmɛ woɔ e he nɔ nitsɛnitsɛ!
14 Yi nɔ ko ngɛ nɛ e lunguhi ngɛ kaa klaatehi,Nɛ e tsitsahi ngɛ kaa nɔ gbemi hahi;A miɔ nihi nɛ a ní ngɛ mɔbɔ ngɛ zugba a nɔ,Nɛ a miɔ ohiatsɛmɛ ngɛ adesahi a kpɛti.
15 Zugba tslɔɔ* ngɛ biyihi enyɔ nɛ a kpaa ngmlaa ke, “Ha mi! Ha mi!”
Ní etɛ komɛ ngɛ nɛ a tɔɛ,Ní eywiɛ komɛ ngɛ nɛ a de we gblee ke, “E hiɛ!”
16 —Yɔkɔ* kɛ fɔmi kotoku nɛ fɔ we,Zugba nɛ e nɛ nyu,Kɛ la nɛ e de we gblee ke, “E hiɛ!”
17 Hɛngmɛ nɛ yeɔ e tsɛ he fɛu, nɛ e gbeɔ e nyɛ he guɛ ɔDɔgba* mi kuakualabitehi ma ta,Nɛ kɔle bimɛ maa ye.
18 Ní etɛ komɛ ngɛ nɛ ye juɛmi kpi a he,*Nɛ ní eywiɛ komɛ ngɛ nɛ i nui a sisi:
19 Kɔle blɔ ngɛ́ hiɔwe,Sinɔ blɔ ngɛ́ tɛ sa nɔ,Mele blɔ ngɛ́ wo nɔ,Kɛ nyumu blɔ ngɛ́ yiheyo he.
20 Yo gba puɛlɔ blɔ ji nɛ ɔ nɛ:
E yeɔ ní, nɛ e tsuɔ e nya he;Lɔ ɔ se ɔ, e deɔ ke, “I pee we nɔ́ yayami ko.”
21 Ní etɛ komɛ ngɛ nɛ a haa nɛ zugba a mimiɛɛɔ,Nɛ ní eywiɛ komɛ ngɛ nɛ zugba a nyɛ we a nya dami:
22 Ke nyɔguɛ ngɛ matsɛ yee,Ke kuasia ye ní kɛ be nɔ,
23 Ke yo nɛ a nyɛ* lɛ ba pee yogbayo,Kɛ jehanɛ ɔ se hu ke mawayo ngɔ e nyɔmtsɛ yo blɔ he.*
24 Ní eywiɛ komɛ ngɛ zugba a nɔ nɛ a piɛɛ níhi nɛ a klee we pe kulaa a he,Se a ngɛ juɛmi ngɛ a bɔ su nya:*
25 Tatuhi ji adebɔ níhi nɛ a he wɛ,*Se kɛ̃ ɔ, a toɔ a niye ní he blɔ nya ngɛ mawulɛ be mi.
26 Tɛ sa nɔ kpihi ji adebɔ níhi nɛ a be he wami tsɔ,Se kɛ̃ ɔ, a peeɔ a tsu ngɛ tɛ sahi a mi.
27 Baalɛhi be matsɛ,Se kɛ̃ ɔ, mɛ tsuo a yaa a hɛ mi ngɛ blɔ nya tomi nya.*
28 Tsunyɛ* ngɔɔ e nanehi kɛ mɛtɛɔ níhi a he,Nɛ e yaa matsɛ we mi.
29 Ní etɛ komɛ ngɛ nɛ a nane hiami ngɛ fɛu,Ní eywiɛ komɛ ngɛ nɛ a nyɛɛmi ngɛ fɛu:
30 Jata; e ji lohwe nɛ ngɛ he wami pe kulaa ngɛ lohwehi a kpɛti,Nɛ e tui nɔ ko nya fo;
31 Gbe;* akpakpo;Kɛ matsɛ nɛ e tabo piɛɛ e he.
32 Ke o je kuasia nɛ o ya wo o he nɔ,Aloo ke o to kaa o maa pee jã a,Ngɔɔ o nine kɛ bu o nya he.
33 Ejakaa kaa bɔ nɛ ke a klɛ nyɔ nyu mi hluu nɛ e peeɔ bɔta,Nɛ ke a mia gugwɔ nɛ muɔ baa a,Jã kɛ̃ nɛ ke a wo nɔ ko mi mi la a, pɛ baa.
Sisi Ningmahi
^ Ngɛ Hebri gbi mi ɔ, “Mɛnɔ wó zugba a nyagbe he ɔmɛ tsuo nɔ.”
^ Ngɛ Hebri gbi mi ɔ, “a tsu he.”
^ Aloo “nɛ́ ma tɔ̃ ye Mawu ɔ biɛ ɔ nɔ.”
^ Ngɛ Hebri gbi mi ɔ, “fĩ.”
^ Ngɛ Blɛfo gbi mi ɔ, a tsɛɛ lɛ ke leeches.
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “Dɔ.”
^ Aloo “nɛ a peeɔ mi nyakpɛ wawɛɛ.”
^ Aloo “a sume.”
^ Aloo “mawayo kpɔ̃ e nyɔmtsɛ yo blɔ he ngɛ e dɛ.”
^ Aloo “juɛmi saminya.”
^ Ngɛ Hebri gbi mi ɔ, “ji nihi nɛ a he wɛ.”
^ Aloo “a gbaa kɛ woɔ kuuhi a mi.”
^ Aloo “Gli he nyɛɛlɔ; tsutsɛ.”
^ Gbe he nɔ ko nɛ a tsɛɛ lɛ ngɛ Blɛfo gbi mi ke greyhound.
